Misual zinga a nawi pawl ni anga kan ngaihte pawh hi, FB group hrang hrangah han hmuh hian, puitling tak tak vek hi kan lo nia. Chuvangin buhhawp ringawt ring tawh lovin, tlema chawrum deuh hlek inbarh han tum tan ta ila. Vawiin atan chuan Thlarau lam Indona(Spiritual Warfare) lam zirho i han tum ta teh ang. Keima ngaihdan sawihluah lovin, Bible chang hrang hrang mithiam ten an lo lakkhawm sa ka han tarlang mai ang e.
Khawvel Chanchinthar han ngaithla ila, Indo leh Indo thuthang hriat tur a tam khawp mai. Amaherawhchu, Thlarau lam Indona chu he khawvel Indona ang hi ani ve lo va, Kan Hmelma ber pawh Mihring ni lovin, mita kan hmuh theih loh Setana, Pathian hawisan tur leh thilsual tih hi nawm leh that hmel taka lantir a, min thlem heuh heuh thintu hi a ni. Chuvang chuan Thlarau lam Ralthuam kan chelek a ngai a, kan hria emaw hrelo emaw, Ringtute hi englai pawhin He Thlarau lam Indonaah hian kan tel reng thin a ni.
Enge ni Thlarau lam Indona chu?
1. Kan Hmelma nena Indona a ni.
“Ngaihven ula, fimkhur rawh u; in khingpui Diabola chu Sakeibaknei rum thin angin a ei theih tur zawngin a phi ruai thin; in unau khawvela awmhote chungah chuan chutiang tuarna chu a thleng ve a ni tih hriain, ring nghet taka awmin amah chu do rawh u. ( I Petera 5:8-9)
2. Thlarau sualho nena Indona a ni.
“Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh, van hmunahte thlarau sualho awmte an ni zawk e. (Ephesi 6:12)
3. Thlarau lam Ralthuam hman a ngai.
“Keini inralthuamnate chu tisaa mi a ni si lo va, kulhpui nghet takte thiatna tura Pathian zarah thil ti thei tak a ni zawk”. (II Korinth 10:4)
4. Kan rilru leh Thlarau chakzawng nena inkalh do let ngai ani thin.
“Duh takte u, mikhual leh khualzin in nih avangin, thlarau do thintu tisa chaknate bansan turin ka ngen a che u” (I Petera 2:11)
5. Phuar leh Phelh theihna a ni.
“Tih tak meuhvin ka hrilh leh a che u, lei chungah engpawh in phuar apiang, vanah phuar a ni ang a; lei chungah engpawh in phelh apiang, vanah phelh a ni ang”. (Matthaia 18:18)
6. Ringtute Tanrualin awmzia a nei.
“Tih tak meuhvin ka hrilh leh a che u, lei chungah hian in zinga mi pahnih an thil dil kawnga an thurual chuan, ka Pa vana mi tihsakin an awm ang”. (Matthaia 18:19)
7. Min dilpui rengtu Lal Isua telna a ni.
“Simon, Simon, ngai teh, Setanan buh thlei anga a thlei theihna tur che uin, nangniho hi a dil che u asin; nimahsela I rin a bo loh nan ka tawngtaisak che a ni; I hawi kir leh hunah nangin I unaute tinghet ang che”. (Luka 22:31-32)
Thlarau Hmelma Setana chu enge a nih?
1. Setana chu Hneh tawh leh hneh theih a ni.
Isua chuan, “Tek anga Setana van atanga a lo tla kha ka hmu asin” a ti.
2. Setana hi Pathian anga Khawikipa awm vek thei ani ve lo.
Setana chuan Lalpa chu a chhang a, a hnenah, “Leia ka vahvelna atang leh ka chhohna atangin,” a ti a. (Joba 1:7)
3. Setana hi Pathian anga thil hre vek a ni ve lo.
Chuvangin aw, van te leh a chhunga awm te u lawm rawh u….Diabola chuan hun tlemte chauh a nei tih a inhriat avanga thinur em ema in hnena a lo chhuk tak avangin,” a tih ka hria a. (Thupuan 12:12)
4. Setana hi Pathian ang a Engkim tithei a ni ve lo.
Tin, drakon, rulpui tar chu (chu chu Diabola leh Setana a ni) a man a, kum sangkhat atan a phuar a, leilawtah chuan a paih lut a, a khar khum a, kum sangkhat a vei hma loh chuan hnam tin a bum leh tawh lohna turin a char hnan ta a. (Thupuan 20:2-3)
5. Setana chu kan Dodal chuan min tlanbo san thin.
Chutichuan, Pathian thu thuin awm rawh u; amaherawhchu Diabola dodal rawh u, tichuan a tlan bosan ang che u. (Jakoba 4:7)
Indo tura inbuatsaihna.
1. Isua Krista Sipai Rinawm tak anga Hrehawm tuar peih tur (II Timothea 2:3)
2. Damchhung khawsak na lama in hambuai lutuk loh tur. (II Timothea 2:4)
3. Sipai tha leh Rinawm chuan a Commander mit a tlung a, a
tilawm thin. (II Timothea 2:4)
4. Mahni Inthunun thei mi nih a ngai (I Korinth 9:26-27)
5. Miten rin tlaka min ngaih ang takin kan nung tur a ni (I Timothea 1:18)
6. Rinna kan vawng reng tur a ni/Kan Ringhlel tur a ni lo (I Timothea 1:18,19)
7. Chhia leh tha hriatna thiang tak kan nei reng tur a ni. (I Timothea 1:18-19)
Eng Hmanrua nge hman tur?
1. Thudik; kawnghren a tan (Ephesi 6:14)
2. Dikna; Awmphaw (Ephesi 6:14)
3. Inring renga awm. (Ephesi :15)
4. Rinna; Phaw a tan(Ephesi 6:16)
5. Chhandamna; Lukhum(Helmet) a tan. (Ephesi 6:17)
6. Pathian Thu(Bible); Ral beihna ngunhnam a tan. (Ephesi 6:17)
7. Eng thuam a inthuam (Rom 13:12)
8. Beramno Thisen; in silfai nan leh Sual hneh nan. (Thupuan 12:11)
9. Mahni tawnhriat sawi thin. (Thupuan 12:11)
10. Pathian hnena inpek pumhlumna. (Jakoba 4:7)
He Thlarau lam Indonaa kan Commander hi Hneha la awm ve ngai lo, Hneh zel leh ngam zel thin a ni a, Indona chu Lalpa Indona a ni a, Hnehna chu Lalpa ta a ni si a, Engatinge Ringtute hi kan tluk a, hneha kan awm leh mai thin le?!! Khawnge puanven i han sawichhing teh ang u hmiang.
Sunday Hman nuam vek u le.
Similar Posts:
- Thlarau Thianghlim (Pentecost Pual)
- Thlemna (Temptation)
- Thlarau Indona ( Pathian Ni Pual )
- Battle Ground (Mihring)
- Chhandamna (Sunday Pual)
ni hman nuam vek u...
January 22nd, 2012 at 6:38 am
A Pathian thu hle mai a. Sawi zui vak tur pawh ka hre chiah lo a, ka rilru a thil lo lang chu ‘ for every action there is equal and opposite reaction’ tih kha ani daih pek chu le..
Bible hi mihringte tan siam ani a, thuruk in thup te pawh a awm ve ang chu. Mahse chumi hrethiam tur chuan, a zir a zir te angai mahna! hriatfiahna chu, thlarau pawlna nen lo chuan a har khawp ang.
Isua in ramhuai a hnawh chhuah khan, vawk te kha khamah an tla hlum ta a..ramhuai ho kha an thi ta vek em ni ang? Engvanga vawk kha vulh nge an nih te ka ti rilru mai mai thin a!!
Report this comment
January 22nd, 2012 at 7:06 am
Va sei ve
Report this comment
January 22nd, 2012 at 7:30 am
Gudmorning vek u…Pu Pk i ziak tha thei khawp mai,ka chhiar chhuak ve thlap e…a tha khawp mai…a bak chu ka hul.
Report this comment
January 22nd, 2012 at 8:09 am
Post tha tak a ni. Ka save keuh teh ang..
Report this comment
January 22nd, 2012 at 8:33 am
Good Morning. Bible thu hi ziah chhuah vek ka’n tum deuh a nia, mahse a sei dawn lutuk a, ka pawtchhe ta deuh mai a nih khi. lrpa, Ramhuai hi vawk kawchhungah emaw mihring kawchhungah emaw an luhin kha mihring/vawk kha thi mah sela, an thihve ngaihna a awm lo. Thlarau spiritual being) anni tlat a, Chatuana Hremhmuna la hrem tur anni e.
Report this comment
January 22nd, 2012 at 9:43 am
Good Post! sunday hman nuam le
Report this comment
January 22nd, 2012 at 9:57 am
A va han tha em! A bikin ‘Indo tura inbuatsaihna’ khi tha ka ti zual. Setana pawh ka lo la hrechiang lo hle tih ka hriat phah bawk e. Thlarau indona hi a hautakin a khirh em a, lei indona avangin lei taksa hi boral mah se thlarau erawh a la awm zel si..
Report this comment
January 22nd, 2012 at 10:29 am
Kan buan te hi kan hriat chian angai, tisa leh thisen an nih miau loh avang hian mi zawng zawng ten chance thuhmun theuh kan neih phah in ka hre thin. Thlarau indonaah chuan mahni kan indo a ngai si. Tha hle mai
Report this comment
January 22nd, 2012 at 10:41 am
Pu PK-a sermon a ropui thin hle. A that ang hu in kan lo dawngsawng thiamlo thin mai pawh a. Pathian thu hi chhiar ngawt pawh a tha a, duhthusamah chuan hmaichhanah tawngkam ngeia ngaihthlak a zawhna lo zawh ve theih tluk hi a awmlo ka ti. A ropui leh pek hle mai
Pu Pk, i hman hunah min chhan ah – Natna chungchang hi, thenkhat chuan kan damloh te hian Setana mi rawn beihna angah an puh fo mai a, tuemaw cancer vei pawh amaha Setana hnathawh lo lang ang a an puh te ka hrefo mai a, hei hi enge i ngaihdan? Khawvela kan awmchhung chuan thi thei, na thei, hlim thei, lungngai thei kan ni a, natna te pawh kan ta tur ni awm tak a nia, mahse mi thenkhat tawngkamah hian natna te hi ringtu chaklo, setana khawih phaka awmho tawrh tur ang deuha an sawi hi ka hre fo mai a, i ngaihdan ka hrechak hle mai.
Report this comment
January 22nd, 2012 at 10:57 am
#9 Sheldon zawhnaah khian kalo inrawlh teh ang.
Kei chuan, ‘natna hi setana hnathawh,’ tih lam hi chu kan pastorte leh Kohhran hruaitute zirtirna ni lovin, kan mihlimho leh changsang inti deuhho zirtirna niin ka hria.
Hei hi a dik reng em, tih hi ka rilrua awm ve reng thin a ni e.
Thlarau lam indona thuah chuan tuna bible ami i sawi piahlamah hian Mizote hian zirtirna dang kan la ngah hle mai. Chung kan zirtirna zawm loh chu ringtu nih lohna leh dak tak maina niin kan inzirtir a, kan inngai bawk a. Hei tak hi da leh min titamtu ni pakhatin ka hria.
Report this comment
January 22nd, 2012 at 11:06 am
I thupui thensawm tina point mal te te khian Mizo Kristian inzirtirna nena kan khaikhin a chakawm hle mai. Mahse a sei dawn lutuk a, insum mai teh ang. A khaikhawm tawi thei ang berin:-
Kan ramah hi chuan he indona hi, chanvo leh mawhphurhna tel lo chuan kan hneh hleithei lova, ringtu kan ni hleithei lo. Hnehna hmanrua, Pathian Thuin min pek sa, i rawn tarlante hman aiin Kohhrana chanvo hmangin ringtu nghet nih kan thiam zawk. Rawngbawltu nih kher lo chuan ringtu kan ni thiam ta mang lo tihna a ni ber e.
Report this comment
January 22nd, 2012 at 11:07 am
Pu PK
I ti ropui hle mai, a hran diat diat a kan inthuam dan tur in rawn dah chhuak khi ka duh lutuk. Vawi engemawa zat helai hi ka lo zir ve thin a, a bik takin tunhnaia thlarau thianghlim enga ka inhriatchhuah thar chu ‘Mahni in thunun theihna hi ka lo nei tawk lo hle’ tih hi ani.
LALPAN HE SERMON HI NASA TAKIN MALSAWM SE KA DUH
Report this comment
January 22nd, 2012 at 11:16 am
A lawmawm thin e. A ropui a, he thlarau indonaah hian Lalpa Isua chuan keimahni ah hian hnehna chang zel mawlh rawh se…
Report this comment
January 22nd, 2012 at 11:18 am
#9 SHELDON zawhna khi chu ZOHO chhan thiam chi tak anih khi
Report this comment
January 22nd, 2012 at 11:55 am
Very good
Report this comment
January 22nd, 2012 at 12:06 pm
Va tha dap dap ve Pu Pk. Reference thlap thlap hian thuziak tha a nihzia a lantir e.
Mahse mi inngaitlawm- hriatna ngah tak Pu Zoho-a i cho chhuak ngei dawn niin a lang.
Report this comment
January 22nd, 2012 at 12:13 pm
I ziah dan chu a fiah fel thlap thlap hle mai, hriatthiam leh chhinchhiah pawh a awlsam tiang hian. Good post
blessed sunday to all
Report this comment
January 22nd, 2012 at 12:43 pm
a va thra tak em, setana mizia/nihphung etc te pawh hriatbelh zel a chakawm, kan ral do tur ber hi kan chian ve fe a ngai a ni
eg Pathian ang in hmuntinah a rualin a awm theilo tih te hi kalo ngaihtuah/hria ngailo, tin setana hian rilru leh ngaihtuahna te hi a hrevek emaw kalo ti char2 a Rebecca Brown lehkhabu ka chhiarah khan a hrelo in a sawi a..
Report this comment
January 22nd, 2012 at 12:49 pm
Report this comment
January 22nd, 2012 at 12:50 pm
Inkhawm kan bang chiah a, Tlai lenchhuah hmain ka rawn lang zawk. Comment a tha hlawm hle mai a, a lawmawm ka ti tak meuh e.
@Ignata, Fb lamah chuan misual ho chu kan inhre tham a, kan tangrual tham mai a sin. Pu Chawnghilha(Isaac Hnamte) te, Soberboy te, Pu Zoho te ho nen chuan thahnem kan ngaiin kan tangtlang tha khawp mai.
@Sheldon, Pathian hian kan thiltih ang zelin kan taksaah hian min thungrul nghal zel ni ta sela, He Leichungah hian Mihring dam kan awm tawh meuh lovang a.Bawhchhiatna avangin Sual Khawvelah alo lut a, He Lei hi anchhedawng khawvel ani a, Natna, tuarna, Lungngaihna ten thla an zar anih hi. Amaherawhchu, Ringtu dik takte chuan, engawh tawk ila, Ka thatna tura Pathian Rorelnaah pawm thiamin Lawmthu sawi thei zel tur kan ni. Nepal a Missionary Pu H.Laltlankima PWD SDO hna bansana kal ta te chhungaw chunga tawrhna te hi a rapthlak a nia. Mahse, Pathianah a lawm reng thei a, Chanchinbuah te a rawn ziak a, miin mak an ti a, an thinlung a hneh khawpin ka hria.
Tirhkoh Paula te meuh pawh kha Pathianin a taksaah ‘hling’ a pe tlat a(Mithiamte chuan, Eng lutukin a chhunthlukna avang khan a mit kha a fiah ta lo a nih an ring). Vawi tam tak labo tura a ngen pawhin “Ka khawngaihna itan a tawk e,Ka thiltihtheihna hi chaklohaah asin tihfamkima a awm thin ni” tih kha a chhanna dawn chu ani si. A chang chuan kan thatna tura Pathianin kan chunga thlen a phal te pawh ani tlat a ni. Cancer te hi natna tha tak ani an tia sin. Mizo zingah Cancer natna vei tih inhre tawh chin reng reng Piangtharloa thi an vang ngawt ang. Kan Thlarau Chhandama a awm theih nan kn taksa hi Setana hnena pek pawh hi Pathian hian a pawiti lem lo.
Khawvela Hla/Thu Ropui “Paradise Lost’ leh ‘Paradise Regain’ phuahtu John Milton-a te hi Mitdel a nia. Braile a mitdel zarah Mitdel hwrawp Braile”s Script te a lo piangchhuak a nia. Stephen Hawkings te mahin an natna lungawi taka an tuar thiam chuan Lalpa Ringtute huan kan tuarthiam dawn lawm ni. He lei hi kumhlun tur ani lo va, Pu Roliana Ralte te pawhin, “Mitdel kan awm tawh lawng Jerusalem tharah” tih hla ropui an phuah daih kha. Natna leh Lungngaihna awm tawh lohn hmun Chatuan vanram neitute kanni hi kan nihlawh e. Tawk phawt aw.
Report this comment
January 22nd, 2012 at 1:02 pm
Report this comment
January 22nd, 2012 at 1:20 pm
Tha ka van ti e!
chhiar nawn fo chi a nih hi….save keuh ang!
4. Mahni Inthunun thei mi nih a ngai (I Korinth 9:26-27)
-Heihi pawimawh vah vah tak a ni. Self control neih loh chuan Pathian sipai rinawm nih a har hle. Ruihthei thil, thatchhiatna, rinawmlohna, hmeichhiat mipat, thinchhiatna etc hi self control neih loh chuan hneh an har si a…..ka thlarau an ti chau thin.
Report this comment
January 22nd, 2012 at 1:43 pm
Pu Pk, ka lawm e. Rilru a nuam huai mai. Kan thatna vanga nung/thi tur ni ila tumah hi kan dam tawhlo in ka ring. Thachianga@10 sawi ang deuh khi a ni awm e.
He thu hi kan zep lawm, OT em em lovang chu. Mi pakhat in damlo a tawngtaina ah ka awm ve a, Pathian kha a au, a ngen, a tur in a tur ani ber a, tisa damna, Setana’n kha damlo taksa a a rawn dah labo nghal tur khan. A boruak chu a sosang duh khawp mai. Keipawh khan thilmak kha lo thleng chawpchilh mai tura ngaihna ka nei hial a. A lo thleng ta lem hlei lova. Mahse, damlo rilru a bet ta tlat erawh chu ‘ka natna hi setana rawn dah ani maw’ tih ani.
Ka ngaihtuahna a awm zui – kha tawngtaina hmunah khan ringlo mi or rinna la derthawng ve deuhte awm ve ta se, Pathian a an rinna kha a nghing thei mai ang em, tin, Pathian la hreve lo tan phei chuan khati khawpa nasa a Pathian au mai bakah, Setana pawh a hnathawh labo tura order a pek nasat dan kha an hreve si ang a, a taka hmuh theih ani silo kha kan Pathian biak an hmuhdan a he zo ang tih te ka ngaihtuah zui a. Keima mimal ngaihdan mai mai ani e.
Report this comment
January 22nd, 2012 at 10:23 pm
Khai a.. he post chuan min van tizak ve.. kum khat dawn post tur a draft a ka dah, ka ziah chhunzawm taklo lam ho saw anni a,chhuanlam pawh ka nei chuanglo e, ziaklo tur a min duhtu thlarau indona hi a nasa em a ni ber e.
Topic zawng zawng a Mizo ten a kan mamawh ber ni a ka ngaih a ni a,(Kan tang thuap vek si a, kan inhre lo mai pawh a) he post hi full support ka pe e.
Report this comment
January 23rd, 2012 at 11:04 am
Tlai khawhnu deuh raihah han comment ve ila: Kristian kan nih phat hian (Piangthar ka tihna)Thlarau Indonaah kan duh emaw duh lo emaw kan lut nghal hrim hrim tih hi Mizo Kristiante hian kan hre lo fo thin niin ka hria. Thlarau Indona te chu ‘Optional subject’ ang lekah kan ngai ni tur ani!! Krista sipai huaisen ai chuan ‘Picnic Kristian’ (ka vuah chawp mai mai!) kan inchherchhuak tam reng a nih hi! Ringtu nun hi nawmchenna leh ‘picnic’ ang lekah kan ngai fo niin a lang.
Post pawimawh lutuk leh tha tak a ni e. I post tawi kim thiam hle mai. Han ti zel teh.
Report this comment