mi(sual).com

Ka bula tui taka mu ka pasal chu ka han en a, ka lung a awiin min hmangaihtu min petu Pathian hnen ah pawh ka lawm a, ka nunhlui te ka han thlir letin kum 3 kalta a mangang leh ruma ka awm nite kha chuan tun dinhmun hi ka thleng ang tih ka ring pha silo. Ka pasal hi mite pasal leh mi pa te aiin a tha bik ka ti a ni lo. Mahse, ka tan chuan a hlu in, ka mize milpui, min hrethiam tu leh Pathian hnen a min hruai thleng leh tu anih avangin ani ka nei hi chu ka lawmin ka lung a awi a, lawmthu ka sawi nawn leh fo thin.

Ani taka, kei hi mahni infak thu lohah chuan sakruang leh hmel ah mi te phalo mah ila a rualpawl tawk leh mite pawh ‘a hmaifang a tha’ an tih ve ka niin ka thluak lah a tha in tette atang pawhin rualpui te zingah pawh lehkha thiam thei pawl ka ni ve thin. Ngaihzawng lam erawh ka ngaihtuah harin unau mipa 4 zinga hmeichhe awmchhun ka nih vang nge, ka rualpui tena ngaihzawng an neih tawh lai pawh khan ka naute ho nena cycle khalh te, bearing tawlai a intlansiak te leh Chite luia tui chen leh sangha man tih te kha nuam ka ti zawkin rualpui mipa te pawhin ‘Puii hi chu a hmeltha a, a mawl em ani’ min ti fo thin.

Ka han than chhoh a, nulat ka hriat tantirh pawh khan “Pasal atana ka duhloh chu ka ngaizawng lo anga, Ka bialpa hmasa ber pasal ah ka nei ang” tih rilru ka puin bialpa ka han neih pawh khan ka la serious in atan ka inpumpek in ka hmangaih a, rilru a ka pasal tur atana ka iailoh ani bawk nen a hlimna tur ka duhin a lawmzawng a awm tumin ka theihtawp pawh ka chhuah ve thin.

Mahse, nulat tlangval inngaihzawnna kawng ah chuan inhauh leh intihbuai nite alo thleng lo thei silo. Chung ni a lo thlen te khan ka rilru a tliakin ana thei hle a, mittui a tlak a mahni a ka room a ka tah chang a tam fo thin.

Fianrialah mipa leh rukru chu rin lohtur anlo tih hi a dik ania nge, min hmangaiha keipawh ina ka duh êm êm a chuan kan inngaizawng rei tial tial a, ka lakah beiseina a ngah tial tialin, a tawpah phei chuan khumkhat lai kan lawi dun ta a. Ka rilru chu nuam zanlo mahse ka hmangaihna avang leh kan pahnih inkar ka lak thutak em avang chuan mi pawhin an titho tiin ka inthiam chawp chho ta zel a. A tawi zawng in sawi ta mai ila, a hlimna tur atana eng pawh ka ti hrehlo chung leh min hmangaih zual phah ka rin avanga ka thianghlimna ka hlan ka bialpa chu keimah ah a lawm a kim thei silo. Ho tete ah a thin a rimin, kan inkar a chhe tial tial a, ngaihzawng dang te min neih sanin, keichuan ka ngaidam in keimah ah a beh ngheh nan tiin a thu thu anga awmin ka theihtawp ka chuah a. A tan zawng a tawklo ania nge, ka laka a awm dan a dang tial tialin a tawpah phei chuan min then ta hial a.

Ka rilru a na in, ngaihzawng ka neih ngailoh bakah amah ka hmangaih êm avang leh kan inkar ka lak thutak em avang chuan ka thinlung a keh sawm in a tliak a, a rum in hlimni ka hmu tawh silo. Pathian lakah te pawh ka vuiin ka nu leh pate leh ka thiante lakah zep thin mah ila ka nun chhungril a ral a, ka lehkha zirlai ah te pawh ka tla hniamin mipa ka hua a, ka tan chuan HMANGAIHNA hian awmzia a nei si lo.

Hun leh kum a ral a, pawnlang ah ngai awh mah ila, ka chhungril erawh a ruak a, ka rilru natna avang chuan kum tam ngaihzawng neilo leh rilru hliamin ka awmin amah ka hmuh te leh kan sulhnu ka hmuh chang te chuan rilru a tharin thinlai na a let leh si thin.

Mahse Pathian hi chu a thain ngaihzawng neilo a kum tam ka awm hnu leh ” Nula Senior” tia mite pawhin min koh fiam hnu leh pasal neihna chang hrelo tih khawpa ka phanchang hnu ah kan pa hi ka tawng ta a. Kan rilru a inmilin min hrethiam a, min hmangaih mai bakah Pathian min hriattir lehin nupa ah hial kan insiam ta a nih hi.

Tleirawl lai leh thatlai chuan ngaihzawng neih a thalai nun chen chu a awmlo theilo, mahse nupui pasal thu ah chuan kan thulo in keimahni duhthlanna a ka nupui, ka pasal tan ka duh tih a ngaihzawng chungchang a serious vak hian kawng tha lo ah min hruai thei in kan nun a tichhe thei si.

Ngaihzawng lap deuh a neih a then zung zung tur ka ti a ni lo, mahse ka tihsual ang tisual ve lo turin ka ngen che u in, kan bialnu/bialpa chungchanga harsatna a awm a kan inthen anih pawhin tawngtai chungin pawm ngam a tha, kan tana tha tur chu chunglamin a
hre si.

Keipawh ka bialpa hlui nen kan buai khan ka tawngtai nasa a, a rem thei silo. A hunlai khan lo pawm ngam ila tha tur. Mihringa tihlawm ka tum khan sualna ah min hruai lutin tun thlengin hlet anei anih hi. Kei zawng ka experience atangin ‘MARRIAGES ARE MADE IN HEAVEN’ tih hi a dik tih ka chiangin ka pawm ta thlap e.

Similar Posts:

• Nupui/pasal virgin in i nei dawn em?
• Mipa rilru hneh dan…
• Tial Tial
• Ka sawisel pawh a ni lo, ka khawngaih ve tawp
• ‎…..pha si lo

Recent Posts:

• Ka lawm e, Mi(sual)-nu!
• MIZORAM SUM LEH PAI DINHMUN IN HMA A SAWN NASA
• ZoRO Press Release
• MIZO KRISTIAN MARTAR THENKHAT TE
• BEIDAWNG SUH

This entry was posted on Thursday, January 26th, 2012 at 3:00 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.