mi(sual).com

(Vaivawm a India chetchhiat chungchang ka rawn ziak leh ang tiin ka in kau phan phan a, mahse ka ziak hlei thei der lova. Hei Red Bull a thlawna an sem  ka dawng leh hlauh mai a, nikum hmasa lam ka in tuma thawh dan hi lo chhiar ve teh u. Mi phunchiar deuh deuh kan tam lutuk a bung hnih in ka rawn then leh pek hi) 

Red Bull hi ka la in ngai vak lova, tun hma lam khan Lipovitan kha energy drink zinga kan hriat lar a ni thin a. Exam dawn men rei leh tlaivar dawnte hian an in thin a. Tun hnu khawvel changkanna sang zelah hian chuan Lipovitan aiin Red Bull hi a lar ta zawk mah a.

Red Bull hi tum khat chu ka in ve tawh ngei a. Chu pawh in ka tum em em vanga in pawh ka ni hran lo. Zirlai pawl in Sport an neih tumin bur khat an tih tlak palh, sawih deuh bem bum tawh hi min bel lui a, chu mi tuma ka in chu ka in hmasak ber tum ni mai in ka hria. A tui ka ti vak lo bakah a thawk teh vak pawhin ka hre hran lova. Enge maw inkhelh nikhua rawl lutuk tur vennan te hian an leklam viau na a, ka ngaina teh vak lo. I

n chhunzawm vakna chhan tur ka neih loh avangin ka in zui lem hran lova. Amaherawhchu, an theh larna tura a thlawna an sem kan nang fuh hlauh a, hnar chi a ni lo bawk a, ka in ve thawr mai a. A thawh dan in lunga ti awi lo em a, kan tarlang ve mai mai ang e.

Red Bull hlawh chhuaktu Sport dress ? :
Tlai khat chu exercise la turin thuam famkim, kekawr bul, T shirt pawl leh Sneaker var fai teh vak lo nen ka in duang ve leh zuih a. Ni danga ka lo tih dan thin angin ka cycle in ka in khal chhuak ve zan zan a. Cycle a hahkhat pawh ka tlan hma hma, exer tak tak ka lak hma in ka thiante tlailam thingpui in thukhawm bula chuan kan tawi khaw muang ve leh phawt a. Eng eng emaw titi phungleng kan sawi laiin, Red Bull faktu nula pahnih hian min rawn pan in, keini thian za ho chu bur nga lai chu min rawn chhawp ta rup mai a, a bur bakah a lehkhate an rawn keng tel bawk a, lawm tak chuan kan lo dawn sak ve hlawm a.

Miin a thlawn an semna mawlh mawlha lo in sak duh lo tlat kha keini thianza ho zia a ni tlat lo. Red Bull in ngai ve hleilo khan a thawh dan tur ngaihsak lem lo khan kan dawn ta fir fer a. Tun hnu a kan ngaihtuah let leh hian, kei a sport dress ha ber khan kawngpui atang hmu awlsam berah khan ka thu a, inkhel mi deuh in min hre ve a min rawn pe emaw ni dawn aw ka ti. A nihna takah chuan, kan piah lawka vai thu ho pawh an pek kan hre lova, pe ni se dawng tlang vek ila a chhan zawn zawn pawha ngai lo tur. Ka thiante khan Sport dress zar an zo ni ta ber hian ka hria a. Ka thutpuite bulah hian chu thu chu sawi ila thih tha in min hnial duh hial ta ve ang, mahse enge kan chhuanlam chuang ang le? Ka thutpui pa dam kawr (malaria ei bang inti kha) vang kha chu a nih ka ring bik chiah silo.

A thawh vawi khatna :
Red Bul thawh dan hi mak danglam ve tak chu a ni a. Chakna lamah pawh a kal chuang lem lo nge ni, ka tum ang lo deuh deuh in ka awm ka awm ta mai a. Red Bull kan in zo chu exer lak lam reng reng a lang thei ta lo. M.A entrance result a chhuak an ti a, a en turin kan ar kawh chhuah ve leh nghal leh thawr a.

Zirlai pawl inkhel huna inkhelh ve leh ngei kan tum avangin mipa inkhel thiam tak kan mamawh in kan hria a, kan mipate tling thar chu an inkhelh thiam ang em aw tih ka zawhna lian ber a ni nghal a. Nula tling chu kan thianpa pakhatin enga mah hma in an sem zui nghal mai pek a. A sema te kha a then chu kan hriat loh chhingkhual lanu te an ni a, tin kan sem a te khan min duh ngut ang em maw chu ni le tih chu zawha chhan har tak a ni bawk ni.

Kan result en haw chu exercise lak lam chu a lang chuang der lo. Sport dress nen a in duang ve zuih khan ka thianpa pakhatin a tarmit siamtir lam turin min sawm a, kan zui chhuak ve leh ngawt pek a. Exer lak paha ke a kal a rem teh lul nen chuan a bike tar lam tawh tak, mi ta a kawl hmangin kan in phur chhuak a. Kan tarmit lam nan minute nga pawh hun kan hmang lo ang tih tur kha kan han kal leh tur chu kan bike a nung thei ta reng reng lo mai. A nuar tlat mai a, pip e pup e ti lo chuan chengkawl angin a ngawi tlat mai, buaithlak tak a ni.

Kei ta pek chuan “running ta che, ka nawr ang che” ka ti a. Bazar lun deuh lai a ni bawk nen a driver tupa lah chuan a zak ve deuh nge ni “running chi a nilo” a ti bur mai si. A engine a sa a nimahna tiin kuhva te kan han lei san dawr dawr a. A nihna takah chuan km 3 pawh kan tlan hman em lova han over heat ngawt mai chu leh. A nun duh loh chuan km 4 leh a chanve(a kawltupa te Hostel thleng) vel chu nawr a ngai ngei dawn a, a driver tupa lah khan “nawr pui tur i awm hlauh a” ti hem mai leh nghal a. Mahse, kan kuhva lei haw minute 15 vel hnu chuan Pathian zarah a nung ve ta mai a.Vanneihthlak tak a ni.
He bike sawi takah chuan a chanchin dang kan zep lawk ang e. He bike hi a neitu nihna nei lo (document awm tawh lo), Uttar Pradesh lam registration a nih avangin kan awmna bawr bial vek bak tlan chhuah pui ngam chi a ni hauh lova. Kan awmna bawr velah hian chuan kan University ID nen hian eng tin tin emaw an in sawi chhuak ve leh mai thin a ni awm e. Mi hrang hrang in an kawl tawh vang hian a hmel pawh a tar ve deuh bam a.

Tum khat chu miin chaw ei ah min sawm a, chu mi tum chuan inneih kum 25-na, Silver Jubilee emaw an ti a. Mahse, an han chhut chianga a kum 24 na zawk a lo ni a. Keini chuan “ Jubilee te chu kum khat an lawm thin kha, nangni pawh in Silver Jubilee tur kum khat ti hian in lawm ang a, a tak tak hun nakum thleng in lawm mai dawn nia” kan ti a, kan hlim pui ta phian a.

Kan chaw ei kham chu kan thianpa pakhat nula thlah chu lo let leh tura kan chah mawlh mawlh kha a lo let leh ta reng reng silo. Bike pakhat leh mi pathum, nula telin kan la awm bam mai a. Rei ngial kan nghah hnu chuan risk la in he bike ngei hian kan in threeble (mi pathum ka chuang) ta nge nge a. Thui pawh kan thlan hma in Priya Cinama hall hmun lun lai takah khuan Police an lo awm ta tlat mai, in threeble chu sawi loh nula zawk phura tlan tlang pui dawn pawhin a khalh tuin helmet a keng der lo mai a.

A bike ti nung reng chungin Priya Cinema hall bul kawngpuiah Cinema en haw vel lai takin kan han nawr der ta a nih kha. Police kan pel emaw ka tih kha nawr lohin a tlan vei ngawt a, a piahah Police dang an lo awm si, chak tawkin a tlan pelh piat a, hla fe ah min lo nghaka, a man chu min man ta em lova. Tun hnu a sawi leh hian mi a ti hlim ta phian a.
Chu bike tawng tawh tak hmanga tarmit kan lam zo kan haw chu ka thiante room kan thlawh kualna lamah pawn lam a chaw ei (hostelah nilo) an lo tum a, kei pawh chu min sawm ve a.

Kei pawisa nei mang tawh lo, Autorisckshaw aia Bus bel zing tawh zawk tan chuan thil huphurhawm tak a ni na in kan in zui chhuak ve leh ta nge nge a. Chaw ei kham chuan kan thian dang ten min rawn fin a thingpui in pahin titi kan han vawrh leh ta nge nge a. Kan hma lawka zirlai pawl in khelh huna mi tur inkhelh dan tur kan han sawi phur a. A khel thiam ber ang ziazang in position tur te kan han in sem in a hma kum lama kan in khel dan te kan han tlirlet bawk a. Tu khaw hriat vek hleih loh khan kan han in hrosa ve kuk kuk a.

Kan Red Bull in thawk a ni maw le? Kan naupan lai a sport na intlansiak tur in thlar thep thawp lai a, glucose an bar tir tak nawk nawk tlengin kan sawiin kan nuih pui heu hova.

Tlangval titi zia dik takah lutin inkhelh atangin nula lamah kan pakai leh a. Nula lamin min duh dawn leh dawn loh hre uk lo hian nula te kan han in hmelbel lawp lawp a. Tu te nula in hmeh bel tak chawt chawt, bei nghet zui vak lo te leh mi in chhai dan tlengin kan han thawh khawm leh liam liam a. Zirlai lam te kan han kai thiak thiak bawk a, keimahni te pawh in kap in ka nui khik ver ver hnu chuan Zoram chhungah lutin Zoram zirna khawvel kan han sep rawtui a, politics erawh kan sawi thui hman meuhlo.

Zan tai rek tlen dawn chuan kan intha then thei ta hram a. Ka tlai exer lak tum exer lak thuam nen a chhuak kha zan dar 12 rik dawnin exer tih tham pawh la miah lovin kan let teh reng a nih kha. Ka exer lak lah kha Cycle tawi te ka khalh leh ke a tawi te ka kal bak chu bike chuan kha a ni leh ngawt a. Han sawt puina tham a awm mawlh lo a ni.

This entry was posted on Friday, February 3rd, 2012 at 6:00 am and is filed under Luangliam. Both comments and pings are currently closed.