mi(sual).com

A thawh hnihna :

Ka exer la haw chu kan inbual fai sir ser a, cyber khawvelah rei lo te ka luh hnu in mut zai ka rel ve ta a. Rilru kamtu tam tak in min hual vel karah chuan ka Red Bull in chuan a thawh tur a thawk  ta tak tak a, ka mu meng ta ker mai. Suangtuahna khawvel ka kawm a, a chang leh eng engmaw ngaihtuahna avangin  rilru hahin ka hui deuh pap pap lo chauh a, ka zirlai lamah kan let ve zuai a, khua a var teh vak lo.

Mut theih loh takah chuan ngaihtuahna a kal kual vel nasa khawp mai. Ka thiante nula min bel leh min dem te chu kan X Ray kual ve ngial a. A hma lama ka thianpa in nula min duh pui ve deuh ka um zui tak vak lo te chu kan bel chiang a.

Vanneih thil thuah lo ngaizawng ta ila tiin patlingin sawi tur awm awm a tih te chu keimah rilruah chuan kan hrilh ve nawk nawk a. Eng tin ngai tak ang maw? Nula atang chuan ka hma lam ruahmanna khawvelah ka lut a, Zoram kan fang leh ziai ziai phawt a.

 Ka kal thu deuh hlek a IPL (cricket) lama ka lut leh a, IPL promotional tour awm dan tur te duh thu ka lo sam ve melh melh a. Ka duhthusam ang kha a tha teh vak lo emaw ni, tun a IPL team neitute hian ka duhthusam ang kha an hmang teh vak lo tlat nia maw le.

Chutia mu hil theilova ka leh ka leh kual lai chuan sms ka dawng a. Kan thiannu Mizoram a haw chhoh tumin Petromax  zawrhna min rawn zawt mauh mai a. E.. tun ang khawvel a petromax hawn te chuh ti rilru chungin a zawrhna ka hriat loh thu in ka chhang a, rilru chuan Old Delhi khawi maw lai vel whole sale market vel a fan kual deuh dun dun  hman a. Mahse, a petromax lei duh tak tak vang nilovin a exam hnai tawh si, an vengah current a awm tha thei lo lutuk min rawn fiam lek lo niin. A ni lah tak a, an veng chu Mizoram ang deuh in current an nei zing reuh khawp mai. Current awm loh thatna chu current  awm tirh hian a nuam tih vel kha an ti ti duhzawng a ni reng a ni.

Football lamah te kan pakai vel a, tun kum zirlai sport lo awm tur a kan in buatsaih tan (a thu in) vangin football lamah te kan kual a, rilruin inkhel mai nilovin pavilion tlangah  football  inkhel lai a comment chhin vel a,  thiam erawh ka thiam teh vak lo, a tak tak a tih zui chi a ni lem lo.

Tin, suangtuahna in kum kalta lama zirlai pawl a kan in hman ve lai a Sport kan hman lai te a hmu thuak thuak a, thil ropui tak phei chu awm lo mahse ribbon sen a chal ka hren ve vu lai te kha ka hmu a. Tun hnu a thlir kir leh hian khang lai kha ka lo ‘chhe champ’ ve awm ngawt mai tih te ka in ngaihtuah leh hnu hnawh a.

Foreign ram lamah ka pakai leh zuai a, Bangladesh ram, kan thenawm ram rethei takah kan thlawk lut leh zuai a. A chhan chu kan nau pakhatin research atan inbutsaihna (research proposal) ah Bangladesh  a tlang mauh mai a. A thlang tih lemah a u ten an lo thlan sak a, a tlang tute lah khan ngaihdan mumal tak an lo nei silova, ka kutah an dah ngawt mai a. Thluak sawr bing chungin Bangladesh ram Democracy ram nghet loh chungchang  thupuiah kan thlan avangin kan han discuss dun leh ang lawp lawp bawk a.

Vanneihthlak takin zun tamna lamah a thawk lo hlauh mai a, zan lai (zinga ni zawk mah a) vawikhat chiah ka zung a. Zing dar thum tlang vel chuan khumah ka let thak thak reng mai a. Ka in hma lam khan hetiang tur tih hria ila chuan lo in lek loh tur hi a ni a. A thawh dan hre chiang teh vak hek lo le, rawn keng tute khan an hmuh lai a in tur min tih vangin an lawm nan kan hawng a kan in kha a ni mai a.

Thla te chu min la lak sak ta deuh deuh a, zia lo tak a ni. Kan in puite zingah khan eng tin tak thawk ve maw tiin sms-in kan zawt kual a. Kan thian pakhatah chuan a thawk vak lo nge ni ka a reh hmiah mai thung a. Kan thianpa pakhat zawk mut hma tum a in sang phek erawh chuan ka sms a rawn chhak zek zek  mai a. A ni pawh Red Bull chuan a lo ti buai ve ngei zawng a ni mahna le.

Muthilh theih lo ta fam chu ka tho tha leh ta nge nge a, cyber khawvel lam kan hrut a, orkut leh facebook ah pawh ka thiante tumah an lo awm tawh lova. Computer hmaah rei ngial ka thu a, tun a i article chhiar lai mek hi kan ziah malh malh hnu a mu tura ka khum ka pan meuh chuan leilung pawh lo lang tawhin sava ho pawh an chiar nak nak a. Ka mut hun in a zir lo bawk a “Breakfast chu ka va han la hman dawn lo chiang e aw” tiin mahni leh mahni ka in be mawlh mawlh chungin khum ka lawn a, mut hilh chhuakin min rawn zam chiai chiai lai chuan khua pawh a var fel ta.

Tui takin ka mu tak siai siai ang chu tih nak alaiin mumang ram lamah lah chuan ka buai nasa mai a. Ka pu, mi a lai a mi phun chiar lo ber mai hmuin, eng thil emaw avangin a lung ka ti awi lo pek a, zia lo tak a ni. Ka pu lungawi lo teuha ka hmunna chhan kha ka Red Bull in vang kal zel a ni thei mai ang em aw?

Kan muhil chu chhun chaw ei hmana ka thawh hman te chuan a pawi lo teh lul nen zing lamah current awm lovin min ti harh ve leh kher kher a. Ka harh hun kha Breakfast ei hun a liam ve ting tanga, han thawh zui mai nan chuan chhun chaw ei hun tur a la hla si,  Chanchinbute  kan chiar leh phawt a. Current a rawn awm leh hnu chuan chhun chaw nghakin in kan mu tha leh ren rawn a, mahse mut thing han awm chu mut a tui duh vak lova, a chhuah viau tak leh tlai lam chawhnu herah ka chhing sek tawh mai a niang chu tiin ka tho leh ta taih taih a, thawmhnaw min suk sak tu nei ve talo chuan ka su taih taih a, ka in bual fai zui bawk a. Red Bull vang vek a ni, Red Bull vang vek.

This entry was posted on Friday, February 3rd, 2012 at 8:00 pm and is filed under Luangliam. Both comments and pings are currently closed.