mi(sual).com

January thla a ral deuh chauh a la ni bawk a, zing karah te chuan Brahmaputra luipui dung suar tluanin Guwahati khawpui pawh chu chhum leivak chhah tak mai chuan a bawh deuh chuk mai a. Chumi kuma thlasik chu kum dang aiin  a vin emaw tih tur hi a ni. Leirawhchan ina khawsate tan chuan hriat em em loh mah se in luah lum tur pawh nei lem lova rel chawlhmuna khawsa ve mai maiho tan chuan a tawrhhlelhawm viau ta ve ang.

Pathianni tuk khat chu tuk dang ang bawkin a vawt vin leh tuk mai a. Thing hnah atanga dai lo far te pawh vur aiin an vawt zawk emaw tih mai tur hi a ni a. Zan khuaa khawvawtin a lo hmeh tawh an nih avangin rel chawlhmuna thir ruangam hrawlpui pui leh chawlhhmun chhuat te chuan pangtilum an nei lo ngang mai bawk a. Chhun pachanga an ling dawn emaw tih tur rel kawng te lah chu vur tlawn ang mai, han khawih palh pawhin a na vung vung thei mai bawk a .Chumi tukzing dar 3 vel chuan Pankaj-a leh Reena-i te unau tan chuan pang tilum thei han belh tur a awm hauh lo. An thuamhnaw lum neih that ve berte lah chu chhuna leirawhchan thiar nana an unauva an zawn thin saiip ti phiar phuar leh nikum hmasa lama a nu’n a thih hmaa a hnutchhiah puan hlap sen duk chauh a ni.

Paltan bazaar rel chawlhhmun kil khat lai chu kum 2 dawn an lo luah lum ve ta reng mai. Tuma’n chu-e-kha-e an ti lo va, zurui tangrang thenkhatin an mutkhalh te a nih ngawt loh chuan chu lai hmun na na na chu an unau chuan an chen bel ve a.Thuam phura inhlawh rui sual leh chhimtir riltamten an ke zungpui khelsaka an tiharhte a nih ngawt loh chuan hulum viau mah se anni naupang baihvai tan chuan rel chawlhhmun hi a him za ber zawk a ni. Chumi tuk chuan thli ro vawt tak mai a thaw vuk vuk a, rel chawlhhmun chhuatah te chuan vaivut leh hnahthel ro a rawn len hnawk niai a. Bang kila saiip chhunga inkual ve ram mai Reena-i sam sen thap mai te chu thli chuan a rawn chhem ang siu siau va. Nimin piah lama narial hriak a chhar te kha thih lo phei se chuan a chhem phir si leh nasa viau ta ve ang chu. Pankaj-a pawh a puan hlap sen duk pawp phoh phoh tawh hnuaiah chuan vawt tiin  a sai hlak hlak bawk a.Thla khat chuang mutmu tuah mumal tawh lo mah se tuk dang ang thovin an thawh hma a ngai leh a. Zing dar 4-a chhuak tur rel nghakin mi lah chu an lo bengchheng chel chul bawk nen. Mumang pawh an nei hman bar lo a ni e. Reena-i riltam chuan a u chu zawi tein a va sik a. A u chuan hrethiam takin ni zana dawr-kal-thei nghaktupa chhang khawro paih tur a lo lak hman chu a nau a han pe a, Reena-i chuan tui pawh tel lo chuan tui ti takin a ei nghal a. An thova an tihdan pangngai bawkin an bungraw neih chhun saiip leh puanhlap sen duk chu an bata, khua la thim chhulhah chuan an inzui chhuak ta hnak hnak a.

A ni taka, an unau tan hi chuan khawvelah hian thil dang han thlakhleh tur teh chiam a awm lo reng a ni. Rel chawlhhmun kil khat tih mai loh chu `kan in’ tia han chhal tur an nei ve lova. TV leh computer te, thirsakawr leh car te, pheikhawp mawi leh ziak loh puan te chuan anni unau tan chuan tangkaina an nei ve lo. Chung zawng zawng ai chuan tuna Pankaj-a dara inbang mek saiip hi a hlu zawk fe a, Fancy bazaar sumdawng hausa Ahmed Mahan-a insaknaa leirawhchan 50 in chunga thiar chhoh apianga Rs 2 hlawhtir theitu a ni miau a ni. Retheiin la naupang dun viau mah se an nu thil pek rohna chang an hre tlat a. Sum tam tak pawhin lei dil mah se an phal dawn lo tih chu Reena-i’n a enkawl uluk dan atang hian a hriat mai bawk a. Chanhai hle mah se kutdawha ei zawn chu Pankaj-a chuan thih hreh takin a hreh ve tlata; chuvangchuan, an tih theih tawk inhlawhna zawngin tuk tin an inzui chhuak hnak hnak thin a ni.

Sava an chiar nak nak a, thing hnuaia chawlh muan pawh ngam awm loh khawpin a hnuaia kawngpuiah te chuan savaho an e pherh ang hlawi hlawi a. Thui tak an kal hnu chuan kawng peng thuam pakhat hi an lo hnaih hle tawh a. Chutia kawngpui pana an chhuah phei lai chuan an piah deuh va kawngkhar in hawng chik ri deuh that that hi an hria a. Reena-i chuan a u kut chu a chelh nghet zual sauh a. An hma lawka thil lo thleng tur chu hre lawk miah lovin hamhaih tak chuan kawng laiah chuan an ding ta chawt a. Chutah an bul lawkah chuan pa pakhat hi a rawn lang hlawl mai a. Tlanchhiat tuma an inher lai tak chuan an hnung lawka pa pakhat lo ding reng chuan nui huau huau chungin Pankaj-a chu a lo rek ta chawt mai a. An hma ami zawk khan Reena-i chu a chhip samah a tham a, a kut leh lam chuan chu zing khawvawt tak maiah chuan a kawr neih chhun chu a phih thler sak ta kawk kawk mai a ni.

Reena-i mangang leh hlau chu tah pawh tap thei lovin a meng phar awn awna, a mittui a hnam tiam tiam a. A nu leh paten an dam laia kut hmawr pawha an tawh phal loh chu, chu misual awmherha chuan baksam til thawt thawt khawpin a’n phih leng ta mai a. Chutah a vawt ti nge, a hlau ti zawk chu a khur a khur mai a. Reena-i tleirawl em pawh la ni lo chu, chu pa chuan a duhthalin an nghaisa ta a. “Ka pu khawngaih takin …” A sawi zawm thei lo. Chupa chuan a tisa chakna hrik thlak nan  chu naupang thiltih sual nei lo chu a hmang ta mai a. Zahngai tura a ngenna  chu ngaihthlaksak a ni lo. Chutih lai te chuan Pankaj-a chuan a nau chu mittui tling piau chungin a lo thlir reng a. Mahse tih theih a nei hauh lo. A hrawk hrui leh chemte tlang hriam an inthenawm reng tih pawh a theih nghilh ve lek lek chu a ni e. Aw chhang tiauva a au hnu chuan kawngpui char laiah chuan Reena-i chu a tlu sawp niai a, a kawr tet hniang mai chu Pankaj-a chuan an puan hlap neih chhun chuan a zu khuh a. An unau chuan an inkuaha lungchhe takin an inhnit hlap hlap a.

Ni e. A nu tal kha chu la dam se chuan hetiang em em thil hi chu a thleng bik lo tur hi a ni a. A pa lah kha kum 40 ral pawh kai hman lovin a boral . Rel kawng tifaitu ve mai mah ni se an nupaa an dam dun lai kha chuan chhungkaw hlim thei tak kha an ni thin asin. Nimahsela, khuanu remruatna hi chuan mi rethei hma a sial bik lova, mi hausate pawh `In hausa tawh e mai, ka’n tirethei ve deuh tawh ang che u’ a ti ngai bawk hek lo. `Vanduaina hi zawng a lo thlen chuan a mal mala thleng lovin a hlawp hlawpin a rawn thleng duh khawp asin’ an lo tih thin kha heng unau rethei tak te chungah pawh hian hai rual lohvin a lo thleng dik chho ta chu a nih hi.

Chumi ni chuan ni lengin chhum a zing chiai reng a. Reena-i rilru leh taksa hliam tuar chu a u Pankaj-a chauh lo chu han hnemtu an awm mawlh lo. Police han pun dawn se, anni ang mi chhia chu tu khaw khain an lo um-e dawn lo tih chu Assam ram dan hman lai a ni tih Pankaj-a hian a hre ve tlat a. Na hle mah se sepui ruah tuar tlawk tlawk mai chu buai chip chiar loh dan tha ber nia a hriat avangin Police pawh a hrilh duh lo a ni. A nau hi a lainata, tlema nuamsam lo deuhva a hriat chang hi chuan hnathawh a awl ziah thin. Hemi tum pawh hian leirawhchan chu inchhawng rukna-ah chuan a thiar chho par para, thlasik khawvawt tak hnuaia a thlan fim lo bawl chhuak tak tak leh a dar belkang that tawhte chu chumi tuka thil thleng chuan a theihnghilhtir titih a. A chang chuan in sak lai kianga lo muthlu bak bak a nau chu lainat takin a’n thlir leh thin a. A  nu mal chunga pangchang taka a tawlh hriap hriap lai te a ngaihtuah kira, a mittui a sum zo lo lek lek thin chu a ni e.

Hah hre mang lova thawk a ni bawk a, Rs 34 lai a hlawh chhuak ve a nih chu ! Hriau leh khawlla dum Rs 2 man a leia, a nau kawr tet hniang mai chu a thui that sak mial mial a .Chutih lai te chuan Reena-i chuan lei lam a en kala, a u-in lainat taka a thil tihsak chu tawngka-in chhang let thiam lo mah se a khabea mittui lo far fap fap chuan a nem nghet a ni. Chumi tlai chuan Pankaj-a chuan chhang tui tak mai, a pain kum 5 vel liam taa a lo leisak ang chi ngei mai kha a nau chu a leisak a. A pek lai te chuan Reena-i chuan lakna chang pawh a hre lawk hlei nem ! Mak tiin  a en vawng vawng a, a hamhaih nasa a ni. Mahse a u-in a kuta a  humtir hnu chuan a ei tur a ni tih a chiang ta a, tui ti takin thawk pawh la tha hman mang lovin a ei ta a nih kha. Pankaj-a pawh chuan a ei tur chhang thawp bial chi chu a’n lei vea, chumi tlai chuan an riahna lam pan chuan an inkai phei leh ta hnak hnak a.

`Mahse’ tih a ngai leh thin. Khawvel hi duh takte nena inthenna ram a ni tih chu hrilhfiahsak ngai tawh bik lo mah se Khuanu remruat chhe lai an tawng bua emaw tih turin a tuk chu unau inhmangaih takte inthenna tur ni a lo ni reng mai. A hma ni ang lo takin khua a tha a, Reena-i pawh a u hmangaihna ril tak mai a hmuhfiah ve tan avangin nimin lamah te khatiang thil duhawm lo khan tlak buak mah se a hlim ve hle mai a. A uin a han koh changte chuan nui sang hian a lo chhang thin a. Pankaj-a pawh a tihlim phian nghe nghe a ni. Rel bula khawsa e ti lo chuan relah hian an lawn ngai zen zen lo va, a kal laia chuan phei chu hla tak a ni. Sawi tawh angin an khawvel pawh a zau lo, Paltan bazaar rel chawlhhmun leh a bul vel mai chu a ni. Rel chu ni tin zan tin hmu thin mah se khawi atanga lo kal nge a nih a, khawiah nge a kal zel dawn tihah an buai ve ngai lo, an khawsaknaah pawimawhna a nei bawk lo. An hriat chhun erawh chu a pa’n a dam lai a, “Rel chu hnaih loh tur, a tlan lai bulah phei chuan din reng reng loh tur, a chhungah pawh luh loh tur, misualin an man mai ang che u” tih  mai kha a ni. Naupang harh ta chu, chu mi tlai chuan rel mawng lam pindanah chuan an lut vea, an rin ai daihin a lo nuam nghe nghe a. An zan tin mutna nena khaikhin phei chuan rela thutna te chu a lo dup nuam nasa mai si a, Reena-i han tlu zal phei chu a muhil a ni ta mai a. Pankaj-a chuan chutia a nau thlamuang taka a han muhil siai siai mai a hmuh chuan a nuih saka, zan lama an ei tur leina hun rem chang a ni tih hriain dawr lam pan chuan a chhuak phei ta a.

Chhang dawra a awm lai chuan rel kiu ruai ruai a hria a. A nau mutna rel kha a ni ang tih ngaihna reng reng a ring pha lo. A nauvin a chhang lei te tui ti taka a han ei vel tur mitthla chung chuan a nau mutna rel awmna lam chu a pan a. A han hawi chhuah meuh chuan a suangtuahna tichavai rawih tham thil a hmu ta . A nau chuanna rel chu rel chawlhna atang chuan meter 100 vel laia hla-ah a to tawlh chhuak hman der tawh a. Chutah theih tawpa chakin rel kawng hrulah chuan a um ta. Khua a thim chhulh tawh a, leirawhchan leh lung hriam phawkphawhraw pui pui karah chuan a tlan zel a, a ke te chu lung hriam te chuan a at thi pheng phung tawh a. Mahse Pankaj-a chu tlemin a tlai deuh a ni. A nau pawh chu rel kal thawmah chuan a lo harh ve a, rel tukverah chuan a rawn dak chhuak a, a uin thei leh thei lova rel kawng hrula a rawn um chu a va hmu a. Pankaj-a chuan a nau chu a’n auva, Reena-i pawh ban vaiin a rawn au va, a tap tiau va. Awrawl tawpin a’n au thin. Rel lah chuan din zai reng a rel tawh si lo, a kal chak tiat tiala, ram ril lam pan chuan a liam ta vut vut mai a. Pankaj-a pawhin a um thei ta bik lo, a tha neihin a tlin tawh lo. A nau ei tura chhang tui chi amah pawhin a ei phal lohte chu rel kawngah te chuan a darh niai a. Han ding tur a awm tawh lo, a nau mangang tap tuau chunga ban rawn vai lawm lawm te chu a mitthla-ah a lo langa, rel kawngsir hnim zingah chuan a bawk thlawp a, a mittui a luang zung zunga, a thaw kawk kawk a.

Chumi zana a riak bak chu Pankaj-a pawh hmuh tur a awm ta bik lo. A nau nena hun rei tak an lo luah lum ve thin rel chawlhhmun kil khat lai chu zan laiah pawh a ruak hiau reng tawh a. Reena-i vawt tia kil khata a lo inkual ve rai thinte chu thuamphurho chuan zawng zawng mah se an hmu tawh lovang. Khatiang thil a thlenna kha kum 2 lai a lo ni ve ta reng mai. Thawkkhat lai kha chuan rela hna thawktuten rel kawngsir vela mi ang lo pakhat bak lenga tlan thin an hmuh thu kha chu an sawi thin tak asin maw. Mahse chu lah chu han bel chiang turin hmuh tur a awm tawh lo.

( Kum 2012 atan post sei ber record siam kan tum teh ang !)

This entry was posted on Saturday, February 4th, 2012 at 6:00 am and is filed under Fiction. Both comments and pings are currently closed.