Zalna run a vai,
Rai a rah vang maw?
Hrilhhaiin laitual a vel,
Khaw nge hmangaihtu chun leh zua kha?
Thenawm hnai tak kan ni lo a, veng khat erawh kan ni. Sikulah kan pawl a inang ngai hauh lo a, kei aiin kum hnihin a upa nghe nghe bawk a nih kha. Kei aia upa ni mah se kei pawl li ka nihin, ani chu pawl hnih chauh a la nih kha, ani pawh kha a zak ve hle thin. Naupang thang duang tak a ni lo a, tuana saruh khel an ti ang hi a nih ve avangin, len zawngah kan intiat tawk hle a, sang zawngah kei aiin a hniam hret bawk.
Khatih laia kan awmna khuaah kha chuan mipa naupang khan lehkhachaih kan chaih nasa hle thin, khata tang khan a ni ta berin ka hria kan inzui tak chawt kha. Saidawium kan rawt dip a, Sagu (chaw ban) nen kan chhum pawlh a, la kan zut a, lehkhachaih kan siam a, hlim takin kan chaih dun thin. Kan hman changin ramah te kalin, tuite kan cheng a, nghakuai te kan chiah dun a, kan hlim ve hle thin. Mahse ka thianpa tan chuan khang hun, thiante nena hlim taka kan infiam hun lai chauh kha a ni, a naupan lai hun nuam chu tih reng ka lo ngaihtuahsak ngai lo.
Ka thianpa te unau kha pathum an ni a, a hun tam ber chu an mipa naupang ber hian a zui chawt thin, a infiam pah pawhin nau a awm a ngai reng thin. A nu leh a pa kha kan inkawm hmain an inthen a. A nu hian a lo tlawh ka hre ngai miah lo a, tun thleng hian a hmel leh a hming ka hre hauh lo. A pa kha engmah thawk lo mah se inah a awm ka hre ngaih meuh lo. Nu leh pa hmangaihna, duatna, enkawlna si per pawh khan a per phak ngut lovang.
A patea leh a ni khan an tir nasa thei hle thin a, ka hriat tirhna ber pawh pawl hnih a nih laia bel lianpui chhipchhuana a tui chawi hi a ni daih. Tlema a haw har deuhin leh awm tha vak lo nia an hriat khan an hnawtchhuak leh zauh thin bawk. Hnawhchhuah an nih tum hian an unauin kalna tur hre lo a, an thenawmte ina chaw an ei ve tak mai chang pawh a tam thin. Mak em em mai chu a pi leh a pu kha an la dam ve ve a. A pu khan fahrah tiin a phun khum fo thin. A pi khan, hna a thawh thata a fel chuan a duat thei hle thin, a fel loh vaih chuan chuti hlauh. An unau thum khan hnawk riau khan an hria ni berin a lang. Hmangaihna tih kha a tan chuan thil awmze nei lo, hming chauh nei, boruak pawh tluk lo; ramhnuai pilrila mi auh tuma au vaka, keimahni aw thangkhawk bak hriat tur leh hmuh tur awm lo ang chauh hi a ni ngei ang le!
Thing delh loh lung delh loh ta na na chu, kan lo thang lian ve zel a; keini veng dangah kan insawn a, kar a hla ta deuh nen kan inkawm khat tial tial a, zilhtu leh fuihtu nei ta lo chu a chanchin ka hriat chhun chu naupang a pawngsual tih a ni ta. A va pawi tak em, kawng dik kawh hmuhtu chu nei sela, humsual a dai bik ka ring si lo. Jail te a tang ve ren rawn a, a lo chhuak chu a khaw pum tih theihin an kawm serh a, kei ngei pawh kha ka tim phah fo thin.
In chhung nuam si lo, khawlaiah mi sawi sep sepna leh hmutsit, endawng nih bak chan tur nei ta lo chuan, zu in leh damdawi lamah a tuan ta. Tichuan, drug addict hmuhsitawm em em leh hmabak nei lo a, hnahthlel a vuaia tawih ral tur ang chauh hian a hringnun chu mualphona leh zahna tinreng phur chungin, mihring te hmangaihna reng reng dawng ve lovin, naupangtein a thlah liam ve ta. Ka thianpa kha mi dang aiin a sual bik hauh lo a, a thatnaah chuan mi tam tak aia thatna tam tak a nei ve zawk asin maw le! A siam vanduai bik tiin Siamtu zawng ka dem ngam si lo, ka dem zawk erawh chu sawi ngai lova chiang sa, mahni mihring puite hmangaihna aia mahni hmasialnaa khat thin mihring hi kan ni zawk e.
Mite leh kei a thian ngei pawh khan ka lo dem thin a, mahse a ni lo, tunah chuan beng maia hre lovin, mit maia hmu lovin, chhungril hriat thiamna zawk hian ka hre thiam ve ta e. Zilhtu, fuihtu, tawngkam tha a betu leh hmangaihtu nei reng reng nei lo nun khan beidawnga sual tinreng dai bak eng nge a tih theih chuan ang le? Vanneihnain a hnuchhawn, sual tur renga piang a nih ka ring thei lo tawp mai, ka ring phal bawk hek lo. A sualnaah khan tu nge dem thei bik ang le? Naupang chu a kalna awm kawngah zirtir a ni si lo a…!!!!
Similar Posts:
- Biahthu ‘D’ in hlan nawn leh ang aw
- What is Love? What does it mean to me?
- Pawl hniam lam zirlai fail tir thin hi
- Nu nge Pa!!
- Hmangaihna Par – Lalrintluanga Varte
a tha khawp mai
February 19th, 2012 at 9:14 pm
Luangliam lawk ang.
Report this comment
February 19th, 2012 at 9:16 pm
Chhiar ang..
Report this comment
February 19th, 2012 at 9:21 pm
Chhiar ang aw.
Report this comment
February 19th, 2012 at 9:23 pm
Rilru ava khawih vele, mizote hi helamah hian hmasawm kan la ngai khawp in ka hria. Inhmusit mai lova in tanpui tawn hi kan intihhmuh a ngai a ni. I thianpa chu kava lainat tak em.
Report this comment
February 19th, 2012 at 9:38 pm
A khawngaithlak hle mai.
#1. A nu leh pa.
#2. A pi leh pu.
#3. Amah.
Report this comment
February 19th, 2012 at 9:38 pm
birth control tih vel nen khan a la in zawm zel niin a lang. Nuapang enkawl chuangchangah hian policy mumal tak kan nei lo ani mai thei.
Nausen, a pian chhuah rual a ‘mi tluk lo nghal ngawt’ hi a fair lo khawp mai. School a kal thei dawn em? Zirlaibu leh uniform te a neithei dawn em? Thanlennan a chaw tha a eiphak ve dawn em?
Report this comment
February 19th, 2012 at 9:43 pm
A va tha em…
Report this comment
February 19th, 2012 at 9:52 pm
I ziakdan hi i tan nat hmel.
Ngaihnawm e.
Report this comment
February 19th, 2012 at 10:04 pm
Naupan lai atanga hmangaihna a zilhtu neilo leh fuihtu neilo a seilian te tan hi chuan nunkawng dik zawh hi a lo va harsa dawn em..
Kawng tamtak ah chuan an dem awm bik love
Report this comment
February 19th, 2012 at 10:05 pm
#8 ka rilru ana veng veng thin a sin… ka la ziak uar lo zaw7kin ka hriaaa…!!!
Report this comment
February 19th, 2012 at 10:38 pm
Rilru a khawih e. Mak ka tih deuh pakhat, tui a chawi hian bel a chhipchhuan thin maw?
Report this comment
February 19th, 2012 at 10:46 pm
hmmm
Report this comment
February 19th, 2012 at 10:48 pm
Puitling tawh pawh beidawn luat vanga humsual dai a awl vei nen naupan lai a tanga nun beidawng lutuka awm chuh, lainatawm tak an nih chu, a unau te chu engtin nge an awm zel le?
Report this comment
February 19th, 2012 at 10:52 pm
#11 bel hi a chhipchhuan thin a ni e…Eng nge dik lo a awm em niii???
#13 A naupang ber hi Bike accedentin a boral tawhhh…
Report this comment
February 19th, 2012 at 10:52 pm
Nupa inthen a, fate enkawl dantur hi mumal takin dan awmse a tha ang! Hmeichhia zawk hian fate nen inpuiah an kir pui mai thin a, tlem a zawng chuan an hmeithai pui ve bawk a, mahse mipa lam kan awl ta theuh a. hetiang dan mumal lo tak hi siam that a hun khawp mai. Sawn man te pawh! a man niloin pa in fate enkawlnaah a thawh ve dan tur te dan mumal tak siam ila a tha khawp ang.
Report this comment
February 19th, 2012 at 11:11 pm
Lehzela an khawngaihthlak hle mai.
Report this comment
February 19th, 2012 at 11:22 pm
A sei a, a ngaihnawm bawk.
Kan thianpa te pawh ka hmuhsit vang ni lo in unau 3 an nia, pa thuhmun an awm lo vek! Nu ber in a lerh san zel bawk si a, an nun chu a fuhlo laklawh ve tawh khawp mai. Fa kan nei a nih chuan a enkawl hi chu kan mawhphur liau2 a ni. Mahse, mahni fate thatlohna lai hi hmuh a va har tak em!
Report this comment
February 19th, 2012 at 11:31 pm
Ka ngaihtuahna a thui, ‘hetiang’ ka hlauh vang hi a ni pakhat a ‘hetiang’ ka la nih…hmalam hun tuman kan sawi theilo mahse tum dan erawh kan nei a tul.
Post tupa, i thil post chu ngaihtuah a va ti thui ve, chaw ei dawhkan kil ho hi a va pawimawh em kan ti daih teh ang
Good Post
Report this comment
February 20th, 2012 at 12:00 am
#14
@RZA, Amah hi mipa a ni bawk sia, bel han chhipchhuan daih chu ka ti mai mai mawle..!
Report this comment
February 20th, 2012 at 7:04 am
#19 kan awm thinna vengah kha chuan mipa bel/tin chhip chhuan kha common tak a ni ringawt.. mahse ka sawi thui lo ang ka inpuang thui e mai….
Report this comment
February 20th, 2012 at 9:44 am
A tha hle mai. @18 sawi ang khian ho te a kan ngaih chawei huna dawhkan kil kim thap te hi a pawimawh a nia.
Chhungkaw pakhat ka hriat chu zing chaw hi chhawng 3 velin an ei tlangpui. An fate an tumah laktlak an awmlo, mipa awmchhun zu a rui reng a, hmeichhe 2 zu leh drug, a fel ber hmeichhia sawn 3 a pai tawh. Chaw kil ho leh kilho loh hi chhungkaw administration fel leh fel loh lantirtu ani ve in ka hria.
Report this comment
February 20th, 2012 at 10:17 am
Rilru a khawihin, i thianpa chu a lainatawm hle mai..
Chhungkaw rethei bakberh tak pawh ni mah ila, nu leh pa te hmangaihna huanga kan seilian hi zawng a vanneithlak teh e. Robert & Sheldon sawi ang khia, Chhungkua a chaw ei ho dial dial te hi a hlu in a tangkai tak zet.
Ka sawi fo thin. Ina ka awm loh/zin bo laia, ka chhung te’n chawhmeh tha an hmeh changin; ka nu (fam) hian, “Aw, Mampuia han awm ve se, tui a tih dawn nen” a ti thin. Kei kher lo, ka unau dangte an zinbo hlan pawn, ka nu hian a ti fo mai. Nu hmangaihna han thukzia tak hi chu aw. Chunnu hmangaihna dawng phak lo i thianpa chu ka khawngaih hle mai.
I sawi ang khian, mahni inchhung nuam ti lo tan chuan, sual rawngbawl mai loh zawng tih tur dang a vang dawn em a ni..
Report this comment
February 20th, 2012 at 7:51 pm
A ngaihnawmin lung a run kher mai. Hetiang hi mi tam takin kan hmuh thelh fo thin.. i ziak tha thlawt e.
I thuziak pawh a danglam ta daih mai, a felfaiin chhiar a hahdamthlak ta zaih mai. Ziak zel mai teh, kan lo chhiar zel ang.
Report this comment