mi(sual).com

Tlawmngaihna hi kan Mizo nun a bet tlat angin kan sawi a, tunlai thangtharte hian tlawmngaihna kan nei ta lo ni in kan sawi fo a, na ka ti deuh thin, tunlai a thangtharte nun leh hmanlai(kan pi leh pu te hun) a thalai nun leh khawsak dan hi kan buk tawn thiam lo ni maiin ka hria, hmanlai ai chuan tunlai kan tlawmngaihna hi a tak in a ril fe zawkin kei ka hre ve tlat.

Kan pi leh pu te hunlai khan khaw pakhat a in 50 atanga in 100 vel an ni tlangpui a, khatiang zat in awmna ah chuan a tu a te pawh an in hrechiang em em vek a, veng kilkhawr a naupang pakhat ha bal pawh khawchhungin an hria ang tih tur khawpin khaw khat chu an in hrechiang a, chutiang khawp a inhrechiang ah chuan a tu a te mah tlawmngai lo nih theih leh nih ngam a ni lo tlat, khawltang ensan hlauhna avang te, thenawm khawvengte sawi nih hlauh vang te in theihtawp an chhuah a, chu chu tlawmngaihna a ni lo ka ti hauh lo, hlauh nei tlawmngaihna niin ka hria.

Khang hunai khan nula tlangval reng reng mitthi lumenna a kal lo nih te, khawhar in a kal lo nih te an hreh thin a, an kal lui hram hram a, a chhan pawh beisei an nei tlat, enge?

Khawtlangin a ni chu khawhar in a kal ngai lo a, mitthi lumenna ah a kal ngai lo a, khawtlangin ensan tur, nula khawhar in leh mitthi lumenna a kal ngai lo a ni a tlangval tumah in rim loh tur tih te, tlangval khawharin kal ngai lo chu tu nu leh pa mah in makpa atan an duh lo a, chutiang an hlauh avang chuan tlawmngaih an chhuah thin. Chutiang chuan tunlai hunah hian ngaihdan leh thuvawn fel tak nei i la, hetiang hi kan ni hauh lo ang. Beisei an neih vang chauh a ni thei mai lo maw.

Tlangval chu zawlbukah an riak khawm a, val upa thu in an awm thin, Lal in thu an nei em em a, zawlbuk thu an zah em em thin a, nula tlangval inleng dawngsawng tha lo chu tlangval ten zawlbukah an thlen a tlangval ten ean zilhhauin an in thlengin an tuar tir thin. Chutiang chu nula te hlauh ber anih avangin a derin that an chhuah a, nula fel nih an tum a, an helhkam ber a ni thin a. Tlangvalte tihlungawi kha an hna leh tlawmngaihna lantir an tumna ber pakhat a ni a, tlawmngaihna dik chu a ni ber lo maithei.

Tlangval ten an ngaihsan ber chu nopui dawm thei ani a. Pasaltha, tlangval tlawmngai chuan nula duh duh an thing thei a, khawtlangah ngaihsan an hlawh a, mi zah an kai thin. chutiang an nih theih nan chuan theihtawp an chhuah a, chu chu mi tlawmngai, mi ngaihsan hlawh an duh vang a ni mai em.

Nula tlangval awm khawlo leh nun dik lo chu khawtlangin an zilh a, mi tlawmngai lo ni a an hriat chuan khawtlang zilh an tawk mai thin, engkim tlawmngai taka an tih chuan beisei a nei lo ti mah i la beisei an neih vang a ni vek zawk lo maw.

Taitesena khan val upa awh lui lungtat kha a ak haw a, lungtat ipte a ah tham a lo ah haw avang kham mi tlawmngai ah an chhiar leh mai a, hnial duh tan chuan hmanlai lungtat chu a lian a lawm an ti maithei mahse ipte a ah tham chu kut hnathawk thang tan chuan a rih vak a rinawm loh, tunlai cubic double ang nen a rih dan in ang vel ah ngai ta i la, an ni tan a rit dawn lo chiang.

Khang hunlai khan an rinawm, thil a bo ngai lo te an ti, dikna chen pawh a awm ang, mahse kei hnial ka chak tlat. Khang hunlai a an thil hlu leh ro chu darbel te, thi t, darbu te a ni a. Khang thil te kha tu emaw in lo awt in lo ru ta se khawiah nge a dah ang, hmanlai mizo in chu luh in a langtlang vek a ni deuh ber a, lo ru ni ta se in tlemte awmna khua ah chuan a lang rang dawn lutuk tlat, thil ruk a hlauhawm em em vang a ni zawk lo maw. Tunlai nen hian khaikhin ta i la.

Tlawmngaihna an ngaisang kan ti a, kan sawi a, tunlai thangtharte min dem vak vak a, khang hunlai thalaite khan phut let leh beisei nei lo in eng tlawmngaihna nge an lantir aw ka ti thin. Chhun lama lo a feh, a nih loh leh thintuah la a ram kal thin chu zanlai a phur tak leh tha tho tak a mitthi in an pan fo bik chu a rinawm loh. Chu ai chuan mut an thlang fe zawk fo ang. Lal an hlau a, zawlbuk an hlauh vang chauh a tlawmngaih chhuah thin an ni.

Tunlai ah chuan tlangval, mitthi in a tlaivar thin, tu khaw kha in a engah mah an ngaih loh, a tlawmngaihna avang a khawhar chhungte hnem tur a kal chu a tlawmngaihna a tak fe zawk lo maw. Lansarh duh vang ah pawh lo puh ta i la, phut let a neih chhun chu lansarh duh vang chauh a ni leh nghal. Hmanlai khan zanlai a mitthi an awmin nula tlangvalin mitthi in an pan khawm vat thin, an tlawmngaihvang chu ni pakhat mahse hlauh an nei tlat, chu chu enge, khawtlang zilh leh ensan nih an hlauh vang a ni. Tunlai ah hian mitthi in kal ngai lo chu khawtlangin ensan tur ti ta i la, kan hlau ve viau tho lo maw.

Kan pi leh pu te tlawmngaihna kha a dazat ka ti, hmeithai an hmusit em em a, khaw hmawrah an awm tir a, hmeithai fa chu nula in ah tlangval dangte hmuhsit tuar tu a ni a, hmeithai chuan lo an neih pawh in a tha lai an chang ngai lo. Chutiang khawp chuan hmeithai te kha an hmusit a, fahrah phei chu an hmusit em em thin. An tlawmngai kan ti a, engatinge tlawmngai si chuan thil engkim ah hmeithai te chu duhsak tak a duh an thlan tir a an tlawmngaihna an chungah an lantir theih ngai loh.

Tunlai thalai te kan rual u zawk ten min dem a, tlawmngaihna nei tawh lo anga min sawi fo hi a dik famkim lo, phut let pawh tum i la phut let tur awm miah lo a thalai mi te tan a thil tha ti hi an la tam asin, mi kan tam a, kan hre lo mai chauh a ni. Mitthi in a kal thin thalaite hian enge an phut, phut pawh nei dawn se hmanlai angin phut tur engmah a awm lo. Hlauh an neih vanga kal ah ngai ta i la, khawharin leh mitthi in kal ngai lo thalai khawtlangin an zilh ngai tawh lo a, engmah hlauh tur a awm bawk si lo. Tlawmngaih vang ni ta lo se eng vang nge ni ta ang, kei chu tlawmngaihna dik tak a ni ka ti zawk.

Hmanlai chuan chhun lam ah ram lamah an liam a, thalai inah an awm ngai lo, zan lamah tlangvalin tih tur an nei miah lo, nula rim a nih loh chuan zawlbuka mut a ni mai. Tunlai ah chuan thalai te hi chhunah enge kan tih a, zanah enge kan tih thin min ngaihtuah ngai lo nge an haider zawk. Zan rei tak tak thleng an meng a, zingah rei tak tak an mu leh min ti a, min dem a, min sawisel a, min fakna tur an hre lo, a chhan an ngaihtuah lo ni in ka hria.

A hua hua in haw rawh se. Dawihzep vanga Tahan phai tha tlansan a Cachar phai thleng thla leh ngam si lo(Pawih ral hlauh vang leh vai hlauh vang) kan pi leh pu ten tlang chheng chhe kar a in ekchhe beng tur a min hnutchhiah hnu ah hian kan rual u zawk te vang asin hetia kan awm.

A tawp thleng leh ngam si lo in independent an sual a, hnam tenawm tak kan nih angin sum leh ropuina hmanga ramhnuai tanga thlem chhuah in an awm leh a(an vai chuan ka ti hauh lo, tun thlengin ka pu ngei pawhin siki 0 pawh a la dawng lo), mipuite hmangaih vang a lo chhuak an ni kan ti a nih pawhin kha thiang a chhuak leh tur an nih chuan kha chen chen kha mipuite tawrh tir kher a tul em.

India sawrkar vai thluak chuan sum hmangin a thlem lungawi a, U.T hunlai a sum tam tak lo lut an hman thiam loh avang a hetia keini thangthar ten tuar ta hi kan ni zawk. Khang sum kha Mizoram hmangaihtu inti te chuan anmahni inhaivur nan an hmang a. Tawngkam chiah a ram hmangaihna chuan tun thlengin kan ram a chhuahsan thei tawh lo a, chumi phen a eirukna chuan kan ram a luhchilh mai ni lo in indedendent hial a sual chhuak tawh ni ber in ka hria.

Chu eiruk sum hmang chuan keini thalai te hma ah kan duh zawng apiang chhawp a ni a, a eiru thei fa te neih chu eiru thei lo fa te tan eiru ve thei dinhmun a ding tur a  lehkha zir duhna a lo piang chhuak ta  a nih hi. Tlawmngaihna ti lang turin kan tha te chu kan inawmtleina hmanraw chi hrang hrang ten a ti thum a, an awmdan dik lo chu keini thalaite ah a langchhuak a, an darthlalang kan nih hre lek lo in keini thalaite min dem leh vak vak si.

Tlawmngai taka dikna leh rinawmna lantir fa tan dinchhuahna kawng a kaw tawh lo a, tunge tlawmngaih chhuah a chaw nghei a thih duh ang. Khawtlang tana theihtawp chhuahtu te chu rual u zawk ten lansarh tum vang ah min puh sak a, mahse kan ti zel dawn. Mahni fa te zan a khawharin leh YMA a in hman phal lo khan engatinge mifa te in dem ngawt zel.

Rual u zawkte u, kan pi leh pu ten beisei nei a theihtawp chhuah a tlawmngai nih an tum na kha kan tun hun, phut let leh beisei tur pawh awm chuang lo ah hian keini thalaite hian mi te tan a thiltha tih duhna thinlung kan la pu a, kan ti mek zel bawk asin. Thalai zawng zawng min dem suh u, i fa te kha i darthlalang dik tak an ni a, i tih dik loh chu i fa te awmdan kha en la, i fa te, tlawmngai lo ni a i tih bak kha Mizo thalai kan la tam a, i fa te lak atang bakin beisei lo la, mi fa te va dem tel suh.

 Theihtawp a khawtlang tan a in hmangte hian engmah an phut let lo, phut let dawn pawh nise phut let tur pakhat chiah a awm, Luka 6:31    – “Miin in chunga an tiha in duh tur ang bawkin mi chungah pawh ti ve rawh”. tih chauh kha a ni e.

Similar Posts:

• Tlawmngaihna
• Tlawmngaihna, kan chhuang ‘over’ em?
• Tlawmngaihna hi a tlahniam em?
• TLAWMNGAIHNA vs NIHNA
• Chawimawi duh Tlawmngaihna

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Monday, February 20th, 2012 at 2:32 pm and is filed under Mizo Society & Culture, Mizoram, Whatever. You can follow any responses to this entry through the RSS 2.0 feed. You can leave a response, or trackback from your own site.