Lawmthu sawina

February 27th, 2012 6:00 am by kawlhawk

A hmasain –
Ni 25/2/2012 (Inrinni zing dar 2 vel) – a Aizawl Bazar-pui kangah kan tel ve thu (kan chhiattawhna) hriaa phone call/ message/ facebook leh email hmanga tawrhpuina thu min thawntu zawng zawng – mi(sual) fel tak takte chungah thinlung takin lawmthu ka sawi mawlh mawlh e.

A kan chhan –
Kang tuar zawng zawngte ngei pawhin vawiin thlengin a kan chhan kan hre lo! A hmun nghaktu – kan chowkidar-te nupa pawhin an hre hek lo. Anni nupa phei chu “Zing dar 3-ah rawn thlen kan tum a nia, lo tho hma rawh u” tia kan nuin a chah avangin dar 2 : 15 am (?)-ah alarm an kam a, chumi alarm avanga harh chauh zawk an ni awm e. Kan harh meuh chuan dawr vel chu thelh rual lovin a lo alh hluah hluah tawh… an ti. Chuti ni suh se, nupaa kan hlum mai pawh hlauhawm tê a ni.

Vanduaina phena thilmak! –
1. A kan hma (Ningani) khan ka arphuahna khawl a chhiat avangin siam tha turin ka phur chhuak a. “Inrinni dawnah ber kher…” tiin ka ang bui buuui nghe nghe. A siamtupa pawh Zirtawp tlaiah tal lak theih ngei ngei turin ka nawr chamchi nghe nghe a. Mahse, a siam zo hman ta ngang lo! Vanduaithlak taka thiante khawl zawng zawng a kan ral laiin ka khawl a him hlauh. Lo siam zo hman ta se…???

2. Ka khawl a chhiat miau avangin thiante khawl ka ban a ngai dawn a, a tuk Inrinni a ni mai si a, (Inrinni-ah chuan thiante’n nilengin khawl an hmang dawn tih hriain…) Inrinni-a Hotel 3-a ka pek tur – arsa quintal 1.5 zet chu thiante khawl awl lai chuhin “Vawiinah ka rawn dah mai ang nge…” tia hotel-ho biain Zirtawp ni khan ka pe chhuak hman. Ka khawl che lovin, ar khati zat kha Inrinni-a pek turin lo dah ta ila…???

3. Samtlang khuaa kan thianpa, kan ar vulhtu – laklawh engang mah ila Inrinniah chuan ar phur chhuak duh ngai reng reng lo) chuan “Zirtawp zingah emaw, tlaiah emaw…” kan tih ngawng ngawng pawhin “Tuntum chu Inrinni zingah ka rawn dah ang e…” a ti tlat a. Zirtawpni khan rawn dah ta se…???

4. A kan nasatna ber floor-a thil awm, thir zawng zawng a kan chhiat vek lai leh thing zawng zawng meihawla a chan vek laiin thil pawimawh tam tak ka chhinchhiahna, cash memo leh ba bu nenlam a pawimawh chin zawng chhui theihin a lo him pial.

Aw le! Thuhmaa ka sawi ang khian – mi(sual)te tawrhpuina leh tawng thlamuanna ka dawng nasa em em a, ka lawm tak zet a ni. A kan tuk maiah pawh min pui tura hnathawh kawr nena mi(sual) lo kal te, puih theihna che ka nei em?… tia mi(sual) min rawn phone-tute, vawiin thlenga mi(sual) inleng kan neih te, heti taka in khawngaihna a taka in rawn lantirna leh thinlung taka in mi tawrpuina, in mi thlamuanna aw-ka te avangin ka lawmthu hi ka damchhungin ka sawi ning ngai lo ang. Chutih rualin, tun atang chuan “Vanduaina phena thilmak” avang zawk khian lawmthu min lo sawipui tawh zawk dawn nia.
((E… chuan, bungraw lam chu sawi lo mai ila… he chhiatnaah hian ka ar 100 vel zet chu a kang hlum ve a, vawk vulhtute’n vawk chaw atan an hawn hlawm…))

In zavaia chungah ka lawm takzet e.

— In thian
— kawlhawk

54 Responses to “Lawmthu sawina”

Showing 10 of 54 comments — the earlier comment pages were not captured when this site was archived.

Ignatia (33-115 AD) Says:
February 27th, 2012 at 4:26 pm
Hlauh hlepa chhiar theihna hi khutah kan thinlung chhunga awm a ni reng a ni!

Malsawmna dawng zel ang che!
sheldon170 Says:
February 27th, 2012 at 5:01 pm
Vanduaina karah pawh lawmna chhiar thei mihring – ka ngaisang hle mai che. Pathianin a let tam takin mal a sawm che ka ring tlat.
awmawmpuia Says:
February 27th, 2012 at 5:29 pm
Khai a..tunlai ka buai lutuk a Kawlhawka chhiat tawh pawh tunah ka hre ve chauh a nih hi. I vanduaina ah ka tawrhpui takzet che a, vanduaina karah lawmna i hmu thei(thiam) hi ka lawmpui thung che. Tang fat fat la, i tlu a i dingchhuak leh thei tih ka ring a ka beisei bawk e.
doc_lib Says:
February 27th, 2012 at 5:42 pm
Miller of the dee tih tluk a hlu, mizotawng ngeiin Zofa te tana ar puahtu ka ti ve mai dawn che em ni ni hehehehe
Mahse tak tak a, i khawl kang ve si lo a, i thenawmte khawl a kan chhiat vek chuan..i ar za kang hlum ta se, i thenawmte khawl a kan chhiat vek a, i khawl chauhin hna a thawh theih tak si ah chuan..ar 100 man chu kar khat chhungin i hmu let ngei anga (i thenawm ten arpuahna nei ve tawh hek lo)..an in din thar leh nan thal 3 vel ngai ang ta se..thla thum chhung chuan everage in kar 12 a awm tihna ania, kar 11 chu i pum bilh hmak thei dawn.. kar khat ah ar puah sa kg 100 siam chhuak thin khan kg 500 i siam chhuah a ngai tawh dawn a..ti chuan kg 100 i loss laiin kg 400 i gain ta char char a. ar kg 1 120 in hralh pawh ni la, kar 12 chhung chuan Rs 648000 i hlep daih dawn tihna ania..Zoram sorkara eng sorkar hnathawk mahin an hlawh pha lo..kar 12 chhunga hetiang i hlawh hman anih chuan kar 52 ( kumkhat chhung) a hlawkna tur hi chhui tham a awm..Bazar hi kum 3 i hal chuan tumah sawisel phak rual lova hausa i ni mai dawn…lolzzzzzzzzzz fiamthu tak tak…Miller of the dee nihna ka hlan che..
vakul Says:
February 27th, 2012 at 5:53 pm
A lo ni maw, kawlhawk. Ka lo hre ve reng reng hleinem.

A zia lo hle mai a, i thulak dan erawh a puitling khawp mai, siamthat theih tawh lohva vui vak hi a tha lo mai a ni lo a malsawm lo va, nang erawh ka tluk lo che.
keimah Says:
February 27th, 2012 at 9:44 pm
Thianpa Kawlhawk, in vanduainaah ka tawrhpui che a, vanduaina kara Pathianin special taka a enkawlna che khi ka lawmpui che a, rilru a khawih khawp mai. Joba ang khan i hloh let tam takin Pathianin vur let leh che rawh se.
51
grady Says:
February 28th, 2012 at 7:52 am
Thianpa Kawla zet chu, khawvel nun dan i van thlir thiam tak em!! Mi awhawm ber zing a mi i nih loh pawh in a sang pawl chu i ni ngei ang le. I tawrhna aiin i lawmna hian mittui a ko zawk mah.
52
mr.Duhlova Says:
February 28th, 2012 at 1:06 pm
Ka zinna ram atangin, Pu kawlhawkate chhiattawh thu ka lo chhiar a, ka comment thei si lo, hei tlai khawhnu ah, ‘better late than never’ changchawiin ka rawn iak thar ve a ni e.

Pathian humhmna i chang nasa hle ka ti mai, mahse midangte’n 100% chhiat an tawhlai a, lo him pial bik chu, mi ngaihte pawh a thalo ang nge tiin, i ar 1oo (ui-awm tham hle)chu i chan ve ta niin a lang. A pawi ka tih pui hle mai che…..mahse, Pathianin mal a sawm ngei ang che.
53
Lersia Says:
February 28th, 2012 at 1:08 pm
I tuar thiam a a lawmawm hle mai…
54
mamboihi Says:
February 28th, 2012 at 8:53 pm
Kawlhawk chu “Tuarna phena malsawmna” i hmu thiam hi a ropui. Pathian in awmpui zel che rawh se.