mi(sual).com

1st. Wednesday: Saiha khawpui lûn lai taka bazar a kâng a, in 29 a kâng fai vek a, a kan kai hlauhthawnna vangin in sawm dang thiah a ni. Heng in kâng leh in thiah taka khawsa hi chhungkaw 57 a ni a, bungruate bâkah, dawr bungraw eng emaw zat a kâng ral a, mihring thi an awm lo a, mi pathum hliamin, vawk pahnih an thi. He kangmei rapthlak tak hi kângmei chhuah tanna in luahtu, Vanlaltlinga s/o. Zahlira, Saikhamakawn, Aizawl amiin in luah man a pek theih loh vanga a in a hal aṭanga lo pakai a ni.

2nd. Thursday: Delhi Mizo Zirlai Pawl-in lehkhabu tê an buatsaih, ’8th. Schedule-a Mizo tawng dah luh zirchianna bu’ tih chu Aizawl Press Club-ah MJA President, H Zosangliana’n a tlangzarh. MJA President chuan, 8th Schedule-a Mizo tawng dah luh chu Mizote, a bikin ziaktute tan hamthatna ni tura a ngaih thu a sawi.

3rd. Friday: Kangmei Ven Hapta, ‘Fire Prevention Week, 2012′ chu CM, Pu Lal Thanhawla’n I & PR Auditorium-ah a hawng. Hawnna inkhawm, -a neihah CM chuan, ‘ram kan chhan ber chu fimkhur tawk loh vang a ni’, a ti. He inkhawmah hian State Level Committee on Fire Prevention Committee Vice Chairman, Environment & Forests Minister ni bawk, Pu H.Rohluna pawhin sorkar programme lian leh pawimawh ber, NLUP chu ram kang tur venna atan leh ram ngaw tha siam nan pawh a tangkai hle dawn niin a sawi a, PCCF, Dr.SS Garbyal pawhin thu a sawi bawk.

4th. Saturday: Mizoram State Cancer Society, Mizoram State Cancer Institute leh Mizoram Cancer Care Foundation te buatsaihin Chanmari YMA Hall-ah World Cancer Day 2012 hman a ni a; khuallian, Brig. SP Rawat, SM DIG, Hqrs 23 Sector, Assam Rifles niin MCCF website thar www.mccf.org.in chu a hawng nghal.

5th. Sunday: Mizoram Baptist Kohhran Hmeichhe Pawl (MBKHP) Inkhawmpui vawi 48-na Zobawk Playgroun-a tun thla ni hnih (2nd. Feb) a ṭan tak chu tluang takin a ṭiak ta. He inkhawmpuiah hian, Speaker Rev C Lalhungliana chuan ‘Sim rawh u! Vanram chu a hnai tawh e’ MT 4:17 tih thupuia hmangin Pathian thuchah vawi ruk a sawia; kalkhawm mipuite a hneh hle.

Palai riak lut 2500 vel an awm a, Lunglei Town huam chhung atangin riak lut an tam lo va, langin a tam zawkin Inkhawmpui hi an chhim a ni. 2012-2015 MBKHP hruaitu thlanna hetiang hian neih nghal a ni:

1)President -Pi LH.Sangziki Venglai(FOD ruat)
2)Vice President – Pi Zanguri, Venghlun
3)Organiser -Pi B.Singpari(Pastoral ruat)
4)Asst.Secretary – Dr. Chawngthanpari, Serkawn
5)Treasurer – Pi H. Lalkimi, Sethlun
6)Fin.Secretary – Pi Zosangi, Chanmari
7)Sr.Adviser -Upa C.Hmingliana Bazar(FOD ruat)

Tin, MBKHP Budget atan FOD –in Budget Celling Rs 7,00,000/- a siamsak bawk.

6th. Monday: Sports Minister, Zodintluanga’n Thuamluaia Mual, Lungleia phûl lem phah hna kal mek a en a; Lunglei mipuite chu khelmual hi anmahni ta anga enkawl theuh turin a sáwm. Sports Minister hi Parliamentary Secretary (Sports) S Laldingliana, Lunglei HPC Vice Chairman Joseph Lalhimpuia leh Lunglei district-a sport asssociation hotute’n an tawiawm a ni.

7th. Tuesday: Anti-Corruption Bureau (ACB) Director, Sundari Nanda chuan Mamit DC conference hall-ah Mamit DC leh Mamit khawpui chhunga sorkar department hotu lú-te a kâwm a; “Hlemhlêtna chu mimal rilru put hmangah a innghat a ni,” a ti.

8th. Wednesday: MHIP Gen Hrqs hruaituten, An President Pi B.Sangkhumi hovin village council leh local council inthlan tura hmeichhe candidate te pualin MNF Gen.Hqrs. hruaitute Mizo Hnam Runah an kawma, MNF Gen.Hqrs. Treasurer Pu Vanlalzawman alo dawng sawnga, inkawmna tha tak an nei.

9th. Thursday: Tlangkawi, Burma rama JCB Driver Lalkrosliana, Champhai tlangsam chu JCB-in a awmah chilin a hmunah a boral nghâl. JCB hi handyman-in a khalh laiin Driver hi a kailawn atang a tla a, JCB hian a chilzui mai nia sawi a ni. JCB hi Ngurzikpuia w/o Pari Vaphai ta a ni.

10th. Friday: Lengpuiah in pahnih Pu Lalnuntluanga In leh an thenawm Pi Lalngeni In chhawng thumte chu bungraw chuh hman lovin a kang ral vek. An ṭhenawm lehchhawnga Pu Lalthlamuana In a kan kai leh bawk avangin a bang ṭhenkhat tih chhiat a ni bawk. He kangmei chhuah chhan hi Pu Lalnuntluanga In luah tu Zakapa’n an mutbu hal chunga a kalsan vanga chhuak a ni. Zakapa hi zu in mi niin Mizo mipui zu in ṭhin tam zawk tena an chin dan ang bawka zu sual nana hmangtu a ni.

11th. Saturday: Pu H.Zanghinga (50) Saiha Tlangkawn ruang chu naupang ram kalten Saiha tlang Lui thlen hma a Pu Thanphuliana huan sir vau kamah an hmu. A ruang an hmuhna hmunah hian chempui ṭha vaklo hmuh a nih bakah tun hma lam pawha intihhlum lo tum tawh ṭhin a nih avangin mahni intihlum ngei a nih rin a ni. A fate panga leh a nupui a kalsan.

12th. Sunday: Vanlalthuami (27) d/o Lalrama Tlungvel Zotui veng chu a pasal anga a awmpui Kapthanmawia tuna Govt. Complex Aizawla cheng chuan a hrawkah chem in a zaihlum. Amah pawh inthah ve ngal a tuma; mahse, an chhan hman a ni. Mahse, chhan hman tute vek hian a hnuah an chilhlum ve leh ta tho a. Chhan lo se an hmingṭha zawk tur a.

13th. Monday: Rasthriya Madhyamik Shiksha Abhiyan (RMSA) hmalaknain sorkar high school leh RMSA sikul thara zirtirtute tan study tour buatsaih a ni a, zin turte hi RMSA Mission State Project Director, T Rohmingliana’n Teachers Inn atangin a vai liam.

RMSA hmalakna hian sorkar high school RMSA school thara zirtirtute tan kumin atangin study tour buatsaih thin a ni dawn a; kumin chhung hian Mizorama zirtirtu 762 tan buatsaih tum a ni a, zirlai 520 tirh chuah tum a ni bawk. Tun ṭuma chhuak ta study tour-a kalte hi Aizawl district-a high school zirtirtu thlan chhuah te an ni a, ni hnih chhung Kolkata khawpui fanpui an ni ang.

14th. Tuesday: Darlawn Bazar venga in 3, Pu Rosiamliana in, Pi Sangpuii in leh Pi Chhanhimi te in chu bungraw chhuh hman lohin a kanga, a bul vela in ding 5 thiah a ni bawk. In kan tanna ni a sawi Pu Rosiamliana in hi a chhawng ani a, a chung chu in neitu Pu Rosiamliana ten chenna atan an luaha a hnuai kawng an chu an fanu Pi Hriatpuii ten thingpui dawr leh nepnawi dawr atan an luah a, he thingpuidawr atang hian kangmei hi a chhuak tan niin an sawi.

He kangmei chhuakah hian thi an awm lova, kangthelhna lama intipalh, perek rap leh hliam tenau nei te chu awm mahse hliam serious an awm lova, a kan atanga darkar khat velah kangmei hi tlawmngai a chhuak khawm ten an thelh mit thei a ni.

15th. Wednesday: Dilkhan leh Lungpher inkarah Laltanpuia (58) S/o Nikhuma [L] Tualbung chu lung hal perin a deng hlum. Thudawn danin Laltanpuia hnang la haw lam chu lung halna chhak vela a kal laiin, lunghalna per hian a sur hnan a.

A lu a keh nasa hle a, a ban leh ke ruhte a tliah bawk bakah a awm ruhte pawh lang khawpin a deng chhia a, ka pawh chhawn lovin a hmunah hian a thi a ni. A ruang hi Saitual damdawi in-ah postmortem a ni. Lung haltute hi Myanmar lam mi an niin Saitual police-ten an la nghal a ni.

16th. Thursday: Joint YMA field Vaivakawnah Will Graham Crusade chu ṭan a ni ta. He crusade hi Billy Graham Evangelistic Association (BGEA) ten Mizoram Synod a rawn dawrna atanga hma lak chhoh a ni a. He Crusade hi Mizoram Synod hian lo thleng thei ta lo se, hmarchhak state dang remchang Nagaland emaw Meghalaya emawa nghah tura tih a ni a. BGEA lamin Will Grahama hmanga Crusade an kalpui danah chuan a hmingah pawh Celebration of Peace with Will Graham tih zel a ni a, Mizoramah chuan a hriat awlsam zawngin Will Graham Crusade tia vuah a ni ta a ni.

Hemi huna thusawi tu tur hi tarlan ang khian William Franklin Graham IV a nia; tun hnaia khawvela Pathian thuhrilru ropui bera chhal ngam Billy Graham-a tupa a ni. He crusade hian tun Pathianni lo awm tur (19th. Feb.) thleng a awh ang.

17th. Friday: Ministry of Home Affairs, Govt. of India Joint Secretary i/c North East Pu Sambhu Singh hovin Mizoram sorkar aiawh Home Secretary Pu K. Riachho, IAS Home Secretary leh Tripura sorkar aiawh Principal Secretary Revenue & Rehabilitation Pu G.K. Rao te Tripura-a New Secretariat Conference Hall-ah Tripura Sakhan tlangdung a Mizo, Tuikuk hlau a raltlante chhawmdawl dan chungchang an ngaihtuah a.

He meeting hian Mizo raltlan chhungkua 83 te hnena chhawmdawlna pek an rem ti a. An ruahman dan chuan Tripura a Jampui tlangdung a chhungkaw 32 la awm te chu Tripura sorkar kaltlangin chhawmdawlna hi pek an ni ang a, a dang chhungkaw 51 Mizoram a raltlan te chu Mizoram sorkar kaltlanga pek anni thung dawn a ni.

18th. Saturday: Chief Minister Pu Lal Thanhawla chuan Mualpui, Aizawla Rajiv Gandhi Stadium tur sak hna kal mek chu a hmunah kalin a enfiah. Chief Minister hian Stadium hi chik taka fang kualin, a sak hna enkawltu Mizoram PWD Engineer-te chuan chipchiar takin hnathawh chi hrang hrangte chu an hrilhfiah a.

Chief Minister chuan Stadium tur chu a tha thawkhat hle nia sawiin tuna sum ruahmanna awmsa hian Stadium puitlinga a peih theih hrih dawn loh avangin, a nih tur anga tih puitlin anih theih nan tul leh mamawh ang te chu ngaihtuah chhoh zel a ni ang tiin, sak puitlin ngei a tum thu a sawi bawk. Rajiv Gandhi Stadium sak mek hi Stadium puitling ni thei tur hian sum Rs. 150 Crore mamawh a ni dawn a.

Phase I Project atana Rs. 25 Crore 12th Finance Commission atanga hmuh chu hman zawh tawh a ni a. Hemi baka State Plan Fund Plan atanga Rs. 10 Crore pek belh pawh 90% hman zawh tawh a ni bawk. North East Games Mizoramin a thlen dawn avangin, tuna synthetic track hna thawh mek hi a hun aia hma a lo thawh lawk anih thu Engineer-te hian an sawi bawk a ni.

19th. Sunday: Lalhnema S/o Laldailova, East Phaileng khua chuan a nau Lalbuatsaiha ban rekah a sat chhum. Lalhnema leh a nau Lalbuatsaiha hi In khata awm an ni a, a nu leh pate chu Aizawl lamah an awm a ni. Engemaw inhmuh thiam lohna neiin Lalhnema hian a nau Lalbuatsaiha hi In atanga um chhuakin kawt laiah a sat a, a nau chu a banin a lo indang a, a ban rek vei lam a sat chhum hmawk mai a ni. A mah pawh inchhunga tlanlutin inawhhlum ve nghal a tuma; mahse, khawtlang mipuiin an chhan hman a ni.

20th. Monday: Mizoram-in state a hmuh ni ‘Mizoram State Day’ vawi 25-na a ni a, hemi pual hian Serchhip a 14th. Assam Rifles awm te chuan Serchhip mipuite tan “Half-Marathon Race” hlawhtling takin an buatsaih a, he hunah hian thalai leh naupang 200 vel telin kilometre 12 a thui an tlan a ni.

21st. Tuesday: Mission Veng Joint YMA chuan an huam chhunga local council indang tur pahnih – Model Veng leh Tuikhuahtlang YMA-te thlah nan hruaitute pualin DYO Hall-ah chawhlui an buatsaih a, bialtu MLA, Lt.Col. ZS Zuala’n a telpui.

22nd. Wednesday: United National Liberation Front (UNLF) hel pawl nia inchhal mi pahnih – Khellambam Bordan (37) s/o. T Nageshmore Singh (L), Chanam Sandrak, Manipur leh, Samering Leishangthem (30) s/o L Angou Singh (L), Kangpal, Manipur te chu Vairengte police-te’n February 12, 2012-a Vairengtea an man hnuah, Manipur police-te’n Kolasib Jail atangin an rawn la.

23rd. Thursday: Mizoram district paruka village council leh Aizawl Municipal Council huam chhunga local council inthlan chu ram pumah (chu chu Mizoram tihna, invauna leh intihthaihna a awm avanga Aizawl leh Kolasib district-a khaw 15 leh Tripura lamin an ram chan nia an sawi avanga ṭhulh Mamit district-a Phuldungsei (Jampui) khua te tiam lovin ) neih a nia; Aizawl khawpuia local council (LC) inthlanah vote nei mi 1,73,757 awm zinga mi 1,18,736 (68.33%) in vote thlakin LC 82 zinga 42-ah MNF-in hnehna changin, seat 522 awm zinga 263 an la a; Congress-in seat 225 lain, veng 29-ah hnehna an chang thung. MPC party-in seat 17, ZNP-in seat 14, PC party-in seat pakhat leh Independent-in seat pahnih an la bawk. Hetih lai hian, party anga chak bik awm lohna veng 11 a awm bawk .

Village Council inthlanah vote 3,90,983 awmin, 2,99,286 (76.54%) a tla a; Congress party chuan VC 285-ah hnehna an chang a; MNF-in VC 132, ZNP-in VC pahnih, HPC-in VC pakhat lain, independent candidate-te chakna khua/veng 20 leh party chak bik awm lohna 53 a awm bawk. He inthlana vote thlaktu upa ber chu Aizawl district-a Daido khaw pitar kum 105 mi, Thawlvungi a ni. Tun ṭum inthlanah hian khua/veng pali-ah vote inzat avangin ṭhumvâwr na a awm. Tin, ṭhalai, kum 25-45 inkar candidate an tam hle a, candidate tling zingah Raymond Vanlalruata (INC),kum 24 mi chu a naupang ber a ni.

24th. Friday: I & PR Conference Hall-ah sorkar sum enkawl leh pek chhuah kawnga Reserve Bank of India-in kalphung thar a duan, CTS system leh ECS/RCS hman dan zirhona neih a nia; Mumbai, Kolkata leh Guwahati-a RBI hotute’n zirtirna an pe.

25th. Saturday: Aizawl New Market building pakhata sa zawrhnaah kângmei a chhuak a, sa chi hrang hrang tam tham tak leh chawhmeh zawrhna tlem bakah cosmetic dawr ṭhenkhat a kang. Bungrua leh thil zawrh lai kâng ralte chu hriat theih chinah cheng nuai 46/- hù vela chhût a ni.

26th. Sunday: Lalthanzauva (42), Hnahthial Kanan Veng chuan Hnahthiala hmeichhe naupang kum 6 mi chu inkhawm laia, páwna a awm lai thil leisaka thlêmin, an inah a hruai a, a pawngsual. Lalthanzauva’n naupang a hruai lai hi biak-in atangin nu pakhatin a hmuh avangin, a ngaihven nghal a, a haw kawngah naupang chu hmuin, thil awm dan a zâwt a, rei tak a dâwp hnuah hmeichhe naupang chuan a sawi ta a ni.

27th. Monday: Saiha MDF & MNF Coordination Committee chuan Saiha bazaar-a traffic point-ah vantlang inkhawm neiin, MADC sorkarin nikuma CCB Rules an siam thar chu an pawm loh thu an sawi a; CCB Rules chu MADC himna tihbona tur leh state thuhnuaia inbarh luhna nia an ngaih avangin an hâl.

28th. Tuesday: Kum 2012 atana YMA kumpuan, ‘Ram leh hnam humhalh’ tih chu Central YMA President, T Sangkunga’n Chanmari YMA Hall-ah a hawng. Kumpuan hawnna inkhawm hi CYMA Vice President, Lalbiakzuala’n a kaihruai a, kumpuan thupui hmangin seminar leh leadership training neih nghal a ni.

29th. Wednesday: Mipui ten computer leh internet hmanga sorkara lungawilohna an neih leh an thil hriat duh an zawh zung zung theihna tura hmanrua ‘website’ thar, ‘Mipui Aw-https://mipuiaw.nic.in/’ tia vuah, sorkar laipuia Department of Administrative Reforms and Public Grievances leh Mizoram sorkar bultum Centralized Public Grievance Redress and Monitoring System (CPGRAMS) chu Chief Minister Pu Lal Thanhawlan Mizoram Legislative Assembly Secretariat Conference Hall-ah bul tanna tur a tlangzarh.

Similar Posts:

• ADC pathumin President hnenah MP seat 1 dil tum
• Mizoram Government finally approve direct funding to 3 Autonmous District Councils of Mizoam
• Mizo students union Silchar din a ni ta
• Do we need more Babus ?
• Sorkar hnathawkin budget sum ei tam

Recent Posts:

• The Alaskan serial killer
• Thanglian, Aw…… Thanglian !
• CFL Hmingthanga Thihcham Vawikhatna Pualin
• NGAIHNAWM KAWLEKSAWN – 2 :
• Pathian Kut Dinglam {Sunday Pual}

This entry was posted on Thursday, March 1st, 2012 at 9:30 am and is filed under Information. You can follow any responses to this entry through the RSS 2.0 feed. You can leave a response, or trackback from your own site.