mi(sual).com

“U Zo…”

“Sawi rawh Jenny, sawi rawh”, tih pahin ka kuah nghet sauh sauh a.

A rawn chhunzawm a, “Ihmaw, u Zo…..i telloa nun harsat tur zia chu ka hria a lawm, mahse chu aia he ka hringnun hian hlauhthawnna a neih chu kumkhua atan min kalsan ang tih hi a ni… u Zo ka hmangaih che asin… . i telloa nun…..”. A sawi thei tawh lo.

Ka hlimna min thlen thintu, he ka thinlung sak tak pawh tui anga luan heuh heuh tir thintu a biang tai no tak atanga mittui lo hnam chhuak chuan a rilru zawng zawng a sawi tir thei mawlh lo. Min en a, min kuah a, engdang sawi zai rel tawh lo-in ka awmah chuan a bei hle hle a.

Ka hmangaih a ni tih a hriat avangin ka bula awm nuam a ti em em thin a; min hmangaih a ni tih ka hriat avangin a kianga awm hi ka ning ngailo. Ka hmangaih ber mai ka kalsan tur chu hreawm ka ti em em a, mahse ka chunga loh-theihlohna chuan ti ngei ngei turin he ka rilru leh taksa hi min tur lui awn awn bawk si.

Ka mitthlaah a lo lang a, Office chawlhni-a an veng lui pher nuam taka kan insuk dun ni te kha. A thawmhnaw hak pan tak tuiin a tih huh avanga a mal no tak leh a awm bawr lang tlang haih te, a tisa zawng zawng lang siloa a mawina pholang tawk lek tura a kawrbah hak fuh zia te, ni thlara a mal bawr pian mawi tak mai suangtuahna ti kal thui em emtu te leh ka rilru lak pen tum niawm taka min han nuih ‘seih’ lai hmel te nen lam khan! Mawi famkim hian a mawi a, siamtu ti ‘Siamtu’ tirtu chu a va’n ni teh lul em. Kei lah tisaa din ka nih avangin Jenny-i mawina leh itawmna avanga ka suangtuahnate pawh chu thil awm lo lutuk niin ka hre lo. Lui dung chhir paha tui ti chip chep a’n chaih velte chu ka thlir reng a, a rah chhan a nal avanga a sir lui kama chhawl hring no hnup mai chunga an tlu hnap te, a tluk paha a mal no tak mai han intai pial ralh te, ka kaihthawh ngena beisei taka min han melh ralhna a mitmeng paw chia te nen lam. A beisei chu duat taka chu a tlukna hmun ata kaihthawh chu a ni; chu veleh kei atan muan chi a nilo tih ka hria, ka thut hmun atangin ka kaihthawh phuta  a kut a lo phar chhuah chu vawn tumin chet ka la thuai a, ka vuan a; mahse amah zawkin min lo pawt a, tal chhuak turin chakna reng ka nei lo. Ka kut pahnih min lak sak a, a awm bawrah chuan nghat turin min ti a, a heh sen ham mai chu chhuang tak hian a rawn vanvadah pui a, kei atan khawdang hawi sawn san chi a ni tawh lo. Duham takin kan infawp a,  kan inhmangaihna kuhmum chu par chhuahtir a lo ni ta. Kha mi ni-a kan vela thlifim thaw heuh heuh leh lui luang ri her her te kha chawl hahdam ve thei ni sela Jenny-i nena hmangaihna lipuia kan inliluh lai kha eng dang tih zai rel lova min thlir ve ngei ka ring hial thin. Mahse an tan Siamtu remruat dan theih a nilo, chawl thei an nilo.

Thawhtan tuk a lo inher chhuak ta. Zan hmasa lam kan mut loh avangin thawhhai a awm lo, zan tir atanga khawvar thlenga ar khuang chu ka bengah a cham reng a. “U Zo, chu chu khuan tawp berna tur a ni tawh ang a”, tih pahin an ar in-a arpa thlazap ri chu ngaithla turin min ti a. “Aw, ni tawh e, chu khuan chu kan inkar ti hlatu tura chhinchhiahna hnuhnung ber tur a nih chu”, ka han ti a.  Khuan tawpna chu a zo a, an sitting room thutthleng atang chuan ka tho a, kawngkhar thleng min thlah a, kan in lam pan chuan ka haw ta a ni.

Ka insiam sawk sawk a, a hma ni-a ka thawmhnaw dang zawng ka thawn tawh avangin ken tur em em ka nei tawh lo. Jenny-i ka sawm phei a, ka kalna tur Sumo Counter lam chu kan pan ta a. A hmun kan thlen chuan rei pawh rial lo-in kan khaw lama haw tur chuan Sumo chhungah chuan ka thu lut ta a. Mahse ka hmangaih ber Jenny-i hmel hmuh leh chu ka chak a, Sumo kawngkhar atang chuan ka dak chhuak leh hram a, a bianga mittui luang tle siar mai chu ka va hmu a, Sumo atang chuan ka chhuk leh a, midang hmai pawh zah zo tawh lo-in ka kuah vawng vawng a, “Jenny, ka hmangaih che sin, kumkhuaa ka nupui ni turin ka rawn lam leh vat ang che, rinawm takin i lo awm dawn nia”, tiin Sumo-ah chuan ka luh san leh a, kan tum ram lam pan chuan kan chhuak ta a ni.

Nileng kan tlan hnu chuan zan dar 8 velah Aizawl chu kan thleng thei hram a, ka chhung ten a hranpaa min lo hmuah avangin kan khaw lam pan chuan a zan a zan chuan Aizawl chu kan chhuah san leh a. Zan dar 11 leh a chanve chuan in kan thleng thei hram a ni. Ka chhung te chuan lawm tak hian min lo dawng sawng a, ka chanchin zawng zawng chu hre chakin zawhna hrang hrang min zawt a, mahse a zavai erawh chuan ka chhang lo. Ka intihfai zawh chuan khumah mu turin ka inbuatsaih ta a, mahse ka muhil thei hauh lo mai. Ka rilru chu a kal thui em em a, Jenny-i ka ngaih avanga ka nunram khawhar lutuk chuan mit chhin zai min rel tir thei lo. Ka kalsan dawna a lungngai hmel kha ka mitthlaah a lo lang a, an ‘landline’ phone number-ah chuan biak kan tum a, mahse line a lo chian loh avangin biak theih a ni bawk silo. Jenny-i telloa ka zan hmasa ber chu khawhar takin ka hmang zo ta a ni.

A tuk a lo inher chhuaka, ka thil tih tum hmasa ber chu Jenny-i biak a ni. Phone ka ban nghal thuai a, a number min pek chu kut khur dar dar chung leh nghakhlel tak chung siin ka’n hmet kauh kauh a, a rawn ri ta ral ral a. Aw zawnga mawi ka tih em em mai, min hmangaih thu min hrilhna aw tham mawi tak mai chuan, “Hello”, a rawn ti a. “Hello, Jenny, Zoa ka nia, i dam em”, ka han ti a. Mahse aw dang hriat tur a awm tawh lo, ka thawm hriat chu tap ri leh lungchhe taka inhnit ri bak a ni ta lo. “Jenny tawng ta che, i aw ka hre chak asin, ka va’n ngai tak che em…..”, kei pawh chuan ka chhunzawm thei ta bik lo. Rei tak kan ngawi dun a, mahse mipa zawk ka nih hi tiin ka intipachang lui hram hram a. “Duhtawk phawt ang aw Jenny, ka hmangaih che nia, ka sawi kha i lo vawng reng dawn nia aw”, tiin phone dah  chu dah ka tum a. “U Zo ka hmangaih che, ka lo nghak reng ang che, i tan Jenny ka ni kumkhua ang”, tiin phone chu a dah ta a.

Mahni tul tul thawkin kum chu a lo vei ve ta reng mai a, a khat tawkin Jenny-i nen pawh chuan kan inbe reng bawk a. Ka haw hnu thla ruk hnua amah hmu tura ka va zin leh kha kan inhmuh tawpna ber a ni a. Thla ruk dang a liam leh meuh chuan Jenny-i pawh chu biak hmasak loh chuan a hnen atangin biak hmasak chu beisei chi a ni ta lo. Mahse ngaihthatlohna em em pawh nei chuang loin Jenny-i nena kan nakin hun tur chu ka ngaihtuah reng thin a, ka rilru luahtu ber a ni.

Kar khat dawn kan inbiak tawh loh avangin chawlhni inkhawm ban chuan Jenny-i chu biak kan tum a, phone line a chiang thei bawk si lo. An inkhawm aniang tiin ‘nakinah ka be mai ang e’, tiin thildang tih zai ka rel ta a ni. Chawhnu a lo inher chhuak a, boruak pawh a dai tawh hle a, ka chawhma rilru ang chuan Jenny-i chu biak tumin an ‘landline’ number chu ka’n hmet leh kauh kauh a. Mahse Jenny-i aw ka hre lo, a nu chuan lo la-in Zoa ka nih thu te ka’n hrilh a, Jenny-i ka ngaihthute chu ka hrilh a, a hma thei ang bera lo zin ka tum thu te pawh chu a hriat ve atan ka’n ti ri tel zel bawk a.

Mahse a nu hnen atang chuan ka beisei ngailoh thil ka hre ta. Jenny-i chu a hma kar inrinni mai khan an khaw mi tlangval nen an lo tla dun a lo ni a. “Zoa, he thu hi i hriat kan hlau asin, hrilhtu che nih hi kan chhungkua hian kan hreh lutuk, tunah hian an awmna chin pawh kan hrelo. I awmloh hnu reilo te atang khan he tlangval hi a lo leng thin a, mahse Mami (Jenny-i) paw’n a be tha ngailo. ‘Mami lungleng khawhar ka rawn rim a nih hi’, tiin a fiamthu mai mai thin a, mahse hei tunah zawng kan beisei ngailoh thil kan tawng ta a nih hi. Zoa, he chanchin duhawmloh tak chungchangah Mami hmingin kan chhungkua hian ngaihdam kan dil tak meuh meuh che a ni”, tiin Jenny-i nu chuan engkim chu min hrilh ta a. Phone pawh chu kan dah ta a ni.

Ka hringnuna ka beisei ngailoh chanchinin chutia min han deng dawt chu ka hrilhhai em em a, hmangaihna avanga ka mittui luanna thin ngeiah chuan ka hmangaih ka chan tak avanga lungngaihna avangin mittui a lo hnam chhuak ta zawk si a. Ka haw dawn tuma a thusawite kha ka thinlungah ka la vawng reng a, a hnena ka thutiam zawng zawngte pawh kha ka hringnun dam chhan a nih teh lul vei nen. Ka tan mawi taka Jenny-i duangtu ‘Siamtu’ ngei chuan duh taka a siam Jenny-i ngei chu a mawina zawng zawng nen ka lak atangin min lak bo sak leh ta.

Ka beidawng tak zet zet a, ka rilru zawng zawng sawi chhuahna tur an awm si lo. “Jenny, i lakah hian beiseina sang tak ka lo nei ve thin asin. Hlimna leh lawmna ka lo tawng ve tawh a, chutiangin lungngaihna leh harsatna pawh. Nang nen chuan lungngaihna khurpuiah pawh awm i la, ka kianga i awm tih ka hriat chuan ka thla a muang em em ang tih hi ka ring tlat thin. Mahse en teh hei tunah chuan lungngaihna khawvelah keimah chauhin min hnutchhiah tak hi. Nang chuan i pawm thei lo ngei ang; ihmaw Jenny, lungngaihna kham chhawrdawh sang takah awmin he khawvel hian min chhanchhuak thei dawn lo mah sela, i hmangaihna hruihrual erawh ka tan a tawk asin. Harsatna tuifinriat mawng tawpah pawh awm mah ila i hmangaihna thir chakai chakna ringin ka nun khawchhuah theihna tur tal chuan ka inham tang thei ngei ang. Mahse chung zawng zawng chu ka hnen ata hla takah min lak bo sak a, ka hnena i hlan thin hmangaihna chu i fam tir ta si. Ka hringnun hi keimahin ka hmang tan dawn a, i tello  chuan a va’n harsa dawn em. Nang zawng hlim taka i awm ka duh a, i hmangaih ber nen chuan hringnun khawvel hi hlim takin hmang u la, ka chunga i thil tih tenawm tak hi a chungah chuan thlen tir ve lu suh la, a tan i inpumpek a ni tih lantir nan a hmuh theih loh i thinlung atang pawn min paih bo ang che”, tiin ka thinlunga Jenny-i chu ka hrilh mawlh mawlh ta a ni.

Similar Posts:

• Hockey was unchallenging for boxer Jenny
• Boxer Nula Jenny ropui taka hmuah a ni
• Jenny tested positive for banned drugs
• World champion Jenny hmuak dawn
• Boxing thiam bawk. BA pass bawk

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Tuesday, March 13th, 2012 at 2:26 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.