mi(sual).com

Chhandamna leh Piantharna chung chang thu ka rawn post atang khan mi thenkhat chianglo(confused) ru riau kan awm tih a chiang reng mai a. Han sawifiah chian lehzual han tum ta ila.

Kristiana invuah zingah hian “Pawl Thum” kan awm a ni.
1. Chhandam ni a, nih inhrechiang bawk
2. Chhandam ni tawh a, nih inhrefiah lo te,
3. Chhandam ni si lo va, nih inring si te.

Chhandam nih leh nih loh han inzawh hian thenkhat chuan “nih ka beisei” an ti a, thenkhat chuan “nih ka ring” an ti a, mi tam ber erawh chuan “thih hma loh chuan engtinnge kan hriat chian theih ang?” an ti bawk a. Hetianga mi tam takin chhandam an nih an inhriat chian lohna chhan chu an “DINHMUN’ leh “NUNDAN” leh “THILTIH” an thliar hran loh vang a ni.

1. Kristian Dinhmun:

Kristian ten kan dinhmun kan hriat theihna chu Pathian thuah chauh a ni. Bible-in engtinnge a sawi? Kristian ‘dinhmun’ chu “Fapa” nihhna hmun a ni (Amah lawm apiang chu an hnenah Pathian Fate nih theihna a pe-Johana 1:12,13). Krista chhandamtu atana kan pawm veleh Pathian fa kan ni.(Ngai teh u,… Pathian faah te min vuah tak hi-I Johana 3:1). Tin, he fa nihna hian ro luahtuah min siam a (Rom 8:17). Tichuan hemi Ro luahna hi kan himna siamtu a ni. (I Petera 1:4,5). Kan Pa kut ata chu tumahin min la chhuak thei lo (Johana 10:27-29). Tlanna ni atana chhinchhiah kan nih avangin (Ephesi 4:30) kan nunna (Thlarau nunna) Krista nen Pathianah thuhrukin a awm a ni (Kolossa 3:3). Pathianin ka “nunna” vawnhim nana Kristaa a thuhruk si chuan kei chuan ka vawng lo a, chuvangin ka hloh thei lo ve. Israel faten Kalhlen kut beram no thisen kha an kawngka bianga an tah veleh khan a chhunga awmte chu an him nghal vek a ni. Pathianin “thisen” chu a hmuhin (anmahni hmuh ni lovin) a kal hlen mai a ni(Exodus 12:13) tih Pathian thutiam chuan a hriatchiantir a ni. Chutiang ang tak chuan, “Krista thisen” chuan min chhanhim a, tin, Pathian thuin kan himna chu min hriatchiantir a ni.

2. Kristian Nundan:

Kristian dinhmun chu danglam thei lova nghet a ni chungin Nundan chu dang thei a ni. Hei hi kan “Pianthar” hnuah nundan pahnih kan lo neih tak vang a ni. A hma kha chuan nundan pakhat chauh kan nei a, nimahsela, Adama thar emaw Thlarau pianken nun kan han neih takah khan, Adama hlui emaw Tisa pianken kha a bo lo va, tisa apiang apiang tisa a ni a, Thlarauva piang apiang thlarau a ni(Johana 3:6). Rom 7:14-25-ah Paulan he mi indo dan a sawi kha. Hei hi Paulan a Pianthar hnua ama thil tih ngei a sawina a ni. Hei hian ringtu chuan “nun” pahnih a nei a, chu chu ‘sual lo’ leh ‘ sual’ a ni. Thlarauvin min thunun vek chuan Sual lo nun kan nei a, Thlarau pianken kha chu sual thei lo a ni a(I Johana 3:9), kan tisa piankenin min thunun kan phal chhung zawng chu “ sual ka nei lo” kan ti thei lo, “Sual ka nei lo” kan tih chuan mahni leh mahni kan inbum mai a ni. Thutak keimahniah a awm lo(I Johana 1:8-10). Hei hi thliar chian a ngai a ni. “Sual” leh “Sualte” tih hi. “Sual” hi Adama atanga kan rochun “Sual bul” a ni a, “Sualte” tih hi chu, keimahnia ‘Sual’ awm, chumi avanga sual kan tih thin kha a ni.

He mi, suala min nuntirtu sual bulpui hi Krista chuan Kraws-ah khan a phur ta a, Amah chhandamtu atana kan pawm hian “Nun thar” sual lohna hmun chu kan lut a ni. Chu “Nun thar” chu a sual thei lo va, chu mia kan luh zawh loh thin leh kan taksa pengahte sual rorel kan la phal avangin kan sual ata kan fihlim lo mai a ni. Rom 6:1-2 ah pawh Paulan “Keini sual kawnga thi tawh, sualin engtinnge kan la nun theih cheu vang?” a tih kha. Chumi awmzia chu thia ngaih kan lo ni ta a ni. Kan nun thar chu “Sualna Dan” lakah khan a thi tawh a, kha dan khan kan chungah thu reng reng a nei tawh lo. Chang 11-naah thi a inruat tawh tur kan ni tih min hrilh, tichuan sual lakah chuan thi tawha inruatin thil engkim kan ti tawh tur a ni. Chu chu engtinnge ni ang? Galatia 5:16 chuan min chhang a, “Thlarauvah awm rawh u, tichuan tisa chakna chu in zawm dawn lo nia” a tih kha. Kan taksa thi theiah hian sualna rorel phal tawh lo tura hrilh kan ni, thutiam pawh kan nei “Sualnain in chungah thu a nei si lo” tih kha (Rom 6:12-14)

Heng kan sawi tak a tang hian Ringtu Dinhmun chu nghet tawh leh danglam thei lo a nihzia leh Nun dan erawh chu dang dang thei, Nun hlui rorel phal chuan sual thei, Nun thar chauh roreltir phal chuan Sual lo nunna chu a ni.

3. Kristian Thiltih chu:

Ringtu hi thiltih lamah chuan heng thil pathumte zinga pakhatah hi chuan a awm ngei ang. Aigupta-ah (ii) Thlalerah emaw, (iii) Kanaan-ah. Aigupta chu khawvel entirna a ni a, Thlaler chu Tisa entirna a ni. Tin, Kanaan erawhchu, ‘ Rinna chawlhna’ emaw ‘Hnehna nun’ emaw a entir ang, Vanram entirna erawhchu ala ni lo, Vanramah chuan Indona a awm tawh dawn si lo va.
Kawngka bianga beram no thisen an tah veleh khan Aigupta-ah la awm mahse chhanhim chu ani tawh phawt mai a ni. Chutiang tak chuan Ringtu pawhin rinnaa Krista thisen a thinlunga a tah veleh khan chhanhimin a awm ta a ni ( A nun/thiltihah thil thar la hmu em em rih lo mah ila).

Ringtu thenkhat chuan Aigupta chu an chhuahsan tawh a, mahse thlaler Aigupta lam pangah chuan an la awm a, Aigupta-a an awm laia an thil ei thinte kha an chak fo thin a ni. Tin, achang chuan Kanaan ram dep thlalerah an awm a, Ramtiama buh thar te, theipui leh theibuhfaite chu an chak bawk thin. Mahsela an chenna ber chu thlaler ram laiah chuan a ni a, phunnawina te, hahdam lohnate leh rah engmah chhuah lohnaah chuan an awm thin a ni.

Thenkhat chuan Kadesh-Barnea an va tlawh a, chuta tang chuan kanaan ramah an va zin a, Eshcol hmuna grapete chu an va tem a, nimahsela, mi liante leh lungkulhte chuan anmahni a rap(ti hlau) a, a ram chu luah tura luh chu an hlau va, an rin lohna avang chuan an vakvai a, an thi bo zo ta a ni (Numbers 13:1-33)

Ringtu thenkhat erawh chuan thlaler ram chu an kal pel a, Kanaan ram chu an lut a, Joshua(Isua Krista) hruaina hnuaiah Kanaan mi te, Hit mi te, Hevit mi te, Perizit ho te, Girgashit ho te, Amor mite leh Yubusit mite chu an um chhuaka an ram chu laksak tumin an bei mek a ni. An kein a rah chin chu an neih zel tur a ni.(Joshua 1:1-3)

Sawi tawh angin Kanaan hi entirna ani a, Van entirna erawh chu a ni lo ve, Vanah chuan Indona(Sual thlemna) a awm tawh dawn si lo va, Kanaan in a entir chu “Rinna chawlhna” emaw “Hnehna nun” emaw a entir zawk a ni.

Heng kan sawi tak atangte hian Pathian nena kan inpawlna chu chat thei a ni a, nimahsela, kan inzawmna(inchhung khatna) chu eng lai mahin a chat ngai lo tih a lang a ni. Fapa tlan bo chuan “ram hla taka” a kal bona chuan a Pa a pawlna chu tichat mahse fa a nihna chu a hloh thei lo, fa a lawm lehin a awm a ni (Luka 15:24).

Krista hmangaihna ata chu tuinnge min then thei ang? (Rom 8:35-39) Tumah leh Engmahin.

Sunday hman nuam vek u le.

Similar Posts:

• Ringtu Nun
• Kristian Chi 2 Te {Sunday Pual}
• RINGTU DIK TAK AN NI LO (Kan ni. In ni lo. Kan ni…)
• Sual
• Rahpuah Bomb

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Sunday, March 18th, 2012 at 9:00 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.