Thuhmahruai
Bible hian Kristian-te hi Chi 2 or Pawl 2 (group/class)-ah a țhen phawk a. Alai laklawh (neutral)-ah a awm theih lova, a khawi pawl emaw zawk zawkah chuan kan awm ngei ngei a. Kan duhthlanna erawh a pawimawh ber a, keimahni duhthlanna ngeiin he Pawl-ah hian kan awm (grouped/placed) zel dawn a ni. I Duhthlanna ngeiin Eng Pawl-ah nge i awm ve dawn le?
Kristian Chi 1-na – Khawvel Mi
Bible chuan Kristian zingah hian ‘Khawvel mi’ an awm thu chiang takin a ziak a, “Khawvel mi chuan Pathian Thlarau lam thilte chu a lawm țhin lo, ani ngaih chuan ȃtthlak a ni si a; Thlarauva hriat fiah a nih avangin a hre thei lo reng reng bawk a ni,” (1Kor. 2:14) tiin. Helai “Khawvel mi” tih tak hi Greek psuchikos hman a ni a. A awmzia chu, “mihring țha pangngai, thlarauvin a khawih danglam loh” tihna a ni. Tirhkoh Paula sawina context ațang hi chuan, Kristian-a inchhȃl, Kohhran-a hming ziak, inkhawm fo, Kohhran (leh Kristian) thiltihnaa tel fo, mahse Lal Isua nen-a inzawmna tak tak nei lo, piangthar lo (natural/un-spiritual man/un-generated man) te an ni.
Kristian-a inchhȃl Khawvel Mi hi chuan, mihring finna leh remhriatna kaltlangin thil a ti ber a (2Pet.2:12), Thlarau Thianghlim a neih loh avangin Setana thununna hnuaiah ala awm tihna a ni tel bawk a ni (Rom 8:9, Tirh.26:18). Khawvel mi a nih ang tak hian khawvel chu a thlahlel ȇm ȇm a, tisa chȃkna leh tisa rilru duhzawng chu a dah-lal ber a, a rilru lawm zawng ang zelin thil a ti a, a khawsa țhin (Eph.2:3, Jak.4:4). Mihring finna leh remhriatna (human reasoning or emotions)-a a innghah tlat avangin, Pathian Duhzawng leh Pathian Thil-tum leh Pathian Hruaina-te chu a hrethiam ngai lova, Thlarau Thianghlim-in thil țha leh kawng dik a kawh-hmuhte pawh a hrethiam lova, engah mah ngai lovin a hnawl țhin bawk (1Kor.2:14).
Kristian Chi 2-na – Thlarau Mi
Bible chuan, “Thlarau mi erawh chuan thil engkim a hre fiah țhin a, ani lah chu tuman an hre fiah si lo” (1Kor.2:15) a ti a. “Thlarau Mi” a tih hi Greek pneumatikos a ni a, hei hi chu Thlarau Thianghlim-in a rilru leh ngaihtuahna a tih-danglam sak a, a chen-chilh mek Kristian (ringtu) a ni thung (1Kor.2:15, 3:1).
He Thlarau Mi hi chu Thlarau chenchilh a nih tlat avangin Thlararauvin a thunun a, Thlarauvin a hruai a, Thlarauvin țawng tur leh sawi tur a tih ang zelin a țawng a, Pathian rilru leh Pathian duhzawng pawh a hria a, Krista rilru a hria a, amah-a awm Thlarau Thianghlim awm avang chuan tisa chȃkna leh tisa duhzawng leh khawvel thil-te chu a do tlat țhin a ni (1Kor.2:11-13, 16, Rom 8:4-17, Gal.5:16-26).
Tlȃngkawmna
Thlarau Mi ni tur hian, thinlung tih tak zeta Pathian rin a, Lal Isua Lal leh Chhandamtu-a pawm a ngai a. Thlarau Thianghlim-in ringtu chu a rilru leh ngaihtuahna leh thiltih duhzawng-te a thlak sak (regenerated/transformed) vek a, mi thar lo niin, thilsiam thar a lo ni a, Krista a rinna avangin Pathianin mifel-ah a chhiar ta a ni (2Pet.1:4, John 3:3,5,7, Rom 12:2, 2Kor.5:17, Phil.3:9).
Tichuan, hmuh theih loh lam chauh ni lovin, hmuhtheih lamah pawh thuhruk theih a ni lova, theihtawpin taihmak a chhuah a, a rinnaah chuan țhatna a telh a, țhatnaah chuan hriatna a telh a, hriatnaah chuan insumna a telh a, insumnaah chuan chhelna a telh a, chhelnaah chuan Pathian ngaihsakna a telh a, Pathian ngaihsaknaah chuan unaute (Kristian-puite) hmangaihna a telh a, unaute hmangaihnaah chuan Pathian Hmangaihna a telh a. Nitin darkar tin a tih-pun zel bawk avangin Lalpa Isua Krista hriatna kawngah chuan a thatchhe thei lova, a rah chhuak ngei ngei țhin a ni (Mat.5:14-16, John 3:16, Jak.2:14, 2Pet.1:4-8, 1 Joh.3:16, 4:7-20, etc.).
Similar Posts:
- Kristian sakhua leh Mizo hnam sakhua danglamna
- Sunday Pual Ephesi 6:12
- Thlarau Râlthuam {Sunday Pual}
- A ram leh a felna zawng hmasa la engkim a pe ang che.
- Nitin Lalpa nen ( Pathian Ni Pual )
June 23rd, 2013 at 2:33 pm
Sermon tha tak a ni. Kan chiang uar mai. Khawvel mi nge Thlarau mi kan nih chu mahni theuh inenfiah nan a tha e.
Kan chhiar laih laih mai.. hahaha
Report this comment
June 23rd, 2013 at 2:35 pm
tha thin hle mai… a manhla e….
Report this comment
June 23rd, 2013 at 3:05 pm
A tha hle mai. Tawi fel tak, a sawi tum chiang leh fiah em em si a sawi i thiam tanin ka hria(a hmain i thiamlo tihna nilovin, a sei deuh thinin ka hria a). Good Post
Report this comment
June 23rd, 2013 at 3:49 pm
Good post.
Report this comment
June 23rd, 2013 at 4:23 pm
Report this comment
June 23rd, 2013 at 6:26 pm
Ka fiah/chiang ta uar uar mai a.
Report this comment
June 23rd, 2013 at 6:35 pm
A tha thin dap dap e
Report this comment
June 23rd, 2013 at 8:02 pm
#3 Pu PK, min fuihna avangin ka lawm lutuk e, ka ziak tawi thiam lo hi ka buaina a ni a, ka lo vawng reng tawh ang…
Hlawkpuitu leh Comment-tu zawng zawng chungah ka lawm e…
Ka buai a reh ve deuh dawn a, tan ka rawn la ve deuh thei dawnin ka hria…
Report this comment
June 23rd, 2013 at 9:04 pm
A tha hle mai.
Report this comment
June 23rd, 2013 at 9:54 pm
I sawifiah thiam khawp mai.
Report this comment