“Ani chuan kan natnate phurin, kan LUNGNGAIHNATE pawh a phur ngei a” (Isaia 53:4)
Isaia bung 53 na hi a mawiin a thlamuan thlak ngawt mai. Lal Isua hian kan Sualnate zawng zawng a phurh bakah kan LUNGNGAIHNA te pawh a lo phur reng mai hi a lo nia. Pathian anga awma Pathian tluka awm chu thil thlakhlelh hleih theihah a ruat lo va, mihringte anga lo piangin, bawih angah a insiam a, amah leh amah a intitlawm ta zawk a. Tin, mihring anga lo awmin a inngaitlawm a, thi khawp hiala thu zawmin a lo awm ta a, krawsa thihna ngei chu.
Kan Lalpa Isua Krista hi Pathian Mihringa lo chang, mihring nihna pumhlum nei niin, na hria leh Lungngai thei, Hrehawm tinreng tuar thei a ni.
Mihringa alo chan khan mihringte ai hi a han awh zo khawp a, Mihringin kan paltlang ngei ngei tur ang chi, Saruaka lo pian te, lum leh vawt tuar te, riltam leh tuihal te, Lungngaih leh thlaphan te, Duhtak te Suna tah chhuah hawm te, Thlemna mihring tuar theih ang chi reng reng te a lo tuar chhuak vek a. Chumi avang chuan Hebrai bung 4:14-16 ah khan chiang takin a inziak a ni. Kan Puithiam Lalber kan sual thawi nana amah leh amah inhlana hian kan chaklohna te min hriatthiam pui a, Thlemna leh lungngaihna kan tuar theih chin a hria a, He mihring taksa hian na leh hrehawm a tawrh theih chin hi amah ngeiin tuar chhuak vekin min hriatpui vek a ni.
Mihring famkim anih laiin Pathian anihna a bo chuanglo a, a tawrh tur leh a tawrh hun tur te, engtifakaua rapthlak nge a tawrh dawn a hre vek mai si a. A zirtirte a han hrilh thin, an hriatthiam pui tak tak si lo. Kha tia mantira a awm dawn zanah te khan, A zirtirte a kokhawm a, Zanriah hnuhnung a kilpui a, a zirtirte ho lah khan an hrethiam pha tak tak si lo. A taksa leh thisen an tan leh mihring zawng zawngte tana hlana awm tur entirna anih thu te a han sawi thin; an manfiah thiam tak tak si lo. Amah mantu turte an inpuahchah mek a, amah man turin an lo kal thuai dawn tih hriain Lungngai tawpkhawkin a tawngtai a, a zirtirte kha amah thlamuan leh hnem turin a duhin a beisei ve tho. Lungngaihna te hi mahnia tuar ai chuan min hriatthiampuitu leh min lainat tu kan bulah an awm tih hriat hian a thlamuan thlak thin. Nimahsela, Tuma tuarpui theih leh lo inrawlh ve theih ani si lo. Lungngai taka a tawngtai zawhin an hnenah a va kal a, anni an lo muhil thap mai si.
“E khai! Nangnin darkar khat pawh mi venpui thei lo a ni maw?…Thlarau zawngin a peih a, tisa erawh chu a chaklo a ni” (Matthaia 26:40-41 & marka 14:38). A ti thlawt mai. “Aw ka Pa, a theih chuan he no hian mi pel lul rawh se” a ti ve ngawih ngawih mai. Nimahsela, Lal Isua Ropuina chu, ama thu nilovin, amah he khawvela rawn tirtu, a Pa thu kha a tawp thlengin a dah Lal a, a zawm tlang raih a ni. “Nimahsela, keima thu ni lovin, nangma thu thu ni zawk rawh se,”(Matthaia 26:39) a ti thei zel tho a ni.
Matthaia 26:38 leh marka 14:34 a Lal Isua thusawi te kha I han en teh ang; “Ka rilru a lungngai em em a, thihna khawp hial a ni; hetah hian awm ula, mi venpui rawh u,” a ti ngawih ngawih mai nia maw le. Pathian Fapa hian kan Lungngaihna; mihringin a tuar theih ang zawng zawng hi ava phur hneh tak em.
Luka phei chuan, “Tin, a thlaphang em em a, thahnemngai lehzualin a tawngtai a; a thlan chu thi far lian tak angin leiah a far a” tiin a sawi hial a ni.
He khawvel kan khualzinna ramah hian, Rilru lungngai vawrtawp leh nun pawh thlahlel zo tawh lo a, mahni intihhlum duh rum rum khawpa lungngaiin I lo awm tawh thin em? Kan Lalpa Isua Kristan kan tana a tuarna hi kan Thlarau tan ringawt ani lo a, kan taksa tan leh kan rilru lungngai thei tan pawh hian a lo tuar ngei asin. I phurrit chhawk zangkhai duh hian, I thinlung kawngkhar hi a kik thin. “Nangni thawkrim leh phurrit phur zawng zawngte u, ka hnenah lo kal ula, keiman ka chawlhtir ang che u.(matthaia 11:28) tiin min sawm reng a ni.
Hmelthat leh piannalh te hi a chakawm ngawt mai; Hlimna ni sela chuan “ Thilsiam a zawnga mawi ber,” an lo tih thin Marilyne Monroe te aia hlim an awm chuang lo vang. Mahse, Lungngai leh beidawngin ama nunna a chhat tho si. Hausak hmingthat leh Ram latu ropui nih te hi hlimna ni sela chuan Sumdawng(Company) mai mai anga rawn kala, an ziaktu pakhat Rawlthar luhlul ve tak ni thin Robert Clive te aia hlim tur an awm chuang lo vang; a fin, huaisen leh Ralrel thiamna avang liau liauin East India Company Vengtu (Guards) tlemte te khan India Ram Ropui Lal(Nawabs) Ropui tak tak hnehin Kumpinu tan India ram a la a, Pound nuai tam tak nen England-ah a haw a, Hnehtu ropui anga lo hmuah leh lawm a ni a, Mahse, a room a thleng fel deuh chauh tihin amah leh amah a in kaphlum ta mai si!!. Hetiang lam chanchin hi sawi tur in hre teuh zawk awm e. (Comment lamah te sawi belh ta ila).
Mi rethei te niin natna tinreng tlakbuak nimahila, Lalpa Isua hnena Lungngaihna leh phurrit thlen nachang hria te chu, tumah awt biklo leh chantawka lungawi anni si thin. Kan Zoram zimte mai han thlir pawh hian, Thalai mahni nunna chat ta mai an va tam take m. A tuartu nih ve chiah loh chuan mi dinhmun va inhriatthiampui tak tak a harsa thin si. Khawvelah Nula/Tlangval chhiarsenloh an awm ti thin mah ila, ‘Duh ber’ hi chu pakhat chauh an lo awm thin si; chutiang mi, kan hlimna ber leh kan rilru zawng zawng kan pek vek naten min han phatsante hian Kan tan chuan ‘Khawvel hi a RUAK vek in awmzia reng reng hi a neilo a, engmah hian Hlimna min pe thei thin si lo. Chungtiang hunah te chuan “Ka hnenah lo kal ula keiman ka chawlhtir ang che u” titu Lal Isua pan nachang hriat hi a va tul take m. Exam fail avang te, Hmingchhiat leh mualpho avang te pawhin He khawvela nun hi thlahlel lovin a awm theih a, Mahni nun chhah hial ngaihtuah thlen rum rum a awl thin. Kal Lal Isua hian Kan LUNGNGAIHNA hi a lo phur ngei a, “Nangni thawkrim leh phurrit phur zawng zawngte u, ka hnenah lo kal rawh u” tiin min sawm reng a ni.
Similar Posts:
- Isua Pathian a ni lo
- UNDO [Ctrl+Z] (Sunday Pual)
- Kristian sakhua leh Mizo hnam sakhua danglamna
- Ram Mamawh Hmangaihtu Dik
- I vanglai hian i siamtu hre reng rawh
Ka fon hi chu charge lai tih...
April 5th, 2012 at 10:05 pm
Tha hle mai..
Report this comment
April 5th, 2012 at 10:08 pm
Comment hmaa chhiar phawt hi ching ila…….. chhiar ang le
Report this comment
April 5th, 2012 at 10:42 pm
Sunday velah Pu PKa sermon hi lo chang thin a awm thei si lo, hei a tawpah nghak chhuak ve alawm. Chhiar ila….
Report this comment
April 5th, 2012 at 10:43 pm
Kan tan a a tawrhna zo zai te ngaihtuah hian, a tana kan in pekna leh kan chan te hi a va beitham thin em……….
Lungngai te u, lawm rawh u ti a hla thu a an lo sawi tawh ang in he hla hi kan tana a nun hlan na lawmawm zia leh hlut zia vanga lawmthu sawinan……..
https://youtu.be/6OM_MTD2bio
Report this comment
April 5th, 2012 at 10:53 pm
Pu PKa sermon Good friday lam hawi a awm ka lo beisei ve tawp a, hei a lo awm tak tak.. ka va lawm em..
Isaia bung 53 hi a chang chuan a tha ka ti lutuk hi ka mittui a tla fo mai.
Chuan kan Lal Isua lungngaih ve zia, A Pa hnena thleng lo hram tura a tawngtaina te.. mahse hmangaihvanga A tuar tho te hi thumak sawi nin theih loh a ni.
Amazing Grace, how sweet the sound!
Pu Pk i ti lawmawm tak meuh
Report this comment
April 5th, 2012 at 11:06 pm
The Passion of Christ hi chu an lo uar lu deuh a nih hi
Report this comment
April 5th, 2012 at 11:22 pm
A tha kher e.
Report this comment
April 6th, 2012 at 2:25 am
Chhiar a va manhla em
Report this comment
April 6th, 2012 at 2:39 am
Sermon ropui tak a ni. Kan phurrit te chhawk thei tu Pathian hi kan lungngaih mangan ni te hian a zawng zawngin pan na chang kan hre thin lo hian beiseina aiin beidawnna ah mi a hruai lut fo thin! A zawng zawnga kan pan a, kan ngaihven a, kan rin phawt chuan thlamuanna, hahchawlhna, leh tuarna phena A malsawmna chu kan lo chang zawk thin a lo ni!
Report this comment
April 6th, 2012 at 7:17 am
Gethsemani huanah tawngtai turin a kal a, kan sualna te avangin a lungngai a, a rum a. Mihring ve tho anih avangin a tuk lawka a chan tur chu atan huphurhawm tak tur a ni. A lungngaihna hnemtu tur reng an awm si lo. Lungngai taka a rum laiin a zirtirte lah chuan an muhilhsan mai si. Kan Lalpa hnungzui zawh hi a lo va harsa thin tak em.
Lungngaihna leh hrehawmna te, zahna te avanga thlan tlak bawrh bawrh hi a awm fo mai. Thisen, thlan ang hiala lo chhuak khawp khawpa nasaa lungngaihna hi chu a va nasa dawn tak em. Hmangaihtu chu a hmangaihte avangin a lungngai a, a tap , a rum a, a hmangaihte avangin thihna lamtluang a zawh mek a. Chu chu tuman an hriatpui eih si lo.
Misual ber, thihna pangai ang pawha thi ve tlak lo khawpa hremna tuar turin ka Lalpa hian engmah tihsual a nei lo. Kan sual tlanna turin amah leh amah a inpe a, Pathian rorelna lak atanga thiam kan chan theihna turin amah leh amah inthawi nan a rawn inhlan ta. Kan lungngaih ai a lungngai a, kan tawrh ai a tuar a, hremna kan tawrh ai hrehawm tinreng tuarin Kraws ah khenbeha awmin kan thih ai a thi ta. A thihna ah kan thi ve ta a, a thawhlehna ah vek kaihthawhin kan awm leh ta. Haleluiah a va ropui tak em.
Report this comment
April 6th, 2012 at 8:12 am
1.Kan Pathian hi Sakhaw dangte pathian aia a danglamna leh chungnunna pakhat chu, ama duhthu (willingly) ngeia ‘mihringte min chhandam tura taksa, rilru & thlarauva a tuarna’ hi a ni. Sakhaw dangte pathian chuan, tuarna leh lungngaihna tel miah lovin ‘ropui leh mak tak’ vekin an inlar a ni.
Kan rinna siamtu leh tifamkimtu Lal Isua erawh hi chuan, Van ropuina kalsanin, a ropuinate hlip in, lei hmun tlawm ber a rawn thlang a, a thilsiam-ah lo changin, misual berte thihna Kross-ah mualpho theih-tawpin kan ai awh-in a thi a, khawvela a len lai ni (kum 33 vel) khan, retheihna, hrehawmna leh lungngaihna zawng zawng a hrekim a. A tuarna hi a nasa em em a, hei hi Fakna hla siamtu chuan hre reng turin min duh a,
Huana Isua rum hre rengin,
A thlan thisen anga far nen,
A hnungzang mawi an vuakna te,
A pa ngunhnam a tuarzia te,
Kalvari tlangah an hruai a,
Khenbehna a tuar, phun lovin,
Heng hi tun nge ngawihpui thei ang?
Tu thinlungin nge tuar zo vang?
tiin a lo phuah-chhuak hial a ni.
2.Lal Isua’n “ka lungngai em em a, thihna khawp hial a ni” a tih hi a pawimawh khawp mai. Helai thu, “thihna khawp hial lungngaihna” hi Greek. perilupos, a ni a, English-in siam danglam hretin “periphery”, “border” an ti a. Rilru lam zir mite (Psychologist/Psychiatrist te) chuan, hetiang hun hi mihringin a thlen tawh chuan, nunna leh thihna ramri-ah (border) a awm tawh tihna a ni.
Mi a lungngaihna leh manganna a nasat em avangin, lungngaihna te, hlauhna te, thinurna te hian Thihna chu awlsam takin an thlen mai thin. Thisen pawh, zun ah te, ek ah te, ka ah te, hnar ah te, mit ah te, mai bakah, thlan-ah te hial a chhuak thei a ni an ti.
He perilupos thleng tawh te hi tunlaia rilru buai (a) ta te, tualthah tim miah tawh lo te, mahni nunna hial pawh in-hmangaih zo tawh lova in-la (suicide) ta mai te hi an ni, an ti bawk.
3. Hetiang khawpa Lal Isua a lungngaih laia “Venpuitu pakhat mah nei lova” a awm hi a va’n lainatawm tak em! Hei hi a ni ngei ang, Fakna Hla siamtu-in, lawmtu leh sawmtu leh venpuitu pawh nei lo Lal Isua kha a lainat lutuk a,
Hnawng tawh suh se khawvel Chhandamtu chu,
A vahvaih nan Judai kha tawk rawhse!
a lo tih hialna chhan kha…
Chuvangin,
Aw, Isu, lo kal la ka thinlungah,
Chenga cham reng atan ka ngen a che,
An hlan ranthleng leh thing anchhedawng chu,
I lawm thin fakna-in lo thlak sela,
Chutin khawvel tan i tuarna na kha,
Lo damin lawmna-in hliah tawh rawhse!
i ti ve mawlh teh ang u.
Report this comment
April 6th, 2012 at 8:16 am
Good Friday hi amah hrereng chungin hman i han tum teh ang. Caribou comment a ngaihnawm e.
Report this comment
April 6th, 2012 at 8:23 am
Dr.John, i point no.2 khi ka hriat deuh ruai han ziak chhuak tur meuh chuan ka chian chiah loh a nia. A lawmawm tak zet e.
Report this comment
April 6th, 2012 at 8:46 am
Pu Pk-a a lo lang leh ta e
Sermon thatak ani.
‘Lalpan min hmangaihna chu,
Van rangkachak ram kalsanin,
Sual fate min zawng turin,
A tuar Lalpa Isuan.’
Report this comment
April 6th, 2012 at 9:24 am
Inkhawm kal hma lawk:- covenanter, mamboihi, ralte, sheldon ,adt. Min fuih naah ka lawm takmeuh e. Maisek(Hnamte malsawmi) tìhdan takah ‘passionate’ deuh mai ka nia, in tawngkam tha hi kei michaklo tan hian a hlu lua e.
Report this comment
April 6th, 2012 at 6:03 pm
E heee Dingtea hi ka nik i lo hre ru khiau ani maw? I sermon hi a tha thei thuai thuai khawp mai…
Report this comment
April 6th, 2012 at 10:10 pm
E heee Pi Malsawmi chu ka hming iva hre em em ve. Ka rawn risk ve mai mai anih kha. hehe.
Report this comment