mi(sual).com

Mizo Wikipedia

Hun a kal bek bek a, hma kan sawn ve zël e.

Ka rawn ziak hnem tawh thawkhat a, min ning fe fe chu in tam tawh viau vang tih ka hlau angreng. Mahsé tirhkoh pahnihten Tirh. 4:20-a ”Thil kan hmuh leh kan hriatte kha sawi lovin kan awm thei lo” an tih ang mai kha ka ni a, ka rawn sawi leh dawn a ni. Thuziak rawn thawh tlém tlémin kan pung ve bek bek a, a lawmawm hle a ni tih hi ka sawi hmasa duh a ni. Mahse engah vak kan ngai lo em maw ni, kan hman lo zâwk nge, thuziak peih tak tak chu pahnih khat chauh kan la ni a, tan a ngai hle a ni. Thil hriat ziktluak nei lo leh mi rawn tùr thu êm ziaktlâk lo nia kan inngaih vang a nih a rinawm a. A tha lo hlë a ni.  Hnam dang wikipediaa thuziaktute pawh hi thalai vek an ni tih hriat a tha a, hnam dang chung-en chatuan tùr chuan kan hnam hi i tlàwmsan lul lo vang u tiin ka fuih vè (khanglang) duh che u a ni.

Chulam vang ni lovin thuziak tùr kan hre lo emaw kan tih vang pawh a ni thei bawk. Pawl 9 i zir thleng em? Hriat pakhat tal i nei em? Tlangkang chanchin i hria maw? Tuipui thil pakhat tal i nei em? Cristiano Ronaldo i ngaisang maw? I thil hriat, ngaihsan, ladt. tawh phawt chu thlalâk nei chi a nih chuan a thlalâk tal rawn tar rawh. I mi ngaihsan zawng pian kum i hre lo maw? English wikipedia-ah en la, a pian kum leh a thlalâk chauh tal pawh rawn thawh rawh. I theih phei chuan i mi ngaihsan zawng chu chhawhchhi tuh thiam nge a nih vaihlo chil chak tih tal pawh i hriat chuan  (mahni mi ngaihsanzawng te thiltih, an larna chhan em pawh i hre lo maw?) (Thlalâk ladt. hi english wikipedia-ah hman tùr a awm vek). Thlalâk tar dan emaw i hre lo a nih chuan he thuziak hi en la, ”edit” tih hmet la, a copy tawp la, a thlalâk hming kha thlâk la a ni mai. A va awlsam tehlul em.

Chu lo lehah chuan mahni zirlai ziah hreh loh tùr. Marxism i hre deuh nual maw? Ziak rawh! Mizo tawngin i ziak thiam lo maw? Mizo i nih a, i zirlai em Mizo tawnga (a thumal technical deuh, Mizo tawnga kan neih loh tiam lohvin.) i ziak thiam lo a nih chuan i thiam tak tak lo tihna. A zahthlâk loh ve. Chutiang thil tal ti thei chu a ni kan zawn ni. Mahse inzir vek kan ni (em?)…  sawi zawm lo mai ila.

Thuziak awm tawh zawng zawng, han tlawh ve hrim hrim la, kan hnam tan hna tha tak i thawk a ni mai. Thuziak tawi & nawi deuh i hmun pawhin nuih mai lovin, i ram leh hnam than chin (puitlinzawng)ah  ngai thei la a lawmawm khawp ang.  Kan nihna dik tak hi i changkansan mai lo vang u.

Mizo Wiktionary

Hei hi eng tawng pawh, Mizo tawnga hrilhfiah vek theihna hmun a ni. Spanish thumal pakhat i hria maw? Ziaklût rawh. Nakin zela kan tihpuitlin tùr a ni. Mahse thawh nana nakin chauh kan nghah erawh chuan puitlin tik a nei ngai lo vang. A! Spanish tih te, ferên tih te hlïr ka lo sawi a, ka mawl a ni. Min lo ngaidam ula! Mara tawng i thiam em? Lai tawng i hmang maw? Tlém tal i thiam maw? Rawn ziak lût rawh. Abîk takin kan mara, paihtë, hmar ladt. unaute ka chah duh chu, in tawng hi, lehkhabu leh thuziak ringawt hmang chuan engtik khawtikah mah kan rawh thiamsak ngai lo vang che u. A duh duhin kan zir theihna tùrin Wiktionary-ah hian rawh dah ula, kan tawng tihhausak nana kan hmang duh a nih pawhin hman tùr kan hmu thei tawh ang. Keini in rama thiante pawh nei lo, in tawng thiam ngaihna (tün dinhmunah chuan) la awm lo hrim hrim hian engti kawng mahin in tawng hi heti ringawt chuan kan rawh tiham ve ngai lo vang. Zohnahthlâk zawng zawngte inpumkhatna atan leh kan tawng theuh tihhausak zëlna atana kawng tha ber niah ka ngai kei chuan.

Khai le, thumal dah luh tawh zawng zawng chu hetah hian a awm e.  Thumal awm tawh sâte hi en la, (entirnan: kham tih hi han chhiar chhin ve hrim hrim la), tichuan a dinglam chunglam kila ”edit” tihah hmet la, a tihdan chu i thiam mai ang.

Mara tawng ziakin a tawpah [[Category:Wt/lus/Mara tawng]],  paihte tawng ziakin [[Category:Wt/lus/Paihte tawng]], pawi tawng ziakin [[Category:Wt/lus/Pawi tawng]] , chutiangzelin, dah tùr a ni. Tichuan miin an rawn duh hunah eng tawng nge a nih an lo hre thei tawh ang. Lusei tawng nena a thumal thuhmun a nih pawhin  phêk khatah  [[Category:Wt/lus/Mizo tawng]] tih nèn a awm dun mai dawn a ni.

Tichuan hetah hian kal la, a phêk laihäwl vêla kaw awm ”create page”/hemi phêk hi siam rawh le (mizo interface i thlan chuan) tihah hian i thumal sawifiah duh chu dah la, thawk tan mawlh mawlh rawh le! Phêk awmsaa tihdan kha zir tawp la, a cheimawina ilo chu i thiam chho ve zël mai ang.

Thutàwp

Wikipedia leh Wiktionary ni lo thil dang entirnan, Wikiquote siam duh tan hetah hian a siam tan theih e. Wikiquote hi miropui (nia i ngaih; nangmah ropuiah i inngai em?) thusawi dah khawmna hmun a ni a, hnam rohlu tling thei thil a ni. I mi ngaihsan-hote leh i ngaihsan lem loh pawh, thusawi lar hrim hrim chu a leng vek a ni. A sawitu chiang takin i dah ang a (Mizo tawngin let vek rawh. A original i dah duh chuan i dah thei ang. Tihmakmawh erawh a ni lo). Hetah hian sakhaw lam thil pawh i duh chuan a leng vek a, bible bu pum erawh chu rawn tar lo tùrin insum hräm thung la ( ) . Pu Vanlalzuata thusawi tha i tih tlar hnih khat lek, Rev Chanchinmawia thusawi fuh i tih tlar khat lek … Ka sawi seng lo, i thu vek a ni e.

(Ka ziak thui leh nek thin, a khat liam ngang a ni ang e!)

Similar Posts:

• Mizotawng chungchâng bawk!
• Kan zain i bei ang u
• Saptawng a thuziak
• The Case for Mizo Wikipedia
• Mizo ṭawnga pachhia — Mizote!

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Friday, April 13th, 2012 at 7:00 am and is filed under Education, Information, Internet, Invitation, Luangliam, Mizo Society & Culture, Mizoram. You can follow any responses to this entry through the RSS 2.0 feed. You can leave a response, or trackback from your own site.