Taxi hi ka hmang tam lo viau a, ka hman ve chhuna ka thil tawn tlêm ka han thai lang ve ang e. Mi ṭhenkhat ngaihdân chu a ni lo maithei, mahse thil nihphung tûr nia kan hriat avang leh dikna leh rinawmnain kan ramah hmun a chan zêl theihnâ’n leh mipuiten thil chiang zâwk kan hriat theihnâ’n ṭhahnem ngai takin ka rawn ziak a ni.
Shillong taxi chuanman (rate) hi per-head a ni ṭhin a, passenger-te pawh an inhnawh ṭên ṭûm mai ṭhin (tûnah hian engtin nge an tih erawh ka hre ta lo). A phur tam thei apiang an hlâwk a ni mai a, passenger-te pawhin an sawisêl ngai lo, a chhan chu, man tlâwm taka duhna hmun an thlen theih avang leh hire system a nih miau loh avangin.
Mizorama taxi-te erawh hire system a ni a, per-head system nên chuan a danglam a ni tih hi hre hmasa phawt ila a ṭha awm e. A stand-a ding emaw a tlân lai emaw pawh ni se, kan duhna hmun kan sawi a, kan chuang mai ṭhin. Vêng ṭhenkhat aṭanga in contribute-a kan chuan ṭhin te emaw ṭhian ṭhenkhatte nêna inthuruala kan hman ṭhin erawh huam lo ta ila. Hire system-a taxi kan hman rêng rêngin kan duhna hmun kan thlen theihnâ’n kha taxi kha a man kan pe a, hun rei lote chhûng chu kan ta lo ni ta tihna a ni. Nimahsela, taxi driver tam tak chuan chutia kan hire chung reng pawh chuan passenger an lâk belh fo ṭhin. Keini’n kan hman man kan pe a, passenger an lâk belh-ten an chuan man an pe bawk a, a lêtin an hlâwk a, a hmangtute erawhin ngai kan awh mai pawh ni lovin nuam vak lo leh tâwt taka kan chuan ṭum pawh a awm fo ṭhin.
Heti ang hi thil awmzia a nih avangin hire hian awmzia a nei miah tihna a ni. Entirnâ’n sikulpuikâwn atanga bazar thleng Rs.150-a ka hman chuan bazar ka thlen hma chu kha taxi kha ka ta a ni rih tihna a ni a. Passenger dang lâk belh chungchâng pawh ka thu a ni tawh ang. Midang lo chuang duh an awm chuan driver-in “kan la dâwn em?” tiin min râwn tûr a ni a, a nihna takah chuan keimâ’n “phur rawh” ka tih loh chuan tu mah a phurh belh tawh miah lo zâwk tûr a ni. Keiin a man ka pêk dâwn avangin ka duh chuan passenger dang chu a ‘free’ pawhin ka chuantir thei a, a nih loh pawhin an chuan man phû tâwk chu keima’n ka la ang a, ka nei thei ang. Chu chu hire system awmzia chu a ni. City bus erawh kan hire a nih chuan midang an lo chuang ve ngai lêm lo va, an lo chuang dâwn a nih pawhin a hire-tute phalna zêla chuang an ni ṭhin.
Tin, taxi rêng rêng hian ‘zân rate’ a nei lo tih hi hriat reng bawk tûr. Zân a nih avanga an rate an tisâng ve ngawt a nih chuan driver thiam loh a ni ang. Ṭhenkhat chuan, nilêngin an service tawh a, zân lamah chuan an taksa te a lo chau a, rate an inchhiar sâng deuh a nih pawhin a âwm alâwm kan ti a ni maithei. Mahse chu chu thutling a ni lo. Rate tihsân belh tûr khawpa an chau a nih chuan service lo mai rawh se. Zân rate hi a awm chuang lova, rate chu rate a ni a, a ngai reng. Chuti anga rate tihsân chîng kan tawnga dikna kan ṭan ngam tak tak a nih ngat chuan thuneitute hnênah i report ngam ang u. Hei hi driver-te tihmualphona lam a ni lo. Mi ṭhenkhat (a tam zâwk pawh an ni maithei) chuan zân rate hi an tisâng uchuak bîk ziah tih kan hriat ṭheuh kha.
Hei hi eng rilru pua ti nge kan nih? Mizo kan ni kan inti a, mahse kan Mizona chu midangte ei ral duhna rilru pua, mite harsatna chu mahni ṭânghma hai a, mahni tâna chakai khawrhnâ’n maw kan lo hman ṭhin? Taxi driver pawh a rate dik takin tlân rawh se, chhûn a ni emaw, zân a ni emaw, a rate hi a danglam thiang lo. Tin, a hmangtute pawhin huai taka he thu hi kan ṭan ngam a ngai. Chuti a nih loh chuan officer lian tam tak kan dem ang mai hian nakinah chuan dem kan la hlawh ve ang a, keimahni tihsualah kan la tâlbuai ang a, kan la phun kan la phun leh ngei ang maw le.
NB: Tukin (20.04.2012) Vanglaini-ah khân in lo chhiar tawh maithei. Keini misual-ho hian i han sawi zawm teh ang u.
Similar Posts:
- … ve ngai em?
- Tele Taxis Mizoram-ah hawn a ni veta
- ZTOA leh ZTDA in 2-wheeler taxi tha ti lo
- ACCIDENT IN SONAPUR
- Taxi leh Driver Bo
April 20th, 2012 at 12:32 pm
Chhiar i1a.
tren tren
Report this comment
April 20th, 2012 at 1:09 pm
chhiar chhuak vek, ngaihdan erawh ka nei hran lo. kan awmna ramah taxi awm hek suh
.
Report this comment
April 20th, 2012 at 1:09 pm
Aizawl Taxi fare to uchuak lutuk khi ka hua…
Report this comment
April 20th, 2012 at 1:20 pm
Zanlamah hi chuan an tisang hi awm ka tihpui tho mai. India hmundangah pawh auto fare chu zan dar 10 hnulamah chuan a to thin hi mawle
Report this comment
April 20th, 2012 at 1:28 pm
#4, nia…
Report this comment
April 20th, 2012 at 1:41 pm
Kan thianpa chuan zan rate hi awmlo a ti lutuk a,zan khat a taxi hmang chu driver nen an inhnial ta a,”Dawr pawh zanah dar 9-10 thleng kan hawng,zan a nih avangin kan thil zawrh man kan tih to phah chuang lo” a ti tlat mai a, driver pawn tih ngaihna a hre bik der lo
Report this comment
April 20th, 2012 at 1:56 pm
Awmtea, i thawh tha khawp mai. I ngaihdan hi a dik ka ti chiah bawk. Vanglaini a chhuah anih chuan a tha e. Mizote hi kan sual hran lova, zirtir theìh tak kan nia. Taxi driver chuan Taxi hire awmzia a hre tur a ni.
Report this comment
April 20th, 2012 at 2:26 pm
Vai ho auto sunday alo nih dek dek a an ti to nghal ngawt hi alawm thinrimthlak thin.
Ka thlawp e. Hei lo pawh,passenger awm laia mahni music duh zawng play ri dup2 mai thin te pawh hi ka ning thei khawp mai. Ka hau mai zel,manners hriat loh vanga duh reng vanga thil tih ni lem lo pawh hi thil awm thei ve lutuk ania.
Report this comment
April 20th, 2012 at 2:29 pm
Taxi driver hi an inanglo nasa ania. Thenkhat chu fel tak tak an awm laiin thenkhat duham deuh leh manner hrelo ve deuhte an awm ve bawk a. I sawi hi a dik chiah, ka hman ve thin 2/3 hi chuan midangin an lo phar pawhin min rawn ziah, mahni thu in passenger dang an la ngawt ngai lo. An la anih pawhin pawisa kha a hire tu min pe thin.
Hmanni pawh Gas laknan hmelhriatloh taxi kan hmang a, taxi hire na rate bakah gas bur phurh man kha a hranpa in min dil anih chu, ka pe lo nasa khawp mai
Report this comment
April 20th, 2012 at 2:32 pm
Hmanni tlaia kan taxi hman kan sawi leh mai mai. Ear phone a vuah a, a sam pawh kha a sei tha viau. A dashboard ah khan portable dvd player ang chi hi a hung a, sap nula zai a play bawk a, ka thiannu lo dawih ve bawk, kei dawih bawk, Zarkawtah kan chhuk ringawt. A motor khalh bak kha ngaihtuah dang a ngah hmel em a
Report this comment
April 20th, 2012 at 2:34 pm
Tichuan, Aizawl ah hian taxi fare a to em em
Hat trick siam leh lawk ang
Report this comment
April 20th, 2012 at 2:39 pm
A va tha kher ve le. Ka chhiar laiin Vanglaini chanchinbu a chhuah nise aw ka lo ti a. A lawmawm tak zet e.
Report this comment
April 20th, 2012 at 2:44 pm
chuan a stand a ding ho hi an inthurual them bawk. Hmankum deuh khan Thakthing Bazar atanga Mission Vengthlang kal kan tum a, kan zawh hmasak ber khan a ti to em mai kan tia a dang kan han zawt kual chu an lo inthurual them a, duhthlan tur kan nei heklo to ti deuh chuan phun phun chungin kan kal ringawt.
Report this comment
April 20th, 2012 at 4:24 pm
Posttu hi ka thlawp e. Manner hi Taxi pu thenkhat hian an tlachham deuh thin anih hi.
Report this comment
April 20th, 2012 at 4:41 pm
Hat trick siam a awm leh ta… Ka lawmpui e…
Thla hmasa ka lo haw khan, Lengpui-Aizawl kha Rs. 1,000 an ti hem mai a
Fiamthuin Taxi driver thenkhat ka sawipui ta a. Engtinge Aizawl (Mizoram) ah hian Petrol man a tlawm zawk daih si a, hetiang em em a chuan man intih to le? ka ti a. Kawng chhukchho an chhuanlam nangin, min hnial thui vak lem lo…
Taxi fare inanlohna: (A chiah chiah ka hre lo nangin, a vel tal chuan ka hre ve e…
)
Bangalore-Bangalore International Airport (30 Kms vel) : Rs 600. Petrol Rs 72/Litre
Aizawl-Lengpui (30Kms vel) : Rs 1000. Petrol Rs 65/litre
A into hleih dan chiah ka chhutchhuak thiam lo…
Report this comment
April 20th, 2012 at 4:44 pm
Dr mahminga, Rs.500 a nih thin kha, engtik laiin nge a lo to leh hman a???
Report this comment
April 20th, 2012 at 5:08 pm
@..Jacka Pi .. Kan haw hma kar 2 vel khan kawng a chhia a ni awm e. Sairang road atangin kal a ngai si a. Tha a na duh khawp mai… Nupui pathum man aia tovin Aizawl to Lengpui ka zin kha…
Lengpuiah nupui ka hman lei tep a ni, lei tur an awm loh hlauh zawk a…
Report this comment
April 20th, 2012 at 6:37 pm
Pu Awmte chu i taxi hman thu ngaihnawm deuh i ziak dawn emaw tia Taxi hman hun a awmdan mawi i sawi a ni ber a lawm le. A tha viau e. Mahse Zan rate hi Mizoramah a hranpa in a awm miah lo maw…. Vairama auto velah hian chuan 25% hi zan dar 11 atanga zing dar 5 vel thleng hian an ti ti thin a sin…
Report this comment
April 20th, 2012 at 7:20 pm
Hmun dang chu ka hre lova Mizoramah hi chuan zan rate a awm lo. Taxi driver fel tak2 te chu a rate pangngai vekin an tlan thin
Report this comment
April 20th, 2012 at 7:27 pm
Shillongah khuan duh chuan midang phur lovin mahni chauh pawhin a hman theih. Mahse sawi kher loh chuan an la char char a ni mai.
Mizoram taxi fare hi a to mah mahin ka hria.
Report this comment
April 20th, 2012 at 8:14 pm
Taxi hi ka khalh ve tawh thin! Mahse rate hi kan petrol hman dan ah kan chhiar tlang pui! hnai deuh hi Venghlui chhukah chuan a man adang daih (Klk nen comparre-in)
Report this comment
April 20th, 2012 at 8:17 pm
Uikend kan hmang ve teh ang! @Sandman style-in
Report this comment
April 20th, 2012 at 9:19 pm
ka thianpa chuan, “ka inbual fai tawh a, nupui fanaute bula awm ve te pawh ka chak, emergency a nih loh chuan chhun rate in ka tlan peih tawh lo” a ti mai zel.. A duh chuan an hmang tho.
Report this comment
April 23rd, 2012 at 2:13 pm
solihull minibus hire…
[...]Taxi Ka Hmang Ve a | mi(sual).com[...]…
Report this comment