1. Introduction
Cellphone (Mobile phone kan tih fo) hi khawvela thil hmuhchhuah zingah a țangkai ber pawl a ni hial ang. A țha zawng leh a țangkai zawnga hman chuan khawvel dang hi a tihnai sawt a, khawhar lovin min siam a, harsatna tam tak min sutkian sak țhin. A țha lo zawnga hman ve thung erawhchuan mi-ang lovah min siamin, mi nuihzatburah min siam thei a, harsatna tam tak mimal, chhungkua, kohhran leh khawtlangah a thlen thei thung. Chuvangin, thil țha leh țangkai tak a ni chungin hman thiam leh thiam lohvah a innghah thui em avangin hman thiam hi kan zir a, kan in zirtir hi a țul tak zet a ni.
2. Cellphone lo Pianchhuah Dan
Kum 1940 hma lamah khan Two-Way Radios (Mobile Rigs) chu Taxi, Police leh Ambulance-ah te an lo hmang a. Phone pangngai anga midang Number a dial theih loh avangin Cellphone emaw, Mobile Phone emaw tia koh a la ni lo. Kum 1940 khan Motorola company chuan Walkie-Talkie a hmu chhuak a, hei hi siambelh-in US military chuan Handie-Talkie ah țangkai takin an hmang a. Kum 1947 December thla-ah, Engineer 2, Douglas H. Ring leh W. Rae Young ten Hexagonal cells hmangin Mobile Phone an siam țan a, mahse an puitlin lo. Tichuan hun lo kal zelah, Automatic Cellphone hmasaber (Mobile Telephone System A) chu Ericson Company-in Sweeden-ah kum 1956 khan an pho chhuak a. Hetih laia Cellphone hi kg. 40-a rit a ni. A hnu kum 1965 ah chuan kg. 9-a rit-in an siam leh a, April 3, 1973-ah Motorola company chuan “Kut-a ken theih Cellphone” chu mipui hman theih turin a phochhuak ta a ni. A system țhat dan a zira tehna 1G (first generation), 2G (second generation), 3G (third generation) an ti a. Tunah hian 3G Cellphone chi hi a țha bera kan neih chu a ni. GPRS hi 2G ațangin dah țan a ni. Cellphone hian hming chi hrang hrang a lo nei nual tawh a, Cellular Mobile (1972), Radio Telephone (1973-75), Cellular Radiotelephone (1976-79), Cellular Mobile Radiotelephone (1980-83), Cellular (1984-1998), kum 1998 ațang chuan Cellular Phone, a tawi zawngin Cellphone tia hman leh koh a ni ta a ni.
3. Cellphone Ţangkaina-te
Khawi ațang pawhin kan biak duhte kan be thei, hei hi Cellphone leh Mobile phone a nihna dik tak pawh a ni. Mobile tih chu ‘awlsam taka insawn zung zung thei’ tihna a ni. Khawhar changin Games kan khel thei a, Mp3 Player hmangin Hla kan ngaithla thei a, Note book angin thil tam tak kan chhinchhiah-in kan dah tha thei, GPS System (global positioning system) awm a nih chuan heng Delhi, Bangalore, Mumbai, Calcutta City ah te chuan kan kalna chin leh kalna tur a hriat theih, GPRS kaltlangin Internet duhna hmun leh duh hun hunah kan hmang (browse) thei, Camera hmangin duh duh Thla kan la thei, Blue Toothe leh Infrared awmnaah chuan (cellphone to cellphone, cellphone to other devices), data awlsam takin kan transfer thei, SMS hmangin ngawi rengin thumal (word) tlem te hmangin mi kan be thei. FM Radio awm-ah chuan Radio pawh duhtawk ngaihthlak theih a ni bawk. Kan Cellphone-ah Video camera a awm anih chuan Video thla kan la thei a, Video kan chhuah thei bawk.
4. Cellphone-in Natna Hlauhawm a Siam Thei?
Tel Aviv University scientist-ten Cellphone hman tam hian natna hlauhawm tumor (brain & salivary gland) a siam thei an ti. Dr. Ronald B. Herberman, Director of University of Pittsburgh leh Pittburgh Cancer Institute te chuan Cellphone hman tam hian Cancer a siam thei an ti bawk. UK-a Telegraph website chuan naupangte tan Cellphone hman hi a hlauhawm lehzual a, Cancer a siam hma êm êm an ti. Brown University, Providence, Rhode Island-a mithiamte leh The British Association of Dermatologist te chuan Cellphone-a nickel awm hian beng leh biang velah natna chikhat Allergy a siam thei an ti. Dr. Pacey, Honorary Secretary of the British Fertility Society chuan Cellphone hmang tam lutuk ‘mipa te chi a chak lo‘ (decrease men’s fertility) tih a hmuhchhuah chu BBC NEWS-ah October 6, 2006 khan puan a ni. National Business Review Website-in a tarlan danin Cellphone hman tam lutuk hian ‘Mipa tan chi thlah theih loh hialna a thlen thei’ a ti. A chunga tarlante khi a dik vek kher lo a nih pawhin Cellphone hi mihring hriselna atan a hlauhawm thawkhat a ni tih tichiangtu-ah ngai ila, uar lutuk lovin, a tul hunah chauh hman tum a tha awm e. Mithiam-te chuan Cellphone hmanga mi biak hian direct-a hmang lovin, Earphone (ear-piece) hmang ila achunga natna hlauhawm-te lakah kan him zawk, an ti bawk!
5. Cellphone Hman Dan Mawi leh Changkang
Cellphone hi thil changkang tak leh țangkai tak a nih avangin țangkai tak leh changkang taka hman a țul a. A țangkai lo zawng leh a țha lo zawnga kan hman chuan mahni tan leh midang tan thil pawi nasa tak a khawih thei a ni.
5.1. Film Bawlhlawh leh Picture Bawlhlawh Dah Nan Hmang Suh
Tunlai țhalai tam takin an Cellphone-ah Film bawlhlawh leh Picture bawlhlawh dah nan an hmang a. Pastor-te leh Upaten min check sak dawn se, kan ngam ang em aw? Hetianga Film țha lo leh Picture bawlhlawh tak tak dah hi Mizoramah mai nilovin, khawvel hmun hrang hrangah pawh Ţhalaite zingah a hluar em em a ni. Film țha leh Picture țha tak takte dah nan hmang ila, țhiante, rawngbawlpuite inpe chhawng țhin bawk ila a hlawk hle ang. Mizoram-ah hian Cellphone hmanga Film bawlhlawh lak, siam leh inpek-chhawn hi a hluar hle ni awm-in an sawi a, dik tak maw? Cellphone hmansual thu-ah hian, kan India ram ropui tak hruaitute pawh an bang lo, Chanchin bu leh TV headline-a “Indian Politicians caught watching porn on Mobile phone during a state parliament…” tih leh, “Blue film in the middle of Parliament plenary session” tih te kha a zahthlak tawp a ni.
5.2. Ţul Vak Lohva Mi Biak Vak Ching Suh
Ţul vak lem lova mi biak vak a, bill sang tak tak, tawng man ringawt thla 1-a Rs.600 chuang seng an awm nual. Hlawh nei lo tan phei chuan thil zahthlak tawp a ni a, Hlawh nei tan pawh inrenchem thiamlohzia tarlanna a ni. Ţhenkhat chuan mi biak tur nei tam hi changkanna emaw an ti a, a ni lem lo. Kan dinhmun a zir leh, kan thusawi pawimawh leh pawimawh lohvah a innghat zawk. Keimahni’n hunawl nei viau pawh ni ila, kan va biak-a te khan hun an nei lo viau thei bawk. Chuvangin, mi kan biak-te hian hun an neih leh neih loh-te pawh zawh lawk diam a țha.
5.3. Mi bula Cellphone i hman-in, Ţawng ring lutuk Suh
Phone kan hman hian kan bula mite ven tel ngei ngei tur. Thil pawimawh tak pawh nise, a remchan chuan hriat theih si, a zawi thei ang bera biak a țha. Ring tak taka phone ațanga mi biak chin hi thil mawi lo tak a ni a, mi nuihzatbura insiamna a ni. A theih phei chuan va kal hran deuh hlek a, mi biak a țha. Kan thusawi kan bula miten hre ve ngei se tih kan duh lem siloh chuan, kan bula mite tan khan ninawm leh hnawksak tak kan ni thei a ni. Kan bula mite titi laia phone kan hman chuan an titi thlengin kan tibuai thei a ni.
5.4. Biak In, Kohhran Program etc.-ah Switch-off/Silent Rawh
Kohhran program hman lai ah leh hun pawimawh neih lai chuan Switch-off loh pawhin, silent-a dah tur a ni. Call a lo kal a nih pawhin Chhan/lak (pick-up) loh tur, emergency thil a nih chuan a rawn call nawn tlut tlut ang a, hemi hunah chuan pawna chhuah a, va chhan a țha. Emergency ni lem silova, call chhang tura chhuah chhuah pawh a mawi lo. Hmun changkang zawkah leh sorkar hmun pawimawh tam takah chuan Cellphone hman hi an phal loh tawpna a tam khawp. “Please Switch-off Your Cellhphone” tih hi an tar kuau zel a. Tih-rik palh hlauh pawh thil zahthlak tak a ni. Chuvangin, Biak In (Pathian biakna hmun) ah te, Pathian faka zaikhawmna leh Inpawlhonaah te, Mitthi In-ah te, Cellphone switch-off/silent-a dah lova, call lo kal i chhang mai țhin a nih phei chuan…mi a zawnga mi khawngaihthlak ber i ni mai thei! Engang pawhin i thiamna sangin, i dinhmun sang mah sela, mi nuihzatbur i ni ang a, miin mi-ang lo en-in an en hial mai thei che a ni.
Ţumkhat chu kan College-a kan Professor pakhatin lecture a pek laiin, zirlai pakhat chuan a Cellphone a lo switch-off theihnghilh a, a rawn ring ta a, kan Professor mangang chuan “I chhungte dam lo serious tak an awm em? I chhungte thi an awm emni?” tiin a zawt thuai thuai a, an awm loh thu a hrilh chuan kan Professor chu a thinrim em em a, a ngai serious khawp a, a warning hial a ni.
Phaia ka awm lai khan sorkar-a mi pawimawh em em, IPS officer pakhat chuan, “Ka phone hi vawi 3 a ring hma-in ka la (pick-up) ngei ngei țhin” a ti a. Mahse, he sorkar-a mipawimawh lutuk, DGP hial chelh tawh pawh hian Biak In-a a inkhawm lai leh Kohhran lam hawi committee kan neihna-ah vawi khat te pawh a Cellphone a tih-rik ka hre lova, silent-a a dah zel thu min hrilh a ni. Mak ka tih em em chu, inkhawm leh meeting lak-lawh laiin call pawimawh chhang tura Biak in leh meeting a chhuahsan ka hre ngai lo bawk! Inkhawm leh meeting chhung hian call miah lo turin a staff-te phei chu a hrilh thlap thin a ni awm e!
5.5. Bill Pek Hreh Loh Tur Tawkin Phone Hmang Rawh
Mi tam tak chuan phone hi duh tawkin an hmang a, bill pek hun a lo thlenin, an beisei aia tam daih a lo kal chuan pek an hreh leh em em țhin. Mahni hman dan azir zelin kan bill kha a lo kal a ni mai si. Bill hi tihsual changte zawng awm ve bawk mahse, a tlangpuiah chuan kan hman zat kha an rawn bill a, lungawi taka pe mai tur kan ni. Mi tam tak chuan țul vak lovah, hmelhriat leh țhian-te rei tak tak an bia a, an hmang teuh teuh a, bill pek a lo hun chuan an rinai daihin a lo tam ta si… pek an hreh leh em em a.
An disconnect emaw, Simcard dang emaw an thlak a, an hmang leh mai țhin hi thil pawi tak a ni a, ringtute tan phei chuan chin loh a țha hle. Mihring mihrinna hrim hrimah pawh rinawm lohna leh ze nghet lo nihna a tarlang tel. America-ah leh UK-ah chuan Mi-rinawm, Ram hmangaihtu leh Innghahna tlaka an ngaih (Faithful citizen & Dependable person) tehna tam tak zinga Pawimawh tak pakhat chu “Kum 15 chhungin a Telephone Bill, Internet Bill, Cable Bill, Power Bill, Tax, etc. te Regular takin a pe țhin em? A Telephone Number pangngai a hmang em?” tih hi Mipuitling, Innghahna tlak, Ram hmangaihtu nia an ngaih te an tehna a ni!
5.6. Inleng Neih Laiin Cellphone Khal Loh Tur
Inleng neih lai leh midangte nena titi lai chuan Cellphone khawih tam loh a țha. Call a lo kal a nih pawhin, vawi 3 continuous call tal nghak ang che. A pawimawh viau chuan a rawn call nawn ngei ngei ang che. Call pawimawh lo kal hi lak a țul pawhin inlengte hnenah “Khawngaihin call ka’n chhang lawk ang e aw,” tih țhin a mawi. A pawimawh viau loh chuan, inlengte awm lai chuan call lak loh a tha, inlengte an țin hnu-ah, a remchan veleh call let mai rawh. Inlengte awm lai leh titi laklawh laia Call i chhang fo a nih chuan i titipui mek kha i ngaih pawimawh lohzia i larlang tel tihna a ni a, titi laklawh laia Call i chhang sek a nih chuan titipui chhunzawm zel che pawh a chakloh phah hial ang a, in inkar boruak a tichhe thei hial bawk ang.
5.7. Mahni Hnathawhna Atana Ţangkai Cellphone Neih
Hnathawhna atana țangkai tur phone neih a țha. Rawngbawlna lam atan Bible thun theih, sorkar mi pawimawh tan English dictionary awm, hna atan a pawimawh dawn chuan Camera, Video recorder awm, Memory chu pawimawh dan a zir nise. Hei hian kan hna atan nasa takin min pui thei a, Hna min chhawk thei a ni. Kei chuan ka phone-ah English leh Mizo Bible te, English dictionary te, Note-book te ka nei a, ka hnathawhna atan ka țangkaipui khawp mai. Mahni nihna leh thawhchhuah (status & income) phu lova phone changkang leh man tam neih te hi thil inhmeh-lo tak a ni a, changkanna emaw kan tih laiin mi nuih tizatu lek kan ni thei. Tunlaiah mi tam takin, thawhchhuah nei lem lo silova, Cellphone man tam tak tak an hmang a, an khawlai lennaa kawngdunga kal-paha hla ring tak taka an play vak vak țhin phei hi chu… hmanlai Radio lar laia khawlaia Radio zaitir a, khawlai an vahpui țhin lai kha a ang hle a, a changkang zawng nilovin, a mawl zawngin kan țhang chho a ang khawp mai. I Cellphone-a hla i ngaithla duh a nih pawhin, i bula miten an ngaithla châk ve viau a nih loh chuan Earphone hmangin hla ngaithla la mifing nih i hlawh ang.
5.9. Internet Hmang Tangkai la, Fimkhur Rawh
GPRS/WiFi facility awmna Cellphone-ah chuan GPRS/WiFi kaltlangin Internet duh duhin kan hmang thei a, Email te thawn-in, Website țha tak takte kaltlangin khawvela thilthleng pawimawh a thu mai nilovin, a lem leh a video-in kan en theih nghal a ni. Hei hi a hmang țangkai thiam tan a tangkai hle. Internet hi a țha lo zawnga hman erawhchuan pawisa sen thlawnna leh țul lova sualna kawnga tlanna a ni thung. Ţhalaite kan fimkhur a țul hle.
6. Conclusion
Kum 2001 vel ațangin Mizoramah Cellphone hi hman țan chauh a ni a (ka hresual em aw?). Khatihlai kha chuan khawsa thei deuhte leh Hlawh nei sang deuhte chauhvin an nei thei a, Tunah erawhchuan Ţhalai hlawh nei lem lo pawhin Cellphone hi an nei fur tawh a, phone man leh hman man a tlawm tawh vang a ni thei. Changkanna emaw tia nei ve ringawt an tam vang pawh a ni thei bawk. Cellphone hi thil țha tak leh changkang tak a nih avangin kan neih tam chu a pawina a awm hauh lovin a lang. Mahse, hmang-sual kan tam em avangin, Cellphone tam tak hmang-sualtu tam tak ai chuan, Cellphone tlemte hmang-diktu tlemte chu a thlanawm zawk. Changkanna hi hman thiam loh chuan midang tan ninawm leh harsatna-ah a kal thei. Changkang tak pawh mite tana ninawm leh harsatna kan nih tawh chuan thil zahthlak tak a ni tawh a ni. Chuvangin, Cellphone hi țangkai tak leh mawi takin i hmang ang u.
Similar Posts:
- KALVARI CELLPHONE.
- WaveSecure – Complete Mobile Security
- Mobile phone number hlauhawm
- I Mobile phone a thi ve dawn em?
- Mizote leh Mobile Phone
April 24th, 2012 at 10:35 am
Hello??
Report this comment
April 24th, 2012 at 10:48 am
Phone brand lam kan sawi thleng lova. iPhone leh a hmangtute hi an “KS” nasa ber (iPhone users have more s**) an ti leh tlat nia! Eng phone nge i hman ve? Hetah hian chhiar teh mah, hihi- https://www.thinkdigit.com/Mobi....._5226.html
Report this comment
April 24th, 2012 at 11:02 am
Cellphone kung nei ila, kum khatah cellphone 500 te han rah ta mai sela, a nuam awm.
Report this comment
April 24th, 2012 at 11:19 am
4G hi hmanni deuh khan Kolkatta ah chuan Airtel khan an launch ngei mai a. Tin, Guwahati ah pawh hian GPS hi a hman theih tawh em kha aw??
Nitin SMS pack atan cheng 1 an rawn cut a, thlakhatah ka phone atana ka senso hi cheng 70 vel a ni.. Sas chu ka nghei miah chuang lo.
Report this comment
April 24th, 2012 at 11:27 am
5.3. Mi bula Cellphone i hman-in, Ţawng ring lutuk Suh
Report this comment
April 24th, 2012 at 11:43 am
Good post.
Report this comment
April 24th, 2012 at 12:03 pm
kan va lawm em ! U John
Report this comment
April 24th, 2012 at 12:09 pm
Bengvar thlak e. Mizorama cellphone kan hman tan kum hi chu 2002 ani lo maw?
Report this comment
April 24th, 2012 at 12:09 pm
Ava tha kher em
Report this comment
April 24th, 2012 at 12:44 pm
Sim card thlak hi chu signal mumal loh avang thin te hian loh theih loh va thlak a ngaih chang a tam khop mai………Post paid hi voikhat chiah ka la hmang a, a that rualin prepaid ah chuan a in ren theih deuh…
3g kha voikhat ka ti ve chhin a ka paih leh daih. Net surf theih lohna phone hi tha ber mai
Report this comment
April 24th, 2012 at 12:48 pm
A tha in a beng var thlak e. Khi hman dan mawi i sawi khi kan in teh ve th ang. (insawi thei lawks ang e)
5.1 Ka fihlim in ka hria, hla pawh hi ka dh tam lo khawp a, thlalak pawh a camera a ka lak bah chu ka pa thlalak leh ka thianten ka thalak an lak min bluetooth a ni mai awm e a.
5.2 Tul lovah mi biak hi chu ka ti vak lo.Nula bula ck duh chhuanlam anih loh chuan.
5.3 Ka lo tawng ring ziah, kei hi phone hmang lo pawh a tawng ring ka ni hrim hrim a. tawng rin hi ka sim thei meuh lo.
5.4 Kei chu Silent hian ka dah kumtluan, ka phone hmasa kha kum thum chhung ka hman lai khan vawi khat emaw chiah a ring a, chu pawh a test na. Message pawh vawi khat emaw chu a ri ang. Keini ang pa haihawt tan chuan NGAWIHTHAP tih hian dah reng a tha.
5.5 Poast paid hmang lo teh mial a. Mahse, Phone nei ve a, Balance ka nei lo tih reng hi zahthlak tawpah ka ngai. Laklawh chang chu a awm. Nei ngai lo permanent nih hi zah tur
5.6 Phoen khalh hi ka ching, nula rim a zahzelah a tha ve in ka hria, mahse a mawi ber lo.
5.7 Hei hi ka vei bawk. Phone changkang mamawh lo hian kan duh changkang a, hmanna kan hre leh silo. PDF hmang thiang lo, mail pawh danwg ngai lo te hian PDF support te kan lei a,Iphone nei pakhatin a thiante cheg 200 a puk sak leh si tih ang hi chu a zahthlak lam hrat a ni.
5.9 Hei pawh hi ka hmang tangkai viau mai a. Google map leh CPS te thleng hian ka hmang ve thiam sawi sawih a tih chi ve tak a ni.
Chuan pakhat leh lawk kan belh ve teh ang. Phone pahnih nei kan in tih hmuh hi a thing ka ti ( kei pawhin ka nei v tho na a) Mi thenkhat chu an office in phone bik an pe a, a then chuan network that loh thil thu an hna ina mamawh avangin 2 an nei a, chu chu changkannah ngaiinmamawh ve hlei lo hian 2 an nei hi chu a thing tawps, a then chuan pkhat ck nan an hmang a, pakhat ah pawh call an dawn bar loh lai a, pa hnih lo neih ve hi chu in tihmuha atan thil tha lo tak a ni. Miin phone thar an lei a pa hnih an lo nei a nih pawhin keng chhuak fo a tul ber lo kawl ve mai mai teh se…………Ka va nasa em
Report this comment
April 24th, 2012 at 1:02 pm
Report this comment
April 24th, 2012 at 1:14 pm
#11
i in-thlahrung mah mah, 
Comment tha khawps mai.
#8, I Zawhna “Mizorama cellphone kan hman tan kum hi chu 2002 ani lo maw?” i tih hi, “Kum 2001 vel a nih thu” hi khawi-ah emaw ka chhiar tawh a, Reference ka pe thei ta mai lo a ni, sorry. Chhim lamah chuan kum 2002-ah kan hmang ve tawh a. Hmar lam chu in hma deuh ka ring hrim hrim. Hriat-sual mial pawh a awm thei tho bawk.
Kei chuan, kum 2002 atangin Cellphone hi ka hmang tan ve.
Report this comment
April 24th, 2012 at 1:47 pm
Post tha leh bengvarthlak tak ani e. Keipawh ka hmang tangkai ngiang mai. Bible chang zawn hmuh zung zung nan, digital camera, video camera, dictionary, calculator, sms, measurement, mp3, video call, navigation, weather forecast, fb leh mi(sual) nan, etc.
Report this comment
April 24th, 2012 at 1:55 pm
Phone 2 ka nei…ka lenvah velna ah pawh ka ak kawp ziah
Report this comment
April 24th, 2012 at 2:22 pm
Good post
Mahse “Kum 2001 vel ațangin Mizoramah Cellphone hi hman țan chauh a ni a” tih khi chu a dik lo deuh ang em aw ka ti. Kan Governor hlui AR Kohli khan Mizoram Legislative Assembly a address naah khan Jan 31 2004-ah mobile phone launch a nih thu a sawi tlat a ni. Mahse 2003-ah pawh khan connection pek chhuah chu a ni tawh a, Jan 31 2004 hi chu official launch date a nih hmel. Ka hriat ve chinah chuan 2003 hmalam kha chuan mobile phone hi Mizoramah hman a la ni lovin ka hria.
Report this comment
April 24th, 2012 at 2:53 pm
Kum 2001 khan state dangah mobile phone hrawl tak mai kekawr ipte puar pawp khawpa ah tham ka hmang ve tan a, 2002 kum tir lam Mizoram ka haw zawk lai khan Mizoramah chuan an la hmang lo ngei mai (hresual em aw???).
Kei zawng phone thlauh ka sim theih miah loh avangin phone tha ve deuh neih ka sim ta.
Mah re re se, post tha leh bengvarthlak tak a ni
Report this comment
April 24th, 2012 at 4:22 pm
bvt
Report this comment
April 24th, 2012 at 4:42 pm
Post tha tak a ni e. Hetiang lam hi lan inhrilhhriat nasat a tul reng a ni.
Cellphone chung changa hriat tur pawimawh deuh pakhat chu Specific Absorption Rate(SAR) hi a ni. Hei hi kan taksain heat radiation/energy a hip luh hnem zawng zawng tehna a ni a. Kan tihrawl kg1 bawr vel zelina power a hipluh tam zawng ti pawhin sawi ila a dik thei tho awm e. A tehkhawng(unit) chu watt per Kilogram(W/Kg) a ni a. SAR hi Mobile phone siamtu company a zirin a inanglo thluah a . Federal Communication Commission(FCC) USA-in hriselna atana him chin tura a bituk chu 1.6W/Kg a ni a. Chutihrualin Council of the European Union ve thung chuan 2W/Kg hi a bituk chin a ni vet hung. Chuvangin Mobile phone lei dawn chuan SAR value hi enchian a tha ve khawp mai.
Chuan Mobile phone hi Mizoramah chuan Kum 2004 atanga hman tan niin ka lo hria a; Kum 2007-ah chuan ram mipui 16% velin kan hmang tawh.
Report this comment
April 24th, 2012 at 4:51 pm
Phone a video/picture dah tur/dah loh tur. A hmandan tihvel hi chu in sawisak chi pawh ni in ka hrelo. A neitu te thu thu a ni mai. A tul tampui berlo. Mahni ngainat zawng zawng chu lo dah mai mai ang hmiang.
Report this comment
April 24th, 2012 at 4:53 pm
Ka hriat ve dan chuan Motorola hi Mobile Phone siam chhuak hmasa ber tu.
Report this comment
April 24th, 2012 at 4:54 pm
Post tha tak a ni e. Hetiang lam hi lan inhrilhhriat nasat a tul reng a ni.
Cellphone chung changa hriat tur pawimawh deuh pakhat chu Specific Absorption Rate(SAR) hi a ni. Hei hi kan taksain heat radiation/energy a hip luh hnem zawng zawng tehna a ni a. Kan tihrawl kg1 bawr vel zelina power a hipluh tam zawng ti pawhin sawi ila a dik thei tho awm e. A tehkhawng(unit) chu watt per Kilogram(W/Kg) a ni a. SAR hi Mobile phone siamtu company a zirin a inang lo thluah a .US Federal Communication Commission(FCC) -in hriselna atana him chin tura a bituk chu 1.6W/Kg a ni a. Chutihrualin Council of the European Union ve thung chuan 2W/Kg hi a bituk chin a ni vet hung. Chuvangin Mobile phone lei dawn chuan SAR value hi enchian a tha ve khawp mai. Tin, Mobile signal hi non-ionizing radiation a nih avangin biological effects a thlen sam bik bawk.
Chuan Mobile phone hi Mizoramah chuan Kum 2004 atanga hman tan niin ka lo hria a; Kum 2007-ah chuan ram mipui 16% velin kan hmang tawh.
Report this comment
April 24th, 2012 at 6:28 pm
Nguntang@22…
Mahse “Mobile signal hi non-ionizing radiation a nih avangin biological effects a thlen sam bik bawk.”
Ionizing Radiation hian biological effects a thlen sam zawkin ka lo hria a.
Post pawimawh tak mai a ni.
Report this comment
April 24th, 2012 at 6:33 pm
Report this comment
April 24th, 2012 at 6:54 pm
Cell phone hi Cinema Hall velah 96 vel kha chuan a chiri chuah2 zel. Aizawlah chuan 2002 khan limited user in an hmang, Lunglei lrh Saiha lam chu 2003 hnu lamah a niin ka hria. BSNL mobile connection la tur khan Baptist Book Room piah te kha ksn intlar thin zawng kha a nia. Lungte pawh a chhe rum rum a lawm.
Report this comment
April 24th, 2012 at 6:55 pm
Cell phone hi Delhiah chuan Cinema Hall velah 96 vel kha chuan a chiri chuah2 zel. Aizawlah chuan 2002 khan limited user in an hmang, Lunglei lrh Saiha lam chu 2003 hnu lamah a niin ka hria. BSNL mobile connection la tur khan Baptist Book Room piah te kha ksn intlar thin zawng kha a nia. Lungte pawh a chhe rum rum a lawm.
Report this comment
April 24th, 2012 at 7:36 pm
@buh-duha..nia i sawi dik e.Ka sawi dan khi a lo famkim lo deuh vang zawk a ni.Non-ionizing bikah chuan frequency sang tak, Radio frequency ang ho hian biological effects a thlen sam deuh bik..ti ta zawk ila,a pawmawm zawk dawn a lo ni e.
Report this comment
April 24th, 2012 at 8:08 pm
Ka misual man ka bengvar leh ta…(Y)
Report this comment
April 24th, 2012 at 9:23 pm
ka beng verh chi, hetiang post hi
Report this comment
April 25th, 2012 at 1:25 am
A bengvarthlakin a ngaihnawm takzet e. Fuihna tha tak a ni bawk si a, ka vawng reng ang. Comment pawh a ngaihnawm khawp mai. Kg 40 a nih lai kha chuan SMS Chhas tih vel chu an la hmelhriat lo chiang vai vai viau ang.
Report this comment
April 25th, 2012 at 11:53 am
Chanchinbu lama chhuah atan itawm hle mai.
Report this comment