mi(sual).com

– Rev. Vanlalzuata

Ni tin tiharh rawh ka rilru, I ta angin siam la he thu; Kalhtu tur hi lo awm phal suh, I thu ni se.

Amena, thuhretu rinawm leh dik taka, Pathian thil siam bula khan heng thu hi a sawi a ni (Thup. 3:14).

Chhiahhlawh thuawih tak pakhat hi a awm a. A pu a zin dawn apiang hian a pu kalna tur khuaah chuan a lo va kal hmasa a, a pu a lo kal dawn a ni tih a lo va hrilh lawk thin a. Vawi khat chu a pu a thi dawn ta a, a chhiahhlawh chu a ko va, “Hei, mitthi khuaah ka zin dawn a, nang hi ka kalna tur khua apianga lo kal hmasa thin kha i ni a, lo va kal hmasa leh ta che,” tiin a hrilh a. Chhiahhlawh chuan chemte a la a, a thinah a vit tlum ta thawih mai a, mitthi khuaah chuan thuawih takin a lo va kal hmasa leh ta a, engtin tak chuan va sawi ang maw.

Amen tih tawngkam hi kan hmel hriat hle a, kan sawi zing bawk a; amaherawhchu a awmzia hi chuti takin kan zir chiang tawk lo mai thei e. A tlangpuiin tawngtai tawpaah kan Amen a, Bible chhiar tawpah leh thusawi tawpah Amen kan pe bawk a, thusawi laiin mihlim thenkhatten Amen an lo pe bawk thin.

Amen tih hi Hebrai tawng a ni a, a awmzia chu “Ni ngei rawh se, nghet takin ka pawm e, chutiang tak chuan ka chungah thleng rawh se,’ tihna a ni (So be it, or So it is, or Steadfast). A awmzia atanga kan thlir chuan Amen hi tawngtaw chham liam mai mai chi a ni lo tih a lang. A chunga kan sawi ang khian chhiahhlawh thuawih takin a pu thu chu a kawi a ngila zawmin, a hlimna tur aiin a pu tana tha zawngin a pu thu chhuak apiang a Amen a. Keini pawh hian kan chunga thuneitu Pathian thu kan awiha kan pawm thlap thlapna hi Amen awmzia chu a ni ber ang.

Kan Bible-ah hian Amen tih hi kan hmu tam khawp mai a, a hman dan pawh chi hrang hrang a awm bawk. Amen tawngkam kan hmuh hmasak ber chu Number 5:22 a mi kha a ni a, Deuteronomy 27:15-26 chhungah khan Amen tih hi vawi sawm leh pahnih kan hmu zui a. Thuthlung Tharah pawh Amen tih hi kan hmu tam khawp mai. Lal Isua tawngkamah pawh kan hmu nual bawk. Johana ziakah ngawt pawh hian Amen tih hi vawi sawmnga awmin an ngai a, a chhan chu Lal Isuan, ‘tih tak meuhvin tih tak meuhvin,’ a tih hi Amen tihnaah mi thiamte chuan an ngai a, ‘double Amen,’tiin an vuah a. Amen hi thu tlangkawm nan chauhva hman a ni lo va, thusawi bul lamah te, a laihawlah te an hmang bawk a, Paula lehkha thawnah te pawh hian a awm nual mai.

Kan Lal Isua hi ‘Amena’ tih a ni bawk a (Thup. 3:14). Tirhkoh Paula pawhin, “Amahah chuan ‘A ni’ tih tih a awm si a, chutichuan amah avang pawhin ‘Amen’ tih chu a awm a ni,” a ti bawk a (II Kor. 1:20). Lal Isua hi Amena kan tih hian thil engkim bul tanna leh engkim tawpna Alpha leh Omega a nihzia a lang a (cf.Thup. 22:13). Amah ngei pawhin, “Kei LALPA, a hmasa ber leh a hnuhnung bera hnena awm hi, a titu chu ka ni,” a ti a (Is. 41:4). He thu hi hetiang hian ngaihtuah zui hlek ila : Mi dangte kalsan vek tawh nia kan inhriat lai pawhin Lal Isua chuan kan hnung lamah min la chhawm reng a. Mi dangte tuar loh tuar fâl nalha kan inhriat lai pawhin Lal Isua chu kan hmaah a la awm cheu bawk. Chutichuan kan awm dan tinreng hi a chhiaah pawh a thaah pawh Pathianin min hual vel vek a, chuvangin kan nuna thil lo thleng reng rengah hian Amen theihna a awm thin a ni.

Chutichuan Amen awmzia leh a kalhmang kan sawi ta nual a. Tuna kan sawi leh tur chu Amen pawimawhzia leh a harsat dan te, tawngkama Amen mai lova thinlung leh nun tak taka Amen a pawimawhzia te, Amen thei tura inbuatsaih a pawimawhzia sawi zau leh deuh ila.

Amah kan Lal Isua ngei pawh kha Gethsemane huanah khan a chunga thihna rapthlak tak a thleng ngei dawn a ni tih a hria a. A huphurh ve em em a, “Ka Pa, rem i tih chuan he no hi ka hnen ata la sawn rawh; nimahse keia thu ni lovin, nangma thu thu ni zawk rawh se,” tiin a tawngtai a. A lungngaihna thlan chu thisen lian tak angin a far zawih zawih a (Lk.22:42-44). Lal Isuan a tuar tur hi huphurhin pumpelh duh hle mah se, “I thu thu ni rawh se,” tia a Pa kuta a inhlanna hi Amena a nihna chu a ni. A thuin thutlukna a siam lo va, a Pa hnenah Amen a pe a ni.

Abrahama kha Pathianin Moria tlangah a fapa neih chhun hlan turin thu a pe a.Kalkawnga an kal laiin a fapa Isaaka chuan, Ka pa, en ten, mei leh thing chu a awm a; nimahsela halral thilhlan tur beram no chu khawiah nge a awm?” a ti a. Abrahama chuan, “Ka fapa, Pathianin ama tana halral thilhlan tur beram no chu a ngaihtuah chawp mai ang chu,” tiin a chhang a. Tlangah chuan Abrahaman a fapa halralna tur maicham a siam a, thing a chhep khawm a, a fapa chu maicham chungah chuan a muttir a, chemtein a vit dawn ta a. Abrahama hian a fapa hi a hmangaih lo a ni lo va, a fapa leh ama aw aiin Pathian aw chu a ngai pawimawh zawk a ni. Amah leh a fapa duh dan aia Pathian duh dan a pawmna chu ‘Amen’ chu a ni a, a namai lo hle (Gen. 22:1ff).

Tirhkoh Paula kha Jerusalem khuaah a kal dawn khan zawlnei Agaba chuan an man ang a, an lo phuar dawn a ni tih a sawi lawk a. Mite chuan kal lo mai turin Paula chu an thlem a. Nimahsela ani chuan, “Jerusalem khuaa phuar chang ka huam lo va, thih pawh ka huam asin,” a ti bur mai a. Chutichuan, “Lalpa thu thu ni rawh se,” an ti ta a (Tirh. 21:10-14). Heta “Lalpa thu thu ni rawh se,” tia an duh dan aia Pathian duh dan an thlir ngamna hi Amen chu a ni leh ta. Amah Paula ngei pawhin, “Lalpa Isua hnen ata rawngbawl hna ka hmuh kha thawk zo phawt mai ila, ka nun pawh thlakhlelh tlakah ka ruat lo ve,” tiin Amen a pe bawk a (Tirh. 20: 24).

Mari chu Josepha nen an inhual lai mekin nau a pai ta mai a. Inneih hmaa nau pai hi thil zahthlak tak mai a ni a. Nimahsela Mari chuan vantirhkoh hnenah, “Ngai teh, Lalpa bawihnu ka ni, i thu ang zelin ka chungah thleng rawh se,” tiin a chunga thil thleng tur chu Amen a pe a (Lk. 1:38). Mari anga kan mualphona turah pawh Pathian thu avanga Amen pek ngam hi a har hle mai.

Keini ngei pawh hi Amen chungchangah hian inen fiah kan mamawh hle. Kan chunga tha tur lamah chuan Amen Amen tiin kan sawi nawn mawlh mawlh a, nimahsela kan tuar tur leh hmingchhiatna tur lamah chuan Amen hi a sak hle a ni. Kan chunga thil tisualten kan hnenah ngaihdam an dilte hian Amen kan harsat hle a, miten min ngaidam se kan tihna lamah erawh chuan Amen turin mite kan nawr thung a.

Kan chungah natna khirh tak a lo thlenin kan Amen thei lo va, damna dilin kan Amen tlut tlut thung a. Kan chhungte thih laiin Amen a har hle a, mahni kan thih dawn phei chuan a har lehzual a. Kan tlukpui ve thoten keini aia chawimawi an hlawhte hian pahnihna nih thiam a har hle mai a, Amen kan pe hlei thei lo va. Hna kan dil a, kan hmu lo va, Amen thei ila chuan a tha tur, nimahsela kan Amen theih loh avangin kan dil hma ai khan kan hah daih zawk a. Kan nihna tak miten min sawiin min rel emaw tiin Amen kan pe thei lo va, anmahni kan haw let a. Kan nihna bâka miten min fak hlak hian kan tawngkamin kan hnial a, kan thinlung chuan Amen a pe a.

Kan chunga thil lo thleng apiang, a chhia emaw a tha emaw Amen ila, pawm thlap thei ila, kan nun hi Amen nun ni sela chuan kan ropui ngawt ang. A dik tak chuan Amen theih loh nei tam apiangte nun hi a hah a, Amen thei lo mah se, tuarna leh thihna an pumpelh dawn bik hauh si lo. Thi tura inbuatsaih peih thlapte ai chuan thi tura inbuatsaih ngai lote thih dan chu a rapthlak hle zawk ang. Mite fak phut ru rante aiin mite fak phut hauh lote nun a hahdam zawk ang. Chutichuan Amen nun nei tam apiangte nun hi a hlim a, Amen nei tlem apiangte chuan he dam chhung tawi teah hian hlimna an hmuh hmain thlanah an liam mai dawn a ni.

A tawp berah chuan Amen hi tawngkam mai ni lova nun leh thiltiha Amen-tu nih a pawimawh. Pathian thu sawiahte pawh hian mi thenkhat chu kan tawngtaw Amen mai mai a, fimkhur deuh a tul âwm e. Sawi ta bawl bawl zel mai ila, tawngtaiahte pawh hian mi thenkhat, pawl chhuakhote tawngtai hi chu Amen tlak loh a awm thei khawp mai. Tirhkoh Paula pawhin, “…i lawmthu sawiah chuan engtin nge Amen an tih theih ang?” a lo ti a (I Kor. 14: 16). Chuvangin Amen-na tura Amen ngam loh a awm thei ang a, Amen loh tur Amen a awm thei bawk ang a, ngaihtuah chiang hauh lova Amen satliah a awm thei bawk ang a, tawngkama Amen a awm ang a, nuna Amen a awm bawk ang. Engpawh ni se, kan chunga hlimna lo thlengah chauh ni lovin, vanduainaah pawh Amen thei turin i inbuatsaih ang u.

Ni tin tiharh rawh ka rilru,
I ta angin siam la he thu;
Kalhtu tur hi lo awm phal suh,
I thu ni se.

AMEN.

Similar Posts:

• Amen ti thei – Mari (Isua nu)
• AMEN (Sunday pual)
• Essay on Amen
• Lal Isua Leh Amen! {Sunday Pual}
• AMEN Vrs UM

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, April 29th, 2012 at 2:29 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.