mi(sual).com

Ka dah tawh emaw ka tia, kalo la dah lova. Nikuma ka chhuah tawh The Last letter chhunzawmna na thawnthu tawi ani e. The last letter en duh tan
https://misual.life/2011/10/07/the-last-letter/

Favang boruak a nuamin thla lah chu a eng uarin lung a leng a, rilru in kan tlangval lai min hriatchhuah tirin mami nu nena kan in ngaihzawn laia Pu Phunga serthlum huana thla eng hnuaia hlim taka kan awm dun lai leh vaihmite thlawk mai mai pawh kan nuih pui laite rilru ah a rawn lang a. Hlimte a tudang ngai lova kan lendun laite rilru ah a rawn tharin tunah zawng engkim mai hi a dang tasi. Ka tih hreh ka tih a ngai a, tlang rel hlauh vanga keimah hlimna tur nia ka ngaih tihreh tur khawp chuan dawizepin ka in hre silo. Zinglam dar 4 a ri tawh a, ka thiannu (Bialnu) chuan bus station ah kan in tiam ang ngeiin minlo nghak tawh ngei dawnsi. Hmmm.. kan chokapui dawhkanah hian ka thil ziah chu dahin ka kal mai ta nge.

To,
Mami Nu,
A hmasa berin i mi ngaihdamna sang ber ka dilin khawngaihin minlo ngaidamin minlo hrethiam hram ang che. He lehkha i hmuh hun chuan ka tum ram panin motorah ka chuang tawh anga, min rawn biak pawh tum lem suh ang che. Hei kan inneihna pawh kum 25 chuang ani tawhin Mami te unau pawh puitlinga chhiar theih anlo ni ve ta a, in ngaituahawm lutuk turah ka ngai biklo in harsatna liantham in tawhloh hram ka beisei. Ka fate leh ka hmangaih thin te harsa manganga in awm ka phal biklo asin, eizawnna chungchangah pawh mami’n hna nei tawh mahse nuamsa a in awmloh ka hlau a thil pawh ka ruahman fel vek e. I hman hmasak berah advocate Remtluanga hnenah khan zu kal la, kan bazar dawr leh tunah kan in kha i hminga ka thlakna lehkha i zu lam dawn nia, Mama zawng a la nau deuh em a, i hmingin ka ti ta hrih.

Nia, tlangkam atang chuan sawi lemlo mahla kan office a ka ngaihzawng neih chungchang chu i hretawh tih ka hria in, zan tam i mutloh phah bawk tih hi i bula mu zantin hian ka hai biklo asin. Nu tan chuan kawppui te ina ngaihzawng dang an nei tluka na hi a tam dawn silo. Mami nu, kei ngei pawh hian hetianga awm hi ka duh lo a, mualphona leh chhungkaw kehchhiatna ani tih ka hria asin. Ka thiamloh ani e, mahse kan ti teh ang. Hetiang hun hi thlentir ka duh ngai ang tih pawh kain hrelo in a thlen ka duh heklo. Hun kalta te han ngaihtuah let la vawi tam ka hrilh che ani lawmni, mipa ka nih angin chhungkaw enkawla kan chhungkaw tana thawh hi ka rawngbawlna ani a, ka hlen thawkhat chuan kain hria, nang erawhin hmeichhe lu i pasal rawng i bawlna kawngah hian i tihtur i hlen ve em tih erawh loin zawt ve ang che. I rawngbawlna hlen la, tun hi kan thlen kei chuan ka ringlo asin.

Ka tlangval lai pawha ngaihzawng nei ngailo kha, nupui ka neih hnuah engvang nge midang ka kawpsan che, a chhan maw? Hlimna ka hmu lo ani e. Kum tam inngaizawngin nupa ah kan insiam ani a, kei khawtlang fak tlangval lehkha zir peih tia sawi ka niin, nang khawtlang nula zaidam, fel leh taima a sawi ini thin. Nupa a kan insiam pawh khan tuman kan hlimloh reng an ring pha silo. Keipawhin ka ring phalo asin.

I hmel en ning theilo khawpa hmangaihtu che hian keh thei dawma dawm chein ka enkawl che a, i duhzawng i sawi reng tihloh ka neih ka hre silo. Hmangaihna avangin tihlawm ka tum che a, i thusawi ka ngai pawimawhin i thu lah ka zawm nasa in fiamthua “thaibawi” antih hial khawpin i thu pawh ka awi ani lawmni. Mahse nang chuan hmangaihna avanga i thu ka zawmna te, ka duatna te chu hrethiamloin a dan tur rengah i ngai a, mi hlutsak silo. Kum tam dimdawi leh kehthei dawma ka dawmna che chu i than hnan a, ka thu ngaih pawimawhloh phah nan leh i thu hlira kaltlang duhna thinlung i neih phah hlauh si. Insak dan chungchang, TV design, carpet rawng leh in rawng thlan chungchanga i thu anga kalpui i tum chungchang te chu kala hrethiam, chhung puinu i nihna angin i chan anihna lai te pawh a awm e. Mahse, thupui leh mipa thu pawhchah na chi ah pawh thu neih i tum zelin hmeichhe in rawlhna tur chiloha thu neih phet i tum avang hian ka U nen vawi engzah nge kan inhauh a, ka pa in min kamkhat thu te kha i hre hauhlo ang, ka hrilh silo che a.

Nitin office ah hah taka thawkin in nawmsak loh hlauhna avanga dawr ka siam haw paha ka en felpui thin avangin ka chau thin a, mahse vawi khat pawh “Mami Pa i chau em, thingpui ka lo lum ang che aw” i ti ngai silo (A tir kum khat kha chuan iti, mahse a reia i inthlak tasi, kalo duat em che khan imi ngaihhlultna leh ka chunga i rilru put dan a thlaktir che ani e) Hah takin kan haw a, kan thlahlel che a, ka bula awm ai chuan Kohhran hmeichhe thiltih khawm, sangha zawrh, pickle zawrh te i ngai pawimawh zawk si. Pathian tana rawngbawl leh Kohhrana inhman hi a thalo ka ti ani reng reng lo, mahse nang chuan Mizo nu tamtak te angin kohhran leh khawtlang hi chhungkaw zawhah, i rawngbawlna 2 na ani tih i hai a, i dah pawimawh zawk si. Pathian zarah sum lamah harsa loin awmpui pawh 2 lai kanla theiin kei hi mizo mipa tamtak te anglo takin fate enkawl hi a nuam kalo ti zawk a, chuti ni suhse kan rama chhungkaw tamtak buaina anga i fate aia ramthim i vei zawk avang hian kan fate hi sualkawng an zawhlo ang tih ka sawi theilo asin.

Nupa nun lah nise kan buaina pakhat ani si, i hmeichhe thatloh chu thuhran nangman i duh hunte anih loh chguan keiman chak thin mah ila nupa nun te hi kan hmang ngailo tih i hria em, i hriat pawh ka ringlo. Kuthna thawk hahlo leh nuamsa in siam che mahila i pasal kani tih hi i theihnghilh thin ni hian ka hre thin. Fa kan han nei a, i tan zawng inchei leh intuaihnum te chu nula tihtur ah a chang zo in i pawnfen puk hluai leh kawr hring i ha nitin a, Office a ka thawh puite nena thil tihkhawm anih in an niin an nupuite inchei nalh taka an rawn hruai thin laiin “Huau huau ka peihlo” tiin mi kalpui ngai heklo.

Inchei parh harh a, nuthlawi zu zuar an sawi ianga taih sen hlarh tur ka ti ani reng renglo, ka tan chuan nang aia hmeltha an awmlo asin. Mahse mipa mit hi chu a ler a, kan hmangaih em em te fai taka anin tuaihnum hlarh aia hmuh nuam a awmlo asin. Chhiatni thatni a ka bula kala nalh taka incheia kal dun te hi ka chak ve thin, mahse nang inchei peihlo chuan i peih thin silo. Inchei i peihlo han ti ila, i duhna lo ah i peihlo ti ila ka sawi dik zawk awm e. MHIP thil tihpui leh Kohhran hmeichhe khawmpui ah vek kawr thar ha lova i kal a awm leh thung silo.

A!! Ka sawi thui lutuk dawn e. Nia, i hriat angin kan office ami nen hei kumkhat kan inzui ta ani a. Ka kum alo upa ta nen ka hlimna lam ka pan ta nge, Pathian erawh zahawm viau mahse uire nih reng a tawngtai ngamloh ai chuan nupui thena ka theih anga chunglam thuawi nih ka tum zawk ange. Min dem ani maithei, mahse kumtam misual tan leh ram tana i tawngtai dum dum lai khan mahniin roomah kan nupa inkar chhe mek hi alo thata kan nupa kan hlim theih nan kalo tawngtai ve thin asin.

Nangmah ka kalsan tak chhan kan office a kan LDC kha chu i hriat kha, i hmuh hmasak a, “a hmel ava ZO ve” i tih ngei kha ani asin. Mahse ani chuan kan inngaihzawn hma pawhin a Pu ka nihna ang niloin Mipa ka nihna angin min zahthiam a, a hunah min duat a, min hrethiam si thin. Mami te unau erawh an zak dawn a, a pawi ka ti hle. ka hmangaih tih i lo hrilh dawn nia. Tunah chuan vai ramah zin kan rilruk phawt a, chumi hnuah ka dil anga thingtlanga awm min phalsak angin Aizawl atanga hmun hla takah ka hna zawm turin kan kal nghal ang. Dam takin le.

I Pasal thin

Similar Posts:

• NANG NGEI HI I LO NI
• The last letter
• Min thlah la ka sawi ang
• Love Story- IV (Ka Thài)
• Facebook Fiamthu

Recent Posts:

• KA ṬAHPUI LEH SI ṬHIN
• The Alaskan serial killer
• Thanglian, Aw…… Thanglian !
• CFL Hmingthanga Thihcham Vawikhatna Pualin
• NGAIHNAWM KAWLEKSAWN – 2 :

This entry was posted on Thursday, May 3rd, 2012 at 9:00 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.