mi(sual).com

1. Thu  Hmatheh:
Sawlâkia hi Mara hnam lâm zinga mawi ber, awmze nei ber leh upa ber a ni. A lo chhuah dan hi a mak danglam hle a, hetiang ngat hi chu hnamdang lâm zingah pawh a awm lovin ka ring hial. Awmze thûk leh ropui tak a ken tel hi Sawlâkia hlutna leh chungchuan bikna lai tak pawh niin alang. Zofate leh tute pawhin Sawlâkia lâma an lâm hunah a nihna dik tak hre reng chunga an lâm chuan a lâm-te leh thlirtute a hneh lehzual ngeiin a rinawm.

2. Keimi-ten Lâm An Zirtir:
Mara hnam hi pipute hun lai chuan raldo hrat tak an ni a. Tichuan heng mi lu an lâk a, sahrâng (sakei, savawm, sai etc.) an kah nikhua te hian a lu chu an ai țhin a, hetiang hunah hian Sawlâkia lâm hian an lâm țhin a ni.

Kum 1600 vela Mara fate Burma ram (Chin hills chhung)-a an awm lai ațang daih tawh khan Sawlâkia hi a lo ințan tawh a. Ţumkhat chu Chhaongai khuaah Keimi a hrâng chiam a, tumah pawna chhuak ngam an awm lova. Tuahthing la ngam leh tui chawi ngam tak ngial pawh an awm lova. Tuahthing an tlak chham takah chuan Chhaongai Lalnu chuan a sal nula chu thing phur turin a tirlui a, sal nula chuan a hnial ngam si lova, hlau êm êm chungin a kal ta a. A rin ang ngeiin, Keimi te chu a va hmu ta ngei a. Anni chuan thil awmzia an zawt a. Sal nula chuan Lalnu-in a tirh luih dan te chu a hrilh a. Keimi te chuan, “Hlau rêng rêng suh, nang chu engtin mah kan ti lovang che. Ţhenkhatin thing kan eh-sak ang che’nga. Lâm kan zirtir bawk dawn che a ni” an ti a.

Tichuan, lâm an zirtir thiam hnu chuan, “Kal ta la, in i thlen veleh, i thingphurh hi in chhungah luhpui lovin, pawnah keuh ang che” an ti a. Khua a thlen chuan khuaa mite hnenah chuan Keimi a hmuh thu te leh lâm an zirtir thu te a sawi a, mak an ti nasa hle a. Zân a lo nih chuan Lalnu chuan sal nula thingphurh chu seng luh tumin pawnah a chhuak a, chu veleh chuan Keimi ten an lo man ta a. Lalpa-in a nupui chungchang a hriat chuan a tuarnâ êm êm a, tui leh chaw reng reng a eiin, a in duh ta lova.

Chhaongai khaw mipuite leh Lal khawnbawl-te chu an Lal avangin an mang a ang hle a. An Lal tihhlim tumin ruai ropui tak an buatsaih a. Sal nula khan an khaw nula leh tlangval-te chu Keimi hnen ațanga lâm a zir kha a zirtir hlawm a. Tichuan, Mual laiah thiam tak maiin nula leh tlangval-te chu an lâm ta a. Chutia an lâm mawi tak a hmuh chuan Lal chuan a lungchhiatna te leh a lusunna te a theihnghilh a, hlim takin ruai a țheh thei ta a ni. He Sawlâkia an lâmna hmasa ber Mual hi Teisai Phaizawl tia hriat a ni ta a, Chhaongai khaw bul (Myanmar)-ah tun thlengin hmuh theih-in a la awm a ni.

3. “Sawlâkia” Tia Phuah A Ni:
Kum 1650 vel khan, Sizô khaw Lal Mahlei-I chuan Matu khua, Chakapi chu a run vak mai a, an Lal Khifie leh a nupui a that a. Khifie nupui chuan Savawm ang main ngho a nei a, mak an tih êm avangin a lu an tan, an hawn ta a. Sizô khua an thlen chuan mi lu an lak te chu aih an tum ta a. Chakapi Lalnu ngho an hmuh chuan Keimi thlah niin an ring a, anmahni tinâ thei thlarau sual (saw) neiin an ring a. Chuvangin, Chakapi Lalnu thlarau (saw) chu tih lungawi a, anmahni tinâ lova, mitthi khuaa thlah liam țul-in an hre ta a.

Tichuan, Keimi hnen ațanga lâm an thiam hmangin nula leh tlangval rual ten Chakapi Lalnu lu chu an lâm hual ta mup mup mai a. Chutia nula leh tlangval-te lâm chu khaw mipuite, Lal leh a khawnbawl upate chuan mawi an ti êm êm a. “He lâm mawi tak mai hi engnge a hming atan kan phuah ang le?” tiin an inrawn khawm a. Chhaongai khuaa Sawlâkia an lâm khan hming a la nei silova. Atawpah chuan, Sizô khaw Lal Mahlei-I chuan, “He lâm lo pianchhuah dan ațanga chhut-in, ral kan thah-te lu kan aih laia lâm a nih avang leh an thlarau thlahna a nih avangin ‘Sawlâkia’ i ti ang u” tiin an lo phuah ta a ni.  Chakapi Lalnu lu an aihna leh Sawlâkia tia an lo phuahna hmun hi Sawlâkia Phaizawl (Sawlâkia By) tia hriat a ni zui ta a. Tun thlengin Sizô khaw bulah (a khaw hming pu reng chungin khaw thar an kai tawh) hmuh theih-in ala awm.

4. Sawlâkia Awmzia:
Sawlâkia hi awmze nei taka lâm a ni țhin ang bawkin, a hming pawhin awmze pawimawh tak a keng tel nghal a. Sawlâki hi thumal (word) 3 – SAW, LÂ leh KIA te hmanga phuah a ni a. SAW awmzia hi, thlarau, mihring tina thei, hri țha lo leh hlauhawm, natna, vanduaina leh chhiatna thlen thei leh thlen țhintu, tihna a ni. LÂ awmzia chu, lam (dance) tihna a ni. Amaherawhchu, awmze thûk zawk, lawmna/hlimna/hnehna lâm, tihna a ni ber. KIA awmzia thung hi, hruai, thlah tihna a ni.

Tichuan, Sawlâkia awmzia chu, mitthi thlarau hnehna leh thlahna lâm emaw, mithah-te thlarau hnehna lâm, emaw tihna a ni ta a ni. N.E.Perry’n “Sawlâkia is the dance of the spirits of the slain” a tih hi a dik-hlel deuh. Sawlâkia-ah hian mitthi thlarau kha a lâm lova, a lâm dan emaw zirin an lâm bawk lova. A thattute khan, an mithah-a chu a thlarau thlengin an hneh a ni, tih entir nan hnehna lâm-in an lâm zawk a ni. Chuvangin, Sawlâkia hian mitthi thlarau lâm dan (dance of the spirits of the slain) lam ni lovin, a thattuten hnehna lâm-a an lâm (victory dance of the slayers) kha a sawi (kawh) tum zawk chu a ni.

5. Sawlâkia Hnamdang Zingah:
Kum 1891-a British sorkar an lo len khan, Mara ram pawh a rawn hneh ve a. Mara Lalte chu British rorelna hnuaiah an in-tulut a, raldo an bansan a. Kum 1907 September 26-a Rev. R.A. Lorrain leh a nupui Mrs. Maud Louise Ulander ten Mara rama Chanchin Ţha an rawn luhpui hnu phei chuan, Kristianna-in ram a rawn la chho zel a. Ral lu leh sahrâng lu aih tur a awm tak loh avangin Sawlâkia pawh sorkar milian lo thlen nikhua emaw chauhvah lâm a ni ta a. Tunhma chuan Sawlâkia hi Mara ramchhunga hun pawimawh bik tih lovah chuan, Mara ram pawnah (hnamdang zingah) phei chuan an entir ngai lo.

Kum 1948 khan Sir Akbar Hyderi (First Indian Assam Governor) Lunglei a rawn tlawh laiin, Mara hnam lâm entir tura ngenna chu ngai pawimawhin, Lakher Pioneer Missionary, Rev.R.A.Lorrain leh Pu Chhali C.I. ten Mara nula leh tlangval 12 hruaiin Lunglei-ah Sawlâkia lam hi an zu entir a. Hemi țum hian Lushai Hills (?) aiawh ten Khuallam an entir ve nghe nghe a ni. Hei hi Mara ten hnamdang zinga Sawlâkia lâm an entir hmasak ber niin alang.

Kum eng emaw ti hnu-ah, kum 1952-a Prime Minister Pu Jawaharlal Nehru leh a fanu Indira Gandhi ten Aizawl an lo kal khan, Pu S.N. Barkakati, Superintendent of Lushai Hills ngenna avangin, Mara nula leh tlangval 17 rual te chu Pu Mara A.D.C, Saiha leh Pu Lairua C.I. ten an zu hruai a. Hetah hian Indira Gandhi pawh Sawlâkia lâma lâm ve turin an kai chhuak a. Indira Gandhi kha hnamdang zinga Sawlâkia lâma lâm hmasaber a ni nghe nghe.

6. Dual Dimensions of Sawlâkia:
Hnam nun phung leh zia te  (culture & norms) hi Pathian hnen ațanga thilthlawn pek (gift) ropui tak kan dawn a nih hi phat rual a ni lo. Amaherawhchu, hnam nun phung leh zia tam tak te hi (sual thiltihtheihna avangin) Siamtu Pathian tih ropui nan leh chawimawi nan leh thil țha tih nan-a hmang lovin, Setana fak nan leh tih-lawm nan te, kan mihringpuite tihchhiat nan te kan hmang zawk țhin.

Kristian kan lo nih hnu-in, Pathian Thu nen-a inmilh lo (inrem lo) hnam nun phung leh zia te chu paih/hnawl (abolished) an lo ni ta hlawm a, țhenkhat te erawhhchu siamțhat (transformed) an lo ni a, Pathian fak nan leh thil țha tih nan hman zui an lo ni ta thung a ni. Heng hnam nun phung leh zia kan chhawm mek (transformed or un-transformed cultures)-te hian awmze (dimensions/aspects)  pawimawh tak an nei zui zel a. Sawlâkia pawhin awmze pawimawh leh thûk tak a nei a, kawng 2 chauhvin lo tarlang ila:-

6.1. Cultural Dimension:-
Hnam nun phung leh zia te hi Pathian thilthlawn pek an ni a, hnam hrang hrang leh țawng hrang hrang nei ten kan dinhmun leh nihna ațanga mahni nihna dik tak (true identity) kan hriat-chhuah te, mi in-a min hriat theih (recognize) te hi Pathian thil tum zinga tel leh hnam hrang hrang leh țawng hrang hranga min siamna chhan pawh a ni. Chuvangin, Pathianin kan hnam nun phung leh zia te hi hloh lova chhawm nung a, thil țha tih nan-a hmang a, Ama ropui nan-a hmang zel turin min duh tih a lang. Chutiang bawkin, Sawlâkia lâm hi entir a nih hun apiangah, Mizo hnam lâm a nih tho laiin, ‘Sawlâkia hi Mara hnam lâm, Siamtu thilthlawn pek a ni’ tih hi hre reng thei ila thil țha tak a nih ngei ka ring.

6.2. Spiritual Dimension:-
Hnam nun phung hian kan nihna dik tak (true identity) leh Pathian thilthlawn pek min hriat chian tir mai bakah, Thlarau lama entir pawimawh tak a nei tel fo țhin. Sawlâkia chu, “Hmelma te hneh an nih a, tihhlum an nih nikhua-ah, an thlarau-te thlenga hneh an nihzia entir nan-a lâm (victory dance)” a ni țhin angin, Lal Isua ringtu kan lo nih takah chuan, mahni mihringpuite hnehna lâm ni tawh lovin, Lalber Isua sipai huaisen, Lal Isua zara Setana hnehtu kan nihzia entir nan, “Setana, thlarau sual hnehna lâm atan kan hmang ta” ti ila kan tisual tampui awm love.

7. Tlipa:
Sawlâkia hian Mara-te nun phung leh zia, nunhlui te min hriatchhuah tir a, kan nihna dik tak min hum sak bakah, Krista avanga Setana leh sual thiltihtheihna hnehtu kan nihzia a tarlang tel bawk a ni. Sawlâkia leh Sarlamkai hi engtin chiah nge an sawi hran a, eng angin nge an sawi thuhmun ka hre chiah lo. An țobul leh lâm dan (style) a in-ang mai thei a, a hrang mai thei bawk. Mara (lakher) leh Lai (pawi) te hi unau in-hnaivai tak kan nih avangin kan hnamzia leh nun phung te pawh a in-ang êm êm a. Hnam hmingah ngat phei chuan kan inhnaih zia a chiang lehzual. Entirnan, Mara- Hlychho, Lai-Hlawnchhing, Mara-Chozah, Lai-Chinzah, etc. Chuvangin, Sawlâkia hi Mara hnam lâm a ni tih erawhchu hah dam tlang ila. Sawlâkia hi Sarlamkai anga sawi leh hriat a nih pawhin, a hun leh a hmun a zirin sawi dan pawh fimkhur ila, țawngkam hmang uluk țheuh thei ila thil țha tak a ni ang.

Similar Posts:

• Mizo hi hnam hming a ni lo
• Mara hnam chungchang
• Post Ho Ber Of The Week!
• Mizoram sorkar bithliahah lawmlo
• Kristian sakhua leh Mizo hnam sakhua danglamna

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Friday, May 4th, 2012 at 6:30 pm and is filed under Dance Dance, Mizo Society & Culture, Mizoram, Pictures. You can follow any responses to this entry through the RSS 2.0 feed. You can leave a response, or trackback from your own site.