mi(sual).com

Kan thinlung pangkhing veilama insiam ṭhìn ṭhàlbẹ tuihnäng (hormone) chi khat nostalgeron an tihin kan thlûak hnung lama chi thlahna péngte thununtu ṭhalbe tuihnäng chik chhuaktu siamtu kawt lawka ṭhàlbe tuihnäng insiam ṭhìn  nostalgon an tih a bùan thlûka thlûaka bàwlhlo insiam chi dang ṭhenkhat nèn an inchawhpawlh tawn hian ṭhalbe tuihnäng chi khat  nostalgiferon an siam a; chü ṭhàlbe tuihängin thlûak pangkhing chhuahsana zunna kawtchhuah lam a hnaih thlâk hian, tuikuk koh kìr hnà aia muanga a tumhmun a pan thlâk chuan, Mizo fâ, Pathian hnam thlante’n Lunglènna kan tih hi a lo chhûak a. Amaherawhchu, vai vawih ai ranga a tumhmun, zunna kawtchhuah síra ṭhàlbe pakhat a thlen vaih chuan, Mizo hnahthlâk, Lalpa zawnchhuahte’n lungngaihna kan tih hi a hring chhuak thung. Inthlau tak a ni. Lunglènna siamtu hi kal chak deuh vaih sela’ng chuan, lungngaihna a rawn chhuak dáwn tihna a nih chu! I fimkhur ang u Mizo hnamte.

Kan neih loh thil hi kan sawiho tlángpui e an ti nia, mifingte hian! Tichuan Mizote pawhin kan neih hlawl loh tlawmngaihna hi thumal ṭha tak neiin kan sawi ve khangláng ta ṭhin a ni. Mizo dik tak, khawlaia kutdawh hi an váng khawp mai a, vairam nèna khaikhin chuan inthlau tak a ni. Vai kutdawh tamzia hi i ngaihtuah ngai em? Mahsé, Mizote chuan khawlaia kutdawt hranpa lovin a hnam pumin kut kan dawh thung! Kut dawhhote vil tùrin Chîfi minisitar kan thlang a, kutdawhphung sawipui tùrin roreltu dang kan chhawp chhuak bawk ṭhìn. ‘Keiin kutdawh ka thiam thawkhat e’, tiin an kampein a, inthlan dáwnah kutdawh thiamhril hlado an chham ut ut ṭhìn.

Brig Ṭhenphunga’n kutdawh rilru pu hauh lovin ro a rél a, kutdawh hnam Mizote chuan, tuboh leh dolung kárah … khaw e bal e kan ti a. A ropui a ni. A zahawm, a zahthlâk lo, a tlàwmthlâk loh. Kan hnam ziaa inphum nghet tlat a ni, tualte vanglai ata tawh. Intél ruhin kan chhawmnung zël dawn. Kan zäm dawn lo. Kan tláwm thiang lo.

A! tlawmngaihna hi kan lo nei reng a ni lo maw? Neih loh sawi ngawt thu a awm lo. Kan nei ang! Kan nei tùr a ni, kan sawi tlat! A! Kan nei reng alawm! A thumal hi han ngaihtuah chiang la! Kan neihzia a lo inphum ru reng alawm! Kan hausak chuan kan chapo lutuk ang a, kan tláwm lo vang. Mahsé, kan hnam nunphungah tlàwm a ngái tlat si a ni. Kha kha a ni mai! Tichuan tláwm tur chuan kan retheih a ngai ta phawt, rethei tùr chuan kan thatchhiat leh zël a ngai. Hei hi kan tün dinhmun chu a ni. Kan tlàwmngái a, tlawmngaihna hi kan hnam zepui ber a ni a, kan retheih phah a ni. A ropui e!

Sâp ṭawng intihthiam hi kan hnam zepui ber a ni a. Sâp ṭawng hi kan thiam êm êm lah tak a! Kan pai tih inhre lo bangral ṭhakin nia sâp ṭawng hi kan thiam ni! I pai vàngin mi dang kan pai vè vek kher lo, i ti maw? I inhre lo te hi a lo ni ve mai mai lo maw, Mäwla, Mäwli? Mizo top model kan thlang a, sâp ṭawng ngêiin kan han puang a, sâp tak takin an lo hrethiam leh mang lawi ṭhìn si lova! Kan zak hauh tùr a ni lo, an ṭawng thiam loh hi. Mahsé kan ṭawnga kan tih theih reng, an ṭawng intithiam taka kan han ti vêl kher hi chu, zah vèah pawh hian a mawi e! A! Zak chuang lo vang. Ho mai mai. Mi ṭhenkhat chuan Mizo hi chu engpawh zir ila kan thiam an ti nia! Kan lo ropui e! Mahsé eng chu nge kan thiam? Mi dang hmuhsit, hnam dang en hniam a, hnam dang laka kutdawh lawi si hi kan thiam ber, leh kan thiam awm chhun chu a ni. Hnamchawm chanvova (tribal quota an ti em ni kha?) invûakvung hi kan thiam awm chhun a ni.

India ram hi mipui-rorèlna ram a ni a, retheih hi min khap lo. Kan duh duha awm thei kan ni. Duh leh kan rethei ang a! Retheih vanga min man tùr zuk awm ta lo chuan! Hnam puma kutdawh huk, kutdawh lalpa thlan huk, ladt. hi kan dikna-chanvo liau liau a ni. Kan thei! Chu na na na chu kan thei ve! Kum tam kan lo inhnangfâkna ve a nia!

Tlipna

Tláwmngaihna awmzia ka sawi khi a dik lo a lo nih chuan min hrilh hreh lo ula. Mizote’n tlawmngaihna kan neih leh neih loh pawh chu sawi hreh chuang hek suh u. Kei chuan kan nei ka ti tlat, mahsé a awmzia ka hriat khi a dik lo mai thei. Hetah leh hetah hian kal la, tlàwmngaihna i neih lohzia, Mizote nunphung i duh lohzia, kutdawh hrehawm i tihzia lantír nan thumal leh thü ziak ve rawh le. I kumah bithliah a awm lo.

A ngai bawk! in ti leh ang e aw! nangniho kha!

I thuziak eng pawh kan pawm e. A bulṭantuho lah an zùzï leh daih pek a, keimahin ka kúal ka kúal ringawt ta a ni ber e. A ṭantute khan, hei hi in lo chhiar ve palh a nih chuan rawn chhunzawm leh ngei tùrin ka duh a che u. Dr. John pawh, thü rawn ziah belh leh hräm la kan va ti em! I tàwp daih ringawt mai. Mi dang pawh, Hyderabad aṭanga rawn ziaktu pa te, khawvêl hmun hrang hranga mahni hnam phatsan lova Mizote leh Mizona la hmangaih fante khân in thü rawn thawh ve chur chur r’u le!

Kei chuan kan hnam ṭawng hi ka hmusit lova, chher thara tihnun thar zël tlâkah ka ngai tlat a ni. Hei vàng tak hian khawvêl hriata inpho chhuah ve zël hi ka zak lo bawk. Facebook hman tihvêl ai chuan hnam tán hei hi a chhenfâkawm zâwk, tih hre ta ṭheuh ila a va ropui dawn em!

Kan miropui ṭhenkhatte chanchin pawh hetah hian han en chhin la, i hriat ang ang ziah belh ang che. Kan la ziah lohte, pakhat tal ziah bel tum ang che.

Ziah tur hre lo emaw i intih chuan hei ringawt pawh hi a ziah theih (entirnan):

Chhiahtlang

Chhiahtlang hi Mizoram chhim lam, Serchhip district chhunga khua a ni. Mizorama khaw fai ber lawmman a dawng tawh.

tih te

Washington

Amerika rama khaw pakhat.

Bill Clinton-a

Pialral kawngsíra Pawla sairawkherh hman tùr kâk suihsak ṭhìntu

tih te pawh.

Fank ia.

Similar Posts:

• Hnamte chanchin – 1
• Siamkima Khawlhring
• Mizo ṭawng ziahphung – 0
• Kutdawh dan changkang
• Le Petit Prince – Part 2

Recent Posts:

• Breaking News: Lungdai Nu Vai bawngchaw zawngin pawngsualin a sat hlum
• Comedian Search 2012 Fiamthu-2 (Link dik leh thei thei tawh lo veeeee!)
• Ka Mit Laa, Ka Rilru Khawihtute
• mi(sual) member piancham!
• Kal dem dem.

This entry was posted on Sunday, May 20th, 2012 at 10:30 am and is filed under Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.