Fixture Siam Dan Tlangpui

May 28th, 2012 1:00 pm by zovel

Vengchhunga Local tournament / Competition han siam nikhua te, thalai sports han neih changte hian a ti mi deuh tan lo chuan intum tur han siam (fixture siam) vel hi a buaithlak duh khawp mai. Tumkhat pawh Draught board competition an siam a, semi final-ah mi pathum an rawn chhuak ta mai. Inkhelh kual leh a ngai a, buaithlak tak a ni.

Knock Out System : Hei hi kan hman tam ber a ni. Awlsam taka mi eng zat nge ‘bye’ tur hriat theih dan a awm. A intum tur bi dik sa a awm a, chung chu 2, 4, 8, 16, 32, ….. a ni. Mi 10 an awm chuan a dawt chiaha a bikim chu 16 a ni a, 16 atanga 10 kan paih chuan 6 a lo chhuak a, mi 6 an bye chuan a kal dik chiah dawn a ni. Mi 4 in an khel phawt ang a (round of 16). A chak 2 lo chhuak leh a awm sa (bye) mi 6 nen quarter finals an khel dawn a ni. Mi 9 an nih chuan mi (16-9), 7 bye tir tur, 2 chauhvin round of 16 an khel anga, a dangte chu quarter finals lut sa an ni. Mi 6 an nih chuan (8-6) mi 2 bye tir leh mai tur. 23 an nih chuan (32-23), mi 9 an bye tur a ni.

Swiss League : He dan hi Chess player te chuan an hre hneh hle a. Vengchhung competition-ah kan hmang lar meuh lova. Inkhel tur pair tin daih board neih a ngaih avangin a hautak deuh vang te leh hriatloh hrim hrim vangte pawh a ni mahna. Knock out system anga vawikhat chak lova tlak nghal vang vang theih a ni lova, a zia phian. Round khelh tur zat tihfel hmasak tur a ni a, a tawpa an point hmuh azirin result a lo lang mai dawn a ni. Mi 10 awm ta se, round 1na ah an tumpui theuh khelin pair 5 a awm a, mi 5 an chak a, point 1 theuh an hmu.(A bi a kim loh chuan mi 1 chu khelh tur a neih loh avangin point 1 hmu saa ngaih mai tur a ni, round 2 atangin a khel ang). Mi 5 dangin point an hmu ve lova, Round 2 naah point 1 hmu tawh ho an intum leh a, point 1 hmu, a point hmuh zat ang hmu ve tho tumpui tur nei lo chuan point hmu ve lo zinga mi kha a tum mai tur a ni. Round 3 naah point 2 nei tawhte an intum leh ang, point 1 neite pawn round thumna khelin an point anpui emaw, a tlukpui teuh ber an khel leh ang a, point hmu lote pawh round 3naah hian an lo intum ve zel bawk ang. Chutiang zelin round khelh tur zat ruat sa thleng an inkhel mup mup reng mai dawn a ni. Round tam dan azirin in lehpelh theih a ni a, intum tawh te chu intum nawn phal a ni lo. Players tinin record card an nei a, point hmuh san dan indawtin result siam tur a ni. Round tina an point hmuh an ziak zel ang. Chu chu Progressive point a ni a, a tawpa point inang an awmin an progressive point belhkhawma a sang zawk chu position sang zawk chang tur a ni ang.

Round Robin League : Hei hi chu group / Pool khata awm te inkhelh kual vek a ni mai a, match schedule siam thu-ah uluk deuh a ngai tih loh chu harsatna a awm lo. Match awm zat awlsam taka hriattheih dan a awm a. Group khata mi / team awm zat leh chumi hnuai chiah number puntir a, 2-a sem leh mai tur a ni. Pool A-ah team 6 an awm a, 6×5 = 30. 30 hi 2-a kan sem chuan 15 a lo chhuak a, chu pool-ah chuan match 15 a awm dawn tihna a ni. Pool B-ah 4 an awm a, 4×3 = 12. 12 hi 2-a kan sem chuan 6 a ni, chu pool-ah chuan match 6 a awm dawn tihna a ni.