May, 2012 thlatir kan chuangkai tan a, U te nena kan la chen ho avangin mi ngaihchuan chhangchhe chhungkua chu kan ni mai awm e, mahse chhangchhia kan inti lemlo a, a lu nung in chhungkaw member 13 chauh kan ni a! pawn lama chhuak an tam zawk changa in lama lo awmphei chuan khua hi a har thuai thuai thin! Chutih laiin ka lo ngaihven em em lemloh thil kan Nu chuan min hrilh ta roh a, chu chu a la ‘V’ loh thu a ni. ‘A insawn hlek pawh a ni mai thei a, nghak hlek ila’ chu ka’n ti awlsam ve mai bawk a, mahse ka rilru tak chuan phurna thar ka nei a, khami ni atang khan kan Nu pawh ka duat leh zual sawtin ka inhria! 
Tuk khan chu zing ka la muhil lai hi min rawn sawi harh nawk nawk a, mumang nen a inchiahpiah nuaia ka awmlai chuan “en teh, hei, ka in test a, a Positive a ni” a rawn ti ta mai a, ka van harh chiang em! ka tho vat a, ka rilru in Pathian hnenah lawmthu ka sawi nghal a, test kit te kan en leh te te hnu chuan tuk dang anglo takin ka zing tho chu hmaiphih nachang pawh ka hrelo a, khawvel hi a van nuam tak em! ka fanu duat chu ka pawm a, ‘bawihte, nau i duh tawh em? anu pumchhung ah hian i nau a awm a, a nu pum delh tawhloh tur aw’ tiin ka hrilh zui a! A nu lah chuan ‘i ho roh, tho la thingpui in rawh’ min ti a, tichuan inti fa 2 nei tur rilru tak chungin choka lam ka pan ta a. Rilru ah thil tamtak ngaihtuah chungin Office lam panin ka old model splendor nen chuan ka inkhalh chhuak a, tuk dang ang bawkin motor changkang tak tak leh manto tak tak, khawvel awmchhunga ka neih ve reng rengloh tur pian maksak chi hrang hrang mawi sawi hleihtheihloh te chu ka tawk in ka tlan pel hlawm a, ka van awt biklo em!
Tichuan dan pangngaiin zanriah eikham ah kan room lamah kan kal a, a pregnancy test na hmanrua kha February a a lo expire tawh thu min hrilh ta roh a, a dang a neih kha kan han enleh a, an lo expire vek mai le! “a expire na a la reilo emai, a damdawi function a la thi chuanglo ang, khaw maw pakhat kha han kheh teh” ka ti a, tichuan pakhat khehsa chu min han pe a, bathroom lam ah ka luh pui ta a, ka va zung ri kur kur a! ka rai leh railoh ka va in test a! Kei chu ka lo railo tawp mai, a Negative chiang, a chuang pakhat la awm chuan kan nu chu ka in test tir leh ngat a, ani ah chuan a la Positive tho! ‘Akhai, naktuk ah a thar, la expire lo ngatin check nawn leh tho ang’ kan ti rilru a, A thar diai nen a kan check pawn a positive ta reng tho a! a nuam nawn leh ta!
Fanu pakhat kan nei tawh a, kum khat leh thla 11 a pum hlum tawh a, june 22, 2012 hian kum hnih a tling dawn a, mi ngaih chuan chhang zing kan ni deuh roh dawn a, nu tan emaw, naute tan emaw te hian a pawi thei angem le! mahse a chhang a pian meuh chuan kum 2 leh a chanve lai a ni tawh dawn tho a…. thil chi hrang hrang hi ka ngaihtuah a, nuam dangdai ve tak a ni. Tichuan remchang hmasa ber ah Serkawn Town Clinic, Falkawn ah Dr.Rammawia hnen lamah inentir turin kan kal ta a, kan tawng ang tawng an lo tam ve khawp mai, nikhat thilthu a raipuar ka hmuh tam ni ber a la ni! No 55-na kan ni a, thenkhat chu an haw leh a, reife hnuah an rawn kal leh a, keini nupa erawh chu kan awm tlang pap! thingpui in a kan kalsawn zeuh kha kan kal hlat ber a ni. Tichuan tlailam dar 3:30 bawr velah kan luh hun a lo thleng a, sawi duh ka ngah avangin ka lut ve ngat a, a hmasa zaichhuah a nih thu te, zai chhan ah ka lungawi vakloh avangin zailo in kan neih theih kan rin avanga amah pan kan nih thute ka sawi hnu ah Dr chuan a han en vel a, 30th Dec, 2012 hi kan neih hun turah min puansak ta a. ka lawm leh ta. Kan nupa a kan chhutdan chuan January, 2013 a kaidawn! Dr aiin kan nupa chhut dan a dik daih zawk dawn tih pawh kan hria, Dr pawh khan a chhut thiam ve hle mai… kan ti rilru dun ngei ngei ang!
A sei lutuk dawn, kai tawi mai ang, Dt.25.5.2012 (Zirtawp ni) tlailam hian kan nu chuan a tai chu na a ti ta deuh tlat mai a, chuan zunram thiar turin a lut a, a luh hnu reilote ah min ko lut ve a, ‘hei, thisen ang deuh reuh, sen lar em em silo a lo chhuak’ a ti ta mai a, a ngaihna reng ka hrelo, tichuan a tuk Inrinni zing karah bawlhhlawh a chhuak leh a, rang takin Dr lam panin kan tlan a, zun a lo test tir a, a zunkawngah hnai a lo tam em em mai a, damdawi te a chawh hnu ah hlauhrukna zawng zawng bo vekin kan haw ta a, chawhma lam chu insawiselna pawh a neilo a, chawhnu lamah erawh chuan thisen hlawm deuh roh hi a zung chhuak leh ta tlat mai a, Dr hnen ah bawk chuan kan kal leh a, mi an lo tam deuh avangin ka tlai ta deuh a, Dr chuan thawhtanni (vawiin ie. 28.5.2012) lamah ultrasound ti turin min lo ti a, tichuan tukin khan Ultrasound ti tur chuan kan chhuak ta a, ti ve tur dang tumah an lo awmloh avangin min en nghal a! Awi karei! Lalpa leh! Chikawng-ah nau a lo pai niin, ka bing mup mup a, enge ka ngaihtuah ber erawh ka sawi thei tawhlo. Mahse mipa zawk ka nih avangin hnemtu tur ka ni a, engkim Pathian thu thu anih thu leh kan thatna tura engkim a rel thin thu te ka sawi hnu ah Dr clinic lamah kan inziak leh ta a, mahse a hnemtu pawh kha engmah ka nilo, hnem ngai ve tho ka ni tih kei aia hrechiang an awm awm love. Tichuan Dr chuan min lo ngai pawimawh khawp mai a, emergency a zai tur thu a pe ta a. A tawi zawngin sawi ta mai ila, tichuan chhun dar 12:50 vel ah OT ah a lut ta a, ka rilru in Pathian hnenah ka tawngtai nghal bawk a. Tluang takin an zai zo a, 1:45 vel ah an rawn innawr chhuak a, amah pawh a harh tha a, na pawh a la hre lemlo e. Vawt a tih avangin ka theihtawp in a taksa hmawr vawt deuhlai ho chu ka khawih lum a. Christian Hospital Serkawn khumah kan mut ta a.
Ka fanu erawh chu a nutei te hnen lamah a kal a, anni’n an awm hman zawk bawk nen. Ka khua a har em em a, ka lung a chhia a, ka fa pahnihna ka hmuhdan ah lungawi har ka ti a, ka mittui erawh chu he thu ka ziahlai hian a la tla chiahlo. Tawrh thiam har ka ti a, ka tuar a ni tih alang chhuak ang tih ka hlau bawk si! mite pawn an tawng ve tho asin mawle! hei aia nasa zawk zawk pawh!
Ka fa pahnihna ka hmuhdan hi lungawi har ka ti, mahse kei aia tuar nasa an kat nuk lawi si!
Similar Posts:
- Mizoram Doctor – An rintlak em?
- Home HIV test kits
- An fimkhur tawk lo em ni?
- Ka ba nge min ba?
- Electric wiring-I
May 29th, 2012 at 7:23 am
Tukchhuah nuam vek u le
Saitawk, a va pawi ve mawle. Mahse engkimah lawm tur anih kha. Fanu i nei tawh a, a nu pawh a that chu, fa dang in la nei leh mai dawn alawm. Fa pakhat nei theilo pawh an tam hi.
Report this comment
May 29th, 2012 at 7:24 am
A tuar tu tan chuan tuar thiam a van har dawn em!
Pathianin a dang a pe leh mai ang che lunggai suh.
Report this comment
May 29th, 2012 at 7:28 am
Nimin chu misualah kan mipa ho an haw haw a, an hlim viau laiin nangnin inzai in lo tawk mek a, a pawi hle mai. Ka lo tawngtaipui ang che u. Chi kawng a naupai hi chu a hlauhawm an tia, a puak keh hman lova in vannei khawp mai. Vanduai a chunga lawmthu sawi zawk tur in ni tlat mai.
Report this comment
May 29th, 2012 at 7:40 am
Ka tuarpui hle mai che u. In la naupang a khawvel in la hmang dawn chauh alawm le; han inhmangaih nupa hle phawt mai ula.
Report this comment
May 29th, 2012 at 7:41 am
A va zialo ve Saitawk. Mahse, sheldon sawi ang khian vanduai vannei in ni e. Pathianin a dang a la pe leh mai ang che u.
Report this comment
May 29th, 2012 at 7:48 am
Saitawk, ka tawrhpui tak zet che u. A nat dan tur leh hriat thiam a hai dan tur hmu thiam vek lo mah ila, eng emaw chen chu ka hre thiam rei ruai. Lalpan fanau malsawmna a la vur zel ang che u tih ring tlat ila. Kan tana thatna turin a rel thin. I puan ven sawi chhing la, pachang takin awm ang che. I nupui hlei2 kha hnem a ngai dawn asin. Tin, i ziak ngaihnawm thiam tak zet e
Report this comment
May 29th, 2012 at 7:54 am
E khai a, a va pawi ve aw. Chunglam rorel hun leh a tawtawrawt te nen a la rawn ri thla ruai ruai rih loh te a nih chuan, A zarah adang a la pe em em ang che u.
Report this comment
May 29th, 2012 at 8:02 am
Thianpa, avan zialo vele… a dang tha tak inla nei leh mai ang. I taima alawm…nilawm ni?
God bless
“a hmasa zaichhuah a nih thu te, zai chhan ah ka lungawi vakloh…” i tih khian hmanni a radio hmanga doctor thusawi minti hrechhuak hle mai. I lungawi loh chhan ka hre lova, mahse theih hram chuan duh loh tur niawm tak a ni (doctor sawi hmang khan)! Research nasa tak an neih hnuah, C section a piang naupangte hi nasa takin obese an tam zual hle tih an hmuchhuak tlat mai. Obesity chuan diabetes te, heart disease leh natna chihrang hrang a thlen tih kan hre awm e!
https://www.guardian.co.uk/soci.....sarean-nhs
Report this comment
May 29th, 2012 at 8:30 am
pawi hle mai.. Keini hi zai chhuah in fanu 2 kan nei tawh a, 2 kan chhiat tawh bawk. Kan va thu lo em! Tih bak sawi tur kan hre lo. kan nu hi hrisel pangngai tak a ni a, medical lam mi kan ni a, damdawiin (qtrs) ah kan awmchilh bawk. Enkawlna leh thurawn tha tinreng kan dawng. Chunglamin pai tlang a phal loh chuan a tla mai. a neitu khian Mawhpuh tur leh han chhuanlam tur engmah a mamawh lo. A tawk e.. a tih tawh chuan damdawi tha leh chak ber2, doc leh nurse te pawh engmah an ni lo. Dan hram tumin kan phek buai thin. chunglamin a switch a off tawh chuan mihringin running tum chiam mah i la, a sawt mawh khawp. A ai tha nei leh thuai ang che u.
Report this comment
May 29th, 2012 at 9:26 am
in tawrhna hre lek lovin princess hovin kan lo haw haw dur dur a, nangni in lo kun tlawk tlawk si a.. A pawi hle mai. ka expi ve tawh a, nuam lo ve deuh a nia. Ngamtlak deuh ten min han fiam ngei a.. (i hawlh nasa lutuk a niang..etc..)..haha..
Report this comment
May 29th, 2012 at 9:26 am
Ka tawrhpui hle mai che u. Thiam taka han inhnem te pawh a châkawm a ni. Pachang takin awm la, fa tha tak Pathian-in a la pe ngei ang che u.
Report this comment
May 29th, 2012 at 9:31 am
Ka lainat hle mai che u. Pathianin a hun takah fanu/fapa pek belh ngei che u rawh se.
# 9…
Report this comment
May 29th, 2012 at 9:51 am
Ka la tawng lo a, ka hrethiam pha chiah lo. A hrehawm ang tih ka hre pha ve riai ruai chauh a ni. Ka tawrhpui che u, mahse a dang tha tak Pathianin a pe leh ngei ang che u tih ka ring tlat a ni. Taima tak khan aw..
Report this comment
May 29th, 2012 at 9:55 am
A va han pawi tak ve le aw… Ni e, Pathianin fapa dang a la pe em em ang che…
Report this comment
May 29th, 2012 at 11:24 am
A pawi hle mai, mahse puitling tak a thu i ngai thei erawh khi chu a ropui hle mai. I ngaihdan khi sawh nghet sauh sauh turin ka duhsak a che.
tren tren
Report this comment
May 29th, 2012 at 11:24 am
Rilru a beisei tawh lutuk a chutiang a thil a awm leh si chu hriatthiam a har khawp ang. Ni e,seldom-i sawi ang khian..harsat chang awm mah se,’Engkim a lawmthu sawi.’ hi kan tan malsawmna alo ni leh thin. Mittui tla zawih zawih a lawmthu hrilh ngat phei chu a theihnghilh lo nasa ania. God be with u. In nu pawh lo tha zel rawh se.
Report this comment
May 29th, 2012 at 12:25 pm
Ka tawrhpui hle mai che, fa tha deuh in neih leh thuai nan duhsakna ka hlan a che.
Report this comment
May 29th, 2012 at 1:00 pm
In nu a dam that phawt chuan a lawmawm anih chu, vanduai mah ula in vannei e. A hun teah fa tha leh duhawm tak Pathianin a pe leh ngei ang che u tih ka ring tlat. Indawmkun mai lo ula..
Report this comment
May 29th, 2012 at 1:21 pm
A va pawi tak em! Thinlung takin ka tawrhpui che, thianpa! Pathianin fanau duhawm tak2 pe che’u se la, a nu pawh damna famkim lo pe mawlh rawh se. He kawmen bawm hmang hian duhsakna ka hlan a che.
Report this comment
May 29th, 2012 at 1:26 pm
Hmmm, a va zia lo ve aw. In nu chu lo dam chho zel rawh se. I thu ziak chu a ngaihnawm dawn a a tawp lam chu a zuzi ve hle mai a… I pet goal dawn dawn a, i pet out a ni ber in ka hria
Report this comment
May 29th, 2012 at 1:52 pm
@ Ka tawrhpui hle mai che u. Pathianin fa tha tak a la pek zel che u ka duhsak a che u.
@ Hei erawhin ka mit a tihkham em avangin ka’n ( “kan ni lovin” ) sawisel lawk( A hun lo viau na chungin): Mite pawn an tawng ve tho asin mawle!. Helaia “pawn tia i hman hi pawhin tihna a ni a; mahse a short form-a hman i duh avangin paw’n tia dah tur a ni e. ‘ hi hman thin tur a ni.
Report this comment
May 29th, 2012 at 3:43 pm
Chhel taka tuar chhuak thei turin chakna lo nei mawlh ang che u. A pawi ka tihpui hle che u a ni.
Report this comment
May 29th, 2012 at 4:17 pm
Va zia lo ve…kan thu ve mang si lovah hetiang lamah hian……………..
Report this comment
May 29th, 2012 at 4:45 pm
Va pawi ve le
Report this comment
May 29th, 2012 at 8:22 pm
In mi tawrhpuina leh in malsawmna tawngkam te avangin a thlamuanthlak e. Ni e, kei leh keilo angin tun tum post ka submit hi ka edit ta reng renglo a, nidang a mi a tha e tihna nilo in tuntum a mi chu a phuai ta deuh luai anih hi.
Submit tumna rilru ka neih miahlo laiin @kawnga’n ‘Misual-ah post teh’ min ti roh a, ka han ngaihtuah a ka blog leh hard drive chhiat thut pawh a en leh theihna tur kha niin ka hre bawk sia, inthlahrung ru takin ka submit rawih mai a ni.
In mi hnemna hlu tak tak ka dawn phah a, a va hlu em!!
Report this comment
May 30th, 2012 at 12:48 am
I thiziak thleh kual mawi lamin ka rilru a la nasa deuh zawk emaw ni ka chhiar tui phian mai a
Upate pawhin ‘piang lo ngaiin kan tap lo ve’ an lo ti alawm le, hmabak thlir a ngai zawk a ni e. In nu pawh chu dam tha zel phawt mai teh se. Keini pawhin kan lo tawk ve tawh a, a nuam fahran lo khawp mai.
Report this comment
May 30th, 2012 at 2:40 am
@muante, a tawp a tawp-ah chuan i lo lang ve ta hlawl maw!!
Report this comment
May 30th, 2012 at 12:30 pm
E ka lo hmu hauh lo va, he post hi; a va zia lo ve aw..Saitawk. Kan chan loh tur chu a kal fal nalh mai thin reng a, Pathian thu thu a ni e. Lo dam zel ula, Pathianin a la pe leh em em ang che u. A nu mawlh kha han duat phawt zel mai teh.
Report this comment
May 30th, 2012 at 11:18 pm
@vakul, ni e, duat tur an la awm hram te hi malsawmna.
Report this comment