mi(sual).com

1. Ka Lalpa duhtak, min awmpui ang che,
Khua a thim dawn min kalsan suh ang che;
Tanpui leh thlamuantu an awm loh leh,
Min tichak theilo hnenah awm reng ang che.

6. Ka maimitchhinin ka hmaah awm la,
Khawthimah van ngaihtuah min pui ang che,
Van a var ang, lei hlim a boral ang,
Damlai, thih hunin min awmpui ang che.

A satu hi a hming ka hrelo. Hmeichhia a nia; zaithiam ka ti khawp mai. He hla hi Rev. Henry Francis Lyte (1793-1847) phuah a nia; Mizotawng a letlingtu chu Rev. DE Jones (Zosaphluia) a ni. A chang innghahna chu Lk 24:29 thu, ‘Tin, kain an chelha, “Kan hnenah awm ta che, khua a tlai dawn ta a, ni pawh a tlak dawn tawh hi,” an tia. Tichuan an hnena awm turin a lut ta a.’ tih thu hi a ni.

He hla phuahtu Henry Francis Lyte hi 1st. June 1793 khan Scotland rama thingtlang khaw pakhat, Edman khua, Kelso khawpui bulah a lo piang a. B A Trinity degree chu 1814 khan a pass chhuak a ni. 1815 khan Pastor ni turin St. Munn’s Church (Protestant) Taghmon, khuaah nemngheh a ni. Henry Francis Lyte-a hian zirna lam hi a ngai pawimawhin nuam pawh a ti hle.

He hla hi sawi tak ang khan Henry Francis Lyte-a phuah a nia; tlai lam hlaah chuan a lar ta ber a nih hi. A phuah chhan tak chu kan chung ‘Ni’ khi nilovin nun uaithla lam a ni zawk a. Kum 1847 nipui laia a phuah kha a ni tawh a; a thih hma lawka Berry Head, Devon a tlawh hnuhnun ber tuma a phuah a ni.

Wembley khuaah inkhel thlirtu sang tamtakte’n hawn nan an hmang a. Hla sak tur programme siamtu pa chuan a sawi hmangin “Sak tura ruat a ziah dawn tum chuan thiltihtheihna thuruk engemaw riauvin he hla hi sak turin a ziahtir niin a sawi a ni,” an ti. Chuta chin chu inkhel puitham a awm dawn apiangin sak berah an hmang ta fo a ni.

A phuah chhan kan sawi tak ang khian tlai lam atan ni satliah mai lovin mihring nun uaithla leh lo inthlakthleng thinah hian Pathian a ngaihawm zia, nun lo awm leh a beiseiawm zia a tilang chiang hle a ni.

He hla hi thlamuanpuite pawh an tam tawh mai. Nurse Cavel-i pawhin Belgium inkahna 1916 khan a lo thlamuanpui tawha, Shackleton-a’n Antartic vur zingah a thlamuan phah tawh bawka. Tin, kum 1912 a Titanic lawnglian a pil pawh khan Band nen lawng pilpuite pawh khan an sa bawk a ni.

A phuahtu thih kum za champhaphak, 1947 a an serh tumte chuan chanchinbuah he hla chanchin hi an rawn chhuah uai uai maia. Chumi chhuahtu zinga nula pakhat ziah dan phei chuan, “He hla hi a mawl hle a; mi naran tan pawh a awmzia a hriatthiam theih a. A thukna lamah lah mithiam tak tan pawh ngaihtuah tham a ni lawi bawk si,” tiin London-a chanchinbu pakhatah a chhuah nghe nghe a ni. Poland lung inahte, Scot sipai pawlahte chawlhni tlaiah band in an sa ruai ruai thin.

‘Min awmpui ang che’ tih a hla tawngkam a a hman nachhan nia lang chu a thian pakhat thi ta chuan a thih hmain he tawngkam hi a hmang ngun hle thin a; chu achhapah Brixton hmuna Denvon khuaah sangha mantute zinga rawng a bawl chhungin an hun hlauhthawnawm tak mai chuan he tawngkam hi a hmantir ve ta mai niin an ring.

A phuah hnu lawk 1847-ah Nice khuaah a kal a; chumi kum vek 20th. November-ah kum 44 mi lek niin chutah chuan a thi a; chutah vek chuan an phum nghe nghe a ni.

Khawi hmunah pawh awm ila; eng harsatna pawh tawk mah ila, min tanpui tu tur an awmlohna hmun pawh nise kan Lalpa chuan min awmpui reng dawn a ni.

Tunlai khawvelah changkan chaknain mitin min tuam vel a; chung thilte chu neih ve tumin thalaite enge a nghawngtur? ngaihtuah lo lekin kan intlansiak a, kan phak tawk tawkah thamnate lain kan theprelh thin. Amaherawhchu Luka 9:25-ah ‘Miin khawvel hi a pumin nei sela; inti boralin emaw intichhe si sela, atan enge sawt ang?’ tih kan hmuh ang deuh khan kan duh leh tum ang chu neiin lo ropui ta engang pawh ni ila Lal Isua kan neih loh si chuan thil ho tak a la ni tho tho dawn. ‘Lal Isua ka neih phawt chuan ka rethei lovang’ tih hla ang deuh khan englaipawha min hmangaihna danglam ngailo Lal Isua kan nei tih hria ila, ama rawng chauh bawl turin inbuatsaih ila, danglam ngailo Lal Isua chuan min awmpui reng ang.

MLA, Minister, Chief Minister leh Prime Minister mai bakah President-te an awm. An lalin thil an tithei em em. ‘Kan inah lo awmla, kan duat viau ang che’ emaw ‘hnathawh tur ka lo zawnpui ang che’te min ti se, kan lawm ngawt ang. Chu chu sawiloh, min be ringawt pawh kan lawm a; kan venga an lokal chang a kan chibai phak ringawt pawh min hre zui hauhlo pawh nise kan intithei hle thin a nih hi. Mahse, hetiang aia lal ropui zawk Lal Isua kan nei. Ani chu ngilneihna leh zaidamnain a khat. Englaipawha min awmpui reng tu a nih avangin I hnaih reng ang u.

Mihring kan lo changkang tawh. Mi thenkhat phei chuan Pathian tello pawhin khawsa thei hialah an inngai ta. A nilo. Ani chu englaipawha min awmpui rengtu a ni.

Hmelmate’n min beiin lungngai thin mah ila kan hnena awm reng Lal Isua chuan chung kan harsatnate chu min hnehsak zel ang.

Harsatna chhumpuiin min hliah thin mahse kan damlai leh kan thih hnu thleng pawhin Lal Isua chuan min awmpui reng dawn avangin I lawm ang u. Krista chu englaipawhin bang lovin I zui tlat zel ang u. Ani chuan kan tan a nunna hial a lo hlan tawh. A tana hrehawm kan tawrh ve hi a phut tlat a ni.

He hla Mizo tawng letlingtu chu Mizote zinga Welsh Missionary hmasa ber 31st. August 1897-a Aizawl lo thleng, Rev. David Evans Jones (Zosaphluia) kha a ni. A lo thlen champhaphak pawh ‘Ramthar Ni’ tia kan hman nghe nghe hi.

Mc Donald Hill, thingpui huana kum li lai lo khawsa tawh Sap Upa (FW Savidge) leh Pu Buanga (JH Lorrain) te chu a lo thlen hian a bel nghala. Pa fel leh rinawm tak a ni.

Thil mak tak mai chu a thawhpui Missionary Pu Zosapthara kha hmeichhia avangin hekna a tawk a, Mizoram a chhuahsan phah a nih kha. Khami chungchangah khan Pu Pu Zosaphluia hi amah hektuah hian an puh mauh mai. Tak tak ni maw?

Aizawl Theological College hi Rev. D.E. Jones (Pu Zosaphluia) a’n a chenna Banglapuiah Tirhkoh hna zir mi pangate class neihpuiin kum 1907 khan a bul a lo tan a. Kum rei tak chhung chu ‘Aijal Theological School’ tih a ni a. Kum 1965-a L.Th zirna College a nih atang khan ‘Aizawl Theological College’ tih hming hi a lo pu ta a ni.

A satuin a thiam a, a hla thuin min hneh bawk. Ngaihtuahna thui tak min neihtir a ni. Mawi ka tih em avangin ka tape chu ka rewind-a ka play nawn leh a.

He kan tape hi ‘tape bawk’ kan ti mai thin. A phek a nih avangin a hunin a hun ve theih lohva; khumah kan mut mai thin vang a ni. He tape kan neih lai hian kan inah electrict connection kan ti ve dawn a, a hmaa baterry hmanga kan ngaihthlak thin avangin, “Tunah chuan current kan neih ve tawh dawn avangin baterry hi a tangkai dawn tawh chuang lo,” kan tia. Kan hmang down thak. A hnuin current a awmlo zing leh ropui si. Power siamna tura mamawh hmasa ber lui chu kan ngah. Hma lak tak tak hmaa thawktute quarter leh an kalvelna tur Gypsy a ngaih hmasak thin avang leh compensation-te a lo ngaih hmasak thin avang hian engmah hi a tih hleihtheihloh a ni.

Kual thui ta, duhtawk phawt ang. Ka lawm e.

Similar Posts:

• Chemtatrawta baltin mawng a pawp
• Kan hnenah awm ta che (Sunday Pual)
• Awmpui Nula
• A sawm che!
• Gospel Group – Andrew . Freddy . Henry . TBC

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Sunday, June 3rd, 2012 at 6:00 am and is filed under Music and lyrics, Religion. You can follow any responses to this entry through the RSS 2.0 feed. You can leave a response, or trackback from your own site.