(Lung a leng tlat. Kum khat leh a chanve dawn liam tawh mah se..)
Place: RT Nagar, Blore-32
The 27th Feb, 2011
Ka NU,
I lenna rangkachak tual atanga min thlir reng tih ka hriat hian ka thla a va muang thin em! Sms leh email tlaktlai lo zet ai chuan; in nulat laia lehkhathawn ang hi i chhiar duh zawk ringin lehkhathawn ka rawn ziak ta mai.
Tukin zing dar 7 a ka pa khawhar lung lengin mi rawn biak khan ka lainatin; pialral kai tura I hmanhmawh bik lutuk hi ka dem leh lek lek che asin. Chutih rualin maw ka NU, a hnena chen I chak berin, I haw a lo rem ti kher bawk si nen. Kan uina che leh kan thlakhlelhna ringawt hi Pathian ho in committee meeting nei ni ta ngat ila, i kalsan chhungkua hian hnial thla turin kan la in ring reng. Mahse kan tana Lal remruat hnial ngam tur kan ni mawlh si lo, nang ngaih erawh a ni telin a zual zel zawng a nih hi.
Nia, ka NU, tukina ka pa ka hrilh hmasak ber pawh, ‘Thawhleh zan mai a natna khum a i mu lai thlalak ka thlir a, ka ngaih che vang a luaithli ka nul chungchang’ a ni. Ka pa hi I lainat ve fo thinin ka ring ringawt a; nge I chenna lam nuam i ti lutuk a min hre chang lo zawk? Aih, ka ring phal lo. Kan lo haw ve hun chuan, I lo tlangnel tawh awm bik si a, ka thik deuh tlat che.
Ih maw ka NU, hmankar maia ka thian pakhatin ramngaih hla thenkhat sak a chakzia sawilan pahin hla thenkhat a ziak tlar a. Chumi zingah chuan ‘Zawlkhawsira luang del del chite luipui’ tih kha ka hmu a. MHIP day-a parlam in lam lai kha ka mitthla a’n a lang uar uar. A ni teh tak asin, Kha’ng hunlai nawm theih thin zia kha tiraw ka NU? Pangpar in kut hmawra in tawn thin kha, a hming ka hre chiang tawh tlat lo nia; aidu chi khat par chu a niin ka hria. Kut hmawra pangpar senlar vat nena, he hla rem a in lam dial dial lai te kha ka ngai vawng vawng. I fapa hian hun liam hnu ringawt ka hrilh leh tak hrep mai che hi.
Chuan e ka NU, college ka kala hmun danga ka awm laia, ka naupan at laia ka nuihzatthlak thin zia te leh, ka thil sawi leh thiltih nuihzathlak deuh deuh ka thian te hnena I lo hrilh thin te kha. Ka lo haw a, thian te’n min fiam na’n teh an hmang a, min nuih nasat thin zia te leh, ka zah ve theih thin zia te kha. Mahse nang chuan ka mizia leh ka duh zawng tam zawk I hre si a. Tunah chuan maw, inah haw pawh ni ila, kha’ng chanchin sawi tur an awm tawh bawk si lo, I damlai hlimawmzia ka hrechhuak thar fo asin. Ka ngai thei tawp che.
Min ngai leh thlahlel tak chunga chawlh ka hmang ka lo haw ve apianga ka kal leh hun tur mi chelh I tum tlat thin lai khan ka dem lek lek thin che. I fapa hian kalsan reng che hi ka chak bik miah lo, ka zirlai a tul vang zawk a ni si a. Chuan ka vuina ka hrilh chhunzawm ang che aw, ka exam tan ni ber a min pialral min kaisan kha. Mahse, I thu a kal I nilo a, Pathian remruat a ni tih erawh harsa ti takin ka pawm a, sawisel ka tum lo.
Ka NU, I natna tawrh bawk kha, ka sawi thui lo ang, lo ning suh aw. Nangmah hringtunu (ka pi) ngeiin min boralsan ni pawh a, I natna vanga a ruang I kil thei lo mawlh kha ka va lainat tak che. I fapa lah, eng han tih sak theih che chu sawi loh, in chawmhlawm zirlai mai kha ka ni si.
He lei damchhungin ka rul seng dawn lo che tih hre reng mah ila, I tana tih theih ka neih tlemzia ka dawn changin, ka inthiam thei thlawt lo; min phut let lo tih ka hre mah ila. Mahse maw ka nu, keia thil tihsak beitham ve tak ngai lovin, hlimna pialral I kai tawh si. He khawvel dinhmun te ngaihtuah hi chuan I vannei ka ti tho tho.
Chuan maw ka NU, min hmangaihna kha ka hrilhfiah thiam lo che, a ropui a ni tawp. I mi hmangaihna leh Pathian hmangaihna tehkhin rual ni lo mah se, Pathian hmangaihna ka hriatchian zawk theih nan ka thiam tawkin ka khaikhin fo thin a. Min hmangaihna avangin Pathian hmangaihna thukzia ka hrethiam chiang thin.
Ziah tur a va tam em ka NU. Tawngkam te hi ka thiam em em si lo. Tun atan chuan duh tawk rih phawt mai ang aw. Vawikhat chauh ka hrilh nawn leh ang che aw: Ka NU, ka hmangaih che.
I fapa, I hmangaih leh duat em em
Mampuia
June 7th, 2012 at 6:29 pm
Chaw eikhamah chhiar ang.
tren tren
June 7th, 2012 at 6:33 pm
Chhuaklinga, chawei turin i chhuak ling ling dawn elaw? hairehai chawei tui le 🙂
“Chuan maw ka nu..” tih khi ka zolo P.Ch over 😛
June 7th, 2012 at 7:01 pm
#3 (Y)
June 7th, 2012 at 7:41 pm
A va han ngaihnawm dap dap ve. (Y) awn awn e.
June 7th, 2012 at 7:58 pm
Lehkhathawn Lungkuai tak ava ni em! “Chhei raw kha a Lawi dawn e, Mahminga runin chhungah *******i a lawi dawn e” tih hup hup hunah pawh i mittui i sum zolo palh ang tih ka va hlau em.
June 7th, 2012 at 8:10 pm
Ka chhiar ve lo mai ang, ka tap palh ang ;-(
June 7th, 2012 at 8:14 pm
A ni khawp asin. Nu hi chu nu an lo ni nge nge e. Hlimna kan neih leh kan hrechhuak a, kan lungngaih tumin chuti bawk.
Lalsangzuali Sailo in a nu ngaih hla a sak te hi a tak in a tha hlawm teh ania.
June 7th, 2012 at 8:43 pm
‘ I ‘ capital zel khi i tilui nge, ms word dik loh.? Solve dan ka hre khiau.
June 7th, 2012 at 8:49 pm
A va tha e (Y)
June 7th, 2012 at 8:50 pm
#8 “I” hi thupui hlapui ziakah chuan uppercase/capital letter ngei tur niin kei chuan ka hria.
June 7th, 2012 at 9:24 pm
Mittui parawl teuhin ka’n chhiar chu le, a rawn post tirh pawh khan ka chhiar lawk ngam lova ;-( , keipawh ka nu chu la dam mahse, lenna kar hla atang hian ka ngai vawng vawng thin. I nu chuan a chhuang ngawt ang che Mahming, nang ang fapa a nei hi.. (F)
June 7th, 2012 at 9:39 pm
Khawpuia seiliante aiin thingtlang lama seiliante hi kan vannei ka ti thin! Chumi hlimthla chu he lekhathawnah hian hmuh tur a awm. Tin, i nu i hmangaihna hetia i puangchhuak thiam hi a va ropui em. Ka nu leh pate hi “Ka hmangaih che” tawngkama han tih dawt chu ka thei lo, mahse ziakin ka pe zeuh zeuh. I post hian ka tih loh rei tawhzia min hriatchhuahtir. Ka lawm hle mai. (Y)
June 7th, 2012 at 9:49 pm
Lung a kuai ruih ruih hle mai. (I)
June 7th, 2012 at 10:05 pm
@Pu Hv.., ka Nu hnenah hi chuan ka pch tlat zel… 🙂
@Pu Pk.., a dik khawp mai, damte awm chuan kan hmabak a ni bawk si, a thalam mah ni se, a huphurhawm lawk khawp mai.
@sheldon, nia tiraw, Nu te hlutzia hi chu aw. Ka haw ve chang pawh hian kan inchhung a ruak huaiin ka hre thin, a hrehawm duh ang reng.. :-S
@ Saint.., ka MS word setting dik loh vang a ni mai thei, i hnua space bar ka hmehih hawrawppui a ni nghal zel. A ruk tein tih dan min lo hrilh teh.. 🙂
@ Charice…, ka lawm e.
@Sasaks.., Ka ngaihdan chiah a ni.
Ka zirlaia, stipend ka lak hmanga siliper bun khat ka leisak leh, sangha tui a tih ber ka leisak bak kha, ka Nu tan ka thawhchhuahin engmah ka leisak hman lo hi pawi ka ti thin ;-( Mahse, khawvel mawina te ngailo leh awt lova, a natna tawrh hrehawm tak tuar tawh lova pialral ramnuam a lawi ta erawh ka lawmpui lawi si… (F)
June 7th, 2012 at 10:09 pm
Dr Mahminga Sailo #14 fate hian min ko deuh hlawi sela ka kuk lawlh duh/chak viau maithei 😛 😉
June 7th, 2012 at 10:13 pm
# 15… 😀 😛
Lehkhathawn hi hmeichhe (nu) tan a ni si a, tawngkam ka’n hmang no deuh hlek bawk a ni… 🙂 Comment-ah thung chuan ka PA viau ang… 😀
June 7th, 2012 at 10:15 pm
#16 weinch grimmm hairehai 😛 (Y)
June 7th, 2012 at 10:27 pm
#17… ka thin-grimmm ngam miah lo a nia… 😀 😀
Tak takin, thumal emaw tawngkam hman fuh loh/dikhlel in han sawi kauh hian, misual.com hlutna a tizual thin. Mi(sual) ho hian Mizo tawng ziak kawngah hmasawnna nasa tak min siamsak a lawmawm ka ti… (Y)
(D) nge (C) hi, in duh zawk zawk han tlak pap teh u… 🙂
June 7th, 2012 at 11:06 pm
#18 ka suahsual tukhum pawn ber lai pawh khan mak deuh maiin kapa hmuhah ruiin emaw meizial zuin emaw ka awm ngai miahlo ve tlat asin. 🙂
June 7th, 2012 at 11:18 pm
(Y) naaaissse!
June 8th, 2012 at 9:07 am
A ngaihnawmin a lungkuai hle mai a, ka nu min hmangaihna ka hriat zual phah a, ka va lawm em!
June 8th, 2012 at 10:09 am
a va lung run ve..!! chhiar a va hrehawm em… mi zingah kan mittui a tla mai ang tih a hlauhawm…
June 8th, 2012 at 2:49 pm
ngaihnawm hle mai, Dr Mahming! Min vel trep alawm le….
Nangmah ang fapa, nu te chawimawi thiam tak neih ve ka chak khawp mai 🙂
June 8th, 2012 at 3:11 pm
# 21, 22, & 23.. Ka lawm e. A mak khawp mai; mipa e ti lo hian ka Nu hi a hnathawh leh lenchhuahna velah ka zui nasa a, mi pawh a thlahlel. A chanchin ka sawi hi chuan ka no leh hnup thin.
A natna a tawrh tan kuma, ka college vacation nghaka lo zawh (hnuhhram) dan tur a lo inhmakhua thlap te; hlim taka lo kan zawh ni te kha, furpui leh favang lo thlen changin ngaihtuahna hian kha’ng hun kha a fang nawn leh thin.. ;-(
June 10th, 2012 at 10:23 pm
(Y)