mi(sual).com

(Football ruaipui kil lai a ni bawk a, Savun ham puar pet lama ka sulhnu kan tar lang ve teh ang)

Kan khuaah hian kum tin zirlai pawl hian kal thar te pual in Fresher Sport a buatsaih ve thin a. Kum dangah chuan zirlai zinga val upa chanchang deuh ho ‘Super Senior’ ah kan khel ve mai thin a. Kum dangah chuan keimahni zirna in pualin team kan nei ngai lova. Kum 2009  khan keimahni pualin football team kan nei dawn ta hlauh mai a, keimah ni pual liau liau a team kan han nei tur chu kan phur ve khawp mai a. Tlai tin hian kan zirna in field-ah kan practice ve thin a. Kal kim erawh kan kal kim tha hlei thei lova. Kan team form tur pawh uluk taka design thlap in India ram Olympic individual Gold medal la hmasa bertu, kawr hak ang Shiv Naresh company-ah an va order ve tlap a…. mawza var nen thuam lamah kan in peih fel tlap a. Taksa lam a kan inbuatsaihna mai piah lamah thu lamah pawh kan tang nasa a, Zirlai pawl sport boruak chawi danglam dawrh turin boruak pawh ka siam a.

Kei hi Football ngaisang lo, ‘Savun ham puar pet’ ti a ko ngat thin ka ni a. World Cup pawh match khat pawh en kim peih lo. European Cup pawh thiante inkhel en tibuai tur ringawt a kal ngat thin ka ni a. Chanchinbuah inkhel en miah lova inkhel ngaihnawm tak ziak thei (inkhel ka en peih lova, ka unaute inkhel en ho an in khel boruak tlangpui ka ziah tir a, ka phuah khawm thin) ngat ka ni na a, kan team Captain turin min ruat miau a ka tlanchhe duh bik ta lova.

Kan team hian a khel tur lam kan in daih chiah loh avangin kan makpa ho (kan zirna lut pasal leh an bialpa) te bakah kan thian tha te ( Fonz hi Golie turin kan lei a) kan khawm bawk a. Kan tang deuh bawk inkhel hma in uisa Aizawl lam atang chah thlak ei meuh in ka khel dan tur kan sawi hova, nuam kan ti ve khawp mai a.

Practice match dangdai chu:

Kan inkhel hma hian Mizoram tanga Delhi Police tan tum Mizo tlangval sek leh phiar fut mai, fit tak tak te nen kan inkhel thin a. Tin, veng dang a mi Sport na a tel ve tur nen field-ah practice match kan khel a. Kan refree kha an team coach a ni a. Zirlai pawl Football team pawh lo kaihruai tawh, duh tui zet mai a ni a. An pu (coach) ber khan kan inkhel kha ham si a, a ho te kha a khel dan tur a hrilh pah zel a, a then lah kha a hau thul, a va hah thlak tak em. Kan chak lo ta reng a.Khatiang team kha chu cheng hnih in chawi pui chi pawh an ni neng love.

Ni ropui chu :

Ni ruat a lo thlen chuan keini team khel kha mi ngaihven leh hmuh chak ber kan nih avangin kan tlak hma chuan sport a ho vek ang tih hlauvin inkhelh pawh min khelh hma tur duh lova. Inkhel ho zinga palina a khel tur kan ni a. Kan tum tur pawh khel thanglo thlankhawm, ‘All star’ an ni a. Thu leh hla a lo in bei fe tawh kan ni a, keini pahnih in tum tur chu kan phur khawp mai. Inkhel hma zan lam hian kan thian te thenkhat chuan an helhlawh nge an lo mu tha thei lova. A then lah chuan inkhel hun a team flag or tar mawi an inhlan chhawn ang chi tur hi ka team tan buaipui in zing dar ruk an lo thleng. Kei a ber pawh chu mut dawn in thingpui ka in avangin ka muhil thei ta tlat lo mai a. A tuk lama chet nasat ka tum teh lul nen khumah ka let let mai a. Mut tlai avanga thawh thlai a thei der mai silo. Buaithlak tak a ni.

Kan inkhel hun a lo thleng a. Kan team kha chu kan zam lo, kan nula lam pawh a thei thei ten min tawiawm a. Kan uniform sen leh var inpawlh bakah maw za var hlak leh ballboot nen pavilion velah chuan kan vei ta thiak thiak mai chu min hre thang lo tan chuan huphurh awm tak chu kan ni. Kan sam lah chu a mak sak thei ang berin rawng chi hrang hrang nen kan chei a, kan hmel en chuan champion tur chiang sa, hneh loh nei miah lo tur kan ni a. Kan inkhelna lah chu kan khel mual a nih avangin ground advantage kan nei sa a. Tin, Chanchinbu lamah lah chuan kan kan chanchin chhiar ringawt pawh a huphurh awm lutuk. Champion lawm dan tur chauh ngaituah sawiin kan lo in sawi tawh a.

Kan team hian au hla ropui tak kan nei a. Kan auhla hi Mizo tawng pawh nilo, Saptawng pawh nilo Vai tawng ni bawk silo, Burma tawng ngat a ni a. ‘Ole ole’ tih vel a mi ti phur thei chi pawh a ni hran lova. Burma lam thil kan ngaihnat leh kan hman avang hmang pawh kan ni hek lo. A awmzia pawh kan hre ve lem lo na a “A lung dalih chhoh hei chhit” tih kha kan au hla a ni mauh mai a, kan au rual leh dual thin a nih kha. Sport lam au hla pawh a ni chiahlo a niawm a. Kan au hla chu Lehkha phekah lian kelh khulin kan tar vu a mi mit pawh a la khawp in kan hria.

Game ropui ber chu :

Kan inkhel hun a lo thlen chuan khawvel team tha te tih dan in pavilion tang chuan kan in kai chhuak diah diah a. Kei pawh ka banah Captain banbun (armband) siam chawp, khawi maw lai a track jacket/kekawr hmawr tang siam niawm tak ‘C’ tih in ziak chu ka bun va a. Kan tum pui tur te tan chuan huphurh awm tak kan ni. Thlalakna hun te neiin ropui takin field chu kan lut a. Kan khelh tur te chu kan team tarmawi te chu kan pe ve a, min pe let let ru aw kan ti ru sup bawk a.

Kan in sem darh ta sang sang a, kei chu forword chhe chi ka ni a. Game kan tan a, field pawn tangin camera nen min veh a, an hmet deuh malh malh reng bawk a. Kan inkhel chu en aiin kan khel a nawi a. Keini ang te phei chuan ball kan khawi ve hlei thei lo. Kan tum pui te lah kha a tamin an tam hrim a. First eleven pawh team hnih daih vel nei a ni bawk a, tha thar lut tur an awm deuh reng a. In thlak theih zat lah kha international standarh chu sawi loh mihring awm chhung a ni deuh tawp mai.

Kei a captain lah kha a hminga captain kha ka ni ve ngawt a. Ball sem dan leh khel dan kha ka hre tlem bawk a thiante tih sa ka ring a, ka khel ve nawk nawk a. Kan inkhel rei telh telh a, an tawh a sak tial tial a, an chhuih lut ta nge nge a. First half a zawh te chuan si phur zawk mah ni ila chak loh kha kan la tum lo nasa mai. Second half a nih chuan kei a Captain ber kha ka awl ta a, Captaincy lah kha tu mah ka hlan chhawng lem lova captain tel lo khan an kel tlaun ve ta nge nge a, Mahse football te zawng si khat pawh hi sut leh a har em avangin si khat kan phur chu sut thei lovin kan hlahthlem ta nge nge a. Kan tlak rual khan Sport boruak pawh a sang zual pui chu a tla ve nghal a. Kan Zirlai pawl hotu lam ten min duhsak a, min khel tir leh an tum ngial a, hun in daih ngang lova. Kan lo in buatsaih nasat teh lul nen aw.

A hnu leh lam :

Ka form mawi tak leh hmanraw dang chu hman zuina a vang khawp mai. Inkhel zawh a suk fai a khai mawi kha kan tih theih tawk chu a ni mai. Zirlai football team in Tournament an tel dawn khan kan team zinga pahnih chu team enkawl tur a lak an ni a. Anni pawh an thiam em vanga lak ni lovin coach tur an awm mai rem chan loh vang leh rual u deuh te an nih a vang a ni ber a. Player lam a chuan kan team atangin tumah in an khel pha lova. An in khel lah chu a ka va en ve hma hma in an lo tla fel der a….

This entry was posted on Wednesday, June 13th, 2012 at 10:00 am and is filed under Opinion, Sports & Games. Both comments and pings are currently closed.