«
»

Chhurbura Sekibuhchhuak

June 25th, 2012 12:28 pm by Dr Mahminga Sailo

Hmanlai hian maw…
Tia ka pi’n Chhurbura thawnthu min hrilh thin; ngaihnawm kan tih theihzia leh, chhaw kan tih vanga ka nuih nasat theihzia zawng zawng te ziak ila, ‘Chhurbura ang mai’ min ti tawk in awm nual ka ring. Chuvangin thil dang kan sawi daih ang. Chhurbura anga mawl nih te chu ka duh bik leu.. :-)

Kan ngaihdante hi a dang thim them hlawm a, chu’ng zing ah chuan kei pawh hi ka bang hek lo. Pawl sawmpahnih kan zir laia (ti ve kanglang ila); Mizo thuziak tu lar tak pakhat in Chhurbura chanchin a ziah kha ka ngaihtuah let mai mai a. Keini’n Chhurbura tih tawh chuan thil atthlak lam leh nuihzatthlak lam a nih kan rin laiin, ani erawh chuan Chhurbura kha pa fing leh rawntlak, mi tlawmngai leh mahni hmasial lo tak a ni a ti ta daih thung!

Mak kan tih em em laiin a ziaktu’n thu lak dan leh hmeh rem dan a thiam bawk a, ngaihnawm kan ti ta em em a. Hei vang tak hian ngaihdan hrang hrang kan neih te hi kawng lehlam ah chuan thil tha dang chhuah nan a tha phian niin ka hria.

‘Ngatinge sekibuhchhuak ber kher..?
Ka sawilan tum tak ka tan hmain thil pakhat sawi ka duh. Kan hnam, Mizo sawisel ka tum lova. Amarawhchu, thil ngaihtuah thui loh leh kan hmanhmawh luat vanga kan rahbi a pial leh thin hi ka ngaihmawh vang zawk a ni.

Chhurbura chanchina sekibuhchhuak pawimawh dan chu sawi nawn ngai lovin kan hre vek tawh a. Engvangin nge Phungpuinu’n a intlan na tura hnathawhna hmanraw tha hrang hrang a pek turte kha, Chhurbura khan a hnawl zel le? kan tih chuan; tha thawh a ngaih vang a ni. A tawp a tawpah chuan Sekibuhchhuak kha a hlawh chhuak ta reng a, hnathawk miah lovin, thu han pek hlek khan buh leh sa a lo chhuak zung zung mai si a. A neitu tan chuan a hluin, thil tangkai tak tur chu a ni.

Enge kan thlan ve ang le…?
Ele, Sekibuhchhuak a niang chu.. Chuti chuan Chhurbura anga mawl leh bum nuam kan ni ta vek tihna a nih chu… :-P
Nia, chhurbura kha pa fing leh remhre tak lo ni ngei mai. Heti hian ngaihtuahna ka seng daih pek. Thawk miah lova ei tur nei a, faisa ringa han awm tawp mai chu, Pathian thu nen a inkalh ta tlat lawi si. Tirhkoh Paula meuhvin, ‘Thawk lo chuan ei pawh ei suh se‘ a ti hmiah mai si a. Ti chung hian, sekibuhchhuak chu kan la thlang zel dawn em..? He thu zulzuia ka sawi duh ber chu, hna leh mawhphurhna kan neih apiangah, mahni tawka rinawm leh rintlaka kan thawh hi a pawimawh tak zet a ni.

Chiahpuam
A vullai kha chuan kan ram titi tam ber leh chanchinthar luahtu ber a ni. Mi tam takin an sum thawhchhuah hlu tak, engmah lovah an chan phah a; mi thenkhat te’n lirthei manto tak tak an neih phah thung.

Engatinge kum 100 chuang India ram puma Bank rintlak leh ngelnghet tak tak kan neih lai rengin; bank hming thar, a chanchin pawh hriat chian hmaa kan bawh luai luaina chhan kha…? Ele, a pung a tam em alawm. Bank pangngai a tlem te te a sum pung nghak peih lovin, sum pung chak chu kan bawh luai luai a. A hming mawi tak an phuah angin an chiahpuam luih luih a, a puam chak ta lutuk, a puakkeh ta reng a nih kha… ;-)

Chuvangin…
I hnathawh leh i hlawhah khan lungawi tum la, tin i hlawh leh i hnathawh kha a inmil tawk em..? He khawvela reilo te i cham chhung hian, sum leh ro thil hian lungawina a pe dawn reng reng lo che. Mahni tlukpuite tluklo (level pui te phak lo an ti mi kha?) ang inhria a, hun leh tha senga rilru pangkhing taka awm fo ai chuan, lungawi tak a awm hi kan zir a tul. Tin kan ram hruaitute lah Pathian in kan tana min ruatsak tih pawm har tawk lekin an huamhapin, hma an sial bawk si.

Englekhawle, Zofate zingah hian, mahni hnatawha rinawm leh rintlak te lo pung deuh deuh se. Chhurbura sekibuhchhuak hun, ramhuai biak laia cheng ni tawh lovin; Kristian kan ni a. Min Siamtu Pathian duh zawnga nung a, kan thawh-hlawh eiin, hlim taka hringnun hman i zir zel ang u…

Similar Posts:

Recent Posts:

This entry was posted on Monday, June 25th, 2012 at 12:28 pm and is filed under Advice, Lifestyle, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.

13 Responses to “Chhurbura Sekibuhchhuak”

  1. 1
    doc_lib Says:
    June 25th, 2012 at 12:42 pm

    comment na ka hawng e

    Report this comment

  2. 2
    doc_lib Says:
    June 25th, 2012 at 12:46 pm

    Chiahpuam ka chhui fuh a sin aw. Min rawn sawi hmuh ve a. Khai khawia Burma pawisa, US dollar leh India pawisa vel an thleng kual lovange. Vengthlang pa pawisa kha Vengchhak pa, chuan a hnu ah vengthlang an hmuh leh a..a tu berin emaw ka dah duh tawh lo tia, lak chhuah tak tak a tum hun chu a puahkeh hun ka tia..a hnu karkhat lekah a puak keh ta reng a :-)

    Report this comment

  3. 3
    chhangteval Says:
    June 25th, 2012 at 12:53 pm

    (Y)

    Report this comment

  4. 4
    chhiartu Says:
    June 25th, 2012 at 12:56 pm

    Tha tehreng em…(Y) mizo zawng zawngin chhiar thei ila tha tur nia…

    Report this comment

  5. 5
    sheldon Says:
    June 25th, 2012 at 12:59 pm

    Ziak tha hle mai. Hreipui khuaitu thei Phungpuinu in a offer khan kan pu Chhurbura khan zawhna a zawnga pawi ber ‘Tha a ngai em?’ tih kha an zawt chat mai a.. pu Chhura atang tawha tha thawh hreh hnam kha kan nia, Hreipui khuaitu thei aia Sekibuhchhuak dah sang awm reng kan ni. Kan pu-a reng khan tha a thawh peilo mai :-D

    Report this comment

  6. 6
    malsta27 Says:
    June 25th, 2012 at 1:08 pm

    Weinch…………….Chhurbura te rawn teh khin vel :-D :-D (H)

    Report this comment

  7. 7
    lr hlonchhing Says:
    June 25th, 2012 at 1:21 pm

    Kan pu Chhurbura hian chatuan hawlh thu ropui tak tak a lo pai ru reng asin le. “A sen reng reng hlauh tur” a tihte hian awmze ril tak a nei. Science thlirna atanga han thlir chuan, “Danger signals are made red” tiin a lo dah fel thlap tawh a lo ni a. Chu chu kan pu hian a lo hmu lawk vek a lo ni.
    Mawngping khua naupang mawng a verh sak theih dan te, Mawngping khua patling hovin an man a a kiu-va a vawn tir thei tlat te, lipui chunga bawmranga an khai tawh hnu pawha paihte sumdawng a la vo zam thei tlat te hian; thluak ropui tak a nei tih a lang.
    A mawl lo, fiamthu a duh mai mai a ang. ;-)

    Report this comment

  8. 8
    Awmtea Khiangte Says:
    June 25th, 2012 at 1:33 pm

    Good post (Y)
    Ngaihtuah a tithui duh khawp mai

    Report this comment

  9. 9
    Mx Says:
    June 25th, 2012 at 2:39 pm

    (Y)

    Report this comment

  10. 10
    Lamji Says:
    June 25th, 2012 at 3:52 pm

    ‘hna leh mawhphurhna kanneih apiangah, mahni tawka rinawm leh rintlaka kan thawh hi a pawimawh tak zet ani’ …AMEN (Y)
    ‘I hnathawh leh i hlawhah khan lungawi tum la..’ a tha khawp mai,Mizo vairam a awm buaina tawk news a kan hmuh tam ber problem ani awm e. Teirei peih,pachan,tawrhchhel,taimak kan mamawh khawp mai. (Y)

    Report this comment

  11. 11
    Kawhterenga Says:
    June 25th, 2012 at 7:48 pm

    Pu Chhurbura kha Pa fing leh rilru tha tak niin ka hre ve mai mai thin (H) Miten an hlauh em em Phungpuinu a man te hian a huaisenzia a lantir bawk. (Y) Nahaian a bum kual vel thin te kha a mawl vang ai mahin a rilru that vang niin ka hre zawk tlat pek a nih chu :-P

    Report this comment

  12. 12
    Kawhterenga Says:
    June 25th, 2012 at 7:52 pm

    Pu Chhurbura Sekibuhchhuak atang khan Mizo buh leh Sial sa chauh a chhuak thei :-O Kan Pua kha pa taima lo zawk zawk chu a ni bik miah lo asin, Champhai Zawl zawng zawng khi Chhura Vuakzawl a ni a, Thangtharte tan hna ropui tak chu a lo thawk ngei a ni :-D

    Report this comment

  13. 13
    Dr Mahminga Sailo Says:
    June 25th, 2012 at 10:08 pm

    # 11 & 12… (Y) Ka post lai khan, ka rilrua’n a lang reng tak asin.

    Report this comment

Leave a Reply

You must be logged in to post a comment.