Malsawmna hnukhawi paihchhuahna

KAN EK IN

February 2nd, 2016 3:14 pm by Zofa H Chhangte

Malsawmna hnukhawi paihchhuahna
Bible-ah hian ‘ek’ tih thumal hi a awm em tih ka hre lo a. Ek In chungchang phei chu ka hmu lo lehzual. Ka zawng chhuak vek tihna lam ni lovin, ka Search hmu zo lo ti ila a dik awm e. A lo awm a nih pawhin kan thupui behchhan tur khawpa hlu erawh a ni lem lo a. Bible thu leh a tlukpui tel lova thuziah thiam ta tlat lo leh Bible chang behchhan awm lo thuziak chhiar peih lote tan kan zawnsak duh mai a nia! A lo awm loh takah chuan a rintlak loh phah lem lo ang chu maw! Ek phena malsawmna awm zawk hi chhiar i tum teh ang.

Israel fate kha an daikal ve ngai lo a nih pawhin, an e ve tho ang tih a rin theih a. Thupui hnawkhnai lo tak thlanga hun ka’n khawhral mai mai hi chu a ho ngawt mai. Ho tingawt ila mi zawng zawng ni tin chin than a nih lawi si avangin a pawimawh riau a. A tawpthlak a tihngawt theih bik loh a ni. Chhura hunlaia mawngping khuaa chengte tan chuan thupui danglam tak, hriatthiam theih loh tur a ni. Kan thil tih thinte ziaka dah pawh hian a fiah zo lo ang a, sawifiah har tak mi zawng zawng tawn tawh a nih avangin heti ang lam thai tawh an lo awm a nih pawhin ka zulah ngai ve ta mai ila. Mi zawng zawng tawnhriat chu ziak a mual mual chu an lo awm ve tawh ang a, a awm lo a nih pawhin tu mahin ziah tlak khawpa thianghlimah an ngai lo a ni mahna.

Dam hrisel tha ver vawra zun leh ek kan thiar thei hi Pathian malsawmna a ni tiin bul tan hnuhnawh teh ang. Chuti anga chhut kilhkelh thin chu an vang ngei ang le. Hman lai chuan ‘Kan ek in” tih tawngkam hi a awm thei lo a, chenna in awm lohna chin dai leh ramhnuai zawng zawng kha an ek in a ni mai a. Daikal ti pawhin thupmawi mahse a rim a chhe ve ngei ang. Evi leh Adama a\ang tawha kan inthlahchhawn hi a enkawl danah tan kan la nasa a, ek in awm lohna chhungkua chu tlemte an ni tawh ang a. Mizoram khua-ah hian chuti ang awm lohna khua pahnih pathum chu ka kal ve tawh a. Kan ek in tih tur an neih lohna hmunah chuan kan ek in ka ngai thin khawp mai.

Kan ek in hi kan chhung intawm a ni a, mi hausate anga mahni puala kan neih ve loh avangin. Chhungkaw tam tak pawhin indaih loh a awm theih phei chu ka hre law. Kan ek inah hi chuan ka thla a muang a, ka ngaih a ngam a, thlamuang takin ke mu churh churh khawpin ka thu thin. Tun tumah hian Ek dan tha,a thu tung emaw, a thu awn emaw, san pek dan emaw, mi ten research-a an hmuhchhuah lam sawi lan ka tum hek lo a. Kan ek in atangin Pathian hmel ka hmu nasa zual bik a, ka hlimna leh lungngaihna ka sawrbing fo a. Ka tana hlutzia heti ang hian sawi teh ang.

Vaizin nikhuate hian ka ngaizual thin. Relah a ni emaw, Thlawhtheihna-ah a ni emaw insum a theih ngawt bik loh avangin bet lo zeta luh hian kan ek in ka ngaizual thin. Laklawh thilah te hlei hlei hian ka ngaizual a, dam leh hrisel tha pangngaia awm hi chuan hmun dangah inthiar hi ka phal lo a, a theih hram chuan ka pan nal nal thin. Puipunna hmun leh hmun bika man chawi ngai hi a tha ka ti. Ek man pekbelh duh pawh hi an tamin ka ring fo a. Kan ek in tih tur awm lohna hmunah hian a insum ngawt theih loh a, cheh palh ta ila, kan mualphozia tur chu ka ngaihtuah ngam lo zawk. Cheng sawmhnih khat lek chu pek belh awm hliah hliah zawk asin.

Ka tawngtaina in a ni a. Hmun dangah Pathian ka biak hi chuan dilna lam a tam thin a, ka duhamzia a lang chiang a. He hmun atang hi chuan “Lalpa ka lawm e” tiin bul ka tan thei thin. Lawmthu sawia fak leh chawimawi bak a leng lo. Tawngtaina in hranpa nei mah ila ka lut fo hian ka ring lo a. Buai chhuan lamin ka thatchhiatzia ka thup mawi fovin ka ring thin. He hmun hi chu loh theih lohna avangin ni tin ka lut a, lawmthu sawi lo thei lo hian min siam thin a. Chuvangin ka tawngtaina in a ni.

Tu tan pawha Call Centre a ni a, thuruk sawina hmun tha a nih avang hian a him bik em em a. Mi dang a tihbuai loh avang pawh hian hmun tha tak a ni. Kan va biaka te hriat atan erawh chuan a hawihhai lo hle a. An hriat loh erawh chuan a mawi lohna a awm lem lo. Pathian aia Phone be tam thin tan chuan Kan ek in hi a tangkai khawp ang le. Mi zinga be zuah zuah thin, mi dang care miah lo hi chu an bula awm pawh a hrehawm thin si a.

Library hran nei lo tan pawh Reading room a ni nghal a. News room tha tak a ni fo. TV news te hi tlangval, chhuak cheh tan chuan en hman a har khawp a. A ziak chhuahsa mahni hman huna chhiar mai hi thil awl tak a ni. Tunlai khawvel buai takah hian mihhring pawh kan buai lehzel tawh avangin lehkhachhiarna hun tha kan nei lo a. Kum khata lehkhabu pakhat chhiar lo chhungkua hi a awm theih khawp ang a, chung ho chu dem ngawt theih a ni lo.Lehkhabu an neih loh chu thuhran chhiarna hmun tha an neih loh vang ni maw? A nachang an hriat loh vang pawh a ni mahna, ni tin phek khat pawh chhiar ta se, thla khatah chuan an chhiar tam khawp ang.

Mihring damchhan pakhat chu beiseina a ni a, suangtuahna-in a zui thin. Suangtuahna hi nun tinuamtu a ni. Khum laizawlah hi chuan suangtuahna aiin mi chungchang ngaihtuahin hun kan hmang a, ngaihtuahna thianghlim lo pui pui kan hmang fo thin. He hmunah erawh hi chuan rei tak a hahdam theih loh avangin ngaihtuahna thianghlim lo a put hman loh avangin suangtuahna tha mi chauh ngaihtuah nan hun hman han tum chhin teh. Khawvela chen hi i thlakhleh phahin ka ring fo thin. Tar chhumchhia leh khumbeta natna i tawrh hunah zawng i ngai ve thin ang a, malsawmna i lo dawn tawh; ngaia i lo neih kha malsawmna a nihzia i hre thei ang le.

A neizual leh a nachang hre deuh ten mahni puala an neih thin avang hian an tan chuan ni tin chhinchhiahna (Diary) ziahna hmun atan an hmang a, a remchang ngawt mai. Patling ke hniak lenna hmun apiangah a ek theih tih hunah kha chuan, thil tha lo paihchhuahna hmunah bak an chhiar thei lo a. Tunah zet zawng kan hmang tangkai ta a nih hi, a hmangtu azir ava ni em! Hmanah chuan inthup hun a ni a, tunah pawh a la ni mai thei e. Mahse, tun ang hunah chuan hahdamna hmun, saruak leh inhawngsa a kan ngaihngamna hmun a nih avangin kan ek in hi malsawm chhiarna hmun ka ti lo thei lo.