Ka awih teuhlo, kiltinah hmasawnna a lo thleng a, kan rahka tinah hmasawnna chuan min lo hmuak zel a, kawmchhak pa in hma a sawn viau chuan kawmthlang pa pawhin hma a sawn ve hun alo thleng tep a ni an ti maw? A ni mahna le!! Khawvel hian zahawmna a neih chhun chu Upa te hi an ni an ti em khah? Chutiang chuan kan ngai chiah em? Kum atam pauh leh kan hlutna a sang an ti, kei erawh chuan a teuh loh zia ka hria. Leihlawn rahka tinah hian kan hlutna a tlahniam zel zawk a ni lawm ni?
“Hmanah chuan hmanah chuan Vai lal nupui ka ni a, tunah chuan tunah chuan ka pu Saza nau ka awi e..” tih hla thu hlui zet hian kei chu min vel thin. Hmanah chuan ka hluin ka mawi ve mahna, nakin lawkah chuan..tiin ka hlutnain tangka 30 pawh a buk uai zo lo ang a, Bukna khai kan a nih rual hian ka lamah bukthleng chu a uaifual silo ang tiin ka ngaihtuah thin.
Naupang tualchai rual lek kan nih lai kha, kum tam ala vei hmain ngaih chang ka ngah ta. Khang hun ang laiah khan kan nun hi han lut leh dawn chhin ila, thangthar khawchhak mifing aia fing zawk mah, mahni chanvo leh right hre bel hler hlurte hi a kawngkhar te takte ah khan an palen leh nulen em vang ni hran hauh lo hian an leng hian ka ring lo tawp.
Thiamna sang zawk nei thangtharte hian, Thalaite Khawvel tiin kan hun kan hrilhfiah e kan ti a ni maw? Thangthar mifing rual zingah hian kan rual u ten an at vang ni silo hian luh zai an rel thei ta lo!! Kei chuan hei hi hmasawnna nilovin Hrichhia a ni ka tih tlat loh chuan ka lungawi thei lo tawp ang.
Vana Arsi te khi telescope neilo mahla han thlir ve tehreng u, Chhohreivung hian a chunglama awm kumhlun turin Arsi pathum zingah khian remna a siam ngailo, Chungnung ber chuan a hnuaihnung ber nih hun angah a sin. Thangtharte erawh hi zawngin Ai a upa te zahna kan vawn thin kha kawng kawi tinah kan thlauh then zel a, “Aia upa te zah thiamin an thute awihin zawm fo rawh” tih hlate ai chuan “Its My Life” tih tawngkam tawite hi kan bengah kan thun hnem ta lutuk a, kan rual u ten kan zingah hmun an chang ve ta meuh lo. Hei hi kan fin vang ni tak maw?
Khawtlanga min uap lumtu rual u te kha khawnge an awm zawh tak le? Kohhran inkhawm tiphuisuitu tar chaklo zawkte khan khawi hmun nge an chan tak? Chhungkua thlamuang taka an thlazar hnuaia min humhim thintu i Pi leh Pu te kha khawnge i thuhruk zawh tak le? I changkanna leh i finna te hian an hmel pawh lan ngam lovin a thukru ta em ni? Changkanna kawng bo tak chu ava ni em!
Zan thim hnuaia tleirawl te in val upa thankin zet a vau khur khur mai ka hmuh chang hian, kum tlemte a lokal leh huna a vautu chan tur chu hetiang ai nasa mah hi ala ni dawn tih ka ngaihtuah thin. France ho thufing mawi tak pakhat a awm, “I ram leh i nun humhim nan aia upate zah rawh” tih tawngkam hi Mizo thangtharte hian i zir tha leh ang u.
Kan finna leh thiamna te, kan changkanna leh hmasawnna te hian aia upa kan zahna thin kha a la bo a, an mahni a tawmim tir a nih chuan hmasawnna kawng bo, Finna mei bul, Changkanna khingbai a ni ka ti lo theilo.
Hmanni mai ngaihtuah pawhin tun dinhmuna a upa te zahna leh chawimawina rilru kan nei tlem ta em em mai hi Thangtharte hmasawnna leh finna vang a nih ka ring thei thlawt lo, Thangthar mifing te hi Lung kan mawl vang em ni zawk?
Similar Posts:
- Kum Sangbi Tharah Lal Krista Nen
- Mizote leh Networking
- Zopa, Harh rawh!
- Aia Upa te zah thiamin
- ‘ZO’ thil thing sawinan maw?
(Y)
June 26th, 2012 at 7:46 am
A ni mah na…
Report this comment
June 26th, 2012 at 7:50 am
A ngaihnawmin lung a tichhe thei ṭep mai ka ti!
Hawihhawmna, nunmawi/Zo nunmawi kan tih ang chi kha keini naupan zual lai aṭang pawh khan ava han dava sawt tawh tak em aw….
Thangtharte nasa taka ṭan kan lak angai. Hnam changkang nitur chuan kan culture leh tradition theih anga tam kan chhawm chhoh zel a pawimawh. Hetiang lamah hian sawi leh sawi hnu, Vaingalsin te leh Japanese te adt. rualawh an tihnat zia mai hi aw. Anni chu khawiah pawh awmin khawsa sela, an hnamze mawi lai lei leh an danglamna bikte chu chhuang takin an chhawm chhova, khawvelin a ṭha zawngin a hriat lar phah ta hlauh mai si a!
Report this comment
June 26th, 2012 at 8:14 am
A va tha em !
A chhiartu tur diktakin ka chhiar a, chhiar ve se tih fe fe tih ka va ngah em. 
Lawks, pauh tih khi poh tih tur a ni zawkin ka lo hria a, a dik em aw..
tren tren
Report this comment
June 26th, 2012 at 8:16 am
#3 yesi
‘poh’
Report this comment
June 26th, 2012 at 9:09 am
Em mawni dawn le?
Report this comment
June 26th, 2012 at 9:11 am
Hv @2
Report this comment
June 26th, 2012 at 9:16 am
“Hmasawnna kawng bo, Finna mei bul, Changkanna khingbai “, he thu hi i va hmang fuh cher cher tak em.
I thahnemngaihna hi ka thlawp khawp mai. Naupan deuh laia ‘u-Sang, u-Tluang, u-David, u-Henry’,ldt. tia kan koh thin kha kan han nula/tlangval ta cheng a ‘Sanga, Tluanga, David, Henry’ tia kan han rualpui koh ta hmiah hmiah thin hi chu a hawihhawmlohthlak ngawt mai. 
“Koh dan awmin Kam Tha hmang rawh” tiin kan inzirtir thin kha a ni sia!!! 
Kan lo puitlin hnu pawhin kan naupan laia kan ute thinte kha keini aiin an la upa reng tho tih i hre thar leh theuh ang u khai 
Report this comment
June 26th, 2012 at 9:16 am
“Hmasawnna kawng bo, Finna mei bul, Changkanna khingbai “, he thu hi i va hmang fuh cher cher tak em.
I thahnemngaihna hi ka thlawp khawp mai. Naupan deuh laia ‘u-Sang, u-Tluang, u-David, u-Henry’,ldt. tia kan koh thin kha kan han nula/tlangval ta cheng a ‘Sanga, Tluanga, David, Henry’ tia kan han rualpui koh ta hmiah hmiah thin hi chu a hawihhawmlohthlak ngawt mai. 
“Koh dan awmin Kam Tha hmang rawh” tiin kan inzirtir thin kha a ni sia!!! 
Kan lo puitlin hnu pawhin kan naupan laia kan u thinte kha keini aiin an la upa reng tho tih i hre thar leh theuh ang u khai 
Report this comment
June 26th, 2012 at 10:46 am
Ṭha thlâwt!
Report this comment
June 26th, 2012 at 12:37 pm
Tha khawp mai……………i duhthawhna leh thahnemngaihna hi tha
. Mahse kan ti teh ang, he thil ah hian ngaihtuah ve deuh ngai a tha chu, ‘Its my life’ an tih lai a tak hi keimahni duh chinah hian kan rek bung hi a ni thei mai a ngem? tih a hi a ni. He lifestyle/idealoy a hi ‘laissez faire’ leh individualism an tih atanga lo chhuak a ni awm a, a thu ken ber leh hril ber a chu ‘ka duh2 ka ti anga ka thu2, midang chuan lo tuar in lo hrehawm phah mahse kei ka hlim phawt chuan a tawk’. Self centred/self centric te poh a tih theih awm e a, midang hi he idealogy ah hian an bo ta thin a ni, tha lo khop mai. Mahse heti hi a ni chung hian, kan thalai te ah chauh hian a mi a awm? ti in zawt ta i la, kan nu leh pa tam tak te atanga kan chhawm chhoh ti ta ila kan ti sual in a rinawm loh, corruption te, moral degradation te, verbal accusation kan tih thleng hian a huam tir theih in a rinawm. Its my life, idealogy hian a khung tel avangin, midang tan a tha lo tur thil a nih chuan sawi/tih loh mai te pawh hi a tha zawk fo mai,mahse societal flaws pakhat ve a nia he thil hi chu fihlim thak nih chu har ve tak tur chu a ni,midang tan a harsatna a va thlen chiah hian kan thil tih leh sawi te hian its my life min tih tir a ni ti ta i la a sual tampui in a rinawm loh ve a. Entirnan, mi kan rel ang chi te phei hi chu its my life idealogy diktak hi a ni ringawt mai a ni 
. Hemi chungchangah hi chuan sawi tur a tam thei awm e, duhtawk i la.
Kan hnam ze tha tamtak nunpui chhunzawm chi a awm lai hian a thalo tamtak a awm ve bawk a, stigma chi hrang2 zinga pakhat ‘NAUPANG A’ tih awm tlat mai atanga thalai te’n a chhuah an tumna boruak hi thil tha a nih rual hian aia upa te zahna hi chu an la nei teuh tho in a ania ka rin ni kei…….kan sawi tak duah chu.
Report this comment
June 26th, 2012 at 12:39 pm
” Zan thim hnuaia tleirawl te in val upa thankin zet a vau khur khur mai ka hmuh chang hian, kum tlemte a lokal leh huna a vautu chan tur chu hetiang ai nasa mah hi ala ni dawn tih ka ngaihtuah thin “.
Hei hi a tha khawp mai, kan ngaihtuah tawizia a langchiang hle bawk. Mi chunga kan tih angin kan chungah a thleng dawn a ni, tih hi kan ngaihtuahphalo tlangpui. Tuna Pitar/Putar hmusit/zahpui/nuihzat emaw ringawt te pawh an awm a nih chuan nakinah an pitar/putar hun ala thleng ve ngei ngei dawn a, an tu/fa te’n anla nuihzatin, anla hmusit ve ngei dawn tlat. Heihi chu a dik chiang em em.
” Thangthar mifing rual zingah hian kan rual u ten an at vang ni silo hian luh zai an rel thei ta lo!! “
Hei hi a bulpui ber chu Zirna (Institution) vang hi niin ka hria. School lamah chuan Zirtirtute’n mahni aia pawl sang tawh phawt chu Kum(age) lamah keini aiin naupang mahse min ‘U’ tir tlangpui a, chutiang bawkin keini aia pawl hniam zawkte chu kum lamah Upa zawk mahse kan ngaihniam ve leh lawi a, hetiang hi Zirtirtute min zirtir dan kha a ni miau a, chu chu kan than hnan chho ta niin ka hria. ” Zawlbuk” hunlaiah kha chuan kum lama Upa a piang kha zah anni thin a, chu chu an inzirtirdan pawh a ni. Tunah chuan Zirna lama sang a piang hi anni tawh thung, chu chu Zirna hmuna an inzirtirdan pawh niin ka hria. Hetiang zawnga inzirtirna hi Hostel lamah phei chuan a hluar lehzual ngawtin ka ring. A thatna leh a thatlohna pawh sawitur a tam ngawtin ka ring.
A engpawhchunise, hetianga inzirtirna ” Mahni aia Upa-te zahawmna leh nunhlimna aia Zirna dahsanna ” hian minti zahawmlo tial tial a, a thatlohzia pawh kan hmu tam tual tual ni a lang. Zirna leh thiamna a pawimawhlo tihna ni lovin, zirna leh thiamna hi Upa-te hlutna leh zahawmna tibo chuanglovin a neih theih ngei ang a, chu chu kan inzirtirdan a nih bawk chuan beiseiawm tak ala niin ka ring.
“KUM (Age)” nge ” Pawl(Qualification)” hi rilru ah kan dahsan, tih hian kan thinlungah Mizo Nunzia tamtak a paih bovin, a puntir a nih ber hi.
Report this comment
June 26th, 2012 at 12:53 pm
Post leh comment a puitling tha hlawm khawp mai.
Report this comment
June 26th, 2012 at 1:06 pm
Lung kan màwl vàng ni chiang e…
Report this comment
June 26th, 2012 at 1:34 pm
Ka chhiar tur tak anih hi mawle. Ka lawm e.
Report this comment
June 26th, 2012 at 2:28 pm
#10
malsta27: A dik tho mai. Mahse, atam zawkah hi chuan thangtharte chapona hian a hrin chhuah a ni ve pakhat ah ka ngai a.
Report this comment