mi(sual).com

All Assam Students’ Union (AASU) aiawhin P. K. Mahanta leh B. K. Phukan, Assam sorkar aiawhin Chief Secretary (Pi) P. P. Trivedi leh sorkar laipui aiawhin R. D. Pradhan, Union Home Secretary ten Assam Accord chu August 15, 1985-a an sign hnu kar khatna ah Prime Minister Rajiv Gandhi chuan 7 Race Course Road-a a pisaah Union Home Secretary R. D. Pradhan chu kovin lehkha phek engemawzat, a chhunga paragraph thenkhat fluorescent highlighter serthlum rawng leh rawng eng (yellow) a inthai rang nasa tak chu lo pek pahin, “Heng hi ka remti thei lo hulhual! Laldenga hi a tawh a khirh tulh tulh mai a. Tun atang chuan he inbiakna hi nangman i kengkawh tawh ang a. Serthlum rawnga inthai paragraph te hi engti kawng mahin India sorkarin a remti dawn lo tih chiang takin hriattir la. Rawng eng (yellow) a inthai paragraph te pawh hi siamthat kan duh tih hriattir ang che,” tiin — hemi ni atang hian Mizoram tana Remna kalsiam chuan hnunglam hawikir fo tawh lovin hmalam a pan ta hret hret zel nia ngaih a ni a.

Hemi hma thla 10 kalta a vanduaithlak taka kahhlum Prime Minister Indira Gandhi kha la dam ta zel sela, Remna Thuthlung ziahfel kha ‘nasa fe in a khawtlai ang nge khawtlai chuang lovang’ tih leh ‘Thuthlung tha lehzual zawk kan nei thei angem’ tih erawh thil awmdan enin inhnial theih tak a ni.

Prime Minister thar naupang takin Assam Accord champion puitu Union Home Secretary hnena he mawhphurhna a hlan hma hian Mizorama remna kawng zawn hna hi Ministry of External Affairs hnuaia Policy Planning Advisor to the PM hna chelh mektu, Indira Gandhi kutke pakhat G. Parthasarathy (GP tia kohvin) a zawng a zain kum 4 chhung chu a kengkawh vek a. Amah thlaktu R. D. Pradhan hnena a thu hlanchhawn chu, “Kawng tinrengah Laldenga nen inremna tluantling kan nei tawh, kawng khat erawh kan la bak, chu erawh political issue a ni tawh a, PM chauh lo chu hemi thuah hian thutlukna siam thei an awm lo. Chu chu hei hi a ni — Laldenga hian Mizoram Chief Minister a kan dah a phut a ni,” tiin. He thil hi Laldenga hian a phut thar a ni hran lova. Indira Gandhi sorkar hmasa atangin Janata sorkar hunlai leh a hnua Charan Singh-a sorkar lai atang tawha a lo ngiat reng tawh thil a ni.

India sorkar aiawh leh Union Cabinet Minister rank nena enkawl mek GP-a leh Laldenga’n fel thawkhat tawha an lo ngaih, amaherawhchu, PM thar Rajiv Gandhi an a pawm theih tak hauh loh zinga langsar ber chu Mizoram chhunga leilung hausakna (resources) thuah Parliament dan siam engpawh, State Assembly-in Mizoram chhunga hman theih tura a remtih ve hmasak phawt loh chuan Mizoramah hman theih anih loh tur thuhla a ni a. He thil chungchangah hian PM ngaihdan chuan Nagaland-ah an lo ‘tisual’ tawh a, tihsual nawn a remti tawh lo niin a lang.

Constitution Article 371 (1) a ‘ownership and transfer of land and its resources’ hi Nagaland-ah ‘automatically’ a hman nghal tura remtih a lo nih tawh avangin thumal 3 lek ‘and its resources’ tih hian Nagaland-ah ONGC leh sorkar laipuia agency dangte tan harsatna a siam hle a, Supreme Court-a chai ngai khawpa thu harsa a tling chho ta hial anih kha.

A nihna takah chuan he inremna duanchhin (draft accord) hi thla sawm kalta a peihfel vek tawh kha a ni nghe nghe a. Amah an kahhlum ni chiah October 31, 1984 khan Indira Gandhi chuan Laldenga nen inhmuin he draft accord hi kawngro nei tura sawidun an tum a ni.

Indira Gandhi chanchin ziahna lehkhabu lar berte zinga mi Indira tiha a inziah dan chuan kahhlum anih ni taka Indira Gandhi in mi a hmuh dan tur indawt chu hetiang hi a ni (1) Peter Ustinov, BBC mi leh sa (2) British Prime Minister hlui James Callaghan (3) Mizoram atanga hruaitu pakhat (4) England atangin Princess Anne (Indira; The Life of Indira Nehru Gandhi by Katherine Frank).

September 1985 thla tir lamah Laldenga leh Union Home Secretary te chu North Block-a Home Secretary pisaah a vawikhatna atan an inhmu ta a. Laldenga chuan uluk taka nawhmam suit rawng uk lam a ha a; a hnuaiah necktie sen lar tak a awrh bawk a. Amah tawiawmtute zinga pakhat zawk chu Brig. Tawnluia, chutih hunlaia Chief of Army Staff, Mizo National Army a ni. Laldenga chuan, “Pu Home Secretary, a bul atanga tan leh tur ni lovin inhmelhriatna atana inkawm chauh kan nih tawh ka beisei. Pu Parthasarathy nen engkim kan sawifel vek tawh a. Ramhnuai atanga ka mite an lo chhuah dan tur chungchangah sawi tur tlem azawng a la awm a. Tin, political issue thilah Prime Minister sawipui tur ka nei bawk a,” a ti a. Amaherawhchu, Home Secretary chuan draft accord a thu thenkhat chu a bul atanga enthat leh a tul dawn thu a han hrilh ta a. Chu veleh hmuh theih khawpin Laldenga chu a thinrim hle a ni tih a lang nghal a, a hmai pawh a sen chhuak vek a ni! Amaherawhchu, mahni inthunun tak chungin dam dap hian, “Pu Home Secretary, kan sawifel tawh sa a bul atanga kan chai tha leh zel dawn anih chuan kei chu ramhnuaiah ka lut leh mai ang. Ralthuam ka lek leh ang a, thisen chhuahna pawh a thleng leh ngei ang! Tin, a mawhphurtu chu nangmah i ni ang,” a ti ta a.

Chutih lai tak chuan thingpui an rawn sem hlauh mai a, chu chuan a boruak pawh tlemin a vaw dai deuh niin a lang!

Home Secretary chuan, “Pu Laldenga, nang nen kan inhmuh vawikhatna a ni a. Min hre lova, keipawn ka hre hek lo che a. Amaherawhchu, hel pawl hruaitu i ni tih erawh ka hria a. Delhi-ah chumi thil kaihhnawiha cham mek i ni tih pawh ka hria. Tichuan, tuna i tawngkam kha ka lo dawnsawn thiam danah chuan — mi i vau a ni. Tin, thisen chhuah chungchangte pawh i sawi bawk. Tunah hian Union Home Secretary pindanah i thu mek a ni tih i hriat ka ring a. Chuvangin, tlang takin sawi ila, i thusawi avang khan dan anga hma ka lak nghal mai a tul dawn a ni,” a han ti ve ta a. Inchaltauh tur ang maiin uluk takin second engemawzat chu mite pahnih chu an han inmelh rum hnuah, thawklehkhatah Laldenga chu za em em mai hian a rawn nui chhuak ta hawk hawk mai a! “Pu Home Secretary, nang nen hian kei hi indawr awm tak kan lo ni e. Mi tlang tak i niin ka hria,” a han ti zui nghal bawk a.

Mizo thalai vanglai hun hlu hmang mek tam tak ramhnuaiah hrehawm leh hlauhawm hmachhawn tura hruai chhuak theitu chuan charismatic leader anih zia chiang takin a lantir leh ta a ni.

Laldenga rilru erawh a dam vak lo. Vawi tamtak PM hmuh a tum a, amaherawhchu, senior Minister zingah pawh Home Minister Y. B. Chavan bak chu a hmu thei lo. Y. B. Chavan pawh chuan a Home Secretary chu thuneihna pumhlum pek a ni tih a hria a, a mawihawiha Laldenga lo kawm bak chu inrawlh a tum lo. Tichuan, Laldenga chuan a beihdan ki a thlak ta a —draft accord peihfel vek tawh chu PM leh Laldenga’n an sawidun vat a tulzia chanchinbu lamah a lo lang ta fova. V. P. Singh sorkar laia Mizoram Governor rawn ni ta hial Swaraj Kaushal thurawn angin Opposition hruaitute a kawm kual tan ta bawk a. October 1985-ah phei chuan Rajiv Gandhi hian a nu Indira Gandhi lo ruahman fel tawh chu a ngaizam hle a ni tih lantir turin GP-a nena an draft accord (full text) chu chanchinbu lamah a rawn lang ta uaih uaih mai a ni. Mahse, heng thilte hian inbiakna kalzelah harsatna liantham a thlen vak lo niin a lang.

Chutih mek lai chuan Surya chanchinbuah Laldenga kawmna a rawn chhuak a. Surya hi Maneka Gandhi chanchinbu a ni. “India sorkar mikhual ka ni a, min enkawl hi an bat a ni. Amaherawhchu, inremna kan ziahfel hma loh chu India mi (Indian) tiin ka inchhal thei ngai lovang!” tiin. He thu hian sorkar laipui ngeng a chhun viau ni tur a ni, Home Secretary chuan Laldenga a kawm nghal thuai a, “Home Secretary ka nihna angin he thilah hian ramdang mi nen kan indawr a tulna ka hre lova. India constitution ruangam hnuaiah inbiakna kalpui i inpeih thu ziaka min pek avang chauhvin kan dawr che a ni,” tiin a khak nghe nghe a ni.

1985 Krismas a lo hnai a. Laldenga chu a khua a har hle niin a lang. Zoramah haw dawn se a hoten kut an lo thlak mai hlauhthawnna a lian bawk si a. Tichuan, India sorkar chuan London-a a chhungte bulah Krismas a hman theihna turin ruahmanna an siamsak ta hial a. A chhungte hnena Krismas thilpek a pek turte nen lam ruahman sak vek a ni.

Hetih lai hian Union Home Secretary chuan Mizoram a tlawh a. Governor Lt. Gen. H. S. Dubey leh Chief Minister Lal Thanhawla bakah mi pawimawhte a kawm kual a. Tin, helicopter-in Mizoram chhim lama Indo-Burma ramri thlengin a va kal bawk a.

Tin, heuih rual hian MNF sipaiten ralthuam an dah dan tur chungchang chu ngun takin an ruahman a, Hnam Sipaite tana rilru natna awm lo thei ang ber turin hetiang hian ruahmanna an siam a: ramri a khaw pakhat Pharva an lo thlenin buk sakchawpah a mal mala lutin, buk chhungah chuan tuma hmuhpui loh turin an ralthuamte an tung ang a. Kut ruaka buk atanga lo chhuakin 100 mtrs. velah India sipaiten an lo dawngsawng zel dawn a; mi tam tak hmuh laia ralthuam tun chu pumpelh tir an tum ber a ni.

June 30, 1986 hi sorkar hna atanga R. D. Pradhan, IAS, Union Home Secretary a pension hun tur a ni a. Nasa lehzualin Laldenga chu nawr a hun tawh thu Rajiv Gandhi hnenah a thlen ta a. PM chuan chutih hunlaia Congress Vice President Arjun Singh hnenah chu thu chu a hlanchhawng a. Laldenga leh Arjun Singh chu an inkawm tan ta a ni.

June 25, 1986 a lo nih chuan PM chuan Lal Thanhawla hnenah a Cabinet hote nen Delhi-a lo chhuk turin a hriattir a. Congress President, PM ni bawk leh Mizoram CM leh a thawhpuite hriatpui ngeiin Arjun Singh leh Laldenga chuan Political Agreement an sign ta a ni. He inremna ah hian thildang bakah sorkar intawm siamdan tur ruangam a chuang a. He hun hi inbiakna thilah hmaichhana Laldenga leh Rajiv Gandhi an inhmuh vawikhatna a ni ta nghe nghe a. Mahse, hemi tum pawh hian PM chuan mawhphurtu ruat bik kuta engkim dah tlang a duh avangin inbiakna thil chu Laldenga nen chipchiar taka sawidun a duh chuang lo.

June 30 a lo ni a. Tlai lam dar 2:30 velah Laldenga chu amah chauhvin Union Home Secretary pisaah a va dak lut satliah a, hemi tum hi he pisaah tumah hruai lovin amaha a kal vawikhatna a ni nghe nghe. Darkar reiloteah Home Secretary thar tur C. G. Somiah hnenah mawhphurhna hlan tawh mai tur anih avangin R. D. Pradhan dawhkanah chuan lehkha/file engmah a awm tawh lo. Amah thlahna hun pawh chumi tlaia neih turin Home Ministry-in ruahmanna an siam diam tawh nghe nghe a ni. Pindana lo thu ve R. Vasudevan, Maharashtra State Cadre IAS officer, Home Ministry-a Joint Secretary (North East) hna chelh mektu te nen chutia titi phungchang sawia an thut khawmuan mai mai lai chuan Home Secretary chuan a tawp nan ‘vawikhat na na na chu’ tiin a han bei leh chhin te pawh a ni mahna, Laldenga hnenah chuan, “Kei leh ka nupui hian Mizote leh in ram hi kan ngaina em em tawh a ni; engtik niah emaw chuan in ramah lo zin leh ngei pawh kan tumruh hle,” a han ti kual phawt a, “Chuvangin, nang nena inbiakna pawh hi a hmawr bawk hman ngei ka chak a ni. Mahse, tun atanga darkar thum lekah hian sorkar hna atangin ka chawl hlen tawh dawn si a. Pu Laldenga, inngaihtuah nawn leh la, i tanfung thenkhatte hi i sawhsawn thei hlauh anih chuan ka chawlh hma ngei hian a hmawr kan bawk thei maithei asin. Thiantha angin thurawn ka pe ang che — tunah kan zo fel thei lo anih chuan tu nen emaw a bul atang bawka in beih leh a tul tho tho dawn a, kum tam fe pawh in inhnuk hnawk leh lovang tih tunge sawi thei?” a han ti a.

Chu thu avang chuan Laldenga chu a rilru a buai hmel ta viau mai a, “Ka thawhpuite ka biak hnuah ka lo let leh thei angem?” a ti ta a. Home Secretary chuan tlai dar 4:30 hma ngeia lo let tur leh chumi hnuah chuan engmah tihtheih a neih tawh dawn loh thu a hrilh a. Laldenga chu hmanhmawh takin a chhuak ta nghal a.

Vasudevan chuan an pu thlahna hun an lo buatsaih lawk tawh pawh chu a tuk lama sawn turin Home Ministry lam hotute hnenah thurawn a pe nghal vat a. Tin, Home Secretary pawh chuan thil inlumlet thar lo awm chu Home Minister Buta Singh a hriattir thuai a, PM pawh rang takin thil awmdan dik tak hrilh nghal a ni bawk a. PM chuan R. D. Pradhan hnenah chuan nasa taka lo bei zui tura ngenin, “I hun a tawp hman ta anih pawhin i hna lo la chawlhsan hauh suh ang che,” ti hialin thu a pe nghal a ni.

Tlai lam dar 4:30 a lo ri a — Laldenga leh a hote an lo let leh chuan a hmaa rei ngial ngial an lo chai mup mup tawh thu harsa fe fe te chu darkar khat pawh tling lovah an sawifel zung zung a, a fel ta duak mai a ni! Amaherawhchu, PM nen ngeia sawifel tur point thenkhat a la awm cheuva. Chung point pawimawhte nen chuan Laldenga leh Home Secretary chuan hmanhmawh takin 7 Race Course Road an pan nghal a, PM pawhin rang takin a lo chingfel nghal mai a.

Hun chep tak karah Cabinet Committee on Political Affairs (CCPA) chu thutkhawm hmanhmawh nei tura koh nghal a ni a.

Zan dar 8:30 lai a lo ri ta a, pisa kai hun pangngai a pelh daih tawh avangin Civil Services Rules angin Home Secretary chu sorkar hna atanga chawl (pension) a ni tawh a, chuvangin, an inremna lehkha pawimawhah a hming a ziak thei dawn ta chuang lo a ni. Amaherawhchu, PM thupek angin Home Secretary thar tur C. G. Somiah hnenah charge a la hlan lo. Chu thil chu PM hnenah hriattir a ni a. PM chuan R. D. Pradhan hnenah chuan, “I hun hi ka duh chuan ka pawtsei thei reng alawm,” a ti a. Home Secretary chuan, “Ka pu, officer pension hun tawh tumah an hun i pawhsei sak dawn loh thu mipui vantlang hmaah vawi duai lo i lo sawi tawh. Chuvangin, ka lakah pawh hian i thutiam chu bawhchhe lo hram turin ka ngen a che,” tiin a tang kawh ve tlat a. Mahse, PM chuan inbiakna hmawrbawktu Union Home Secretary ngei chu a tawp thlenpuitu atan a duh tlat a ni. Tichuan, kawng engemaw a awm theih tak mialin tih thu ah Law Secretary hnenah thurawn la turin a hrilh ta cheuva. Telephone-a Law Secretary an han biak chuan, “Tun thlenga charge inhlan a la ni lo anih chuan zanlai dar 12 ah Union Home Secretary chu pension-in a chhuak thei alawm,” tiin a rawn hrilh ta hlauh mai a — chu thu avang chuan PM pawh a lawm hle mai.

PM duhdan zelin Inremna Thuthlung ziahfel anih lai chu TV a tihchhuah turin ruahmanna an siam nghal chuk chuk a. Doordarshan hote lo be turin a Personal Secretary Vincent George chu hriattir a ni.

Zan dar 9:00 a lo rik chuan Union Home Secretary pisaah Laldenga te nupa leh a thawhpuite, Mizoram Chief Minister Lal Thanhawla leh a Minister thenkhatte leh Home Ministry leh Mizoram sorkara hotu thenkhatte uapna hnuaiah kum tam tak chhunga Mizo mipuite tah leh rumna ti tawp tawhtu tur Memorandum of Settlement on Mizoram chu ziahfel a lo ni ta a ni.

Similar Posts:

• Who dares wins
• Zu chungchangah: Laldenga Ngaihdan
• Silchar Truck Drivers Assn. in nuai 10 phut
• Vanhela Pachuau – appointed for Pondy CS
• Lungrem chim chungchangah “Legal Notice”

Recent Posts:

• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL
• President Trump ka hmuhdan (amah thlawptu lam atangin)

This entry was posted on Saturday, June 30th, 2012 at 5:00 pm and is filed under Mizoram, Politics. You can follow any responses to this entry through the RSS 2.0 feed. You can leave a response, or trackback from your own site.