mi(sual).com

(Ka hriat ve chin leh hrebelhte cho nan)

 Pu. Aithulha hi Mizo fate zinga Medical College rap phak hmasa ber tia hriat lar thin a ni. Zir hlawhtlingin Doctor ten i ta lo mahse mi danglam leh chanchin ngah tak a ni. A saptang thiam vang ngawt pawh hian mi te ngaihsan hlawh tak thin a ni.

 Amah hi hmeithai fapa rethei tak niin, a nu chu Daithangi a ni a, Mission Vengah an awm thin a. Naupang tumruh leh lehkhathiam thei tak a ni a. M.E school a zawh hian scholarship hmu phakin Silchar-ah High School  a lut zui ve ta a ni.

 Hetia Silchar a zir chhung hian scholarship a amah a inchawm mai bakah a nu (Aizawl a mi) pawh a chawm tel ve zawk an ti hial thin. Kan rual-u ten an sawi dan phei chuan kumtluanin dal-bat ringawt a ring a, exam dawn hnaihah chuan sangha lian chi rawmas-lu ngat a hmeh thung thin an ti.

 Matric a pass hnu-ah scholarship hmu phak zui zelin, Syhlet Murrarichand College-ah I.Sc a pass a, Calcutta Medical College-ah a lut, Mizo zinga Medical College lut hmasaber a ni. Mizo zinga I.Sc pass hmasaber dawttu a ni. A pass hmasa ber Durra Chawngthu khan Engineering College rap hmasaber a ni vet hung.

 A kum chiah hriat a har tawh chungin 1927-28 bawr lai vel niin a lang. Pu Aithulha leh Pu Durra te hian an zir puitling lo hlauh ve ve a ni. Dr.Selbuanga leh Er.Robula te kha anni dawttu te ve ve an ni a, an karah kum a liam tam hle mai. Mizo zinga MBBS hmasaber Dr.Tlanglawma kha LMP zova, condensed MBBS Course zo ve leh a nit hung.

 Hetia, Pu Aithulhan Medical College a zir chhuah theih lohna chhan kha mitthi ruang a khawih theih tlat loh vang a ni an ti a, a kalkawng lo tur a zawh fuh hlauh a ni ta ber awm e.

 Khatia zirna lam a bansan hnu khan Sawrkar hnate a la vang si a, Bawngpuakphur khalh hna te a thawk ta a ni. Vawikhat chu Tipaimuk lamlian-ah a zin tumin, chhunah a bawngte a hahchawlhpui a, chawte a pek laiin thingbuk hlimah a thu chawl a, Sap hla a lo sa vang vang mai a.

 Chutih lai tak chuan Bawrhsap Maj. A.G.McCall zin chhuak, Sakawr chunga lo chuang chuan a rawn hre fuh hlauh mai a. Bawngkhalhtu mai siin Sap hla thiam tak mai a a sa chu mak a ti hle mai a, a chanchin a zawt ta a ni awm a. Chutah Bawrhsap chuan Sawrkar hna pek a lo tiam ta tih a ni.

 Aizawl khawlai phiatfaitu rual, Mirawng-ho te kha a ho lai chu Sikul sena M.E School kan kal lain kan hmu ve thin. A hnathawh kha Sanitation Inspector tih ang lam a lo ni ta awm e.

 Saptawng te kha a lo thiam fuh hle ni ngei tur a ni, a thiam zia an sawifo pakhat chu “No human tongue can tell” tih mizo tawng lehlin an buai pui laiin a ni kha chuan ‘Sawi-in-a siak lo’ a han ti thei mai thin an ti. Kan Bible lehlin te pawh hi a lo duhthawh deuh thin in, hei aia a awmzia phawk chiang zawk a lehlin theih nia a hriat thu pawh a lo thin.

 Tunhma lehkhazir hmasate chu Tlawng lui dung zawhin an kal vek thin a. Ani pawh hian atana lunglen thlak deuh hunt awn a nei ve ngei tur a ni, Saptawngin hla a lo phuah a ni. A hla hming pawh “Down The Windy Tlawng River” tih a ni. Hetiangin :-

“Far in a foreign land, Memory recalled to mind,

Sweet remembrance of the past where my love and me met,

At the Tlawng river.

I love the windy Tlawng river, as it flows through

My native hills,

‘Tis where lovers met in joy,

Oft to part  in tears again,

I love the windy Tlang river,

Where I met you to part again and the birdies sang adieu,

Down the windy Tlawng river”  tiin.

 Amah hrim hrim kha pa hleitling leh hmeltha chu ni lo mahse hmel ropui(bumro) danglam tak niin, kan rual u te chuan Filmstar thenkhatte pawh ‘Aithulha type’ tia vuah annei hial thin.

 A hun hnuhnung lamah chuan nupuite neiin Phaitualah sumdawngin a khawsa a. Pawisa ngah tawk huna lo chuanchhuah leh  tumin, mahse chutiang hun a thlen hma lawkin a zuk boral ta hlauh tih a ni. Fanau hnutchhiah a nei em tih chu kei chuan ka hre ve phak ta lo.

—-by Dr.Zokuma (Vety) [L]

This entry was posted on Wednesday, July 4th, 2012 at 5:15 pm and is filed under Copy Paste, Mizo Society & Culture. Both comments and pings are currently closed.