mi(sual).com

1998 khan Home Mission Field a chhim lam biala khaw pakhat a hming Tlabung, Demagirri an tih bawkah chuan ka nu chhang chiah (naupang ber) Evangelist Teacher-a awmte thawhnaah ka va zin ve e ka tia. A nuamin ka kumkhaw sawi a tling dawn niin ka hria. Chulam chu lo dahá¹­ha rih ila:

Phak ang tawk tawk a kohhranahte inhmangin a hmingin mahni vengah rawngbawlna chhete kan nei ve a; chutiang miin Mission Field meuh ka’n tlawh chu hawn hunah Kohhran ang emaw, KṬP thiltih velah emaw report pe tur te a min beisei takin tiin a khua kan thlen phat aṭanga ka hun hman dan leh a khua leh a hmunhma, thawktute dinhmun leh ringtharte chungchangte chu ka phak ang tawka chipchiarin ka chhinchhiah ve a. Helai hmunah hian thla khat leh a chanve vel zet ka cham a, hetih chhung hian nitin ka hun hman dante chu ka ziak ta ṭhin a ni. Mahse, ka hawna kan khua ka thlen leh hnuah erawh ka chhunzawm ta chuanglo.

Hemi kum vek hian Aizawl lamah hna chhete ka hmu ve hlauh mai a, heta ka hlawh nei hi thlakipa hlawh ka neih hmasak ber a ni nghe nghe, ka thawk rei ta lo mai pawh a. Ṭumkhat chu in leh a vel tifaia hun kan hman laiin diary bu hlui, kan puten tun hmaa an sum hman dan vel an ziahna chu hmuin kan thawhpui pakhat chuan ka duh leh duhloh min zawtin min pe a. Ziahna tur awl a lo la tam em avang chuan hemi a chin chu zantin bahlah lovin ka ziak ta char chara, A hnu deuhah ka tui tak em avangin diary bu thar ka leia, hemi bua ka lo ziah tawh leh Tlabung ka zin chanchinte bakah ka hun hman dan ka la hriat theihte chu ka ziak ta vek a, hemi kum hian kum chanve aia tam mah diary chu ka ziak ve ta a, tun hi ka thleng ta a ni.

Rin loh leh beisei phak lohin Israel ram ka thleng ve nawlh mai a, Aizawl lamah computer te ka lo zir silawng ve bawk a, duh duha kensawn theih mai chi hlaptawp (malchawi) lei ve in internet nen kan che ve ta rup mai, mahse, mi han zawh tur an tam lo nen visit tur a tlem ngei mai. Han khawih han khawih takah chuan chhiar turte pawh ka hmuh belh ve ta zela. misual.com hial ka lo hre ve ta. Thilte pawh ka lo post thiam ta hial mai.

Keima mimal private diary ka ziah aṭanga a kum sawmnaah chuan rilru thar neiin ‘hetianga internet-te neia Zoram lam chanchinte kan chhiar fo si chuan nitina thil thleng ṭhenkhat hi ka’n chhinchhiah mai mai te’ng’ tiin Mizoram thilthleng bik pawh ka diary bu tho, ka nileng hun hman dan ka ziah hnua, la awl laiah chuan tawi te tein ka ziak ta ṭhin a ni.

misual.com-ah nitin ka lut a, pakhatmah hmaih lovin ka hawng vek ṭhin. Chutih rualin sawi tak angin thilte ka post zauh zauh ve hial, ‘hetia misual.com-a lut a, thil post a, mahni diary a nitina Zoram lam chanchin ziah reng tho bawk si chuan’ tiin Mizoram Diary tiin kan post ve te’ng tiin May 2008, Mizoram Diary chu post tumin ka bei a, ka peih fel vek tawh. Mahse, ka tum lai hian internet lam a lo chaklo viau vei a, ka hlawhchham ta. Mahse, a thlaleh June diary chu ka post thei ta a, chhiartute pawn lawmthu te min hrilh ve liam liam a nih kha. Kha khan min tiphur em em a, tun hi kan lo thleng ta a ni.

A chang chuan ziah tur hi a vang thei em em a, a chang lahin engbernge ka ziah ang? tia inkhap chang lah a tam. Tarlan awm tak tarlan lohte, ho deuh han tarlan tak mai maite pawh a’n awm leh zauh ṭhin nachhan hi a ni e.

Israel rama hun engemaw chen ka khawsak hnua, Zoram lam ka lo chuan chhuah ṭum khan ka library ka’n hawnga, ka diary bu hnih Thlabung zinna (bu hmasa ber tihna) leh 1999 diary chu ka hmu ta hauh lo mai, Ka nu (pahnihna) ka zawta, ‘thil chhiar tur ka zawng a, chukchute an lo awm bawk nen ka ti fel vela, a hlui tawh em a, ka paih daih a nih kha’ a’n ti mai chu, thinrim chi ni mang silo, a hrethiam lo lutuk kha ka nuih a za letling phian mai.

Diary ziah hi kimchang lutuka ziah a á¹­ul loh chang a awm tih chu nupui han neih takah hian ka hrechiang khawp mai bawk. Nupuite lunglengin an lo chhiar a, hmuhloh tur thil an hmuh fo mai chuan zialo duh tak a ni.

Mizo(ram) Diary- tih a a ‘ram’ lai ka’n bracket na chhan chu he diary hi Mizoram chhunga thil thleng zawng zawng, hnam dang chungchang pawh ni se, leh Mizoram pawn a thil thleng pawh nise, Mizo chungchang huamtir ka duh vang a ni. Ka idea hi a fuh chiah em? erawh ka hre chiang biklo.

Tunah hei, ka Mizo(ram) Diary publish hmasa ber a nih (9th. July) champha a lo thlen pualin ka rawn thai kawi ve mai mai a nih hi. Vawiin hian Zoram lam pana rawn chuan chhuah ka tum ni a nih avangin post ka vil theilo mai thei a, min lo hrethiam dawn nia.

Ka lawm e.

This entry was posted on Monday, July 9th, 2012 at 12:01 am and is filed under More than words. Both comments and pings are currently closed.