mi(sual).com

– Zosangliana (Zotea)
Source – Vanglaini.org

New Land Use Policy (NLUP) hi Pu Lal Thanhawla hruai Congress a sorkar apiang 1984-1986, 1989-1998 kum 13 vel chhung an term hmasa leh tun tern kum 4, 2008-2012 ah te kalpui mek zel a la ni bawk a. An term hmasa kum 13 chhunga NLUP atana an pawisa hman tawh hi Pu Ronald Sapa Tlau, Congress thupuangtu-in lehkhabu a siam ‘Zoram Thar’ p-22-ah khan, ‘NLUP – atana pawisa hman (term hmasa ami) chu Rs 72,49,00,00,000 a ni’ a ti a. Pu Lalthanhawla Chief Minister leh Party President ni bawk chuan, chhungkua/ mi 66,445 hnenah Rs 30,000 theuha pek an ni tiin a sawi bawk a. Congress chanchinbu, ‘Muantu’ July 1-31,2007-ah ziak a ni.

Pu Lalthanhawla leh Pu Ronald Sapa Tlau te thuziak/ sawite hi tumahin a dik lo tiin an sawi miah lova. A dik turah ngai ila. Pu Ronald Sapa thuziak Rs 72,49,00,00,000/- hi Pu Lalthanhawla’n chhungkua/ mi 66,445 hnenah kan pe a ti a. Chuti a nih chuan Rs 10,90,977.5 theuhin an chang thei a ni. Pu Lalthanhawla khan Rs 30000/- theuhin kan pe a ti bawk si a. Hei hi a dawngtute an la dam ngei turah ngai ila, engzat chiah nge an dawn tih hi an la hre ngei ang. Pu Hawla sawi Rs 30000/- hi a dik turah ngai ta ila, mi 66,445 te hnena sem ral chu Rs 199,33,50,000/- a ni dawn a. Pu Sapa’n sen ral a tih atanga chhut chuan Rs 60,49,66,50,000 hi eng atana hman nge ni ta ang le? Heti zozai mipui pawisa hi eng atan nge an hman, tu kutah nge a luh tak? tih hi zawhna pawimawh tak, hriat chhuah lohva tham ral mai mai atan chuan a pamhmaiin, thamral thiang a ni dawn em ni le?

Congress sorkar term kal chho mekah hian Annual Plan atanga a lan dan chuan 2010-2011-ah NLUP atan Rs 234,81 crore; 2011-2012-ah Rs 234.00 crore, a vaiin Rs 468,81,00,000 hman niin a lang a. NLUP dawng tawhte dawn zat leh senso dang a kipa kawi la hre lo mah ila, a hmaa kan sawi tak NLUP sum, a hmanna la hriat loh Vbc 6000 chuang daih khuangcherbo ta ang mai hian, tun tuma NLUP Thami an tihah hian sum riral a awm leh mai ang em tih hi mipuiten chik taka kan chhut a ngai mang e. Hun hmasaa kan hotu ngai bawk kha kan hotupa hi a la ni reng si a.

NLUP zir chiangtu, Tata Energy Research Institute a mi Daman Singh ‘The Last Frontier’ tih ziaktu chuan, ‘NLUP sem hnu hian Lo neia eizawng 72% zetin an pung zawk a ti a. Hmun thenkhatah phei chuan 106% laia an punna te pawh awmin a ziak. NLUP sum an semah khan chhungkaw awm lo 45% zeta tam sem anga tarlan a ni’ a ti bawk. Hetiang hi thil awm dan a nih avangin chhungkua 66445 kan pe an tih lai hian mihring awm lo 29900 pe angin an sawi tihna a ni a, Rs 30000/- theuh pe anga an insawi ang hian chhut ta ila, Rs 897,00,000 zet chu a dawngtu mihring awm lo tihna a nih chu. Heti zozai mipui pawisa te hi khawilamah nge an thehthang a, tute pocket-ah emaw a lut ta mai em ni? tih hi hriat a chakawm khawp mai.

Chanchibu leh Local T.V vela NLUP hlawhtlinna tia an rawn tarlan tam tak hi ‘NLUP sulhnu ni lo, mimal taimaten sorkar Programme kallai pangngai hrang hrangte puihna tlem tlem an dawn leh anmahni tha hmanga an hlawhtlinpui tawhsa leh sorkar puihna pawh dawng hran lova, anmahni thawh rah ve liau liaute an ni zawk’ tia sawi ka hre tam khawp mai. NLUP hi a tha lo hulhuala e ka ti hauh lo. Mahse Khua/Veng tam tak ka tlawh veah te, Pa rintlak awm deuha ka hriatte hnenah, “NLUP dawngtu engzat vel nge in khua/ vengah awm, chhungkaw engzatin nge dinchhuah pui in rin?” tia ka zawhte min chhanna 95% chu a lawmawm lo lam vek a ni.

‘Pawisa fai Rs 10,000/- pawh a hlawma la la lut ngai loten Rs 20,000 – 50,000/- te kan dawng hi chu kan lawm khawp mai, kan beisei phak loh Auto-Reckshaw kan nei thei a’ tite chu chhanna lawmawm lam ka dawnte an ni. Hei hi kan dinchhuahpui ngei dawn e tih lam hriat tur erawh a vâng khawp mai.

A thlawna pawisa sem hi a dawngtute an lawmpuiawm rualin, kan ram leh hnam kal zel dan tur, mipui rilru put hmang tur thlir erawh chuan mahni tawkah rilru a hah duh hle mai. A thlawna pawisa dawngtute rilruah kutdawh rilru siam sak an ni thin tih hi zirchianna nei tawh thinten an ziak kan hmu fo tawh thin a. Miin kutdawh rilru a put tawh chuan, mahni ke a ding thei tura inngaihna a nei lovin, tum pawh a tum peih tawh thin lo. Hmanni deuha Central YMA-ten Mizorama kutdawh tihrem tuma hma an laknaah khan kutdawh thin engemawzat chuan anmahnia intungnung tura puihna kha hnarin, kutdawh chhunzawm zel an duh zawk tih hmuhchhuah a nih kha.

NLUP pawisa sem hian Mizo nu leh pa, thalai engzat tak kutdawh rilru put tir ang maw? tih zawhna hi, a chhanna dik tak hriat chakawm lo tak a ni.

Similar Posts:

• Cong. Minister hluiin MNF a zawm
• Tu nge i vote leh dawn le???
• NLUP atan vbc. 100; Mualpui-ah Stadium
• Aizawl a kutdawh tam ta lutuk hi
• Congress hi ka vote tawh ngai dawn lo a ni.

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Monday, July 16th, 2012 at 4:30 pm and is filed under Mizoram, Politics. You can follow any responses to this entry through the RSS 2.0 feed. You can leave a response, or trackback from your own site.