mi(sual).com

Tlanchhuakte : 1.R.Haleluia 2. Zailiana 3. Zaidarhzauva 4. Hmuaka 5. Lalhmangaiha 6. Rualzachhinga

Silchar Jail hi hmarthlang lamah zauh (extend) a ni a, an zauh chhungah hian in a dung 60 ft., a vang 20 ft. pahnih an sa a. An zawm seina chin chu leirawhchan rem (partition wall) a ni a, inkalpawhna kawngkapui pakhat a awm a. A tualzawlah chuan warder chhun zan zawmin an duty a, tangte chu an kim leh kim loh darkar tin an chhiar zel thin.

1967 March thla a R.Haleluia leh a thiante an tan lai hian Silchar Jailah vai tang 70-90 vel an awm a. Mizo tang te chu Jail zawm seiah hian an dah deuh bik thin. Jail hungna lungrem san zawng hi 16 ft. a ni a, an zawm sei chin chu 2 ft. a ti sangin 18 ft. a sang a ni.
An sawi danin Mizoram a buai avangin Mizoram Jail-ah tang an tam a, Jailin a zawh loh avangin Mizorama leng lo te dah nan Assam Sawrkarin Silchar Jail hi a zauh tir niin an sawi.

Mizote an tan tirna in hnihah hian inthiarna pakhat ve ve, in chhungah tepenin a awm a, inthiarna pindanah hian ventillation a awm bawk a. Ventillation dung zui zawngin bar 4 kham a ni a, chu chu duhtawk lovin thirlen hling nei lo an kilh bet bawk a. An kilh behna lai chu thingphela tuamin an kilh hnan leh thlap a, chuvangin ventillation pawh a hawn theih loh.

Silchar Jail-a Mizo tangte hi thuneituten an ngaihthah hle a, Court hmaah te an inlan khat hle a, thla 3 danah a hming chauhin rundalah Magistrate hmaah hruai zauh chang an nei a, an hruai tum pawhin, “Nangmah MNF tak tak maw? Engchen nge i tan peih ang ?, I inchhir em ?” tih ang reng thu ho mai maiin Magistrate chuan a lo chhaih kual thin a ni.

Mizo tlangval a chunga kan tarlan 6 te khian Jail atanga tlanchhuah theih dan an dap ru reng a, mahse hmanrua an neih loh avangin thil han tih mai a harsa em em a, Mizo tang zingah hian Rualzachhinga a tel ve kan tih tawh kha, ani hi thil chinchang hre deuh ber a ni a, a ni hi tun hma pawhin tum 2 lai a lo tang tawh nghe nghe a. Bengali tawng a thiam avangin vai ho zingah pawh thian a nei nual a, Chokaah te kalin chawte a chhumpui thin a, Choka atang chuan thuka an thir kham spare chu a la ru a.

Warder-ten an ven ngun em avangin chet lak a har hle a, Chaw ei a huna chaw eia an vah darh lai hian warder-te pawh an inthlahdah ve thin a, chumi hun lai chu remchanga chuhin Rualzachhinga thirtlawn lak kha an puan hnuai a, inthiarnaah an inkalhkhunga. Ventilation kilhna chu dim takin an kar a, mahse chaw ei zawhsan a hluahawm avangin rei tak an thawk ngam chuang lo va.
Ni khatah chutiang tih theihna chance chu tum 2, tukthuan ei lai leh zanriah ei laiin an nei a, hnathawh sawt a har viau nain dawhthei takin nitin an hna chu an thawk zel a.

Chawlhkar thum zet an beih hnu chuan ventilation kilhna perek chu an phawi thei deuh vek tawh a, mahse phawi mai lovin an tlanchhuah dawna phawi mai theih turin an dah a.

An inpeih fel thawkhat hnu, an la tlanchhuah hma siin Mizoram atangin tang dang an rawn thawn thla teuh a, chung rawn thleng tharte nen chuan in hnihah chuan an sem darh dawn a. A tir atanga in khata awm ho leh tum thuhmun te chu inthendarh a ngai dawn ta tlat mai a. R.Haleluia ho chuan Jail warder hnenah inthendarh lova chen ho an dil a, Warder chuan rem ti lovin in pakhat zawkah chuan anni thian 6 chu a sawn ta zawk a.
Beidawng duh mai lovin an hna ngai ventilation kilhna phawi hna chu an sawnna bathroom-ah chuan a bul atangin an tan tha leh ta a. Ni 17 zet an beih hnu chuan perekte chu kar chhuah mai theihin an dah ta a.

Tangte hi darkartin an chhiar vek thin kan tih tawh kha, chu pawh chu la duhtawk lovin kawngka leh tukverh atagten warderten an thlithlai ru reng a, chuvangin jail atanga tlanchhuah duh tan pawh hun remchang a vang em em a ni.

Bathroom-a tui dah nan hian petrol bur chhia an hmang a, tui a tam lo thin hle a. Tlanchhuah an tum avangin convict pakhat chu cigarette tlawn khat an pe a, bathroom ah chuan tui an chhunkhah tir a.

Ni 21 March 1967 zan chuan an tanna in chhungah inkhawmna an nei a, an inkhawm zo chu an la thu bial deuh laih mai a, thenkhatin fiamthu an thawh a, thenkhat an zai rawng rawng bawk a, an ri chel chul a, zan dar 8-ah warderin an kim leh kim loh a rawn chhiar a, a chhiar zawh chuan kawt velah awm lovin hmun dangah a kal a. Tangho pawh chu mu mai lovin an la thukhawm a, an titi a.

R.Haleluia leh a thiante chuan chet lak mai thain an hria a, Zaidarhzauva leh Lalhmangaiha te chu bathroom-ah chuan an inzui lut a, ventilation kilhna an thlawn a, a hmanruate chu tuiah an dah zel a.

An thiah zawh chuan Zaidarhzauva chu chhuah a han tum a mahse bar karah a lu a leng lova, tha tawpin thir kham chu a han kuai kau vak mai a, thir chu a kual a, a chhuak thei ta a.Lalhmangaiha chu a chhuak ve nghal a.

An tanna in bang hrulah chuan an ding dun a, bang atanga 10 ft. velah chuan tuihawk luankawr (nala) 2 1/2 ft. a zau, 3 ft. a thuk a awm a, chu nala chu an pan a , an thupil nghal a. An thiante pali chuan an rawn zui ve nghal a.

Nala-ah chuan an inzui a, Jail bang lam chu an pan a, an thlen chuan nala atangin an chhuak a, bang kil panin an bawkvak phei leh a. Jail bang hungna an thlen hnu chuan R.Haleluia leh Zailiana an ding dun a, an pahniha kokiah Lalhmangaiha a chuang a, Lalhmangaiha kokiah chuan Zaidarhzauva a chuang leh a. An han ding chhuak chu an ding awn lutuk a, an tlu ta a….( Awmzel tur)

[Source hi Pu C.Zama "Escape" bu atangin a ni e, tun tum chu kaihtawi a awm lovang, Pu Zama hi a lehkhabu hi reprint turin ngen tur a ni(ngen thei in awm hnai em?), a copy kawl that atan pawh a tha ve hrim hrim]

Similar Posts:

• Central Jail Tanhril atangin tang mi 5 tlanchhuak
• Silchar Jail atangin – II !!
• Silchar Jail atangin – III !!!
• USA hi ram hrehawm tak a lo ni?
• Tuirial Jail Escape

Recent Posts:

• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release
• Ka lawm e, Mi(sual)-nu!

This entry was posted on Monday, July 23rd, 2012 at 12:34 am and is filed under Copy Paste, Mizoram. You can follow any responses to this entry through the RSS 2.0 feed. You can leave a response, or trackback from your own site.