mi(sual).com

Mahse tumah insawh na an awm lo hlauh mai a, thawm dim takin an han tan tha leh a, an han ding mar chu Darha’n Jail bang kotlang a la ban pha lova, R.Haleluia leh Zailiana-ten Lalhmangaiha keah a rualin an kutin an chawikang leh vak a, Darha’n Jail kotlang chu a ban pha ta a. A kotlangah chuan a lawnkai nghal a.

Darha a lawnkai fel hnu chuan komol, a tlang kila an suihzawm sa chu an pe chho a. Darha chu bang tlangah chuan a bawk phek a ngun takin a thlir kual vel a, duty rawn hmu mai tur an awm lo tih a hriat hnu chuan a komol ken chu a thlak thla a, anin a hmawrah a lo chelh a, a thiante chu an lawn chho ta a.

Chutia an inpawh kai kim hnu chuan puanhmawr lehlam chu Jail pawnah an thlak thla a, puan chuan an uai thla leh a. A hnuhnung bera chhuk Zaidarhzauva chu komol bang tlang atanga lopawttu awm tawh hek lo, komol nen chuan Jail bang hrulah chuan a hlawm thla tawp mai a, R.Haleluia a delh fuh thelh nghe nghe a, a tlakna lai chu leitha dur a ni hlauh a, a insawhna lo va.

Jail hungna bang chu Jail staff quarter-a chengte chuktuah huanin a hnek avangin Jail bang hrulah chuan khawi lama kal tur nge tih ngaihtuahin an thu far a. Hun rei tak awmna chi a ni lo tih an hria a, chuktuah huan pal chu dimtein an tichhia a, quarter leh quarter inkarah an kal a.

Quarter-a awmte’n an thawm an hria a, “Kaun hai?” tiin an rawn au a, chhang lovin ngawi rengin an thawm dim takin an kal hmawk hmawk a, kawngpui an chhuah dawn tepah an kalna huan chu thirhlingneiin an lo hung a, thirhlingnei chu a ban chawpin an namthlu a, Premtola kawngpui an chhuak a.

An chhuahna piah deuhah chuan Pu Piandenga truck a ding a, Rualzachhinga te chuan truck driver chu vuakhluma, motor chu Mizoram lama khalh chhoh mai thain an hria a, mahse Zaliana leh R.Haleluia’n an remti lo va.

Zan a la rei loh avangin kawngpuiah chuan mi an la zi nuk nuk a, mipui insul zut zut karah chuan hmanhmawh tak si mahse kal chak lutuk ngam lovin an kal deuh hmawk hmawk a.Rickshaw pahnih an awmna lam rawn pan chu an lo phar ding a, pakhatah pa 3 ve ve an chuang a, Rice Mill lam an pan a, Rickshaw khalhtute chu a chak thei ang bera kal turin an hrilh a, minute 35 an kal hnu chuan Rice Mill bul an thleng ta a.

Jail Warder zingah Assamese pakhat, Halar-a chu Rualzachhinga nena inkawm thin an ni a. Zan dar 9 a rik hma deuhin Rualzachhinga hmuh tumin a kal a, Rualzachhinga a hmuh tak loh avangin a thiante hnenah a hrilh nghal a. Wardente chuan bathroomah a awm leh awm loh an check a, a awm bawk si loh avangin tlanchhuak an awm tih an hre ta a.

Ralkhel dar (alarm) an ti ri a, he ralkhel dar ri hi tlanchhuakte khan Rice Mill bula an kal laiin an hria a, kal thuai thuai an duh a, an duh angin Rickshaw khalhtute an hmanhmawh thei si lo va, khawimaw chhengchhe deuh laiah te an chhuk a, an han nam pui leh dawr dawr thin a.

Agartala Road-ah hian Siliguri khua a awm a, an mamawhte lam theih an beisei avangin chu lam pan chuan an tlan a. Kawngsir dawr chhete lo awm thliahna an thlena a, an ding a, Rickshaw khalhtu chu cigarette, nawhalh leh hmawmsawm an lei tir a, an tlan leh nghal a.

An hnung lamah chuan Jeep rawn tlan eng va va hi an hmu a, rickshaw an din tir a, a khaltu hnenah chuan, “Min phurh thu hi sawi reng reng suh ang che u, kawngsir hnim zingah khuan kan biru dawn,” an ti a. Hnim zingah an biru ta a.

Jeep chuan a rawn tlan pel a, an rin ang ngei chuan an mahni zawngtu police an lo ni a, an hma lama an tlan liam hnu chuan an kal leh ta a. Rei vak lo an kal hnu chuan an mahni rawn tawk zawngin Jeep rawn tlan an hmu leh a, an chhuk a, kawng sirah an biru leh a, motor chu police motor tho kha a ni a. An tlan liam hnu chuan anniho chu lungmuang takin an kal leh ta zel a.

Km 2 vel an tlan hnu chuan rickshaw khalhtute chuan, “Ka pu, kan kir tawh mai ang e, kan kal hlat lutuk zawngin kan haw kawngah harsatna kan tawng palh ang e, rickshaw hi kan ta a ni lo va, hlawh neia khalh kan ni a, kan pute pawhin an ngaithiam lovang, min hrethiam rawh u,” an ti a, an kir san ta a. Anni ho chu kein an kal zel a.

Thui tak an kal hmain an hnung lamah rickshaw rawn kal thawm an hria a, kawng sirah an biru leh ta a. Rickshaw khalhtute chuan, “Ka pu, ka pu,” tiin an au va. Anni ho chu an ngawi thap a, han chhan ngam mai tur chi niin an hre lo va, han chhang se an mahni mantu tur an hnung lawkah an awm ru reng thei si a.

Mahse, a kotute chuan, “Ka pu, hlau suh u,” te an la tih tak zel avangin hlauthawng rilru takin an chhuakchho ta a. Rickshaw anmahni phurtute kha an lo ni a, “Ka pu, malik-in va hruai leh rawh u a ti a, min rawn tir a ni,” an ti a.

Hlauthawng rilru tak chungin an kir leh ta a, rickshaw neitute in an thlen chuan, “Khawnge in kal dawn ?” tiin a zawt a.” Siliguri-ah” tiin an chhang a. In neitu chuan, “Siliguri-ah chuan kal suh u, sipai an tam lutuk a nia,”tiin an kal tumna a zawt a, “Mizoram lamah” tiin an chhang a. Ani chuan an kalna tur lam a kawhhmuh a, chem leh puan 2 bakah an eitur chhang leh biscuit thanhnem tak a pai bawk a.

An hmelhriat ngai reng reng loh hnam dang, Vai lehnghal an chunga a tha em em mai chu an lung pawh a chhe hial a, lawmthu sawia an inchibai hnu chuan kal tura a hrilhna lam chu an pan ta a……(Awmzel  tur)

P.S : Mobile phone atanga misual.commer-ho hi a sei lutuk chuan an khawngaihthlak theih em kha…!

Similar Posts:

• Silchar Jail atangin – I !
• Silchar Jail atangin – III !!!
• Central Jail Tanhril atangin tang mi 5 tlanchhuak
• Aidu!
• USA hi ram hrehawm tak a lo ni?

Recent Posts:

• YMA
• Hringnun thim lam
• Mithianghlim-te Inpâwlkhawm {Sunday Pual}
• C.P. Road
• Thalai ni si:

This entry was posted on Monday, July 23rd, 2012 at 9:00 am and is filed under Copy Paste, Mizoram. You can follow any responses to this entry through the RSS 2.0 feed. You can leave a response, or trackback from your own site.