High school ka kal lai hian tumkhat chu chanchinbu kan siam ve alawm mawle. Sikul hrang hrangah ah IT subject an rawn introduce tirh lam kha a ni a. Kan sikul pawhin sawrkar lam atangin computer sawm chuang lai kan dawnga. HTML leh microsoft word hman dan, file siam dan tih angreng chu kan zir thiam ve nghal maia. Chanchinbu siam pawh chu kan zirtirtupa hoin kan rawta, kan phur tlang hle a. Pawl sawm zirlai atangin editorial board tur mi paruk vel kan inthlang chhuak ve thlapa, keimah chauh chu hmeichhia ka la awm zuia.
Hmeichhe awmchhun ta chu an ti nge min duhsak ve hrim hrim vang, editor ah min ruat teh tlata, tumah dangin an chan duh tak loah chuan lawm fahran hian ka lo pawm ve maia. Ka pian ahnu lama editor ka nih ve vawikhatna a ni a, hmai pawh a uang ve hle. Kan chanchinbu (bulletin) lah chu phurchangly tih takah rin ai takin a sawngnawi phiana, a hming tur pawh kan phuah mumal hleithei lova. Mahse a vawikhatna a ni bawka sikul pumpuiah chuan ngaihsan erawh a hlawh hle thung.
Tichuan kan ti nek neka, exam te ala hla deuh bawka vawithum vel lai chu kan chhuah ve ta reng maia. A copy pawh a tam thei ang berin kan siama, a vawihnihna atang phei chuan vai phek chhiara phek li laiin kan han ti ve a. Sikul banah news editor (ani hian a rawn thawh ‘news’ lo thei lutuka a date kan thlak tawp zel), leh joint editor (nui hmel pu reng, a typing speed erawh satel hlauh) te nen kan pathumin Computer room-ah kan bung ve tluk tluk thin. Kan article chhuah hmasak ber chu thianpa Hruaia rawn thawh “Operation Sex and Drugs, teenagers lets fight back” tih ngei mai hi a ni a, bawn rem rem tak a ni. Sikul chanchinthar atanga poetry thlenga kan chhuah bakah inkahna column SILAIMU kan tih mai chu kan siam peka. Tuman huat awihloh, duh duh inkah awih tih chu Rule Number One leh a awmchhun a ni. Chu chuan zirtirtute pawh a huam veka, kan zirtirtu ngamtlak deuhte phei chu an rim mawlh mawlh hle..
“kan sir pakhatin mahni mimal private individual…a tih ve ziah hi a awmzia kan hrethiam lo, hihi”
“Sir Mxxx-a chuan hmeichhia pawh a hlaulo a ni awm e, smiley “
“Rxxxx-a of class X hi patling tanbun a ang…lolz”
“Hxxxx-a of class VIII aim in life chu electric ban chen nih a ni tawp…a ngaihna awmlo weh”
Inkahna tur chu alo lut hnem ngang maia, tin keimahni pawn kan ‘contri’ nual bawka. Tumah sawisel emaw haw awm emaw an awm hranloh avangin ngaihtha tak chuan kan awm ve maia. Mahse tuk khat ka sikul kal chu thu thinthawng tak mai hi ka dawnga. Tuemaw hian “Hxxx of class VIII khan in kahna kha a haw lutuka, a thinrim teh mai ania” tiin min lo hrilha. Hxxxx-a hi rawlthar tuaitir, thang duang zet mai hi a ni a, a pawl puite chu a zakzeh chen lek lek an ni hlawm nghe nghe. Rin ang ngeiin chawlh lawk lai chuan lehkha ka dawng ta. Lehkha pawh chu engdang ni lovin kan chanchinbu copy ngei mai kha alo ni a, SILAIMU column sir awlah chuan hawprawp hraw zetin pen tui sen hian ….
‘Pi Editor…”
ka phu deuh zawka, ka mit chu ka’n nuai nawk nawka, ekhai, hei chuh, ava rawn bei official angreng ve ti rilru chungin ka’n chhiar zawm nghala,
“Pi Editor….nangni ei tha hmulo thang theilo bawk lil lel ang nih ai chuan tun anga san hi ka duh fe zawk, nangni ho khan min tluk lo tih in lo hre dawn nia. Hetianga mi kah hi ching tawh suh u, in mawl khawp mai. Electric ban chen nih pawh ka tum bawk lo, aim in life te chu ka nei ve bawk..in sawi phak a awm lo….”
tih hi remlo fahranin alo inziak kual ruiha. Ka chhiar zawh chuan ka thin a phu dup dupa, thinrim tur nge, lawm tur nge, nuihsan mai mai tur pawh ka hre lo. Ka ngaihtuahnaa lo lut hmasa ber chu ‘fiam tawp loh tur mi rilru te deuh kan lo fiam palh a ni maw, zialo ngei mai” tih chu a ni.
Ka han en nawn leh thina, Pi Editor tih lai tak chuan ka nuih a ti za deuh tlat maia, Editor leh Pi tih hi inrem lo riauin ka hre tlat pek anih chu (hetih lai hian kum sawmpanga lek ka la ni vei bawk nen, hehe). Mahse chutih rualin a hminga editor ka nih miau avangin kan thil ‘tihsual’ ah chuan mawhphurtu ka ni tih min hriattir nghal bawk. Mi pawisawi hi ka thil hlauh ber pakhat a ni thina, mahse mi pawi ka sawi mai piahlamah mi rilru ka ti na hle tih chu a rukin ka hre ta rauh rauh mai a ni.
Karlovah kan sikul pumah an hrechhuak nghal veka, hawina lam apiangah mite hian min sawi sep sep ni hian ka ngaihbel ta zela. Min tantu tam tho mahse min ngeitu an awm nuala ka hriat avang chuan hrehawm ka ti ve hle a, a rukin ka zak chem chem mai a ni. A tukah chuan atir atanga min buaipuitu kan IT zirtirtupa chu ka hrilh ta a. Min duhsak bawka, tum khat Assembly kan neihnaah na takin ka thlavang a hauha. ‘Cxxx-i hi a hming chauhin editor a ni a, keimah hi editor diktak zawk chu ka ni.
Khang thil zawng zawng kha keima tih vek a ni, a duh chuan Cxxx-i ngei lovin keimah min ngei mai rawh u” a ti hiala. A sawilai te chuan hawi pawh hawichhuak ngam lovin ka dinna ah ka lo kun tlawk tlawk tawpa, rilru erawh tlemin a nawm phah ve deuh. Chung vel boruak avang leh exam te alo hnaih tak em avangin, leh board exam hmachhawn turte kan nih bawk si avangin bulletin pawh chu kan tihtawp alo tul taa, a ruk tak chuan ka ui ngei mai.
Tun hnua ka ngaihtuah let hian pangai taka Hxxx-a hnena ngaihdam ka lo dil lo kha ka inchhir thin. Amah chuan min ngei zui lova, midang sawi ka hriat leh dan pawhin ka chanchin a tha zawngin alo sawi fo a ni awm e. Tin, keipawhin min tihelsenna tawngkam avang khan ka ngei phah lova, ka thiamlo hauh lo bawk. Khatianga alo ti pawh kha a hriatthiamawm hle zawkin ka hria.
Mizote hi midang rilru tur dawn lek lova nihna ang anga infiam leh inchhaih ching tak mai kan ni a. Thenkhatin an huaa, thenkhatin an haw lem lova. A hua an lo awm pawhin ‘fiam a dawl lo em mai’ tia dem ringawt tur an ni bikin ka hrelo. Kha an mawilohna emaw tlinlohna lai avang khan mahni inkiltawih leh inzahpui reng rengin an lo awm reng thei a ni tih kan hriat a tha khawp mai.
Chubakah kan mawilohna emaw that tawk lohna lai chu keimahni’n kan inhre bel em ema, englai pawha a mi nazawngin min ‘remind’ sek reng kha a tul lem lo. Mitin hian thatna leh duhawmna lai kan nei veka, tangkaina leh pawimawhna zawn kan nei vek bawk . Chu chu kan inhmuhsak thiama, kan inngaihhlutsak tawna kan in chawimawi thiam hi alo pawimawh khawp mai. Chuti lo chu keimahni avanga khawvel hrehawm ti deuh leh nun beidawng deuhte hi kan bulah an lo awm reng palh ang tih a hlauhawm.
Nia, heng zawng zawng ka zirchhuah nachhan hi thumal pahnih lek , Pi Editor tih vang vek hi alo ni e… 
July 27th, 2012 at 3:11 pm
Ka 1st em aw
Report this comment
July 27th, 2012 at 3:14 pm
Umm… first chiang rap
Chiar tan ang
AVSV
Report this comment
July 27th, 2012 at 3:19 pm
Pi Editor, Mizo tam tak hian, infiam dan chintawk hi kan hre lo fovin ka hria. Thian/rual khat zinga fiam hlawh laklawh phei hi chu, tunlai tawng takin kan bawl rawn luai luai fo mai.
Fiamthu hi thawh tur, a hlimawm; mahse chintawk neih a tha fo.
Nikum khan, in SILAIMU ang deuha kan ziah tel nula pakhatin min zilh hrep tawh. A kahna lah kha, ka thianpa min phuahsak a la ni zui…
Report this comment
July 27th, 2012 at 3:25 pm
Ka 1st hman loh chu le.
Report this comment
July 27th, 2012 at 3:25 pm
Nui khi sun chungin ka chhiar ka chhiar a, ka’n chhiarchhuah dap chu le. Ka chhiar tum loh lam daih a ni, a ngaihnawm e.
Report this comment
July 27th, 2012 at 3:25 pm
Ngaihnawm ti deuha ka chhiar chuah dap chu. Nia, mizo hi fiamthu angreng si, huatthlala deuha infiam hi kan chingin ka hria, an huatin fiam dawl lo kan ti leh thin si a, Haw si, a langa haw ngam si lo, rilru na takin mi hi kan siam fo maithei a ni.
Tin, nula/tlangval senior te hi fiam kan ching, naupang tete pawhin zahpah lo taka fiam kan ching thin. Hei hi sim a tha khawp mai.
Report this comment
July 27th, 2012 at 3:27 pm
Mi fiam sual hi nuam lo ve tak chu a ni…
Nuihzat atan ringawta mi fiam fo phei hi chu a dawngsawngtu tan a nuam lo thei fo mai, an lo inzahpuina emaw, anmahnia an lo inchhuan lemlohna thilte a nih phei chuan.
Zirlai tha tak lah zuk ni a, Pi Editor.
Report this comment
July 27th, 2012 at 3:36 pm
Chhiar a nuam phian mai Pi Editor
High School zir hunlai hi a lo ngaihawm thei ber mai.
Keini pawh kan sikul (hostel) ah a phur fal deuh te’n chanchinbu an chhuah ve thin a, in kahna huang ah ‘zanlai a kitchen rawk’ tih vel a ka hming alang ve ziah erawh kha chu a zahthlak ve chem chem zel (classmate chhas neih ve khanglan phei chuan ‘hit’ lo tak ani
)
Report this comment
July 27th, 2012 at 3:37 pm
mx, AVSV ti suh, Pu Editor ka ti ve mai tur che ania…pichiu, zanlaia kitchen rawk hmel pawh i pu ve reng reng e..huhu
Report this comment
July 27th, 2012 at 3:53 pm
Lol @Charice, kitchen rawk hmel hi a ngaihnobei tehmai ania
Report this comment
July 27th, 2012 at 3:59 pm
Pi Editress, i sawi ho chuan i post ma chiah ami “HMEICHHIATE THLAVANG” hauh an thiam lo anih chu.
Report this comment
July 27th, 2012 at 4:09 pm
A ngaihnawm e Pi Editor
Pawl 12 kan zirlai in chanchinbu hi kan chhuah ve a. Official pawh a ni hran lem lo a. Science leh Arts in kan chhuah ve ve a. Sumdawnna tha tak a ni mai. Science lamah kei editor, joint editor pakhat kha tunah Mizoram sawrkhar ah officer a ni a, a dang chu Army lamah lutin Haiti ah a awm mekin ka hria. Kan news editor te pahnih erawh lawng sipai an ni ta a. Circulation manager pakhat chu doctor niin MC ah khian dawr a hawng a, pakhat zawk Synod Choir ah zaipawl member ni ta in ka hria. Nuam ve thei tak a ni, zirtawp tlaiah kan her thin a. Lung te pawh a leng deuh e 
Report this comment
July 27th, 2012 at 4:11 pm
Paragraph 12-na leh 15-na khi a va lai ve. A chung amite chiah nen khian hmunkhata awm tur a va ang deuh ve aw.
I ziak ngaihnawm khawp mai. Misuala ka hriathnu che hian na thupui hlawm tha tak tak i tan (defend) thin a. Chung i tante chu gender issue lam a la ni deuh zelin ka hria. A tha ka ti khawp mai. Rational taka ngaihtuah chuan hmeichhia hian pawimawhna in ngaih ang bawkin i chanvo neih hi mipa aiin a danglam chuang bik vek lem lo a nia. Mipa tih theih zawng zawng hi inti thei deuh vek a ni.
A ngaihnawm khawp mai. Thil min tihrechhuak. Tun tum AICS, Aizawl ka tlawh khan Rev Dr Zauva’n Campus min fan pui a. A tawp berah Principal roomah kan lut a. Tah chuan Principal, Rev Prof Hnuni a lo thu kuau mai a. Kan lut chiah a Pu Zaua chuan, “Ig he lai hi chu KINGdom ni lovin QUEENdom a nia aw” tiin fiamthu a thawh saih mai a. Kan pathumin kan nui nasa a lawm. Gender Issue hi Biblical tak paw’n chhui nasat a tha. Customery law lampang hawi zawnga hriat pawh mizo hmeichhia tan chuan a pawimawh leh zual ang.
I ziak ngaihnawm hle mai. A thlun phelh ang a ni mai lawm le… Duk par par mai.
Report this comment
July 27th, 2012 at 4:33 pm
To,
Pi Ex-Editor,
Subject : Lawmthu sawina
I misual post hi sei hle mahse ngaihnawm tak leh chhiar nuam taka i ziah avangin lawmthu ka rawn sawi e, thu thui tak tak chhiar tur hian hun leh mit etc. te a hah in a hek ve em em a, ngaihnawm tihzawng a lo nihloh phei chuan thinrim lamah te a kal lek lek thin. Chuvangin sei tak ai chuan kekawrte ang deuh a tawi si, fun kim si a ziah thiam hi a tha berin ka hria!! he i thu ziah hi chu Editor i lo nih thin tawh vang emawni, sei thawkhat ve pangngai tak si ah chuan chhiar a nawm mai bak ah Zu ngaihnawm tel tlat a!! Entawn zui tlak a ni.
I la rin ngam chiahloh,
ST
Report this comment
July 27th, 2012 at 4:52 pm
Chhiar a nuam, a ngaihnawm
Report this comment
July 27th, 2012 at 4:55 pm
Hei hi ka theihnghilh a…..
Report this comment
July 27th, 2012 at 4:59 pm
vaiva, in va bawn hlawm bik ve a, kan tluklo che u anih chu keini lam chuan
Ignatia, i ti lawmawm, mahse feminist chu ka inti miah chuanglo
, ka thlirdan hi a zau ve fu ania hehe paragraph khi chu kan admin te lam chan a ni e, hei vaiva hi han zawt mah la, chhiar a nuam zawk an ti miau si alawm le 
Saitawk, ka rintlak ni mai rawh, i comment hian min ti nui vur vur mai
Report this comment
July 27th, 2012 at 5:05 pm
Report this comment
July 27th, 2012 at 5:17 pm
high school cal lay del the hi in her chiang thei sia..kei chu engmah ka her tawh lo!
lo edit teh ..comment hi..default hi a hang a..ka correct vel peih lo e…editor hna!! haha
Report this comment
July 27th, 2012 at 5:22 pm
Magazine Editor ka nih laia ka thawhpui zawng te chu Vety. Doctor vek an ni thung…
Feminist tlemtein hmeichhia tih aia Minu, Pathian aia Nuthian ( fiamthua an sawi mai mai nge ka hre lo, an sawi rik erawh ka hre tlat
) adt., an tivel erawh a tul lem lo ka ti… 
Report this comment
July 27th, 2012 at 5:49 pm
Pi Editor, i ziak thiam e
Report this comment
July 27th, 2012 at 5:53 pm
Pi Editor… keipawh Pu Editor min lo ti ve tawh thin a. Kan hloh hi hlepah kan chhiar tih loh rual a ni lo
Report this comment
July 27th, 2012 at 6:01 pm
Charice_mizo nge nge, a fakawm e.
Thu ziah a thiam bawk si, tawnhriat leh dai-chian ngah bawk si,
Report this comment
July 27th, 2012 at 6:17 pm
Pi Editor, i ziak ngaìhnawm e. Keipawh kum 20 vel liam tawh, ka la tlangvallai khan, Kohhran Thalai pawl chanchinbu Editor ah min ruat ve a, ka phur ve turh turh khawp mai. Joint editor kha keiaia kum 10 vela upa zawk, unit\branch pakhat a President\Leader nilai kha a nia. Bial intlawhtawn program ah anmahni tlawhtu turte khan an thulh zing lutuk a, a lungawiloh thu leh Tang ang maia thawm chauh nei annih thute kha min type tir hmiah hmiah mai si a, ka hnial ngam si lo. A han chhuak chiah mai chu, thawm kan nei laih mai maw le. Min ngaisang der ve tu te(abikin an nula hovin
) annih tehlul thin nen, an hruaitu phanchang deuh ho chu an hmel hmuh anuamlo raas mai maw le.
Report this comment
July 27th, 2012 at 6:23 pm
#19, ka edit thiamlo, nangman lo edit mai teh
Pu Pk, i thil tawn chu ava namai lo ve, luck loh phah rawihna ni tlat…la rawn ziak ve nghe nghe teh
Report this comment
July 27th, 2012 at 7:17 pm
Ngaihnawm lehpek e, a tha bawk si
Report this comment
July 27th, 2012 at 7:26 pm
Report this comment
July 27th, 2012 at 7:45 pm
tunah hian eng eng emaw ah editor leh editorial board-ah ka hming a lang ve sek. ka hriatthiampui khawp mai che. kei pawh a hnu a ngaihtuah leh a nuih vur vur chang leh zah ngawih2 chang ka nei nual. ka pawi tilem lo.
ka siam that theih tawh lohvah ka inchhir ngai lo..eg.. ka TATOO haha.. haha..
ka fak duh ka fak mai thin.. ka sawisel duh ka sawisel mai thin bawk..
a chhan chu kei mah saint sammoo kha ka ni tlats..
Feminist tih chu i pha viau nachungin i thuziak (tlem teah pawh)ah a lang.
Report this comment
July 27th, 2012 at 8:35 pm
Pi Editor.. A ngaihnawm em em e..
Report this comment
July 27th, 2012 at 10:49 pm
A post-tu Editor hlui, comment-tu lah Editor lo ni tawh deuh vek in ni bawk a. Chuvangin he post hi Ediotrial board tih mai chi a ni
Report this comment
July 28th, 2012 at 1:33 am
A ngaihnawm. A thuchah khi
Report this comment
July 28th, 2012 at 2:26 am
#28, a tha, editor chu huaisen tur, kei chu ka nih ve chhung kha a reilo em a ni.
Feminist nih chu ka pha ni lovin ka nih loh vang zawk a ni, engtin nge ka sawi ang, khawtlanga ei leh bar leh property intluktlanna duh zawng zawng socialist an ni kher lova, ram hmangaih zawng zawng rightist an ni vek lo ang deuh hian women empowerment lam sawi mawi zawng zawng feminist an ni vek kher lo tih hriat a tha…mahse anti-feminist erawh ka ni hauh lo thung
Report this comment
July 28th, 2012 at 10:45 am
i naupanna ngaihnep chi a nih loh hi a
Report this comment