The Insider: Tualthahna leh Phuba – I

July 28th, 2012 2:00 am by DEx (Chemtatrawta Nau)

He cell tawp tak ah hian keima duhthu a ka thil tih ni lo ah a bul tumtu ni a rinhlelh ka nih avangin ka awm a ngai a. Joey Jones, ‘Cue Ball’ an tih nen chuan he cell ah hian kan awm dun a, mi zawng zawngin hemi hming a an kohna chhan chu mi pakhat Cue Ball hmang a a thah vang a ni, mahse keichuan a chhan diktak erawh ka hria. Ka hriatna chhan chu amah hi Cue Ball ang mai in a lu a kawlh a, a thinchhe ve hle; chu thil chu keimah tih loh chuan midang tuma’n an hre lo.

A lukhum parh, hlui ve deuh tawh hi a khum deuh reng a, kei hi a lukhum khum lo a a awmlai hmutu awmchhun ka ni. Ka hming ve thung chu, tu pawhin an hria, Frank ‘The Don’ Tulli. Kan pawl a hotu ber ka ni a, ka nau te ho chuan tihbuai en ah min en ngai lo, chu chu a ni ka hming ‘The Don’ ka put tak chhan chu. Tunah chuan helai hmun ah hian kei leh Joey chu kan awm ta chu a ni a; helai sazu bu ang mai, hmun tawp em em ‘Nice Cell’ an tih ah hian. Vantlang hnawmhnawk paihkhawmna hmun, he hmun ai a felfai zawk hi ka hmu tam tawh mai. Ti kha chuan ka awmna hmun tawp zia chu in hrethiam tawh mai ang chu.

Tunah chuan, he hmun a ka awm tak nachhan ka’n hrilh tawh ang che u. Ka naupan lai atangin sawi tan dawn ila. Bronx khua a cheng kan ni a, he khua hi hmun duhawm tak a ni lem lo, ka sawi awmjia chu chemte nen a vak-kual thin ka hmu fo. Kan In hi ropui lutuk lo mahse In pangngai ve tak a ni a, vantlang dawr chung a awm a ni. Ka pa hi a hnathawhna lam ah a tluan loh avangin he In hi kan luah phak ve tawk a ni a, mahse nuam kan ti ve hle. Tukverh a tlabal deuh tawh a, carpet a awm lo, thingphel chhuat a ni ma, kan thenawm neih ve te chu sazu ho an ni mai a.

Ka pa hi a hnathawhna reng reng a mi taima tak mai a ni a, chhungkaw ngaihsak em em leh kan tan a tha ber tur min ngaihtuahsak thintu a ni. Ni khat chu school ah, pawn a ka infiam lai in kan khua a naupang sual a an sawi,Tony Marco chuan ka infiam lai chu mi rawn nem tlu a. Naupang zakzum tak ka ni a, min tihdan ang ang chuan ka lo dawh ve tawp mai a, mahse ka pa’n min rawn lam tur a a rawn kal chuan Tony min tihdan vel chu alo hmu a. Chu naupang bulah chuan va kal in, a tukhum ah a beng a, tlan haw pahin a tap nghal a.

Chumi zan chuan, dinner kan ei lai in, kawngkhar an rawn kik a, ka pa’n a va hawn chuan, ramhuai a hmu emaw tih mai tur hian a che miahlo, kawngkhar lam ka va en chuan Naupang Sual, Tony leh a pa lo ding chu ka va hmu a, thawmhnaw dum vek an ha, lukhum dum, suit dum leh pheikhawk dum nen. Ka pa chuan khur chung chuan “ I fapa a ni tih ka lo hre lova, ka duh vang reng a ti ka ni lo, ka tihpalh tak zet a ni, a thleng leh tawh ngai lo ang” a ti a. Tony pa chuan “A dik, a thleng leh tawh lo ang” tih pah chuan a coat hnuai a a shotgun dah chu phawrh in ka mithmuh ah ngei chuan, ka hma ah ka pa chu a kaphlum ta a, engmah thleng lo ang mai in, ngaihtha takin an haw leh nghal a.

Ka mittui a rawn tla a, tap chung chuan “Ka pa harh teh, harh teh khawngaihin” tiin ka au vak vak a, mahse a che lo, ka lungphu te hi a chawl hian ka hria a, ka ngaihtuahna a bing mup mai, thinrimna in ka khat nghal. Ka nu chuan ka bul ah rawn tlanin nghet takin min kuah a, mahse engmah ka hrelo, ka hriat awm chhun chu ka thinlung a thinurna so bawrh bawrh chauh chu a ni. Tony leh a pa chu thah ve mai ka va duh em. Chu chauh chu a ni ka pa taksa atanga a thisen rawn luang chhuak ka hmuh lai a a ngaihtuah chu, kan chhuat te chu rose par senduk ang mai ka pa thisen chuan a khuh sen ta vek mai.

A tuk ah chuan, a hma zan a thilthleng a hriattur awm te rawn la turin police an rawn kal a, chumi atang chuan Tony pa chu Crime Organisation lian tak mai a an hotupa a ni tih ka hria a, kum 7 mi chauh ka la nih avangin chu’ng thil te chu ka la hrethiam ve lo. Police te’n ka nu an hnem lai te chu ka thlir reng a, a tih ber chu ka pa thihna hmun en leh tah chu a ni ber. Kei erawh chu tah pawh ka tap thei tawh lo, a chhan chu ka thinrim lutuk hi tah dan pawh ka thiam tawh lo hial a ni.

Ka pa ruang kan thlahliam ni chuan a vui tu te chu kei, ka nu leh priest(puithiam) nen, kan 3 chauhin kan ni. Ka pa ruang chu thlankhur thuk tak mai a an dahthlak lai chuan hreawm ti tak in ka en reng a; ka duh ber chu, chu kuang atang chuan lo chhuakin min rawn pawm se, “engkim a tha leh vek ang” tiin min rawn hrilh se ka duh a mahse ka duhthusam chu engtik ah mah a thleng ngai dawn si lo.

Ka pa ruang kan vui ni chu tun thleng pawh a ka thil hriatchian ber a la ni reng, a chhan chu thlanmual atang a kan chhuah chuan, car dum lian tak mai a a hnung a Tony pa nui lai chu ka va hmu a, a tan chuan kan chhungkaw lungngaihna ni chu eng tihna mah a ni lo. Chu mi ni atang chuan ka pa phuba chu la ngei turin thlutlukna ka siam ta a.

Kum engngemaw zat a ral hnu chuan, kum 13 vel ka ni in ka hria; ka pa thlan chu ka va tlawh a. Chu mi ni chuan khua a dur nasa hle, ruah a sur ngei ka ring bawk. Tichuan, ka pangpar ken chu ka pa thlan ah chuan ka dah a, ka sawi tur nei an gang te chu sawi in ka haw ta a. Ruah in min nan loh nan tiin kawngpui sir lam chu ka zawh phei zel a, kan in atang a feet50 vel atang chuan au thawm, kawtthler atanga lo chhuak chu ka hria a, chu mi hnu chuan silai puak ri ka hre bawk. Ka khawng nghal vek a, che lova ka din reng lai chuan ka mitthla ah ka pa thih lai kha a rawn lang nghal a, khami zan a ka thinrim em em ang bawk khan ka awm leh in ka inhria.

Chu kawtthler zim awmna lam ah eng thil nge thleng tih hriat tumin ka tlan thla nghal a, ka zuk thlen chuan khami zan a lukhum dum leh coat dum ngei mai kha ka zuk hmu a, ka lam a rawn hawi loh avangin tunge a nih ka la hre thei si lo. Thawm nei miahlo in ka nghak reng a, chutah ka lam a rawn hawi chuan ka phu chiang kher mai, ka rin loh tak mai in Tony Marco, ka pa thattu fapa, ka naupan lai a min hmusit em emtu kha a lo ni a. Min rawn en a, ka hlau hle mai; min rawn nuih a, car dum ah a tlan lut a, chumi hmun atang chuan an tlanbo nghal a. Chutah chuan eng thil nge ka hmuh pawh hre lo hial khawpin ka rilru a buaiin ka ding reng a; (Tony chu kum18 vel emaw chauh a la ni ang, a pa thiltih thin chu ani paw’n a ti ve der tawh mai).

Chu hnawmhnawk kar a mitthi ruang chu ka en reng a, a hmai ah chuan thisen hlir a khat, mahse chu ruang ka zuk en chuan mak tak maiin chu ruang ah chuan ka thla ka zuk hmu a, ka ding khawng leh reng a, ka taksa thisen in a bual khah vek chu ka zuk hmu a. Chu kawtthler atang chuan ka tlan chhuak nghal vat a, khawi lam ah nge ka kal pawh ka hre lo, ka ngaihsak bawk hek lo; kha kawtthler a ka ruang hmuh a ka thla ka zuk hmu thut kha mak ka ti a,ka hlau em a ni..

Kan in ka thlen chuan, ka room lam ka pan a, ka muhil nghal. Ka harh leh chuan thawm engmah a awmlo, thil diklo a thlengin ka hria, a chhan chu TV ri emaw, ka nu chaw chum ri emaw, a zai ri hi ka hre ziah thin. Ka khum atang chuan ka chhuk a, living room lam ah ka phei a, tumah an lo awmlo; bedroom dang ah ka va lut phei leh a, bathroom chu a lo inkalh a, bathroom kawngkhar chu ka chum vak vak a, mahse tuman min chhan tak loh avangin kawngkhar chu ka tlawh hawng a, bathtub a ka nu a bawkkhup zawng a lo mu, thisen in a bual khah vek chu ka zuk hmu a.

Ka theihtawp a ringin ka au va. Ka khum ah chuan thlan tla bawrh bawrh chung chuan ka harh chhuak hlawl mai a, eng thil nge thleng pawh ka hre lo, ka mumang chu a tak tak a thleng a an em avang chuan ka mumang ni paw’n ka ngai lo hial a ni. Ka nu chuan zanriah tur a lo siam mek a. Ka ngaihtuahna in min tibuai nasa lutuk chu ka mangang hle mai a, ka muhil ngam tawh lo hial a ni. Mahse, meng reng thei pawh ka ni lo, ka chauh em avangin living room a sofa ah chuan TV en in ka mu a.

Ka la hriat reng chu kum 17 ka nih laiin ka nu’n ‘Nopang Sual ho Pawl’ ti a ka nu’n a koh thin ho te nen chuan kan inkawm thin, mahse ka thian kawm tur neihchhun te an ni miau si a; ka thian te hming chu Joey Jones, Dave Tudesci, Johnny Forbes leh Al Goranza te an ni. School khat a kal ho vek kan nih avang a inhmelhriat leh inkawm ho ta kan ni a, kum engnge maw zat chu kan lo inkawm ho tawh, mahse Johnny erawh hi chu kum2 liam ta mai a helai hmun a rawn awm hi a ni a, thian kawm tur a neih loh avangin kan thian zing a tel ve turin kan sawm ta a ni. Chumi hnu atang chuan thian tha tak kan ni ta a ni. Ka thian te hian ’Hotupa’ ti in min ko mai thin, a chang in tun a ka hming put tak ‘The Don’ ti a min koh chang a awm bawk.

Tum khat chu kei leh ka thianpa Joey nen chuan pa hausa tak mai hi kan hmu a. A car atang a rawn chhuak in a thawmhnaw hak te chu en mai pawhin man to tak a ni tih a hriat ngawih ngawih, a rangkachak sona leh a overcoat nen a confi tak mai a kal vah vah ka’n hmuh chuan Joey nen chuan chu mi hausa pa chu rawk tumin thutlukna kan siam ta a. Tichuan, chu mihausapa rawk dawn ta ila eng thil te nge kan hriat ngai- khawnge a kal thin, in ah engtik hunah nge a awm thin, a bik in engtik hunah nge amah chauh a awm thin tih te hriat tumin ni engngemawti chhung chu a ruk in kan thlithlai reng a. Ni 3 vel a rel hnu chuan, kan thian te chu ruahmanna fel tak nen, chu mihausapa chu kawtthler zim lai ber ah chuan vuakhlum ngei tumin min an rawn kal bawk a, kei chuan hnawmhnawk zing ah chuan Al leh Johnny te chu ka lo nghak mek a.

Tichuan, mihausapa chu zawi zawi in a rawn hnai hret hret a, a ding a, cigarette 1 hi a bawm atangin a pawt chhuak a, a zu nghal mai a. Chumi hun ah tak chuan Al leh Johnny te chuan kawngpui chu hmanhmawh takin an rawn kan a, kan mi thah tum-a lam chu an rawm pan nghal chat a, a lo hmuh hman avangin, kawtthler zim lam ah chuan a tlan thla nghal a, kei leh Joey chu a hma ah chuan ani chu dan tumin kan va ding nghal a, chu pa chu a ding nghal chawt a, hnunglam leh hmalam chu a en tawn sek tawh mai, a hmalam ah kei leh Joey kan ding a, a hnunglam ah Al leh Johnny an ding bawk. Chu pa chu ka han en a, eng thil nge thleng ta pawh ka hrethiam lo, thinurna in ka chhungril lam hi a khat nghal pup pup a ni ber; ka hmuh chhun chu Tony pa, chu lai hmun a ding chu a ni a (ka mit a vai), chu pa awm ah chuan ka tham nghal nawk nawk a, a pawisa ka mamawh lo, na tak a sawisak chu ka thlakhlelh ber a ni.

Joey leh Al te’n min rawn man beh hma chuan chu pa chu ka kut dinglam leh vei lam chuan ka hnek nghal char char mai a ni. Ka mi sawisak-a chu ka thinrim chhan ber pawh hre tawh lo chuan ka en reng a; chumi hnu a Joey hmel ka han en chuan tunge ka nih pawh a hre tawh lo emawnile tih mai tur khawp in hamhaih deuh hian min en reng a, chumi lai tak chuan kei ngei pawh chuan tunge ka nih pawh ka inhre lo hial a ni. Chu mi hnu lawk chuan Johnny-a’n ‘thiante u, hepa hi a thaw tawh miahlo a nia’ a rawn ti a.

Kan za chuan rang takin chupa ruang lam ah chuan kan mit a fu nghal thap mai, a hmai chu thisen in a khat vek a, a hmai a thisen luang zawih zawih chu ka en reng a. Ka khawng vek a; ka pa ruang, thisen a bual khah vek, chhuat a inzalh lai chu ka mitthla ah a rawn lang nghal a, kawl phe ang deuh hian a rawn lang zut zut a ni deuh ber. Chutah tak chuan, ka pawisawitu pawh ni lo ka thahna kawtthler ngei chu Tony-a’n pawisawi lo nunna a laksak lai ka hmuhna hmun kha a ni tih ka hrechhuak ta a. Thil rapthlak deuh erawh chu ka mi thah-a kha Tony-a pa ang a ka ngai tlat mai kha a ni. Joey chuan min rawn pan a ‘Lo kal rawh Frank, he hmun hi chhuahsan vat ang u mi in min rawn hmuh hma in, lo kal rawh’ a ti a. A hma ang bawk khan, chu kawtthler atang chuan khawi lam nge kan pan tih pawh ka hrelo, ka ngaihsak lova, kan za chuan theihpatawp a chak in kan tlan ve tawp mai a ni.

Kan in kan thlen dawn hnaih chuan ka thiante chuan haw mai an duh tawh a, mahse keichuan ka thei ve tlat lo; ka nu bul a thu a, engmah hrelo ang mai a awm chu ka thei dawn tlat lo a ni, chuvangin Joey chuan a In lam ah min hruai haw ta a. An In kan thlen chuan a room ah kan lut chho nghal a, ka room nen a khaikhin chuan Lal In a ni ringot mai; khum 2 inzawm a nei a, bedsheet pawl-duk(dark blue) in a khuh. Keichuan, ka neih ve chhun chu mattress bal tawh tak chauh kha a ni. Thian te theuh theuh pawh hi a lo inan loh thei ngei mai. A room ah chuan TV a nei a, a te in black and white ni mah se ka neih phak loh anih miau avangin ka awt ve kher mai, chu room a ka luh chuan Joey nen a han khaikhin chi rual ni hian ka inhre lo, kei aia inches5 a sang erawh thuhran.

Joey-a nu chuan ei tur tui tak tak min siamsak a, Joey-a tan chuan zanriah satliah ve mai mai ni mahse ka chaw ei tawh zawng zawng ah a la tui ber. Ka la hriat reng chu, khami zan khan ka muhil thei reng reng lo a; a chhan chu ka mit ka chhin apiang in ka mi thah kha, kha khawtthler a mu a, a ban rawn phar chhuak in duhtawk tur a min dil lai ka hmuh zel vang a ni.A tuk a rawn thlen chuan tukverh bulah dingin dakpu(postman) in lehkha a sem lai leh dawrnghaktu te’n dawr an hawng lai chu ka en reng a, dar7 a ri tep a, Joey-a a rawn thawh chuan, amah chu en in ka kal dawn tih ka hrilh a, a lu a bu ringot a, ka tho a, ka chhuak ta a. In hnuai lam ah ka chhuk a, pawn ah ka chhuak a, veilam ah kal in haw tum in In lam ka pan a, kan In ngei ah chuan ka haw tawh ngai dawnlo tih pawh ka la hre lo.

Kawngpui a ka kal thlak lai chuan ti hian ka ngaihtuah a, In ka thlen dawn chuan kawtthler kha ka kal tlang a ngai ngei dawn tih ka hre reng a, chu hmun ka thlen chuan kawng ka kan a, chak thei ang ber a tlan tur in ka rilru ka siam fel a. Tichuan, ka tlan tan ta a, mahse thui pawh ka tlan hma chuan tu emaw hian min rawn man bet a, kawng sir lam ah chuan min pawt phei a, ka ke a tlawh pah chuan ka au vak vak a, ka hmai ah min rawn hnek nghal chawrh mai, ka inbeng dai a, ka hma ah chuan putar, lukhum var khum, suit var ha ka hmu a, ka mit a min en chung chuan nui pahin ‘Mama, nimin a I thiltih kha ka hmu vek che asin’ a ti a.

Lungtum ang mai in ka khawng vek a, ka che eih lo. ‘Helai atanga hmun hla lo te ah hian ka awm a, ka tukverh atangin I chetla kha ka lo thlir reng che a, I chet dan kha ka duhzawng tak a ni tih ka sawi tel duh bawk. Kha pa kha I sawisa hneh in I awlsam khawp mai, silai mu 1 emaw 2 chu min save sak ani’ tih pahin a nui vur vur a. ‘Hna awlsam te ka pe ang che, I duh nge duh lo ang tih ah ka buai lo, I duh ngei dawn tih ka hria, a chhan chu I ti ngei dawn chiang a ni. He lehkha hi la la, kawng thlang lam ah khuan chhuk thla la kawngkhar bula duty, hmeichhia I zuk hmu ang a, I zuk pe dawn nia, amah chu I hre thei mai ang, kawrfual sen a ha a, scarf sen a keng a, lukhum parh lian tak mai a khum bawk, I hre mai tiraw? Awle, tun ah chuan he thil hi min tihsak loh emaw, lehkha hi I chhiar anih chuan kha pa I thah dan ang bawk kha I chung ah a thleng ve ang, mahse he thil hi chhuanlam engmah siam lo a min tihsak dawn a nih chuan, ka hnuai ah I thawk ang a hlawk tha tawk tak ka pe bawk ang che, tha em Bawiha, heta tang hian kal bo nghal rawh’.

Lehkha chu min pe a, a thuihhruai te chuan min kaltir ta a, kawngpui a ka tlan thlak lai chuan mangchhia mai ni in ka hria a, mahse a sawi ang ngei in ka chhuk thlak zel chuan kawngkhar bul a hmeichhe hmeltha tak mai, a sawi ang thlap a inchei chu ka zuk hmu a. A awmna lam chu ka pan phei a, min en reng a, nui chungin ‘Hey, Mama engnge I duh?’ tiin min bia a, lehkha chu ka pe a, ka ding reng a, a hawng lai chu ka en a, a chhiar nghal mai a, a chhiar zel chuan hlim hmel a pu reng thei ta lo, a mittui a tla a, a thingthi a, chutah tak chuan ka mi thah-a nupui a ni tih ka hrechhuak ta a.

Chu hmun a awm reng chu a chi dawn in ka hre lova, thli ang mai a chak in In ka thlen hma chuan chak takin ka tlan char char a. Living room ah chuan ka kal phei a, ka nu chuan min rawn pan in ka tukhum ah min rawn beng a, ‘Khawi ah nge I kal bo daih a’ tiin min vin nghal a, amah chu ka en ringawt a, ka room ah ka lut phei nghal a, mahse ka han thut chuan TV ri chuan min tibuai ta tlat mai ‘Tualchhung factory manager chu nimin khan rawng tak a thah a ni a, crime organization 1 nen a an inremsiamna chungchang ah thubuai an neih vang a ni in reporter hnen atangin thu kan dawng…’ Ka ding nghal vat a, TV hmuh phak ngei tumin corridor lam ah chuan ka chhuak phei a.

Mitthi thlalak leh a nupui, nachin lawk a a pasal thih thu inziahna lehkha ka va pek tak kha, a in a tap chung a police te nen an inbe lai te chu an rawn tilang a. Ka nu chu ka bulah rawn kal in, “Thil diklo a awm em ni? Thlahrang hmu ta ni awm ang tak a I awm tak mai a’ a ti a; engtin mah chhang lo chuan ka khum lam chu ka pan leh nghal mai a, lukham hnuai ah ka lu dahin ka muhil nghal a.

Kawngkhar chum ri chuan min tiharh zawk mai; ka khum atang chuan ka chhuk a, kawngkhar ka va hawn chuan vawiin a suit var bawk kha ka hmu leh ta, kawngkhar chu nem khar thuai ka han tum chuan a ke in hnuai lam ah a lo dang tawh si, kawngkhar chu a rawn inhawn chuan vawiin a putar ka hmuh bawk kha a lo ni a. Min en pah chuan “ Mama, vawiin kha I titha takzet a ni, chuan ka sawi tawh angin ka hnuai ah I thawk ang a, ka Thu thawntu/kengtu(messenger) I ni ang, chu mai bak ah hna dang thawh tur ka pe dawn bawk che a ni’ a ti a. Ka nu chu a room atangin a rawn chhuak a, a rawn au vak vak a, chu putar chu a nau te zing a 1 chu a en a, a tlan phei a ka nu ka chu hup bet in a man bet nghal a, ka nu chu a ngawi ta a, chu putar chuan ‘tunah chuan, Bawiha I nu hi buaipui tawh lo la, nang leh I nu hi chu tha takin ka enkawl ang che u, ka tan hna tha tak in I thawk ang a, hlawk tha tak ka pe bawk ang che, I beisei phak ngai loh nun hahdam leh nuam tak I nei thei ang, ka rual in lo kal rawh’ a ti a.

A rual a kal chu duh lo hle mah ila, ama lam a min pawttu nei tlat hian ka inhria. Inhnuai lam a kan chhuk thlak chuan a tawng belh zel a ‘Ka hming chu Lou Riggiazi a ni a, mi zah pawh ka hlawh hle, kan pawl ah chuan the Don ka ni a, nangmah ah hian theihna leh chakna tha tak ka hmu tlat a, chuvang chuan ka tan a thawk turin ka duh che a ni. Tunah chuan, I chak a ni tih nimin a I thiltih atang khan I fiah tawh a, chuan vawiin ah hian I rintlak in titur a ka tih che I tih avangin I fing a ni tih I fiah leh a, ka duhzawng tih hi a finthlak ber a ni’.

Chutah tak chuan eng thil pawh sawi se a thusawi engmah ka ngaithla duh lo a, ka nu chu ka ngaihtuahin, a chung ah eng thil nge thleng ang tih chuan min tibuai ber a ni. Pawn ah chuan kan chhuak a, a limousine(car) dum, sei tak mai ah chuan kan lut a, kan tlan chhuah chuan car hnunglam tukverh atang chuan kan In chu ka thlir zui a, ka nu tukverh bul a a tap lai chu ka han hmu a, a hmel ka hmuh theih chhung zawng chawl lovin ka en zui char char a..

(contd…)