The Insider: Tualthahna leh Phuba – II

July 28th, 2012 4:00 am by DEx (Chemtatrawta Nau)

A tuk a ka han harh leh chuan ka la awm ngai lohna In ah ka lo awm ta mai a, movie ang mai a ni, a nuam kher mai. Bang zawng zawng chu wallpaper in alo inkhuh vek a, chhuat zawng zawng ah chuan carpet an phah chhuak vek a, tukverh zawng zawng pawh darthlalang hlir in a khat.

Choka lam ah ka kal a, chutah chuan dawhkan bul ah silk kawr leh silk kekawr var ha in Lou-a chuan tukthuan a lo ei a, ka lam rawn hawi in ‘lo kal rawh, lo thu phei teh’ ti in min ko a, ka phei a, ka hma ah chuan plate lianpui ah hian scrambled eggs(tomato&artui kan pawlh), vawksa fry, salad, changthawp ro 2 leh beans a awm a. Tui ti tak in ka ei nghal char char a, ka tet te atang a tun thlengin chutiang chaw chu ka la ei ngai miau lo hek, a tui ka ti kher mai. Lou-a chuan ka chaw ei lai min hmuh chuan mak a ti hle a, a nui ve mai.

Kan ei kham chuan, living room lam ah min hruai a, sofa ah chuan thu turin min hrilh a, minute 3 vel chu a chang chunglam a chho a, a chang in a rawn chhuk leh a, ka lam rawn hawiin ‘Mama, I tan hna dang ka nei a ni, chumi I zawh hnu chuan I hlawh hmasa ber I hmu ang, garage ah khuan zuk chhuk la ka duh a ni’ tiin tukverh lam hawiin kawngpui chu a kawk a. ‘he package hi parking lot a car pawl ah khuan zuk lut la, a seat hma zawk ah zuk dah ta che, I room a wardrobe ah khan I thawmhnaw hak tur chu a awm nual ang, inthlak thuai la zuk kal vat ang chu, chuan midang inhmuhtir miah suh ang che’.

Ka tho a, ka room lam ah chuan ka chho ta a, wardrobe lian em em mai chu ka hma ah chuan ka hmu ta a, a kawngkhar lehlam lehlam chu a rual a ka han hawng a, a chhung a thawmhnaw awm zawng zawng ka’n hmu chu mak ka ti kher mai. Kamis var,kekawr dum, mawza leh pheikhawk te chu ka la a, hmanhmawh takin ka inthlak sawk sawk a, ka tawp thut a, package chu ka en a, engnge a nih chu ka hria, mahse han hawn chin ringawt pawh ka ngam lo hrim hrim. Tichuan, choka lamah chuan ka chhuk thla leh a, kawngkapui hnunglam a awm ah chuan ka chhuak tep tihin Lou chuan ’Mama, lo kal the, kha kha min lo pe teh..’ tiin package chu a la a, a hawng a, a chhungah chuan engngemawni hi a a thun tel a, timer a set a ni tih ka hre nghal mai, tichuan a khuhna nen chuan min pe let ve leh mai a, ‘Bawiha, kal tawh rawh le, hun I nei tam tawh lo’ a ti a. Pawn a ka chhuah pah chuan a nui vur vur a.

Pawn boruak chu a vawt a ni tih ka hmai atang chuan ka hre nghal thei mai, ka biang a na vek thei. In chu hel kual a, kawtthler atanga ka han chhuah chhoh chuan, mipui tam tak vak kual vel chu ka hmu a, ka thiltih leh ka tih tum an hria ni awm takin an zavai chuan min en vek niin ka hria. Kawngpui chu ka kan a, garage lam chu ka pan nghal vat a, mi in min hmuh loh nan tiin hnunglam atang chuan ka lut ru a, dim te in Car lam chu ka pan phei hret hret a, a kawngkhar hmalam chu dim te in ka hawng a, package chu seat ah chuan ka dah a, garage hnunglamah chuan dim te in ka phei a, a hnunglam atang chuan ka hel kual a, kawtthler atang chuan zawi muang in kawngpui chu ka chhuak ta a. Mi in min hmu nge hmu lo ka hre lo, ka ngaihtuah bawk hek lo.

Khami hmun a atang a rang thei ang ber a chhuah thuai thuai kha ka duh ber a ni. Kawngpui chu ka kan a, kawngka bulah chuan ka ding a, ka nghak reng a. Mi 1, suit pawl ha, sam buang hi garage atang chuan a lo chhuak a, car ah chuan a lut a, a kawngkhar a khar chiah chuan car chu a puak ta dur mai, car them te chu toys vuak darh ang mai hian helam leh sawlam ah a darh chuai chuai hi a ni ber mai. Khawi hmunah pawh thir,plastic leh glass them hmuh tur a awm, chu mipawisawilo taksa van lam a thlawk chho lai chu ka en reng a, kawngpui lai tak ah chuan rawn tla in a thi nghal. Kawngpui lam ah chuan ka chhuk thla a, kawtthler ah chuan phei zelin kawngkapui hnunglam chu ka pan a, Inchhung a ka luh chuan Lou chu a lo nui vak vak a, mahse engtia awm tur nge pawh ka hriat loh avangin ka ding ngawi reng a, envelope min pe a ka room lam ah ka chho nghal a, khum ah chuan ka mu a.

Envelope chu ka hawng a, pawisa chu ka la chhuak a; chu tah tak chuan chu’ng misualho pawl ah chuan ka tel ve ta tih ka inhre ta a. Ceiling lam chu ka en reng lai chuan ka lo muthlu ta a.Kum engngemaw zat a ral hnu chuan pawl 1, ‘The Riggiazi’ dintu te zing sul su tu 1 ka ni a. A hrangin thuihhruai ka nei a, business lian lem lo hi ka khawih ve thin. Ka thuihhruai te chu ka naupan lai a ka thian te ho Joey ‘Cue Ball’ Jones, Dave ‘Shark’ Tudesci, Johnny ‘Shrimp’ Forbes leh Al ‘Hitman’ Goranza te an ni. Pawl hran ka nei thei dawn tih min hrilh khan ka thian hlui te ka thlan tak nachhan chu ka ring thei dawn tih ka hria a, kan pawl kan inzawmkhawm leh chu tha a ka hriat vang a ni.

Vegas a keima chanpual hna ka tih dawnin anni hi ka ko ta a ni. Lou hnenah chuan min puitu tur ka mamawh thu ka hrilh a, a thuihhruai te zing a mi engngemaw zat min pe a, mahse mi 2 ka la mamawh avangin Joey leh Johnny chu ka call a, ka pawl ah chuan ka telh ve ta a ni. Kan tihtur chu, Casino lian lem lo 2 te a rual a suasam chu a ni a, a chhan chu pawl changtlung deuh nei tur chuan pawisa tlem a zawng tal neih ve a ngaih vang a ni. Tichuan, ‘Circus Circus’ an tih leh tualchhung Casino te nau ‘The Gold Coral’ ti a an sawi chu kan luhchilh ta a.

Kan tualchhung Casino te nau ‘The Gold Coral’ ti a an sawi chu kan luhchilh ta a. Kan plan chu, security te kan tihbuai thei dan ber tur ni a kan hriat avangin casino 2 ah chuan buaina kan siam ang a, pawisa dahna hmun a luh chu kan tum ber a ni. Tichuan kei, Johnny leh Lou a thuihhruai thenkhat te nen Tha Gold Coral lam ah kan kal a, Joey leh midang zawng chu Circus Circus ah an kal thung. Kan inpeih felt a tih ah Lou-a nau te chu Security ho tibuai turin zan dar 8 bawr vel ah Casino 2 ah chuan kan luhtir ta a, Joey leh Lou-a nau dang te chu Circus Circus hnunglam chu helkual in bungrua dahna lam chu an pan phei a, chutiang chiah chuan Johnny leh a nau te pawh chu Gold Coral lam ah chuan an lo che ve mek bawk a. Dar 8 a ri chiah a, hnunglam atangin kan lut ru a, security point awmna lam chu kan pan thla zel a, guard ho in insual thelh tur a an rawn chhoh hma chuan keini chuan guard te chu kan lo nghak reng a. An thawm kan hriat chuan, chet hun a ni tih kan hre nghal mai, kawngkhar chu tlawh hawngin pawisa awmna lam chu kan pan nghal a, guard 15 te’n Safe chu an veng a.

Tichuan, 1 te te in kan kaphlum zel a, Lou-a nau te zing 1 an kahhlum hma chu anni chuan kah poh min kap ve hman eih lo. Mahse, guard zawng zawng kan kapphlum vek a, Vault(pawisa leh thilhlu dah thatna) chu kan hawng a, duffle bag 2 a kei leh Lou-a nau ten pawisa kan dah lai chu Joey chuan min en reng a. Kan theih tawk a tam kan lak hnu chuan intithei takin kan inpuchhuak ta a. Bungraw dahna lam ah chuan kan phei a, kawtthler lam ah chuan hmanhmawh takin kan tlan phei nghal a, darkar 1 dawn lai kan nghah hnu chuan, kan mimawl-a chuan hmun diklo ah min lo nghak tih hria in a bag 2 nen hmanhmawh tak in kan hnen a rawn thleng thei hram a.

Min hrilh dan chuan a nau hruai te ho chu tumah man an ni lo va, tumah hliam tuar leh thi an awm lo bawk. Engpawh ni se, a thil ngaihsak loh luat avangin ‘Thluakthawl-a’ tiin kan koh hlen phah ta hial reng a ni. Kan thlenna hotel lam chu kan pan nghal a, mahse kan room lamah kan kal lo, kan car ah chuan kan lut a, chu khawpui chu chhuahsan in kan khawlam ah kan haw nghal a ni. Tunah chuan, Dave leh Al kan pawl a ka lakluh dan chu thu dang daih a ni, a chhan chu an 2 hian an rawn kal duh lova, kan pawl rawn zawm hi an duh bawk hek lo. Mahse, an nunna kan laksak dawn ti a kan vau tak ah chuan min rawn zawm ve ta nge nge a.

Anni hi ka duh nachhan chu, tun a ka hna thawh leh hmasa ber tur ah hian Lou-a’n a nau te min pek belh phal tawh loh vang a ni. Midang ka mamawh bawk si avangin, an 2 hian ka la lut ta a a ni. Dave chu Cop nih tum a a train lai pawh a silai kah thiam tak a ni tih ka hre tawh a, ‘Hitman’ ti in kan ko thin. Dave hi pa hawihhawm tak a ni a, mahse a thinchhia in ‘shark’ ang maiin dawhtheihna a tlachham ve hle, hei vang hian a hming ‘shark’ hi a pu ta a ni.Awle, tunah chuan ka pawl te ho ka nei leh vek ta bawk a, tun a ka hna tur ah hi chuan ka inpeih at at tawh khawp mai. Ka hna hmasa zawk ai kha chuan a har lo tur ah ka ngai a, mahse hna hautak tak erawh a ni ve tho mai.

Lou chuan kei leh ka nau te ho chu ‘The Vicenzo’s’ factory ah va kal a, va titawp turin min duh a, a chhan chu he factory hi Marco’s ho pawisa hmuhna ber a ni si a, pawisa an neih loh chuan, awlsam tak in an lo tluchhia ang a, chutah chuan kan pawl ‘The Riggiaza’s’ leh kan el ber ‘Marco’s’ ho te chu kan inel theih phah dawn a ni. Thil engkim mai chu a tha thei ang ber in kan plan fel thlip-thlep vek a, tupaw’n kan tihtur ang te tha tak a kan tifel thei anih chuan hliam tuar tumah kan awm lovang. Kan plan hi a ho hle na in a tangkai in a sawt hle dawn tih kan hria a ni. Factory ah chuan kan han chho tlang nghal tawp ang a, kan han titawp mai dawn a ni.

Al chuan kawngpui lehlam a In chung atang chuan kei leh Joey, kawngkapui hmalam a kan lut lai chu min en reng a, hnunglam atang chuan Johnny leh Dave chuan factory atang a chhuah tum te dang turin an lut ve mek bawk.A hun a rawn thlen chuan mahni hmanraw hman tur theuh chu kan la sap sap a, Al chuan rifle leh pistol a la, keichuan ka pistol leh machine gun ka keng a, Joey chuan shotgun a la, Dave chuan pistol leh lead pipe chu a la a, Johny chuan marine emaw a in ti thut a machine gun leh shotgun chu lak a tum a, mahse Dave chuan pistol chauh chu a pe a, ngawi turin a hrilh a. Zan dar 9 vel ah factory chu kan thleng a, chumi hun lai tak chuan factory bul vel a awm tupawh kan ngaihthah mai mai tur a ni lo tih chu ka dan siamthar a ni. Al chuan inchung a, a duhna lai tak a thlen hma chuan kan nghak thap a, Dave leh Johnny chu factory hnunglam a kal tur in kan ti a, an awmna tur ah an awm fel vek hnu chuan kei leh Joey pawh kawngkapui hmalam pan in kan chhuak ve nghal a.

Khawl ri avang chuan tuman kan thawm an hre thei lo. Johnny leh Dave factory chhung an luh chiah chu ka va hmu a, kei leh Joey chu minute 2 dawn lai chumi hmun helkual a kan hnu chuan, office chhohna step chu kan va hmu ta a. Tichuan, kawngkhar lam chu panin dim te in kan chho ta a, Joey chuan tukverh nghen pah chuan mi 2 office chhung ah chuan an awm tiin min rawn signal a, tichuan kawngkhar atang chuan tlem in ka tawlh hnung a, kawngkhar tlawh hawn thuai pah chuan a chhung a mi 2 awm te ka pistol ken lai chuan chu ka kap zui nghal a. Ka kah zawh hnu chuan Joey chuan an 2 chuan a dap kual vel a, security guard leh manager te an nih thu min hrilh a. Joey chu engmah sawi lo chuan ka en reng a, ka pawisa lem lo a ni tih a hre nghal mai.

Chumi hnu lawk ah chuan pistol puak ri kan hria a, mak ti takin kan hawi let a, chutah Johnny chu factory kil lam tin a a lo ding lai kan hmu a, step ah chuan hmanhmawh takin kan tlan thla char char a, Johnny a silai tin-na lam chiah chiah chu ka va tin ve a, zawi muang a ka va kal phei chuan parva thi, chhuat a lo let der chu ka va hmu a, inthlahrung tak a lo ding Johnny chu a hmai ah ka va beng sawk a, kawngkhar hnunglam ah chuan phei leh in a ding reng a, kei leh Joey chuan Dave-a’n factory lai tak a a bomb dah chu kan va la a, kan set zawh hnu chuan, chu hmun a ta chu kan chhuak ta a. Car park-na hmun atang a kan chhuah chiah chuan bomb chu a puak nghal a, kan hnung a building (factory) chu a vawrh darh hneh khawp mai. He thil thlen lai hian Johnny chu lei ah a tlu hnawk a, midang erawh chu kan nui a, a rawn tho leh chhung pawh chuan kan kal zel a.

Chumi zan vek, reilote hnu ah chuan Vitto Vicenzo (‘The Vicenzo’s’ Don) chuan ‘Riggiaza’s’ te nen a Indona chu a order a ta a, thla engngemaw zat a ral hnu chuan, kan pawl chu kan chak ngei dawn ni in a lang tawh a, kei leh ka nau te ho chu Vitto that tur chuan pu ber in min tir a. Zawn hmuh a harsa lo, ama pool hall ah a awm deuh reng a, kei leh ka nau te chuan chu hmun chu kan va luhchilh ta a, silai kan hmet puak nghal char char a, mitthi ruang a let rem rum mai. Ka thuihhruai ten inhnuai lam an ven lai chuan, Vitto-a office lam ah chuan ka chho a, ka rin ang ngeiin a dawhkan bulah hahdam hmel deuh mai hian a lo thu a.

Chutah, ka machine gun ka phawrh chhuak a, hmeichhe naupang ang maiin a rak chiam a, ka thuhnuai ah a awm tawh tih ka hriat chuan ka nui vak vak a, kan hna kan zo felt a. Inhnuai lam ah chuan ka chhukthla a, ka nau te ho nen chuan hmun him lam pan in kan tlan chhuak ta a. Kha Indona a kan chak ta kha ‘The Marco’s’ chhungkua tiam loh in tualthattu chhungkaw lian ber a min siamtu a lo ni ta a ni. Ka thiltih avang chuan ka inhaw hle a, Tony leh a pa thah vat vat ai a chak dang reng ka nei tawh lo.Lou-a hriselna chu a tlahniam zel a, Cancer vangin a thi lek lek tawh, a ai awhtu tur hi tun thlengin a thlang lo, ama’n fapa a nei lova, a lo enkawl tawh te zing ah hian Eddie ‘Madcap’ Jones a awm a, mahse ani pawh mi tlaktlai lo mai a ni. Aiawhtu tur te zing a a lanna chhan chu a tet te atangin Lou-a hnuai ah hian a lo thawk tawh a, a duat em vang a ni.

Tin, Roberto ‘Crazy’ Flamingo a awm bawk a, a hming atang reng pawh hian mi kawlhrawng tak a ni tih a hriat mai, a tih thin ber chu pawisawi lo te nunna laksak a ni, pawi tihna chhe te pawh a nei lova, khawngaihna tlachham ve tak a ni bawk, aiawhtu tur te zing a a lanna chhan chu Roberto hian Lou hi a la that ngei dawn a rin tlat vang a ni. A tawp ber ah chuan keimah, chance nei tha ber ka ni a, a chhan chu mi kawlhrawng ka ni lo,ka laktlak lohna lai ka hrelo, ka dawihzep lo bawk. Chu bakah, Lou hian a fapa ang maiin min zah em em a, ka chungnung bik larh a ni. Tichuan, Lou chuan a thih dawn darkar ah chuan, kan 3 chuan a hma a inlan turin min ko ta a, te te in a office ah chuan kan lut a, a hma ah chuan inchhuang tak maiin ka ding thap a.

Na ti tak in, zawimuang in a tawng ta a, ‘Vawiinah hian helai ah hia engvang awm nge in nih in hria ang a.. kan inhriat sa vek avangin introduction pek ngai kan awm lo bawk. Vawiin ah hian ka aiawhtu tur, ‘The Riggiaza’s’ Don thar tur ka puang dawn a ni. A intipachang a, a dawhkan vawn pah chuan Eddie hma ah chuan a hmai khawih pah chuan a ding a, ‘Eddie, naupang fel tak I ni, a tir atangin ka tan pawh I tha em em.

Keimah ang bawkin Don tha tak I nih theih ka ring tlat bawk a ni. Ka tan I rinawm em em a, min phatsan ngai lo’. Zawimuang in a inher a, na ti tak a pen 6/7 vel kal in Roberto bulah ah chuan a rawn phei a, a hmai te ve tak, bawl leh dang lap mai chuan Roberto chu a mit ah tak a melh a ‘Nang hi chu naupang chimawm tak I ni, mahse chu chu ka ngainatna chhan che a ni thung, mi thah tur ka hrilh che in min hnial ngai lova, mi mawl tak I ni a mahse he chhungkaw tan hian member tangkai tak I ni thin a, I ni reng bawk, nangni ho in kei min zah ang bawk hian keipaw’n ka zah che’.

A inher leh a, min rawn en a, ka lam a rawn phei pah chuan ti hian a sawi a ’Ka la hre reng, naupang te I nih lai a mi I thah avang a I hlauh em em lai a kan chhungkua a ka lak luh lai che kha, I la naupang hle a mahse mi rothap ve tak I ni a, tun thleng paw’n ila ni reng. Nangmahin pawl I nei thei ang ti a ka hrilh lai che khan I thiante I sawm a. A tir kha chuan tha ka ti lo hle a, mahse nangni ho hian hna harsa tak tak ah min pui a, ka chhuang tak zet che u a ni. Tunah chuan, nangmahni zar ah Crime Family lian ber dawttu kan ni ta a, Family lian ber ah min la hlangkai theih hi ka ring tlat a ni. Chuvangin, ka thih hnu a ka aiawh turin ka ruat che a ni’.

Chu’ng thu chu Boss ka atang a chhuah zawh hnu lawk chuan Roberto leh Eddie te chuan mu in a lak tur a en ang mai hian min melh kar a, sawichhuak lo mahse an lungawi lo hle tih ka hre thei mai. Anni 2 hian Don an nih hi an inring ve ve a, chuvang chuan ka dam khaw chhuah theih nan hemi te 2 hi ka dah that ngei an ngai dawn a ni tih ka hria. Lou chu ka en a, a kut chu reilote ka vuan a, a chak loh toh em avangin a khur nasa hle, tichuan room chu ka chhuahsan ta a. Hall a nui vur vur pah a ka chhuk thlak lai chuan Roberto leh Eddie te phun bawrh bawrh ri chu ka hria a.Tunah chuan Don ka nih tak ah chuan, Eddie leh Roberto ka thah theih dan tur chu ka plan tan a ngai ta. Eddie chu thah a awlsam zawk ka ring a, a chhan chu a mawl in a dawihzep a, chuvangin ani that tur hi chuan tha ka mamawh tam lo ang, mahse Roberto hi chu a dang daih thung.

Gang indo ang vel kan ni ang, thuihhruai mi 200 lai a nei a, an boss ber thih chu sawi loh, a ai a thih pawh an huam hial ang. Tichuan, hna awlsam zawk chu zawh fel vat tha in ka hria a, Eddie chu ka bei hmasa ta a. Ruahmanna fel tak siam in Eddie leh a nau te ho chu ka hrilh danin ‘The Marco’s’ ho kudam (a takah chuan kan pawl ‘The Riggiaza’s’ kudam a ni) va suasam turin ka tir a. A naute chu a tam thei ang ber a hruai dawn tih hre reng chung chuan a mamawh tam loh tur thu erawh ka la hrilh zui hram a.

Tichuan, a thlen vel ah hnathawktu zawng zawng a thah vek hnu in kudam chu a bomb darh vek tur a ni tiin ka chah a. Mahse, an va thlen chuan mak a ti hle mai a, a nau te ho chu a hruai lut a, kudam chhung ah chuan tumah an lo awm lo. Pawn a rawn chhuah a tum chuan ka nau te ho chuan kawngkhar zawng zawng chu chain in an phuar bet vek a, kudam atang chuan ka nau te ho chu an kalsawn ta a. Ka car atang a ka chhuah hma chuan kudam 2 chu a tlu tawh, ka remote ken lai chu ka hmet a, kudam zawng zawng chu a puak darh nghal vek, awlsam angreng hle mai. Chu chu Eddie leh a nau te ho tawpna ni chu a ni.

Tunah chuan Roberto dahthat hun a ni ve ta. He thil hi a awlai dawn lo tih ka hre reng mai. Kar2/3 dawn teh meuh he thil hi ka ruahman a, hlawhtling tur chuan ka tum dan ang thlap in thil engkim a thlen vek a ngai dawn a ni. Roberto chu eng hun ah pawh khawilam panin nge a kal a, khawi ah nge a awm tih te kan hriat theih nan ka nau te ho chuan an zui reng a. A routine kimchang tak kan hriat hma chuan hetiang hian kar 3 vel kan ti char char a.

Hriattur pawimawh te kan hre kim thei ta. Amah chauh a awm lai nghakin, kan that nghal mai tur ah ilo ngai maithei, mahse chutiang a awlsam a ni miahlo, a chhan chu hepa hi a mi rin ber 5 te’n engtik lai pawh in an veng reng, a ai a thih huam thah an la ni zui bawk. Tichuan, hriattur pawimawh te kan hre kim ta bawk a, amah ber kan dahthat theih dan tur chu kan ngaihtuah leh nghal char char a.Roberto leh a nau te ho tan ‘Top Secret’ hna ka ruahman sak a. ‘The Marco’ ho ram chhung a kal turin ka tir a.

Rei lo ah chuan Tony-a nau te ho in Roberto leh a nau te an hmuh chuan an kap nghal a, Roberto nau te ho chu engngemaw zat an kah hlum thu ka hre ta a, mahse Roberto chuan chu hmun chu hliam tuar miahlo in a chhuahsan tlat mai, mak ka tih em avangin ka va kal chilh a, chung thil thleng atang a ka hriat chu Roberto leh a nau te 5 chu an duh chuan an kapphlum thei mahse an chungah eng thil mah a thleng lo. Tichuan, kan pawl a tang reng chung si in ‘The Marco’ ho nen inthlunzawmna an nei tih ka hre ta a, ka thah chakna a tizual sawt mai.