mi(sual).com

By- Laldinthara
Thingsulthliah

Mizte tâna innghahna lungphum pawimawh ber mai thûk leh ril, khawvêlah pawh kan chhuan leh kan uanpui ngam ‘Zo Nun Mawi’ hi i han sawi dawn teh ang. A thuleh a ri a hriat si, a tak hmuh tur awm si lo hi, he hun tawi teah hian chuan kan sawi chhuakin kan sawi fiah thiam dawn lo hle mai.

Amaherawhchu a hming mawina leh a thûkna hian min hneh si a, ka han sawi ve hram teh ang.

‘Zo Nun Mawi’ tih han sawifiah hmasa dawn teh ang. Khawi Dictionary-ah mah hmuh tur awmsi lo, chetzia leh nih phung ‘nun’ hmanga lang chhuak a ni si a. ‘Zo,’ tih awmzia chu Zofa hnahthlak zawng zawngte tihnaah lo dah ta ila, chu Zo hnahthlakte nunphung leh zia chu ‘ Zo nun’ kan ti thei ang a, chu nun ze duhawm, îtawm, ngaihawm, mite dawmkânnâ’na hmantlak a nih bawk a vangin ‘mawi’ a lo ni ta bawk a. Chu Zo nun chu ze dik, ze tha, a lo ni a, khawvela nun tha, nun dik chu Mizote nun mawi ber chu, ‘Zo nun mawi,’ kan tih chu a ni ta a ni.

Tichuan Mizo nun ‘Zo-nun mawi,’ kan sawi dawn avangin Zofate chanchin leh an ziarâng te, an khawsakphung te atanga ze mawi leh tha chu kn sawi dawn ani. A hmasain chu Mizo, ‘Zo’ kan tihte chu tute nge an nih tih te chu i lo sawi dawn teh ang. Amaherawhchu, Mizo pipute khan ziaka thu dag an neih ngai loh avangin tuna kan sawite pawh hi a dik ber leh pawm tlak ber hriat a har hle a, mi thil chhût mite, Historian-te leh lehkhabu thenkhat râwnte atanga lak chhuahte a ni hlawm a, pawmtlakleh rintlak ngei tura ngaih theih ani awm e.

Zofate hi Mongol hnam lian pui(race) zinga a zung zâm peng pakhat Mongoloid kan ni a, tawng lamah chuan Tibeto-Burman tawng hlawm zinga mi kan ni. Tunah hian a hlawm ang cgu hmun hrang hrang heng- Manipur, Tripura, Chittagong, ChinHills leh a chheh vel, China ram chhim chhak leh Thailand ram hmar lamah te, Myanmar ramah te leh tuna Mizoramah te kan cheng a. Tichuan, China ram hmarlamah te, Myanmar bial hmar lamah te khawsain, Chindwin phaizawlah te, Kabaw Valley-ah te, Khampat-ah te an chen hnuin, an aia chak leh thil tithei zawk Shan ho an lo lut a, chuta tanga rawn chhuk thlain kum 1700AD vel atang khan tuna Mizoram leh a chhehvelah hian an rawn khawsa ta a ni.

Kan Mizo pi leh pute chuan an ram leh hnam chhan avangin lu chhum bân chhum pawh huaminan tha leh zung an lo seng ral a, chûng an thiltih avang chuan Mizo hnamin Identity a lo neih phah a, Mizote, chu ‘Zo’ hnamin a lo pâr chhuah phah thin a. Chûng an thiltihte chu vân atanga an dawn a ni mai lo a, fimkhur tak leh taima taka kum zabi engemawzat chhunga an din, an siam, an hmuhchhuah a ni. Tuna kan ram hi Zikpuii Pa ziah danah phei chuan ‘Thân tlang atang khan ram chhengchhia, khâm bak berek leh luipui inkar tlakna ram a ni a. Chutia ang karah chuan tampui mitthi leh hripuite a lo lêng a, râl leh sahuai an thâwm chamchi a, chuvang chuan nun kha thil theih loh tluk a ni a, an khawsak leh nun kalhmang khan ti hian thu a lo zawt a ni, ‘ Inhmangaih a, inphung bawmtawna, dam khawchhuag nge in duh, mahni hmasial a, awm hrana boral?’ an lo ti a. Khati ang harsatna karah an ni tin nunte chu hnam boral hlau a, hnam din khawchhuah duh zawkte an lo boral hlau a, hnam dinkhawchhuah duh zawkte an lo ni a, an biak Khuanu’n an hna tur a pek an hlenna kawngah khan thil chi hrang hrang a practical-in an lo zir chhuak a, Vai pachal leh Sap pachalin an finna thawh khawmadân an siam ngawt ang a ni ve lo a, an nun ngeiin a taka an tawnteleh chuta tanga a chhe lam bânsana, a tha lam an lo zawh zelnaah hnam ziarâng a lo lang chhuak thin a ni.

Tunlai angin zirna sikul te a awm ve lo a, mahse Zawlbûk a awm thung a, chu chu an nunchan zirna hmun a ni a, inbuan te, inchai te an zir a, khata tang khanthu leh hlate leh themthiamna lam te thlengin an zir thin a ni. Tlangval leh mipa naupang zawng zawng te chu thununna hnuaiah an lo sei liana, a fel fal te,a huaisen fal te leh a remhre fal tean nih ngawt loh chuan an kai sâng ngai lo a, upate zah an ngai hle thin a, chuvangin upate zah an zir a, aia upate zah thiam hnam an loh nih phah ta a ni.

Tin, mahni thawhchhuahsa ringa ei an ni tih an inhrechiang a, an thwh chhuah loh chuan eitur an nei lo a ni nghal bawk a. Chuvangchuan thatchhiat avanga retheite an ngainêpin, an hmusit em em a,an sakhaw kawngkala thil pawimawh ber pakhat Thangchhuah pawh mi taima tan lo chuan a theih loh a, Thangchhuah lo tan chuan an thih hnuah pialrâl a kai theih loh a, chuvangin pialrâl an kalna tur kawngah taimak an lo seng lut a. Hnam taima tiin kan lo hre ta a nih chu. Tampui mitthi pawh lo tawk se, ‘Sem sem dam dam, ei bil thi thi,’ tih changthlanin, ‘Dam leng tlâng khatah thih leh ruam khatah,’ tiin tumah ei bik duh lo a, tlemtê pawh insem zel thin, eng ang harsatna pawh lo thleng mahse, mimal maiin an tuar lo a; an vaiin harsatna chu an intawm a, an tuar tlang thin a ni. Mirethei leh chanhai te an hmusit ngai lo a, an endawng ngai lo a, an dawm kâng thin zawk a; an nun mite tan an hlan a phût lêt an nei ngai hek lo.

Similar Posts:

• Zo Hnam Puanchhuahna Hla
• Tunge Mizo ni ber ang?
• Zo Nun Mawi Hlutna- III
• Hun a la herchhuak ang
• Zofate kan nihna

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, July 29th, 2012 at 7:08 pm and is filed under Mizo Society & Culture, Mizoram, Religion. You can follow any responses to this entry through the RSS 2.0 feed. You can leave a response, or trackback from your own site.