Hnathawh peihloh manah hmanni a ka purse tihbo chungchang hi thairang mai mai teh ang.
Hmeichhe tamtak ang a bawkin bag-a thil tinreng ak mi hi ka ni ve a. Niminpiah Inrinni, July 28 2012 pawh khan ka ak tlem lo leh khawp mai a. Purse, nihliap, rawmawl, pen, note bu te, tui bottle, purse dang chahbi leh pendrive vel ka dahna, heti zawng hi ka hriatchhuah theih chin chu a ni.
Tichuan Big Bazar ah ka kal ta a, scarf hi ka lei a ni. A man kha pek nghal a ngaih avang khan ka purse chu ka phawrh a, a man chu ka pe a. A man dawngtunu kha a rilru a buai nge ka hre lo min kir dik lo a, receipt nen kan han entawn leh he haw a, kan inkir dik leh ta. Ka purse chu ka la keng ngei tih ka hria chutih lai chuan. Mahse ka bag ah khan ka thun leh em, ka bag kha ka zip em tih kha ka hre chiang tawh hauhlo.
Bag zip lova teihawi hrat tak mai hi ka ni a, ka vanneih a siamin engmah hi ka la tibo tak tak lo va. Ka phone leh wallet tihbo tawh te chu ka kalsan an ni chawk a. Hemi ni pawh hian ka bag inhawng chu engvakah mah ka ngai lo.
Chuan, Big Bazar hi lian ve tak mai a nia, floor 4 (?) lai an luah a. Ka tei ka tei a, eng engemaw ka en kual a, lei tur te chu ka hmu zel a. Ka inkhai bawr ta fe tihah chuan a man pek tumin cash counter lam ka pan a, ka thlen hmain ka bag chhung ka zuk dap chu ka purse reng a awm lo. Thil dangin an hliah aniang, ka tia, ka han hai chiam, ka phawrh ruak vek, a awm chuang lo. Ehe, a bo ngei a nih hi, ka ti a. Ka rilru a rawn awm hmasa ber chu hah taka ka lo vahna kha a thlawn mai a ni tih hi.
A thawkte kha ka hrilh nghal a, Customer Service ah zuk report rawh an tia. Report hmain ka kal tawhna hmun ah te khan ka va vei leh fua fua phawt a, hmuh inring lem lo deuh khan. A thawk pakhat chuan Customer Service ah chuan min hruai ta a.
An lo buai khawp mai, mahse min lo ngaihsak nghal vat a. Eng rawng nge, enge awm tih te kha ka han sawi thuak thuak a, a bo na lai tak ka hre mai si lo. An boss deuh pakhat chuan “Lungngai suh, a awm alawm” a ti a, min hnem mai mai a nih hi ka ti rilru a. Ka han in report zo chu mi kha an ngaihsak vaklo khan ka hria a, ka va sawi sek a, Ka purse chuuuu… tih hi a teuh ber awm e. Rilru ah thil a lo lang nghal zut zut a. Ka bank card te kha a awm sia, ka account number ho kha ka hre der mai si lova. Miin lo ru ta se an hman hmain block tir vat a ngai anga, mahse ka account number/card number ka hre chiang bawk si lova, inah haw ila computer ah ka save nge save lo check phawt ila, chuan card thar order ta ila a la duh rei awm sia, tih thlengin ka ngaihtuah hman a.
An boss dang pakhat hi a lo kal a, min han describe tir tak tak mai a le. Pawisa awmzat te kha ka sawi diklo nuaih a, mahse ka card ho kha ka hriatchian em avang khan min ring ta aniang chu, min hmuhtir ta a. An lo chhar daih tawh hi a lo nia, fimkhur tur sermon kha ka han ngaithla leh phawt a, Big Bazar chu ni lo se i hmukir kher lo ang, an tia “Ni e in fel ngawt mai” te kha ka han ti luam a.
Hming te ka han sign leh vel te te a, ka pawisa te chu an lo rem tha thlap mai a, ka cheng nga note zawr chhe deuh ka dahthat te kha an lo rem khawng at mai a, ka nuih a za letling. Hming ka sign lai chuan a chhartupa hi a lo kal a, Nepali ka nih loh zia leh Mizoram mi ka nih zia ka han sawi hnu khan “E kan ram lam mi i nih chu, keipawh Assam atangin alawm ka lo kal” a ti a. Lawmthu ka sawi hmain a kal bo daih leh nghal.
Vannei ka inti khawp mai. Mihring fel tak tak hi an lo la awm teuh a ni tih ka hriatchhuahphah bawk.
July 30th, 2012 at 8:37 pm
vannei khawp mai.
Report this comment
July 30th, 2012 at 8:48 pm
Haha hmanni keipawh big bazaar ah ka va bazar a, tum loh deuh deuhte ka lei nuaih kha….i vannei hle tak mai a, a chhartupa hi Mizo ami hriat ava chakawm ve…U Aduh
Report this comment
July 30th, 2012 at 8:57 pm
ka va lawmpui che em.
Hetiang deuh hi 2007 kum khan ka lo tawng ve tawh a, ka rilru a khawih khawp mai.
Report this comment
July 30th, 2012 at 9:09 pm
I la hmu let leh a i vannei hle mai. Hmu let tawh lo te an awm chawk a nia
Report this comment
July 30th, 2012 at 9:09 pm
a chhartu chu hman sakhua nih ngei dawn chu..
hmanlai mizote chaUH kha emaw tha leh fel an ti tlat sia..lol..
Report this comment
July 30th, 2012 at 9:24 pm
A va lawmawm duh dawn ve. Hmun tinah mi fel tak2 an awm ve zel.
Report this comment
July 30th, 2012 at 9:36 pm
#5
Report this comment
July 30th, 2012 at 9:55 pm
Big Bazaar ah hi chuan an bo ve fo asin, a hrechiang keini angte min lo kalpui duhlo a nih kha le hehe…….
Report this comment
July 30th, 2012 at 9:55 pm
Big Bazaar ah hi chuan wallet an tibo ve fo asin, a hrechiang keini angte min lo kalpui duhlo a nih kha le hehe…….
Report this comment
July 30th, 2012 at 10:01 pm
Mifel hi kan hriat loh tam tak an awm a ni tih hriatchhuahna tha tak a nih hi a
Report this comment
July 30th, 2012 at 10:32 pm
i hmu leh chu a lawmawm e.
i lo fimkhur tawh dawn nia…a bo hnu chuan a beidawnthlak duh em mai.
Report this comment
July 30th, 2012 at 10:36 pm
Nia, zonunmawi kan tih (ang) hi hnamdang pawh hian an nei chawk asin!
Mifel tak tak i tawng a, ka lawmpui a che.
Kum 2009-a cunningham road mall pakhata manipuri nula, ama card hmanga discount min offer-tu te kha min tihrechhuak..
Report this comment
July 30th, 2012 at 11:12 pm
bar ah wallet tih bo hi lom hmuh leh huphurh awm thin chu……
Report this comment
July 30th, 2012 at 11:32 pm
Big Bazar han sawi takah chuan Darjeeling boruak nawmzia mawlh mai hi ka theihnghilh thei lo
Darjeeling-ah i awm tihna em ni?
Mifel takin a chhar a i vannei hle mai.
Report this comment
July 31st, 2012 at 12:01 am
@14 Big Bazaar tih hian Hyderabad a nih hmel e. Hyderabad ah hian Big Bazaar pathum chu a awm ve in ka hria. Heta zingah hian Abids ( kan veng) ami chu lian ber niin a zau khawp mai.
Report this comment
July 31st, 2012 at 12:28 am
A chhar tupa chu ava fel ve.
I passport size photo pakhat kha han kim lo zeuh se tha tur. 
Report this comment
July 31st, 2012 at 12:28 am
big bazaar tih vanga hyderabad emaw darjeeling emaw tura ngaih te chu a dik dawn em ni? khaw dangah pawh a awm tho a..
(inla hre vel)
mahse Aduh-i chu Hyderabad
Report this comment
July 31st, 2012 at 12:56 am
#16
thahnem i ngaihpui hle mai hahaha
Ziak ngaihnawm e.
Report this comment
July 31st, 2012 at 12:56 am
Haha! 100fa, Ka sawi ngam loh. I shual latuk.
Report this comment
July 31st, 2012 at 1:02 am
bb, kan pi hi a tanghma kan ngaihpui alawm. Duhsakna tih lan ve zel loh chuan.
Report this comment
July 31st, 2012 at 1:15 am
Ngaihnawm ti taka ka’n chhiar chu a. I hmu let tawh dawn lo aniang chu ka lo tia, i vannei kher mai.
Report this comment
July 31st, 2012 at 2:05 am
#19 Lamjish, Aduhi’n ka comment a delete em hleinem, pawi ka sawi lo ni’ang
Report this comment
July 31st, 2012 at 3:31 am
I vannei hle mai, kur hliam hluam awm tak pawh i ni e. Ka lawmpui em em che tih ka puang e hairehai
Report this comment
July 31st, 2012 at 4:00 am
Amah pawh hi a la inti bo thei mai ang!
Report this comment
July 31st, 2012 at 7:16 am
A tibo tihthria a, ahan zawng tak tak chu a chhartu tan pawh pek let leh loh ngam chi rual ani lo ang.
Report this comment
July 31st, 2012 at 7:28 am
Tukchhuah nuam vek u le
Kum an tam deuh hi chuan kan haihawt tulh tulh mai a nia
Report this comment
July 31st, 2012 at 7:33 am
tarmit tla phhung khawp in a zawng ang mawle…
Report this comment
July 31st, 2012 at 7:49 am
Tar lamah hi chuan haihawt hi a awl bawk a ni!!
Report this comment
July 31st, 2012 at 7:53 am
Purse chhungah hian pawisa bak dahloh hi a tha. Tunlai ah chuan ATM Card/Credit Card/Pan Card adt kan nei thluah vek tawh a, kan bag chhung tepeng ah hian heng lehkha pawimawh hi chu dah vek a tha. Purse a dah chuan a bo awlsam. Bag chawp chawp a tihbo chu a harsa deuh ang.
Report this comment
July 31st, 2012 at 9:27 am
ka lawmpui hle mai che… mahse big bazaar te chu cctv in an cover reng tho ani lawm ni?
Report this comment
July 31st, 2012 at 9:28 am
Abikin hmeichhia hi fimkhur a ngai khawp mai. K’u aduhi ang hian, in bag-ah thil hlu tak tak in ak nasa thei si. Misual nu leh nula zawng zawng khan lo hre vek teh u…
Zawhna pakhat ka nei: Purse tibotu hi, engtikah nge a bo ve ang?
Report this comment
July 31st, 2012 at 9:57 am
Ru botu, a hmuh hunah, a bove maiang. Ar leh vawkte ai’in, hmeichhia (hmeitha) ruk techu a awlzawka, an bengchheng ve ngailo an tihthin kha. Chutianga titu chu, a tawng e maiang.
Report this comment
July 31st, 2012 at 11:22 am
I Purse bo i hmu leh ta chu ka Lawmpui hle mai che
Report this comment
July 31st, 2012 at 11:39 am
Mi tha leh michhia,misual leh mifel hi chu khawiah pawh an awm, eng hnamah pawh an awm…ka lawmpui che (Y)…
Report this comment
July 31st, 2012 at 2:55 pm
aduhi, i hmu let leh chu a va lawmawm em! I pawisa ah zat chiah i hre lo hi a natural. Hriat dik thlap a har khawp mai.
Hmanah Delhi-ah, DTC bus ngei maiah, ka chhuk tur chiah hi ka wallet min phawisak zauh tawh. Ka feel theih avangin ka han hawi let nghal a, a phawitu khan a lo la thukru hman lo a, a lo la lek va mai a. Ka pawhthlaksak leh a, ka chhuksan daih. Den rem rem tak a ni…ka fee pek tur ka pawisa kawl ve chhun chhun ka ah chhuah ni tak a ni lehnghal.
sheldon@29, i advice hi hmeichhe tan chauh a apply theih ang. Mipa tan chuan…bag hran ah hnu hnu zel a ngai dawn asin!
Report this comment
July 31st, 2012 at 3:22 pm
Kan Admin te pawh thawh fuh loh tuk chu in nei ve thin tho maw…..lol
Thil pakhat mai mai chu tunlai khawvelah chuan (ti ve khanglang teh ang) kan documents pawimawh leh id cards, driving license, Voter’s id, adt. te hi scan a, email emaw a dahthat hi a tha ang reng. Scanner kan nei lo anih paw’n
Report this comment
July 31st, 2012 at 3:24 pm
Kan Admin te pawh thawh fuh loh tuk chu in nei ve thin tho maw…..lol
Thil pakhat mai mai chu tunlai khawvelah chuan (ti ve khanglang teh ang) kan documents pawimawh leh id cards, driving license, Voter’s id, adt. te hi scan a, email emawa dahthat hi a tha ang reng. Scanner kan nei lo anih paw’n mobile phone a camera te hi a tha tawk viau a ni.
Report this comment
July 31st, 2012 at 7:18 pm
Nizan chu kan office bang hi ka thianpa (Mizo) nen “share-auto” ah kan chuang dun a. Kan bulah hian vainu a thu bawk a, mahse rei vak lovah min chhuk san a.
A chhuk hnu rei vak lovah chuan ka thianpa thutna bulah chuan phone hi a rawn ri ret ret a. Kan han en chian chuan kan bula vainu khan a phone a lo theihnghilh chu niin. Phone chu ka chhang a, “a neitunu i hriat chuan lo hrilh rawh, a phone a theihnghilh ania” tih ka tum lai takin amah lek kha a lo ni a. Kan chhukna tur kan thlen tep tawh avangin chutah chuan lo phei mai rawh, kan inpe dawn nia ka ti a.
Mahse, mak tak maiin keini ai khan auto driver kha a ring zawk aniang chu, auto driver nen khan an inbe ta a. Tamil tawng thiam hek lo, an thil sawi chu hriatthiam a har khawp mai. Kan chhukna hmun tur kan thlen chuan driver chu engtin nge ni dawn tia kan han zawh chuan “keiman ka lo pe mai ang” a ti a. Mahse, ngaihtuah let leh hian khatia kan chhuk lai pawh khan phone kha a ri reng a. A pick up duh miah lo. Kan chhuk hnu chuan vainu pawh chu nghak lem lo chuan a tlan ta daih a.
Heti hian ka ngaihtuah ta mai mai a. Kan hmel a danglam vangin vainu khan min ring lo chu a ni phawt maiah. Mahse, keini aia auto driver a rin avangin a Nokia touchscreen phone, man tlawm lem lo tak chu a chan ta chu a ni awm sia. Ka ngaihtuah let leh hian ka khawngaih ru khawp mai. Tihtheih lah kan nei der si lova…
Report this comment