mi(sual).com

A thupui ka ti-Lalchhungkaw-ṭawngkam mai mai a, ka sawi tum chu a dang daih. Sakhuana leh rinna nen inlaichinna leh inkungkaihna a nei lo — mi dukdak lo, mi kheuhbeuh leh mi thu lâk-kawikawhnawk chíngte tán lo chuan. Thutak leh thudak sawi lovin ka mimal thiltawn ho leh naràn ve mai mai, phùr leh fàn thühläah ka chhâkchhuak dawn a ni.

• Pakhatna: Facebook hi kum hnih vêl zet ka lo hmang ve tawh a, hun paihna leh holam mai mai nia hriat cháng ka ngah vè hlë. Mahsé bànsan tawp chu ṭül ka ti fahran si lo. Mite anga mi lär leh ngainat hlawh mihring hi ka ni fahran lo va, ka misualpuite’n in hriat ṭheuh angin. Fiamthu-titaka Ignatia’n a sawi ang deuh khan a tam apiang do em maw tih mai tùr hi ka ni a. Hei hi mite ngaihdan tam zâwk ṭhat loh vangah ka ngai ve (khanglang; ka ngaihdàn tam zâwk hi a ṭha ka tih vanga pawm leh puangchhuak ka ni, mi dangte ang bawkin).Tichuan facebook chu han sawi chhunzawm ta ila… Mite hriat hlawh êm êm lo, ngainat hlawh lo tak, mi inthlunghrang tak, Rotekawla sepa ang mai ni lo, Rotekawla sepa tak tak ka ni a. Tu tu te emaw anga, “ka facebook ṭhian zariat (800) chuang zet te hi ka sawm ni lovin anmahni min sawm deuh vek an ni” tia ùanpui tùr nei ve lo riangvai ka ni a. Ṭhian sangkhat chuang ka neih zínga sawmparuk (16) vêl chauh hian min rawn sawmin ka hria.  

  Amaherawhchu ka ṭhian sawm tam zâwk hian ka sàwmna an hnar ngäi lo va. Kei pawhin miin ṭhian der mai mai pawha min duh chuan tiin hnar pakhat mah ka la nei lo. Facebook ṭhiante hi ṭhiante zawng zawnga ṭangkai lo ber mah ni sé, mí sàwmna lo hnar tùr chuan mi chapo tàwpkhäwk, màwl leh chènbeh kawp mihring nih a ngaiin ka ring ve a ni.Mahsé chutiang mai chu a ni bîk lo; mihringte hi kan inang lova, inhriatthiam tawn bâk chu inlaichinna ṭha neih tak tak hi a har a ni. Kei mi maksak dangdai maktara hi facebook ṭhianah tu teh ualin nge min duh ve ang? Mi dang zawng zawng pawm mah sé, kei min hnar chu a mawi lo hran lo ve, tih rilru hi ka pu thiam ta. Isua zirtirnaa tlàwmna nun pawimawhzia hi ka hre thar vè ṭhin.
  
  Mak tak maiin ka ṭhian sawmna hnarho hi chu min hrechiang deuh deuhtu, nitin deuhthaw min hmu ṭhintute zuk nia! Ha ha ha! Mi pangngai tan chuan inbihchian féna tham chu a ni. Mahsé mak angreng tak maiin min hnartu pahnih-khat lekte hi Lunglei leh a chhehvêla chëngte (chhim lam mi) zuk ni vek pek a!  Intihlungawilohna ka neihpui lëm loh, inhre ringawta inbe ngäi lëm lo kan ni thung.
  Kei hian an pawi ka lo sawi chu a ni êm lo vang chu maw? te ka ti vêl nuah nuah a.

• Pahnihna: Mizorama hlawhtling taka mîte ngaihsan hlawha khawsa tùr chuan Kristian nih hi a ngai tih theih a la ni a. Zirna leh thiamna lamah hma kan sâwn chho zël ang a, ngaihdàn neih hi a thiang tih kan hre chho zël ang a, a la zia ve mai chuan ka beisei. Tünah chuan mosolman ramte nèn kan dang lo. Kan sakhaw sawisëlte thahna thupêk kan pe ve lo hi kan danglamna awm chhun a la ni. Kan rilru erawhin a hlat lo tláng.
  Mi hrang hrangin ngaihdan hrang hrang, rin dàn hrang hrang kan nei thei tih hi kan la vàrpawh lo.
  Mîte ngaihsanna leh lawmna lam aia thudik ṭan tán chuan buaina tham a awm lo. Chaw eia min sáwmtu tùr zawn ai chuan thudik ṭana thih ka thlang zâwk kei chuan. Ka dam ang a, mîte chaw ei ngái lova ka thawhchhuah vè theih zël ka beisei.
• Pathumna:  Facebook-ah bawk lût leh ila, ka mi ngaihsànte hi an lo va indiami (=vái) tawh tak êm! Kei zawng, Vairam laka zalen hi ka châk báng thei lo. Eirûk aia mahni thawhchhuah hmanga nun ka ngaihsan zâwk vàng a ni.
  Ka mi ngaihsan ziakmi tam takte chuan vaiho hnuaia awm a thlamauanthlâkzia an sawi chàmchí a, an rilru a lo hlemhle vè hlë ni ngei tùr a ni. Vaiho sum lo hlèprûk vêl hi nuam an ti ve viau a nih hmel. Ka rilru thlâk a ngai tih ka hre ta, ka mi ngaihsan chungchangah.
  Vaiho lakah hi chuan zalèn ila, mahni thawhchhuah bâk nunpui tùr kan nei lo vang a, Afrika midumho (chawmhlawm ngaiho) ang mai nih ai chuan tiin hna kan han thawk leh suau suau mai tur hi a ni a!
• Palina:  Adama pian hma kum tam takah khán Chainaramah khian lei an lo let tawh a, Afrika ramah (Madagascar-ah) pawh balhlä an lo chíng tawh.
• Pangana: Ka la boral vek ang a, heta la chiang loho pawh chian loh tùr awm lo lékin kan la khawsa vek ang. Inlâk-sakhawmî hi thatchhiate inhnangfâkna mai mai a ni tih hriata ṭhanharh hman erawh a va pawimawh tak êm…! A hnam puma kan han mäwl êm êm bîk vek mai hi chu lungàwi a va har tak êm!

  Pawimawh ber chu, Isua zirtirna anga mîte hmangaih hi a ni. Isua zirtirna la kàwitu Zoram kristiante duhthusäm vànram ringawt beisei erawh chu khawvêla âtna maksak ber a ni. Eng hnam mahin hetianga maksak hi an duh ve lo.

  Ka lawm e

This entry was posted on Wednesday, August 8th, 2012 at 3:21 am and is filed under Luangliam, More than words. Both comments and pings are currently closed.