July 2012, Mizo(ram) Diary

August 13th, 2012 11:00 pm by chhana

1st. Sunday: Upper Republic-a Pu Lalduhawma leh Pi Thazuali te fanu Lalduhzuali thla 11 mi chu an bathroom panna corridor sirah vak liamin an kawmthlang motor kawngpui cement slap-ah a tlathla a, a bek natakin a sawha thawm chhuah miah lovin a chatthla. Lalduhzuali hi Lalduhawma leh Thazuali te fa hmasa ber a ni a, nausen than tha leh chak tha tak a ni a, kal te pawh a zir ve tan tawh a ni.

An kawmthlang hi vantlang kawngpui, motor te tlan theihna a ni a, an inzawn hi cement slab-a siam a ni. Naute hi a vah liam hlauhthawn thilthuah an bathroom panna kawngkharpui chu an kharin an kalh deuh reng thin. Tun ṭum hian a nu nen inah an awm dun a, a nu hian choka lamah engemaw a tih san zawk hlanin kawngkhar hi beng hawngin a lo vak liam niin a lang.

2nd. Monday: Sangneihkimi (13), d/o Kaithanga, Kolasib Hebron Veng chu LPK truck-in Kolasib Electric Veng leh Tuitha Veng inkar kawngah a chíl hlum. Sangneihkimi hi pawl 4 zirlai a ni.

3rd. Tuesday: MHIP Gen. Hqrs chuan I&PR Auditorium-ah Mizo Customary Law chungchang zirhona an buatsaih a, Sr. Govt. Advocate-cum Public Prosecutor, RC Thanga leh Addl. District & Sessions Judge, KL Liana ten thu an sawi. Seminar-ah hian kohhran pawl hrang hranga hmeichhe pawl te, hmeithai association leh Hmeichhe Tangrual Pawl aiawhte an tel a ni.

4th. Wednesday: MNF party thalaite chuan Mizoramah eirawngbawlna gas a harsat avangin Aizawl khawpuiah meihawl an sem a, an meihawl sem chu ‘Hawla gas’ tiin a hming an vuah. MNYF-in meihawl an semna hi Millennium Centre tualah an tan a, Millennium Centre atangin a huhoa kawngzawh pahin kawngpui dunga meihawl an sem a, thu chi hrang hrang hmangin an aurual nghal. Kawng an zawh zawhah Supply Directorate-a gas emergency guota diltute hnenah meihawl an sem leh bawk.

5th. Thursday: C Chhuanvawra lehkhabu ziah, ‘Hlaraw hrilhfiahna leh a hman dan’ tih leh ‘Sangsarih khawpui’ tihte chu I&PR Auditorium-ah Assembly Speaker, R Romawia’n a tlangzarh.

6th. Friday: Mizo hmeichhe zinga MLA atana thlan tlin hmasak ber, Pi L.Thanmawii chu natna bik sawi tur awm lovin Venghluia an chenna inah a thi. Kum 92 mi, Pi L Thanmawii hian fapa 6 bakah tu leh tuchhuan 46 a kalsan a ni. Rev. Thianga fanu, Pi L Thanmawii hi kum 1921, March ni 30 khan Haflong-ah a lo piang a, pasal atan Dr. Rosiama a nei a, Dr. Rosiama hi Mizo District Council-a Chairman hmasa ber a ni. Pi Thanmawii hian nu a nih hnu, a fapa Wing Commander, Lalzawma nupui neih hnuah IA atanga tanin lehkha a zir tha leh a, Silchar-a Cachar College atangin BA English honours tha takin a pass a ni.

Rambuai laia Peoples Conference Party a lo pian khan Brig. Thenphunga Sailo hnung zuiin mipui rawngbawlna a thawk tan a, kum 1978-a Mizoram UT Assembly inthlannaah khan Serchhip bial atangin PC ticket-in thlan tlin a ni a, kha inthlanna atanga PC Ministry, Brig. T Sailova kaihhruai kha member thenkhatin an bansan avangin a kum leh, kum 1979-ah inthlan that leh a ni a, khatah khan Pi L Thanmawii chu Aizawl East bial atangin PC ticket bawkin thlan tlin a ni leh a, hetah hian a term pumpui a hmang a ni. Amah hi Mizo hmeichhia te zinga Politics lama in hmang hmasa, thahnemngai taka mipui rawngbawltu, hmasawnna ngai pawimawh leh Mizo hmeichhiate changkanna ngai pawimawhtu a ni.

7th. Saturday: Mizo hnampa, Chief Minister hlui leh MNF Founder President ni bawk Pu Laldenga thih champhaphak vawi 22-na a ni a; urhsun takin a Thlan Treasury Square-ah hman a ni. He hun hi Pu Vanlalzawma Treasurer, MNF in a kaihhruai a, Pu Rualchhina MNF PAC Member-in hunserh hmangin, Pu Zoramthanga President leh Pi Lalbiakdiki, Pu Laldenga nupui ten thu an sawi. Pu Laldenga zahna leh hriatrengna hun Programme tawi te neihah hian party hruaitu leh mi pawimawh an kal kim hle a, amah zahna pangpar an hlan hlawm.

8th. Sunday: Kolasib Venglai a Taitesena Hall bulah Maruti van MZ 05 3051 chuan auto rickshaw MZ 05 5552 a su a; auto rickshaw a chuang Lalengliani [18]Rengtekawn chu damdawi ina kalpui a nih hnuin a thi. Van hi a neitu Lalrintluanga s/o Lalbiaktluanga, Kolasib Diakkawn khalh a nia; police-in an la nghal.

9th.Monday: Chief Minister Lal Thanhawla leh Cabinet Minister thenkhatten Prime Minister Dr. Mammohan Singh chu a chenna inah an kawm a; Chief Minister Lal Thanhawla chuan Mizoram atanga Lok Sabha MP kan neih CL Ruala chu Union Minister a telh ve nise a duh thu Prime Minister chu a hrilh.

10th.Tuesday: UPSC chuan Indian Economic Service [IES] examination result a ti chhuaka; mi 29 tling zingah Mizo nula, Lalramdinpuii Renthlei d/o R.Laltlanthanga, Bazar Veng Lunglei chu a tel.

11th.Wednesday : Central Anti Drug Squad chuan Lalparliani d/o Kapsavunga, Armed Veng inti leh Rorelsaka s/o Tlangtinthanga, College Veng Aizawl inti hnen atangin parvon spas mum 998, Rs 24,950/- hu an man.

12th.Thursday: H.Lalfakzuala buatsaih ‘Thu ngaihnawm huang’ tih chu Parliament Secretary Lal Thanzara chuan Chanmari YMA Hall-ah a tlangzarh. He lehkhabu hi tunlai Mizo thalaiten facebook kaltlanga inkawm hona an neih thina group pakhat hming a ni a; he group hi naupang, puitling leh thalaite tan pawha thu rotling, thu bengvarthlak tak tak leh khawvel thilmak lawrkhawm mai bakah thih hnu piah lam ram thlenga hawl pha ngaihnawm bawk site a chuang a ni.

13th.Friday: Mizoram Gorkha Youth Association [Central] chuan Vanapa Hall-ah Gorkha hnam zinga thu leh hla thiam, Adikavi Bhanu Bhakta Acharya pian champha vawi 198-na an lawm. He hunah hian Gorkha hnam lam chi hrang hrang an entir bakah zirlai tithate chawimawi annia; sikul naupangte tan essay leh lemziaka inelna buatsaih a ni bawk.

14th.Saturday: Central Anti Drug Squad (CADS) chuan Lalchhuanmawia s/o Lalhlimpuia Ngopa hnen atangin parvon spas mum 107 an man a; Exise & Narcotic kutah an pe.

15th.Sunday: Synod Music Committee ruahmanna angina Presbyterian Kohhrana tualchhung kohhran hrang hrangte chuan a ni hnihna leh a tawp nan hla kutpui an nei leh a; he hunah hian solfa hmangin Kristian Hlabu (KHB) no 10 na ‘Engkim tithei Lalpa leh kan Pathian chu, no 470 na ‘Hmangaih in nuam kan tan a buatsaih’ tih leh no 555 nga ‘Hringmi hun hi tui luang angin’ tihte leh lengkhawm thlukin no 44 na ‘ Aw Lalpa min lawmin, ka lamah lo eng la’, no 462 ‘Isua hnenah puan var sinin’ tih leh no 566 na ‘Aw kan Lalpa, khawvel entu’ tih hlate chu zirin inelnate buatsaih a ni. He hun hi kum 19 hnua hla kutpui an hman lehna hmasa ber a ni.

16th.Monday: Serchhip Darnam Branch YMA-te chuan an venga damlohna avanga thlawhhma enkawl tha theilo Hmunlianate chhungkua chu an lova buh hmun leh sawhthing hmunte chu hnatlang kovin an thlawhzawh pui. He hunah hian member 72 zet an thawk chhuak a ni.

17th.Tuesday: Zirtiri Residential Science Collage chuan Vanapa Hall-ah zirlai tharte lawman ‘Freshers Social’ leh zirlai chhuakte thlahna hun an hmanga; an Principal JH Zoremthanga’n zirlaite fuihna thu a sawi.

18th.Wednesday: Champhai MNF thalaite chuan Champhai Awmpui phei kawng chhe lutuk an vei zia tihlanna helai hmuna tui tlingah hian buh an phun. Champhai MNYF chuan kawngpui hi siamthat a nih loh chuan sangha chhuah leh an tum thu thuchhuah siamin an tarlang bawk. Hetih lai hian Congress lam hruaitute chuan buh phunna hmunah hian tui leh chirhdiakte hi hmun dang atanga an lak thu an sawi ve thung.

19th Thursday: Central Anti Drug Squad (CADS) chuan Bawngkawna Greenwood Hospital bulah Laltlanmawia [20] s/o Biaksanga, Vairengte inti hnen atangin parvon spas mum 190 an man a; Exise & Narcotic kutah an hlan nghal.

20th Friday: Aizawl Civil Hospital-a Eye Department leh Kolkata-a Susrut Eye Foundation tangkawp chuan Aizawl Civil Hospital-ah a thlawna mit entirna hun an buatsaih a; mi 310 in mit an entir a; heng zinga mi 15 te chu a thlawnin an mit zaisak nghal anni.

21st Saturday: Zokhawthar atanga Aizawl pantu night bus (ZK Travels) Lalnunsangi w/o Lalrozama Bawnkawn South ami ta chu Keifang daia quarry chimin a hnawl a; kawng thlangah meter 250 vela thui a lum a; a hmunah mi 18 thiin midang 19 in hliam an tuar. Bus hi a chhe hneh hle.

22nd Sunday: Alto Car DL7CD 3303 neitu leh khalhtu ni bawk Zonunsanga [29] s/o Lalhmingthanga Venghlui chuan Sikulpuikawnah mi a su a; tlanchhiat a tumna lamah chesualin kawng thlangah a let a; car khalhtu hi police-in an man nghal. He chetsual dan a hmuna awmte sawi dan chuan Sikulpuikawnah hian Alto car-a chuangte leh midang an inti buai a; midangin an thelh hnuah car chu Upper Republic lam kawngah a tlan a; chu chu Sikulpuikawn lamah let lehin chak takin a tlan a; Sikulpuikawna lo awm mi pahnihte chu a su ta chiam mai a ni.

He thil thleng hi tihluih ngei nia sawi a ni nghe nghe. Car hi tlanchhiat nghal a tum a; MG Road/Upper Khatla lama tlanchhiat a tum chu amah tawk zawnga truck a tlan si avangin Tuikhuahtlang lamah tlan chhoh tumin a inher a; a chesual ta a ni. Car-ah hian a khalhtu bakah midang pahnih an chuang ani. Car-in a sutte zinga pakhat Lalsanglura s/o Lalrinliana Tuikhhuahtlang chu damdawi inah hruai nghal a ni.

23rd Monday: Model Veng Branch YMA leh KTP-te chuan an veng Presbyterian Kohhran Hall-ah YMA kumpuan ‘Ram leh hnam humhalh’ tih thupui an zirhova; Central Executive Committee member Lalrinmawia Sohnel in thupui a sawi. Hetianga YMA leh kohhran lamin a huhova thil an tih ho hi a khat hle.

24th Tuesday: Hortoki bula Tlawng luiah Zonuntluanga [28] s/o C.Hruaizela, Govt. Complex Aizawl ami ruang chu chhar a ni. Amah hi 20th. Friday atanga bo tawh niin an sawi. A ruang hi a chhe hneh tawh hle a; a wallet ah atangin amah hi an hrechhuak thei chauh nghe nghe a ni.

25th.Wednesday: Truck hmun hniha chetsualna avanga chhiatna thlengah mi pahnih heng; Driver Biju Moni Laskar [20] s/o Moni Laskar, Silchar leh Mechanic Lalsawmliana [36] College Veng Aizawlte hian nunna an chan.

26th.Thursday: Silchar lam atanga Aizawl pana rawn chho Assam Riffle kel tur phurtu truck MZ 05-4589 chu Rengte tlangsang laiah kawngthlangah thui tak a lum a; driver hnamdang chu a hmunah hian a boral nghal.

27th.Friday: Mizo Zirlai Pawlte chuan University Grants Commission-in Mizorama college-te tana collage tih changtlunna tur sum a pek thahnem tak chu tih chingpen nia an hriat avangin Hrangbana College Principal lakah Anti-Corruption Bareau (ACB) ah FIR an thehlut. FIR hi MZP President James Thanghmingmawia hminga thehluh a ni.

28th.Saturday: World Hepatitis Day a ni a; he ni pual hian Aizawl Civil Hospital-a medicine department chuan hepatitis vei nia inringhlelte tan a thlawnin thisen an endik a; counceilling duhte tan a thlawnin counceilling an pe nghal bawk. Thisen endik naah hian mi 50 vel thisen endik a ni a; doctor-te chuan chawhrualin khawvel mihring 12 zinga pakhat zelin hepatitis an vei theih thu leh Mizorama a thlawna petute zinga 75% chu hepatic vei annih thu an sawi.

29th.Sunday: Darthanseii [86] Keiliantawna {L} Sihphir chu Asthma natna a vei avangin Greenwood Hospital-ah a boral. Amah hi Minister hlui Dr. Lalzama pizawn a ni.

30th.Monday: MPC Vice President leh MLA hlui Pu Sailothanga Sailo chuan MNF party a zawm a; President Zoramthanga’n Mizo hnam runah a lawmlut, lawmluhna inkhawmah hian thusawiin Pu Zorama chuan, “Tunlaiin Congress party zawm an ching tawh vak lova; MNF sorkar na chang leh tura an rin hi zawm an ching tawh zawk,” a ti. Pu Sailothanga chuan MNF a zawm chhan sawiin ‘Pathian leh kan ram tan’ tih hi mawi a tih vangte; MNF President leh a hote a ring tawk a; an sorkar leh ngei a rin vangte; Mizoramah party pahnih regional party leh national party pakhat ve ve chauh awm thei se a duh vang a nih thute a sawi.

31st.Tuesday: Lallianpuii [45] w/o Vanlalruata, Chungtlang khua chu a pasal nen hna an thawh lain thingin a delh a; ka chhawn lohin a boral. A pasal pawh hian hliam a tuar bawk.