mi(sual).com

Mizo ṭawng hi hmasáng aṭanga zîaka dahṭhat a awm vè lëm loh avàngin a ziah dàn chungchangah pawh harsatna tam tak a awm a. Hemi sukiang tùr hian Mizo Language Committee din a ni a, an lehkhabu siam Mizo ṭawng ziah dân    tih a chhuah meuh chuan buaina tam zâwk a kiang duak niin a ngaih theih: Mi tam tak inhnialna a tireh a, a dik zâwk leh dik lo zâwka inhnial buai ngai lovin dàn siam a ni tawh miau va. Mahsé he lehkhabu nei lo leh chhiar lo tán chuan a reh ve ngawt lo.

Tuna ka thuziak hi chu a lehkhabu pumpui thlir thuak thuakna a ni phawt ang a, a ziah dàn tak tak chu hman remchan ang zëlin, chhiartute’n in chhiar peih dawn bawk chuan, kan la rawn zîak ang.

1. Pakhatna:  TuaiSialA thuziak awm sa pathumte: 1-na, 2-na, 3-na — hi chhiar phawt la, hei hian sawi nawn ngai lovin thil tam tak a tifel.

   Heta a lehkhabu hman hi dàn hlui zulzuia ziah a nih hmèl a, tihdanglam pahnih khat a awm a, chu chu ka’n sawi ang e. A pawimawh berah chuan záwng  tih zawng zawng hi thuhnungbet a nih pawhin, ziah zawm tawh loh tùr (Heta TuaiSiala thuziah bi 15-na nèn hian khaikhin ta la). Hë dàn  an rawn siam hi mak kan ti mai thei a,  mahsé kan thuziak leh tùrah a mak lohna kan la rawn sawi dawn nia. Hei hi tihdanglam lian ber pakhat a ni. Tihdanglam dang chu, hrilhfiah chhawnna sei lutukho, entir nan: engpawhnise tih te, chawplehchilhin tih leh a dang tam tak te hi, zawm tawh lovin eng pawh ni se, chawp leh chilhin ti tea ziah tawh tùr a ni.

   Hemi ṭhatna êm êm (ni-a an sawi) chu, thumal tam thei ang ber hi lam khat lek leka ziah hran vek ni se la, chhinchhiah a awlsam zâwk dáwn (ni-a a lan!) vàng a ni. Amaherawhchu (amah erawh chu? kan la sawi ang!) thumal pakhat ni chiang bàngho, entir nan: sazu, tlanchhia tih angte chu lam khat lek leka ṭhen hran chi rual a ni lo tih kan hrethiam ṭheuh awm e (mahsé ziah zawm vek tùr tih emaw, lam khat lek leka ṭhen hran vek tùr tih emaw dàn awm ta se, ṭhen hran rual loh leh ziah zawm rual loh a  awm thei hauh lo thung a ng le! Chhiar erawh a har nak ang.). (Tihdanglam dang chu kan la sawi ang, hun dangah)

2.  Pahnihna: An dàn siam hi ṭha famkim chu tuman kan ti vek kher lo mai thei a, mahsé dàn changtlung angreng tak a awm vè ta hrim hrim hi chu làwmawm kan ti ve ṭheuh awm e.
3. Pathumna:  A bu hi Aizawla awmte chuan lei ngei u la, google chhuah theih turin in blog ilovah te tar chuai chuai ula, a ṭha ngawt ang. Lakchhawn phalna dàn in bawhchhia tia khing tùr che u an awmin ka ring lo.  Mitin kan lawm êm êm zâwk ang. Chéng za man pawh tling lo a ni.
4. Palina: Mizo ṭawng hi enkawl hautak tak a ni te pawh a tih theih a, thufiahbu changtlung tak lah kan la nei meuh si lo va. MAL hian buatsaih thuai thuai se tih hi ka nghâkhlel ru vawng vawng ṭhin. An tih tùrah an ngai lo em maw ni? Hnam dangho chuan an ṭawng thufiahbu hi an ulukin neih pawh an nei changtlung khawp ṭhin asin. Sâp ṭawngah, in hriat ṭheuh angin, Oxford English Dictionary (anmahni leh Guinness World Records sawi dan takah: The largest dictionary in any language) tih te, Zerman ṭawngah Deutsches Wörterbuch tih te, Ferên ṭawngah Dictionnaire de l’académie française tih te, sipein ṭawngah Diccionario de la lengua española tih te, an ṭawnga chhiar theih zawng zawng dah kim an tumna, thumal thar apiang an khawn khâwm zëlna beihpui a ni hlawm a. (Database changtlung tak nèna inthlun zawm a ni hlawm). Anniho (leh hnam dang tam tak) ang êmin tamin la changkang ve rih lo mah ila, bul ṭan a, ho te tal neih chu a hun vè tawh khawp mai. Mimal siam, an hrilhfiahna pawh hnial theih tak tak hlïr kan la nei tih theih a ni a (keiin ka hnial thei tihna ni lovin, Rev. Chuauṭhuama leh Lalzuia Colney te Vanglaini-a an inhnialna tluang kha lo zawh vè ta mai mai ula), a changtlung lo hlawm viau mai bawk a. Mimal siam a nih hlawm vàng te pawh a ni thei e. Sawrkar emaw pawl lian tham deuh (MAL ang chite) buaipui chhuah thufiahbu hi kan la nei miah lo va ni (ka hriat theih chinah).
5. Pangana: Sawi tur tam viau mah sé,  bi ngaah hian duh tâwk dáwn ta mai ila. Ka sawi duh chu: An dàn siam hi a ṭhat êm êm rúalin, hei aia tawifel hian dàn a siam theih niin ka ring ve tlat a ni, hriat reng awlsam bawk sï tùrin. Hman dàn hlui erawh hnualsuat nual a ngai thei a. Entir nan: hë dàn te hi lo vaw thla ṭhuai ta chhin ila: thil hming (rannung hming, thing hming adt. ) leh thuhmabet leh thuhnungbet te tih loh chu ziah zawm loh vek tawp tùr, lam khat të tëa ziah hran thliah tùr! te han ti chhin ta sela, chhinchhiah na na na chu a awlsam phian ta ve ang. Ṭhat erawh a ṭha lo mai thei. Sawi hmaih erawh a awm thei hauh lo vang (vek tih thumal avàng ringawt hian!)  Hei aia sei deuh hlek mitin pawm theih deuhthaw tùr ni si, bi sawmli-nga leka an duan thiam ka ring tlat a ni, a duangtute hian. (Bi khat ringawta huamtír vek tum chu hriatthiam a har bâkah, a ṭha lo hrim hrim bawk. Eng chin hi nge hming tih hian kan huamtír dawn? tih zawhna leh a kaihhnawih tam tak a la chhuak thei cheu.).

   Awle, dàn awm sa chu a tawifel thei ang bera rawn ziah chhuah kan la tum dawn nia, a rang thei ang berin.

   Ka lawm e

Similar Posts:

• Mizo Dictionary Software?
• Kristian nge Khristian?
• Kan zain i bei ang u
• Mizo ṭawng.. (kan hnam ṭawng!)
• Ka thupui ngai bawk

Recent Posts:

• NGAIHNAWM KAWLEKSAWN – 2 :
• Pathian Kut Dinglam {Sunday Pual}
• ZO NUNMAWI HLUTNA
• NGAIHNAWM KAWLEKSAWN – 1 :
• Kawnpui dai sex video a leakout!

This entry was posted on Tuesday, August 21st, 2012 at 6:00 am and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.