mi(sual).com

“U Elli” chu hming chu kan veng mai nilo, a chhehvelah chuan hrelo an awmlo ,kan awmna bawr velah chuan hming lar pawl tak ani ti ila kan sawi sual awm love. Hrelo an awmlo ti ila,ka sawi tak bak leh a hmingpum erawh hria an tam lo. A hming pum Elizabeth Lalchhuansangi kum zat hi tleirawl ho inhnialna pawh ani fo thinin, a vin zia, a thinchiatzia te, mi a hauh dan te hi a hriatlohah fiamthu thawhnan an hman fo niin huat enah pawh tuman an en lova, an nuihpui bawk bawk thin.

Chhiatni thatni ah te, khawtlang thiltihna engpawh nise a uaptu ber kumtam niin, kan veng library ah phei chuan a neitunu emaw tih tur khawpa pawimawh leh kumtam a venghimtu ber ah tangin lehkhabu sang chuang awmte chu chhiar zawhloh anei heklo, a bik takin M n B ngat phei chu vawi 2 tal a hawh vek tawh ti ila kan sawi sual hauh lovang.

Kan veng library hi 1986 atanga din niin uluk taka enkawl ani a, lehkhabu batch hmasa ber te pawh kha kim taka la vawn that vek niin register hmasa ber pawh kha han keu let mah la Elli Chhuani tih hming sign i hmu ngei ang le.

A tu ate mahin a kum zat tak hrechiang kan awmlo, kan hriat chhun chu nula senior tak ani tih mai chauh lo chu. A kum hi kan inrinsiak fo thin , hrechiang lo mah ila hmanni a kan veng indoor stadium 1991 a sak tawh kan siam that tum a, a stage hnung lama an sak laia YMA OB hoin fiamthu nipahfawm a chhuata an kephah thla an nemkaia, kehniak dang te aia te deuh bik nula kehniak tih hriat tak hnuaia Elli Chuani kehniak tih a inziah dan atang chuan kan veng YMA ah pawh hall an sak hlim chuan a phusa hle tawh tih a hriat a, chuta tang chuan a kum zat a chhut theih ngei ang le. Ngaihzawng a neih thu hi sawi tur hria an tam lova mahse ka Pa ina a sawi dan chuan kan kohhran Upa Hrangvela nen khian an inngaizawng thin ani awm e.

Ka han sawi ta chiam nang a, U Elli hi nula khirhkhan nelawm lo ka tihna erawh ani chuang lo. Krismass a hman tam ve deuh tawh avang hian tlemin thangthar zawkte hian an kawm thiam chiah thin lo tih ani mai , a mah hrim hrim hi chu nula kawm nuam leh fiamthu duh tak, a bula awm nuam tak ani. A hmel pawh thlek vang vang chuan chuti em em a chhia a ni hran lo tih leh a vun mar that lai chuan hmel vantlang tak niin, Mizo mipa te duh leh it zawng taka vun ngo lam, ria chum bat , tunlai tawng taka khal tha tak niin kei tak phei hi chuan a ngo avang leh a hnute bu a that avang ngawt pawh chuan kan lenlai rual se zawng ka iai hauh bik lovang, bakah a mizia hi ka duhchi ani hrim hrim, mahse han chhai tha leh ila Lalhmangaih i zaklo lutuk tiin min hau hrep ngei ang le.

Tunah zawng ka sawi tak te khan zamual an liamsan ta, a vun ngo tak ah a lansarh em avangin a hmai thuanvuak te leh a hmai duk te chu chiang takin a hmuh theih a. Thau chhia ten anlo bawm ta bawk nen a hlai thla hluaiin a hnute, hmana pawng tha tak ni ngei tur pawh chu a hnuai chiaha a dul lo pawng nen a level ain an tawh avangin itawmna reng a awm tawh lo.

Chuti nimahse a incheina te erawh a in hmeh phian zel thinin tunkum tak phei hi chu tunlai tawng takin ain la young nge mawni, a incheina te hi a tunlai thei ta phian a, en reng reng pawhin a man a to tih a hriatin, a hmai lah nise a chei mawi thawkhat thin viauin kan veng chhunga Avon, Mary kay leh Oriflame zuarte pawhin an in chu an luhhmaih ngailo reng ani. Mahse, a hriat leh tawh suh ah, a kumin a phu ve ta nen beauty product tha tha te hi hmang thin mahse kutdawh lalkawr haktir an sawi ang maiin a inhmeh loin a mawi phah hauh thin chuang silo.

Tu emaw ina mawi taka an hak theihtur te hi a thawmhnaw siamtu company te tizak rawih theitur khawp te hian zu han inhmehoh pui theia mawle. Hmanni a tunlai jeans lar “Levis curve” antih emawni a rawn ha phei kha chu a en ringawt pawh ka inthlahrung. A kekawr hming kha chu a hakchhuahpui zo khawp mai, a mar tha bawk nen a curve zawng zawng alang ti ila kan sawi sual lovang.

A mal lianpui te chu mar peng pawng hian anihna ang anga langin a engemawlai inrina lang phak khawpin chu Levis Curve chuan a taksa a pholang a, nunna nei chu nise thawchhamin a thi thei ang tih tur khawpin a taksa chuan zu tawnmar theia mawle. Kum 4,5 kalta vel atanga nula nelawmlo leh thinchhia, kawmnuamlo tak ni tura a mizia a rawn thlak te kha tunah zawng hmuh tur a awm tawh lova, tunlai tawng takin a inla young tak tak ve ta aniange.

A inchei duhdan a thlak a, a fate rual lek lek tur te kawmin a nui uar uar a, an ina YMA commitee a awm pawha ti deka kal thin nula tlangval la naupang deuh te pawh kha tunah chuan tlangnel takin an lut chhuak a, enge maw hlekah “U Elli” an tita sekin a tello in thil tih reng an thei talo. Hlimtakin an kawma, chhiatni thatni eng ilo leh hunpui ah pawh U Elli tello chuan a bik takin kan vengchhung nula leh tlangval te chuan nuam anti thin lo.

Facebok te an han zirtir a, a hma a internet khawih peih ngailo kha facebook hman an zirtir thiam hnu leh account a siam hnu phei chuan hrat tak ani , hrat tak. A nau fate pawhin computer an chang thei tawh lo, naupang mah nise an inkhing fo a, an inhauh phah foin a Nu mangang chuan kar hmasa khan U Elli facebook na atan liau liau computer a han lei nghe nghe kha.

Nitin, A!! nitin tih chuan a khat hmel lutuk e, engtik lai deuh thoin a online a, a phone leh computer ah nen a lutkawp thul. Status te hi a update peihin,ho deuh2 la a dah peih ,
“E dawn chiah“ tihte update in a hnu lawkah “E kham chiah” a ti leh a, a chang leh
“Tuaisiala ka hmu, sexy topz” tih mai mai te a update thul. A friend list a awm te chuan a nitin nun hman dan hi amah vawi khat pawh la hmulo mahse a status update atang ringawt pawh chuan an hre thei ngei ang.

Mahse, kan ti teh ang, U Elli hi tamtakin fiamthu thawh nan hmang mahse a haw ngai lova, a nui liam mai mai a, kan Mizo society anga Nula senior ten fiam an hlawhna angah phei chuan khawtlangah alo inhmang nen sawisak a hlawh em em a, a vui ngailo. Thenkhat chuan ,
“A hmel enin a nulat tirh phei chuan a hmelchhe dawnlo tih a hriat si a, a uihawm e” anti thin,
A then lahin, “A duh uluk lutuk aniang, tunlai nula te hi chu mi ina va mo ai chuan an nawmsak loh hlau hian pasal an nei peihlo a, an tenawm taktak ani” tiin U Elli pawh chu an dem fo a. Mahse amah hrechiang tute, a bikin kan venga awmhlun leh hman atanga amah hretu te chuan han fiam bawrh bawrh thin mahse a ruk tak chuan an ngaisang a, an zah a, nula tamtak ten an tluklo zia an sawi bang theilo.

Ani lah taka, hetianga rei han leng tur bik hi ani lo, ama tawkah a phuloh tak tak te pawh rimtu a hmu ve fo. Mahse, khatia a pa a boral hnu khan a U phaia lehkha a zir laklawh lai aniin, a nu a hriselloh bakah a naute anla te nen an eizawnna bazara an dawr te takte chu aman lohtheihlohin a enkawl a ngai a, BA zirlai nimahse college bansanin chhungkaw tana eiawngtu ber hna chu a chhunzawm ta a.

Zingah hma takin a chhuak a, tlai takah haw in nitin kawla nichhuak chhiarin a U leh naute tan a thawk a, zirna ngaina mi anih avangin amah ngei pawhin a IGNOU ah BA chhunzawmin a zo a, chumi hnuah hunawl nei tlem mahse zingkarah hindi class a kal hram hram thin. Engtih dawn pawh hian thiamna hi chu alo pawimawh ani e, khang BA a zir hram hram leh hindi a zir te khan a sumdawnna ah a pui nasain a hlawkpui em em a, phai dawr nikhua ah te buaina a nei ngailo.

Tin, sumdawnna avanga bungraw la a an zin pawhin Mizo sumdawng tamtak te angin a nun a ho lova, ain vawng a, zu leh mipat hmeichhiat na lakah te ain thiarfihlim thin. Hah taka a thawh na chuan rah tha a chhuah a , a U leh a naute 2 in an zirlai zoin hna tha tak an thawk a, an dawr pawh a lian tawhin 1 dang hawn belhin , an in leh lo pawh kan vengah chuan a tha pawl tak ani bawk.

Hetih vang aniange, tun thlenga pasal ala neihloh. Amah hrin hrim hi ngaihzawng ngaihsak lo chi anilo bawk nen. Tiang lampang hi a chanchin sawi tur hria an tam lova, mahse kan veng a awmhlun te chuan Upa Hranga nen hian an inngaizawng thin anti. Kum 3 chuang an inzuiin an induh ve hle a, mahse Upa Hranga hian phaia thla 6 office thil avanga an training laiin nula dang neihsanin tuna a nupui hi a nei a, mi sawi dan chuan an chhungkua khawsak lama harsa lemlo tak te khan U Elli hi an iaiin an hmusit a, chuvang te chu ani anti bawk.

Kha khan ani ngaihzawng ngaihsaklo rilru chu a hliam a, kum tamtak a tuar a, hmangaihna a ring lova, mipa a ring thei tawh bawk lovin tun thleng hian ala nulat phah tiin an sawi thin. Ka Nu bulah chuan Upa Hranga hi chu tun thleng hian ala hmangih thu alo sawi ani awm e.

Thenkhat chuan a hnung lamah nuih thinin fiam nasa mahse, kei zawngin ka ngaisang a, tunlai phei chu a inla young tiin sawi peih viau mahse a hlimna a hmuhna tur anih chuan engpawh nise ka lawmpui zawk thin. Kei zawng, NLUP(NuLa Upa Pawl) hmuchhuaku ti a an sawisak rawn U Elli hi ka ngaisang a, a nunah zir tur tamtak ka hmu a, kan kum inthlau over lo phei se chu ka ngaizawng ngei ang…

Similar Posts:

• Enga ti zia nge ni ta aw?
• Hrilh mai rawh…
• Hre reng thin ang u!
• Nula Rim
• Three Amigos: The flop show (Part I)

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, August 29th, 2012 at 6:00 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.