Kelnote an be el el…
Ralkhat dai hnaia tla kel note hnim hring pet te’n an nu te auvin, theihpatawpa awrawl chhuahin an be ar ar a. Beidawng lek lek an be hnu chuan; ralkhat atangin an nu te’n helama hi kan awm e, khawnge in tlat bo hman khanglan zel aw ti ni awm takin an fanu-fapate an han chhawn ar ar te chuan kan khaw awm dan tur min hriattir a. Ni, vartian khaw eng tur lawma chhiarkhuan arpa a pau thin kan hai lo angin; ruahsur dawna kelnote be el el te kha, thingtlang naupang te ruah a sur dawn hnai tih min hriattir tura Khuanu duan a lo ni reng mai!
Ruahsur tur intham
Vanlaizawl a var pup a, kawlkilah chhum dum an inbuanlet tup tup thung. Ralkhat tlanga ruahkung zam paw chi chiai te chuan a rang thei ang bera mahni in pan turin min tur theuh a. A khat tawkin vanlam mi te lah chuan hmanhmawh taka kan tlan dawr dawr lai thla min lo laksak awl lova. An thlalak khulna tur kan neih loh avanga min vauna ni awm takin Pu Vana lah chuan a chawbel a hnuk ri ang dur dur bawk si.
Nu leh pa te losul feh hawn a la hun chiah bawk si lo. In kan tlan thleng ta maw tihah ruah chuan insumkarna nei hlek lovin lei chunga awm zawng zawng te chunga phuba la tur ni awm hrimin a rawn vaihma ta phuar phuar a. Naupang dawihzep leh zam hma deuh tan chuan, awm nawm lohna khawp hiala ruah bawhawk leh tuihawk tam chang te a awm thin.
Naupang thenkhat erawh ruahsur nuam ti tak an awm thung. Ruah a sur tawh chuan, ruah do chakin an awm hle hle thei ngailo. Ruah sur hnuaia tlan kual zak zak te kha nu leh pate ina an awm loh lai a nih avangin an tan hun nuam tak a ni. Thian thenkhat over deuh phei chu, an silhfen hlip sawk sawkin saruak ngal ngatin ruahsur buan buan hnuaiah, an tlan kual nawlh nawlh thin.
Tuihawk khuap ang le…
Ruah bawhawk a’n han deuh tihah, tuihawk luankawr lian lai deuh kan pan khawm sap sap a. Chirhdiak awm ang ang kutlawngin kan hai a, tuihawk kan khuap li pung a. Khawvawt reng kan ngaihtuah thei tawh ngai lo. Kan khuap li tha ta maw tihah intiam rualin kan han sah leh rih thin. Thatho taka tihtur inhrilhin kan khek chiam chiam a. Tudang reng kan ngai ngailo.
Van chung nulain tui min chawisak…
Ruahsur hi thingtlang mite tan a tangkai khawp mai. Tui dahkhawlna nei tha lem lo te’n, kan hman chawp te te kan chawi mai thin a. Ruah a’n sur takah chuan, ruahtui kha kan dawhkhawl mai a. Tui dahkhawlna kan neih bung leh bel zawng zawng a khah vek hnu chuan, ka pi hian Ummm, vawiin chu vanchung nulain tui min rawn chawisak leh ta, a hahdamthlak thin mang e a ti thin.
Furkhua ruah sur tur an intam vel a, khua a’n hnim ruih chang hian, he hla hi ka hre chhuak vawng vawng thin. (Ka hriat angin ka’n tarlang ang e, a dik vek lo mai thei… 
)
Mahse tuan tul vang hian maw kir zai I rel lo,
Kan sawmfang lamtluang zawhin liam zai I rel a;
Min awm la I chawilai nau a ngurnun iangin,
Chutin maw I hraileng te thinlai tui ang a dam ngei ang.
Lo haw thuai thuai lo haw thuai thuai,
Tlangah ruahpui a sur e;
Sakhi lameng rawn zawh la lo haw thuai thuai ang che,
I chawi lain au a tap e, ka nu ka nu lo haw thuai thuai.
Tiin ka nu (fam) losul haw nghakin kan kawmchar/leikapuiah kan unauvin kan thu thap thin.
Similar Posts:
- I hmanlai lawk ang u
- Chhandamna-II (Sunday Pual)
- Mizo ruah hming chi hrang hrang te
- Pan Lai Nun
- FURPUI MALSAWMNA
September 1st, 2012 at 1:38 am
VaiVa a first zet zet
Report this comment
September 1st, 2012 at 2:04 am
Va ngaihnawm leh dawn êm…
phawts
Report this comment
September 1st, 2012 at 2:08 am
Ngaihnawm e…
*Kan sawmfang hmun lam zawhin liam zai i rel a…
tih tur a ni zâwk mai thei…
Report this comment
September 1st, 2012 at 2:21 am
Dr. Mahminga thu ziak hi chu para i then fel theiin a thupui i dah thlap thlap thin hian chhiar a tinuam bik riau
Report this comment
September 1st, 2012 at 5:46 am
Awi! he thu ziak chuan ka naupan lai min tingai lutuk, ruahthimpui a lo haw a, thlipui na tak a lo tleh chang te khan ka nu leh pa te lo feh tawmhulna tur nei tha lo ngaihtuahin a chang chuan kan unau in kan tawngtai thin, keini tan lah nu leh pate ngaih a na em em thin a, ka nu feh haw nghaka kawmchara ka tah karh karh lai te kha aw!!
Khang zawng zawngte kha mual an liam ta si, lunglen thlak hle mai
Report this comment
September 1st, 2012 at 6:53 am
Tukchhuah nuam vek u le
Report this comment
September 1st, 2012 at 7:13 am
@ ɪ̣uɪ̣pnoɥ… Ka lawm e. Chang thenkhata a thu kha a inang hlawm lutuk a, ka hriatpawlh; bakah kan sak hunlai kha a rei ve ta deuh a…
@ chhangteval… Ka lawm e.
@ zoelife… I lo ni ve tho maw? Chenna in a that lem loh phei chuan ruahthimpui han intam leh, to (thlitleh) haw tur te kha chu a choawm lo thei teh e ti raw…
Vawiin hun hman nuam vek u. Nilengin Football inkhelhnaah khel ve si lova ka nilen a ngai dawn tlat. K’u sheldon hian ka post min lo vilsak se ka va’n ti ve.
Ani hian hmangaihna a ngah, tuktin hian hmangaihna sen vat nen hian duhsakna min hlan vek thin hi… 
Report this comment
September 1st, 2012 at 7:49 am
Naupan lai min tihrechhuak e. Ruahthimpui sur tur, thli thaw vuk vukah pai chawn chawnin kan han tlan haw a, Inchhungah te khan khawnvar chhit a ngai hial thin mawle.
Ruah do kha a van nuam thei tak e aw… Ruah a sur tawh chuan ka do lo phal ngai lo, thiante nen kan han inkhel ngei a, a nih loh paw’n tui kan khuapa nuam thei tak a ni.
Khuanu pawh hian a tawk te hian min lo enkawl a lo ni a, tunlai naupang hi chu khatiang khan ruah do sela chu an dam loh phah hialin ka ring. Keini hun lai kha chuan kan mawl ang ang khan kan tuarchhel tlat
Report this comment
September 1st, 2012 at 7:55 am
@Mahminga, ka lo vil hneh khawp ang
Nang chu pan lai nun i ngah bik e. A lunglenthlak khawp mai.
Report this comment
September 1st, 2012 at 11:17 am
A ngaihnawm hle mai, i thuziak i uluk, chhiar a nuam!
#Hmanah, Dr Mahminga hi football kan khelh tumin, keeper-ah kan hmanga goal 10 chauh a chhuah
Report this comment
September 1st, 2012 at 11:28 am
A ngaihnawm thei e…
Han ziak zel teh, kan lo chhiar zel ang e
Report this comment
September 1st, 2012 at 11:30 am
Tha thei riau.
Report this comment
September 1st, 2012 at 11:35 am
Vawìin khua lo hnìm chùk nen, khawpui lo ri nghawr der der bawk si. A lunglen thlak hle mai. Hmanlai a, nu leh pa ten an fate an han feh san tawp mai a, upa berin a naute a lo awm a, chutah ruahthimpui a han sur ta thin kha chu, in lama naupangho thlaphan dan tur zia leh, an nu leh pa te an ngaih thin dan tur zia kha. He hla hi kan sa ve fo thin.
Report this comment
September 1st, 2012 at 1:16 pm
sikul kan han kalte hi, kan kal hmain “hun kan thlak a” hun thlak pahin EVS, DRAWING, MATHEE, MIZO…kan ti zut zut thin.
Report this comment
September 1st, 2012 at 1:40 pm
Pu Vana lah chuan a chawbel a hnuk ri ang dur dur bawk si.
Chawthleng/Thlengpui an ti thin emaw ka lo ti ve luklak.
Report this comment
September 1st, 2012 at 1:44 pm
ruah zawng zawng kan do han a, tuihawk kan khuap a… kan dam loh kan hre lem hlei lo va… kan tu leh fate ve zawng ruah do hlek se an khua a sik a.. tuihawk dai hlek se an hritlanga… an khuh tak bawrh bawrh a… chawhnu a her dek dek a.. kawr ban tlawn an tia..
eng kan ti zo ta nge maw ni le…?
Report this comment
September 1st, 2012 at 2:00 pm
Ka lung a va tileng em
Report this comment
September 1st, 2012 at 2:24 pm
“Ka mumang mang chu ni sela, ka zuk au na ral ral tur a” tiin kan titawp thin.
Report this comment
September 1st, 2012 at 3:41 pm
Ka tetlai ka ngaihtuah phah tak hrep chu
Report this comment
September 1st, 2012 at 4:10 pm
Zirtawp tlai, sikul ban a ruah a sur hian kan lawm thei…… atuk chawlh ania, do kha nuam bik em alawm
Report this comment
September 1st, 2012 at 8:44 pm
@ thachianga… A ni zawk tak.
Ka ziahlai hian ka inringhlel reng a ni… 
@ dolly dollz… Zirtawp tlai hi a chu nuam ve ngawt mai ti raw…
Report this comment
September 2nd, 2012 at 8:47 am
A ngaihnawm lunglenthlak hle mai.
Ti ve lawk, min tiphur tlat..
‘Ka nu, ka pa, lo haw thuai thuai,
Tlangah ruahpui a sur e,
Sakhi lam peng rawn zawh la,
Rawn zngphar der der ang che;
Chhingi a tap e, Rolenga a tap e,
Ka mumang mang chu nise la,
Tlangah ka zuk au ta ral ral tur a.’
A dik thlip thlep tawh lo maithei, ruah a sur tawh chuan sak ngei ngei turah kan ngai hei nen hian.
‘Khua lo thalin sirvatein hlim takin zai rawn sa e,
Zai hla rem thianten lo zai la,
Khua thal min rawn thlen leh la,
Ngai ru, ngai ru…’
tren tren
Report this comment