Vawiin Teachers’ Day a lo ni reng mai. Nimin vel atanga lo ziah tan tur ania, a ni takah a chhuak hman ta lo anih pawhin a pawi lo turah i ngai mai ang aw.
Kei hi ka vannei a, zirtirtu taima leh chhuanawm tak takte hian min khalh fuh thei em em a. Tun dinhmun thleng thei tura malsawmna ka dawn chhan tam tak pawh hi Pathianin heng zirtirtute a hun taka min pek vang ka ti lo thei lo. Chung zinga a langsar zual ka han sawichhuah duhte chu a hnuaia mi te hi an ni.
1. Upa H.Pahlira :- Ani hi chhimlam chhuak, zirlai hmasa te kha chuan kan hriat loh a rinawm loh a. Ani hian a pension hnua Gospel Centenary School-a a thawh hnu leh chumi atanga a chhuah hnua a sikul dinah khan kan inhrawn nasa hle a. Zirtirtu ka nun min thlak danglamsaktu ber ka ti hial a ni.
A taimakzia leh tumruhziate, thil a tih tawh chu a tawp thleng raka a beih dan hian min hneh hle thin. A sikul kal laiin sapho bulah lehkha zirna tha neih a duh si a, Theiriat atang hian nitin Serkawnah sikul a kal thin a ni awm e, ke ngatin. Hetiang khawpa mi tumruh leh taima hi ngaihsanawm chu a va ni em!!!
Pawl 7 ka zir kum kha kan inhrawn hnuhnun ber kum a ni a, ani pawhin a chawlhsan hlen ta niin ka hria. Class captain ka ni a, zirtirtu a lokal loh avanga a office a min koh a, “Mi tlemte chunga i rinawm loh chuan mi tam tak chungah pawh i rinawm dawn lo ania” tih thu a hun tak maia min hrilh avang khan thil te ber nia ka hriat thlengah hian ka fimkhur phah hle thin.
A tunu-in a thih chhan ber a sawi te kha a ropui asin. Hna a thawk nasa lutk leh a taksa a hman rim luat avangin a taksa khan a tlin lo a ti mauh mai a, thudik anih phei chuan khatiang khawpa a tar tawh hnua ngil taka a thu auh leh, zingtin maia devotion min hmanpui ziah a, fai taka a rawn inthuam a, a rawn inkhuih thlap te kha thilmak a ni hran love.
2. Fr Mathew Arackle/ Fr. Michael :- Heng mite pahnih hi sawikawp mai hian a rem zawk mah awm e. Fr. Mathew hi Sacred Heart School ka luh theih nana kawng min hawnsaktu a ni a. Mi invawngfel tak a ni a, zirna ngai pawimawh rum rut mai mi kha a ni a. Tlangval kan han hre chho, pawl bawhkan chak lai leh zirna pawimawhzia leh hlutzia kan hriatfiah thiam loh laia min tiengtu kha a ni a. Zing assembly tin maia thu tha tak tak a sawite kha bengah a cham reng mai.
Fr.Michael erawh hi chu confidence min tuhsaktu ka ti hial thin. Pawl 10 kan han zir a, Principal leh Vice- Principal thar an rawn awm a, kei school leader ta chu school kalphung leh tihdan te min zawt chawpin bul an tan chho a. Khatiang khawpa rinna ka chunga a nghah avang khan inrintawkna tam tak ka neih phah a. Tuna school building an siam belh te, kan pahniha kan han plan tak tak chu, keipawhin a tihtheih ka ring ngai lo. Mahse, hmanni lawka ka va tlawh chuan a lo sa zo vek mai, a ropui hle, a tumruhna.
Sacred Heart Schoola ka kal laia thla tin Function eng emaw kan neih changa kan kuta engkim an han dah tawp a, programme tur ngaihtuah atanga, a remkhawm, bawhzui, leh a tawp thlenga zirlaite kuta an han dah hmiah thin te khan zirlai tam tak chu min pui nasa asin.
3. Sir Hauthuama :- SYnod Higher Secondary School a thawkte chuan Sir Hauthuama hi kan hre theuh awm e. Ani pawh hi thingtlang atanga harsa taka zir chhuaka, sapho table boy ah te pawh lo tang a, chutia zirchhuak chu a ni a. A thiltih reng reng a la thutakin a taima em em a. HOstel kan lut chiah, kartin maia Inrinni zingtin maia Mission Vengthlang SYnod ram zaupui mai kan han enkawl te saw ahmunah va kal ula, zirlai naupang tih atan chuan a ropui in tih ve ngei ka beisei.
Upa tak anih tawh hnu thleng pawhin zing dar 4 ah hostel naupang min thawhpui ziah peih te, kan zai laia solfa dik lo kan sak avanga a chawei lai kutberh phunga a rawn tlan thla te khan thil tam tak min zirtir thin.
4. Fr Saji/ Fr. Warpakma/ Fr.George/ Fr.Mathew/ Fr.Jobi – heng mite pawh hi ka college kalna hmun St. Anthony’s College enkawltu puithiamte an ni a.
Fr.Saji hi kan Hostel Stephen hall warden a ni a. Ani nen hian kan inhrawn ngun bawk a, chanchin sawi tur a ngah hle. A senior tawh avang hian college a mizo admission kan buaipui dawn hian amah hi ka kar thin a, min pe leh nge nge thin. Mizote’n hostel leh college tana kan thiltih that hi min hriatpui em em a, Hostel naupang 180 zinga Mizo 18 lek leh college naupang 2000+ zinga mizo 40 vel lekin kan thiltih avang hian Mizo te hi min duhsak em em thin. A taima em em a, SUnday tin hian thingtlangah a zinchhuak deuh ziah thin.
Fr. Warpakma hi kan principal a ni a. Principal e ti lo chuan, admission kan duh lai hi chuan a office kawngkaa NO ADMISSION tih tar kuau chung leh Peon pakhatin a veng tlat chung pawha Mizo admission form kan tlan luhpui ve tawp thin te khan thinrim hauh lovin nui sangin min lo chhawn a, admission hi min pe leh nge nge thin. Mizote hi min expose nuam a ti em em a, thil tihtur leh thisen pekngai an awm chuan Mizote min pun ve rawih thin.
Fr.JObi hi VIce principal thar a ni a. Mizote hi min han ngaisang em em khawp a, a rooma thil la tur hian chahbi hi min pe hmiah zel. Mizo ho kan thukhawm te hi kan bula a lo thu ve a, min fuih fo thin. Fr. George leh Fr. Mathew te hi kan counselling centre, Barapani ah an awm a. Seminar leh function neuh neuh nei hian Barapani ah hian ka riak ve fova, kan Sir pakhat hnenah phei chuan “Ani hi chu kan fapa ve ania” min han ti te kha tunthlenga ka ngaihtuah let hian, College ka chhuahsan dawna mittui tla chunga kan inthlah te kha rilruah a thar reng thin.
St.Anthony’s College kha, NAAC team in an rawn tlawh khan “A” grade with 92 % min pe a, chu chu East India (West Bengal leh Assam HUamin) a college grade hmusang ber kan nihna tura an beih nasatzia te kha entawntlak a va tam em.
Sawi tur a tam hle mai. ZIrtirtute hi an ropui a, ka kalna apiang maiah hian zirtirtu ropui tak tak zel hi ka hrawn a, hei hi ka vanneihna bik em em a ni. Nangni pawhin sawi tur tam tak in neih ka ring.
Thubelh- College ka kal laia Political Science HOD Bengali pa tha zet Sir RKP, Mussourie ah pawh lecture lo pe tawh, USA a university in tlawh tura an sawm ngat hian Mizo zirlaite hi min nel em em thin a, min duhsak thei hle a, kei HIstory zirlai kha Pol science national seminar te min kal tir a, a class roll call tu atan hian min hmang a. Mak ka ti deuh a, ahnuah min hrilh dan chuan Mizo DGP officer hian a lo chhan tawh a ni awm e. Zirlai hmang hian kan hnathawhte hmang hian kan Mizopuite kawng hi kan lo sat kaw thui thei hle dawn a ni.
Similar Posts:
- Colleges in Bangalore
- Huiham!
- DU admission tawp ta, cutoff a sang hmel khawp mai…
- Mizo zinga hmasa ber leh a awm chhun:
- Kolkata a college admission zawng te tan
peu...
September 6th, 2012 at 11:05 am
Chhiar a va’n hahdam ve le… Zirtirtu tha tak takte duhsak leh rinngam zirlai i ni thin tih a chiang e. Midangte entawntlak han ni zel teh…
I post chuan min tiphur tlat…
Pu P Roliana, hnaptla perpur leh naupang mawl tak ka nih lai atanga duhsak taka min zirtir a, min fuihtu te..
Pu Lalthakima (fam), middle sikul ka kal laia min duhsak em em tu, a office almirah zawng ka hawnsak theih, amah avanga thingtlang naupang si, english word-meaning ka hriat tam phah na chhan te…
Pu R Thangkhuma, high sikul ka kal laia, admission fee min tumsak a, uniform a thlawna min petu te,
Er. B. Lalhmuakluaia Pawl sawm ka zir kuma a thlawn veka hostel-a min awmtir a, engkim ka mamawh min phuhruk a; ka pass hnua, beisei miah lova scholarchip min pe leh zeltu te,
Nl. Laldinpuii Chhangte, English teacher ni siin, Veterinarian nih ka chak theih hialna tura Mrs Patch chanchin min zirtir thiam leh, zirlaite tana thahnemngai tak te,
Prof. Dr. Lalnuntluangi Hmar, ka dinhmun hria a, a thlawn a study material min pe thin tu te,
Prof Dr. S Yathiraj Ka research dawhthei taka min kaihruai a, hna tha tak min hmuhsaktu te,
Prof Dr. M Narayana Bhat, A kannadiga-pui te aia min ringtu, tun thlenga a clinic-a ka thawhpui tak te…
Ngawi teh, sawisen reng an ni lo, an va tam em! An hming ka sawilan loh tam tak te hian, ka hringnunah hian an va thawhhlawk tak em!
Teachers’ Day-a token kan zawrh lai te kha a ngaihawm mang e…
Report this comment
September 6th, 2012 at 11:40 am
Mizoram ah school ka kal tawh naah fak tur ka hre lo tlat pek kei chu. Ka thiam thei lo thin si a, a bikin Math leh Science ah ka chak lo thin hle mai. Subject dang pawh chuti teh ual chu ka ni lem lo. Hetiangah hian ka harsatna hrethiam tumah ka tawng lo tlat kan zirtirtu te zingah. Phaiah college kan han kal a, vai ho ngei hian students te motivate dan an thiam. Kan Prof R.Sridhar leh Prof Subbu te phei chuan min duhsak em em a, ka zirlai atangin exam ka pek thin avangin leave char char rawh, attendance chu kan lo dah zel ang min ti tu te kan Prof rual ho kha ka fak tawp thei lo. Ka theihgnhilh ngai hek lo. Thenkhat phei chuan min hre tawh hauh lo na in. (Hmanni ah ka thianpa vai pakhatin kan Madam kha min lo biak rawh, ka hming sawi la ka ti a, ka hre chhuak thei tawh lo, Mizo hming a in ang lutuk a a ti a.Ka hrethiam tho mai. A hunlaia min duhsaktu te an ni tho. Min hre tawh lo mah se ka tan chuan an hlu reng ang)
Tun hnu khaw laia in hmuh te hian biak hmasak loh chuan mi biak lah hi an tum lo.
Report this comment
September 6th, 2012 at 11:46 am
#47@Jacka Pi, JNM a kan zirtirtuho kha zirtirtu tha an tling takzetin ka hria.
Hotupa Buata hlaphuah kan sak tuar tuar thin laite, Hotupa Dova hova kan inkhengkhawng laite, Hotunu Thuami thahnemngai lutuk vin tuar tuar laite mitthlaah a cham reng e…
Fakna em em pawh nilovin JNM vanglai tak tak kha chuan SpringDale aimah pawh khan miin an bawh zawk niin ka hria.
Report this comment
September 6th, 2012 at 2:33 pm
Uniform hak hunlaite kha a va han ngaihawm tak emm…!!!!
Report this comment
September 6th, 2012 at 8:50 pm
Pu Hauthuama fanu hi class X ka nih lai khan chhelo ka ti thei rap. hehe.
Report this comment