mi(sual).com

(CFL-a boral thu ka hriat hian min thawng mang e. Chawpchilh takin, ka rilrua lo lang ang ang ka’n ziak ve leh ringawt mai… )

Hmangaih Cii Ell Feee…
CFL-a lar tan kha primary sikul kan kallai a ni a. Saptawng intithiam taka, I am Lalhmingmuana Sailo ka ni kan tih talh talh tan vel kha a ni. Naupang te ni mah ila, thenawm te’n CFL-a hla an play thin erawh kan ngaithlain, a hlathu ka hre ve thin. Nu leh pa te hriat hlau tak siin, kan sa ve rat rat fo.

Hetiang a nih avang hian, kan veng pitar pakhat pawh, a tunu tleirawl tir khan ‘Hmangaih CFl, min dawn pui ve rawh.. tih kha an inah a sa fo a ni awm e. A tunu’n, chuti taka a sak ngun mai chu, pitar thil hrethiam chiang thei lo bakah; a hahmai a bal then tawh avanga CFL tih lam thiam lo chuan, ‘Chhanhim, hmangaih Cii Ell Feee tia I sak fo hi engemaw a awmzia le? a ti a ni awm e. Kan vengah chuan fiamthu nuihzat hlawh ber a ni hial asin!

Lav-stawng sak an phal lo
Primary sikul kallai kan ni a. Luv-stawng sa ngam chin kha chu nula tlangval an ni. Tin an nu leh pa te hriata lengzem sa ngam ngat phei chu an vang khawp. Khatiang a nih avang khan, sikul kan chawlh ni chuan, thianza hovin ramhnuaiah kan inzui chhuak diah diah a. Ramngaw kan lut ta maw tihah, theihtawpa ringin CFL-a hla kan sa rawng rawng thin.

Ukulele nen, Bawlhmuntlanga’n
Ka thuziak dangah ka ziaklang tawh mai thei. Nipui khawlum lai, Pathian ni chawhnu a nih tawh chuan, kan khuaah tihtur dang vak a awm lem lo. Chutih hunah chuan, ka putea ukulele min tuk sak ngei mai ka’n ak chhuak hnak hnak a. Ka thiante sawmkhawmin, bawlhmuntlanga hmawng kung bawk kan pan a. Hmawng kakpuiah ngei kan thu fer fawr a. D key ngei hmetin,Ka D tawn hun tur Her chhuak thuai thuai se, ka suihlungdumtu ka tawng ve mahna.. tiin duhthawh taka D tawn ve hun tur ngaihtuah chungin kan han zai tan a.

Ama’rawhchu, tun thleng chuan D an tih erawh ka la tawng ve reng reng lova. He hla hi ka tana phuah bik ni awm tak a ni e. Ka zaipui thin te erawh chuan nupui fanau neiin chhungkua an din ve fir fer tawh.

Mikhual nula hmeltha…
Middle sikul kan han kai a. A ruktea hmeltha han hmuh te nuam kan ti ve tan. Sikula tuithak emaw thei kan pai ve; beisei deuh si, beisei ngam vak loh laia, a ruktea *-te ngeiin min han eisak hlauh nawm theihzia te kha aw. Khawvel hi a zangkhai huih ni ber hian ka hre thin…

Tin, khawtlanga chhiatni-thatni thlena, thenawm khua atanga mikhual an rawn zin changin, mikhual nula hmeltha kan hre thei viau. Chutah tak chuan alawm Kan vangkhawpui bela chhingkhual I rawn chan lai khan e tih te kha kan sak uar thin ni. Keiin CFL-a saklai ka sa a, ka thian pakhatin nula sak tur bik a sa bawk a. Awmze nei takin hla te kha kan sa thin asin!

Ngaihlai Masang
High sikul kan kai ve chinah phei chuan, ka u nen in kan luah avangin, hman remchan apiangin lengzem ka sa ve thei ta. Hetih hun lai hian alawm kan venga tleirawl pakhat, he hla nena inmil chiaha sakhming koh, ralkhat atanga * em em ka neih thin ni. A hmel duhawm tak leh no tak te, a inkhawm dawn nia a hmel nen inchawihmawi taka thawmhnaw thianghlim a inbel thin zawng zawng te mitthla chungin, Ngaihlai Masang ka ngai ber che ka’n ti vawng vawng te khan, lunglen engemaw chen a hnem thin. Tichuan, he nula hian pasal a la nei bik lovin ka hria..

Ziah sen a ni dawn lo. Pu CFL, naupang hnaptla pur leh biang chat hrip hrep, kekawrbul mawng tet ha rual kan nih atanga tlangval kan hriat thleng mai ni lo, tun thlenga i hla phuah leh aw mawi rak mai ngaihthlaka, lunglen min hnem thin hi a va hlu em! Mizo hla kungpui zinga parmawi ber pakhat i ni e. Muang te’n chawl na’ng che.

Similar Posts:

• Vai Nula Vs Mizo Nula
• Hmeltha-i Kha
• Class system Mizo zingah..
• Hmeltha hi an va hlu tak!
• Nula Rim Thu

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Monday, September 10th, 2012 at 10:00 pm and is filed under Luangliam, More than words, Obituary. You can follow any responses to this entry through the RSS 2.0 feed. You can leave a response, or trackback from your own site.