mi(sual).com

Finishing strong
Hman ni deuh khan Evergreen emaw ni khan “Finishing Tawih” chungchang a rawn ziak a, tha ka ti khawp mai a..kha mi zul deuh kha ka rilruah hian a awm a.

Greek Philosopher Aristotle-a chuan “ a bul tan that chu a chanve zawh ang a ni” a lo ti a, mahse Kristian nunah ngat hi chuan zawh that hi a pawimawh ber mai. A bul tan that hi a tha em em a, mahse zawh that loh chuan engmah lo mai a ni; zawh that phawt chuan a bul chu lo ti ningnel deuh pawh ni ila a pawi lo zawk.

Kum 1945 bawr velah khan America ramah khuan thuhriltu pathum an rawn lang thawt a, Thusawi thiam em em mai a hun laia Kristian inzawmkhawm pawl pawhin thuhril thiam bera an dah thawthang Chuck Templeton –a te, tlangval hmeltha leh pianthiam thusawi thiam bawk si a hun laia thalaiin an bawh huam huam mai..Hollywood pawhin Film star atana an veh Bron Clifford-a te leh mi nun tha Billy Graham-a te an ni.

An hun laiah na na na chuan tunge thiam ber ang tih hi mipui inrinsiak a ni a, mahse kum 1950 a lo her chhuah meuh kha chuan boruak inher dan a lo inthlak ta a; Chuck Templeton-a chuan a rawngbawlna chawlhsanin TV-ah commentator hna thawkin “Isua hi Pathian a ni lo” ti zawngte khan a comment ta zel a. Bron Clifford-a pawh chuan a rawngbawlna chawlhsanin a nupui a then a zu dawrah a in inhlum ta ringawt a. Pastor tututen emaw a that lai khan thu a hril ve thin, tiin pawisa an thawhkhawma an phum ta ringawt a. Chuck Templeton pawh chu hman deuh khan tukhawkha hriat lohin a dam chhung ni chu a vai liam ve ta bawk a.

Vawiina khawvelin a hriat tak chu Billy Graham-a chauh hi a ni ta mai…an pathum zing atang chuan. Kristian nun hi kal kal mah ila kan finishing hi a strong loh chuan awmzia a awm reng reng lo. Mi pakhat thi tep tawh thusawi ka hre reng thin…chanchin tha hrila zin kual reng mai a ni a, a thih hun a lo thleng tep tih a hriat chuan a zam hauh lo mai a, chanchin tha a lo vahvaihpuina hmun hrang hrangte chu a Mitthlaah an lo lang a, chanchin tha avanga a lo tawrh tawhna hmun te chuan a lung an len lawi si…

Tah chuan a valedictory sermon ropui tak mai chu sawiin, “ kei zawng tunah pawh hlanin ka awm mek a ni si a, ka chhuah hun athleng tawh e, intihsiakna tha chu ka bei zo tawh a, rinna chu ka vawng reng tawh a ni..” tiin tha takin a zo ta a, khawvel piaha thlarau khawvelah chuan a nun chu a va hlim dawn em ka ti thin.

Nunna kawng thuampuiah
Mizo Novel-a ka chhiar nin theih loh chu Nunna Kawng thuampuiah tih Zikpuii Pa ziah kha a ni. A va ngaihnawm em ve aw!! Keu phawk ila han chhiar ila, bak a nei zel a tawp thlengin kan chhiar zel. A tawngkam a mawi em em a, a changtunu “a sailo Ngurpui Thangsangi” lah kha a hmelthat hmel hian ka hre thin. “Chu Nawhchizuar hmelah chuan Vantirhkoh hmel ka zuk hmu a” tih tawngkam phei kha chu ril tak a ni..ka’n sawi zau nghe nghe teh ang Kristian Philosophy ril tak a inphum bawk a.

A changtunu leh changtupa kha thianghlim takin an inngaizawng a, khawkhat an ni nghe nghe. Ram a lo buai a, Sipai Captain Renade-a chuan Ngurthansangi duh lo chung chu nupuiah nei luiin phaiah a hruai ta a, nawhchizuar bukah a hralh ta a ni. A changtupa Chhuanvawra chuan a la ngai reng mai si a, amah a hmuh theih beisei pahfawmin IAS emaw IFS emaw thlang lovin IPS a zawm ta a.

Training an neih lai chuan nawhchizuar hmeltha tak awm thu thiante chuan an sawi a, Mizo hmel niawmin an sawi nghe nghe a. Tahchuan a changtupa chuan chu nawhchizuar hmu tur chuan Sardarji lemah insiamin a va pan ta ringawt a…Ngurthansangi a nih beisei ru deuh chungin. A lo ni ngei a, a la hmangaih em avang chuan lakchhuah a tum ta a. Mahse Sangtei chuan a lo duh awzawng lo, hlauhthawn a nei tlat, chu nawhchizuar In neitu chu Chief minister unaupa a ni a, an that ang tih a hlau va, “Min pawl la, min kalsan mai rawh” tiin a ngen a.

Chhuanvawra chuan a la hmangaih thu a hrilh ngial pawhin a remti thei lo, amah avanga IPS a zawm tawh thute leh venhimna tha tak a awm dawn thuin a thlem leh a, a la pawm thei lo. A vawithumna atan, “Ngurte, heta tang hian ka hruai chhuak ang che nga, Zopui khuaah Pathian hmaah ka nei ang che” a ti ta a. Chutah chiah chuan Ngurthansangi chu a tap ta a, “Ka u, kan Pathian kha a la awm maw” a ti ta a, Chhuanvawra chuan a la awm zia te, A la hmangaih ziate chu a hrilh ta a, tichuan hruaichhuah dan tur ruahmanna an siam dun ta a.

Hmangaihna, venhimna hmanga a hneh theih loh Zopui khaw naupang Pathian thu awih Ngurthansangi rilru chu Pathian hming chuan a lung tilengin a thinlung chu tui ang a nem leh ta a ni. Ringtu tha tak anga inphochhuak zingah hian bawhchhiatna leh rahbi tleu palh avang te, thlemna hneh zawh loh avangtea tlu kan tam na rawh e, Zoramah hian. Ka sawi tum ber chu lunglenna reng reng nei hauh lova kan han tlu ta thin hi chu kan hmuhah khan kan lo chiang lo a lo ni thin. Ringtu tha chu tlu mahse sakhi luite tui chaka thaw huam huam ang leh thlaler tuivalawng, khawram chhimbuk ang maia khawharin an awm a, an nun hian Lalpa a ngai vawng vawng thin a, hlimna an dawn kha an ngai thin a ni.

Misual.com
Ka ngaihtuah thin a, kumte a lo vei a, nick hrang hrang neiin kan inhnial a, kan inkawm a…hun a lo kal zel ang a, nick name hrang hrangte hi a mal tetein an kiam pheuh pheuh ang a, hlim taka kan inkawmna site hi keiniho hian kan la rauhsan vek ang a; chhuan thar lo chhuak chuan vawiina mite hi hre lek lovin inhnialnan an la rawn hmang ve dawn chu a ni si a.

Hla pakhat ka hre reng thin, “Nunna kan duh berte hi, khawvel thil ral thei anga hma taka an ral thin hi inpeih rawh” tih kha…ni e, ni-te lo kiam zelah hian vanduaina hi a lo la thleng dawn a, lei pangpar mawi hi lo chuaiin lungngaihna chhum dum hi kan chungah a lo la zam ngei dawn “mahse ka zam lo vang, ka ngaihtuah thin Lalpa chuan min ngaihtuah dawn” tiin hringnun hnehna hlado hi i chham tum teh ang u.

Pan leh vanglai hunte hi chuaiin a her liam mek a, sanna leh hausaknate hian kum tam tak min daih maithei mahse kan daih dawn si lo; lalthutthleng var hmaah hnam zetin kan la inkhawm dawn, lawm avanga mittui nen tlantu chibai kan buk hunah chuan…kan lo hahpui ve…kan lo insum chhan…miten mi a anga min dah chhan Krista khan kan mittui a hru hul tawh ang a; he kan mikhualna ram hi chhuahsanin “ka lo haw” tiin In kan neihna hmun chu kan la pan ve dawn…a va’n nuam dawn em..chu ni ropui chu.

Similar Posts:

• Kristian Châr-Tîn – Mi(sual) Sermon Part II
• Zofa te leh kan kristianna
• Lazydog’s “KRISTIAN RAM ANI SI A”
• Mizorama Kohhran(Biak In) hmasa ber ??
• Thlawhtheihna

Recent Posts:

• Pathian Kut Dinglam {Sunday Pual}
• ZO NUNMAWI HLUTNA
• NGAIHNAWM KAWLEKSAWN – 1 :
• Kawnpui dai sex video a leakout!
• Ka Zirtirtu

This entry was posted on Thursday, September 13th, 2012 at 11:50 pm and is filed under Luangliam, Opinion. You can follow any responses to this entry through the RSS 2.0 feed. You can leave a response, or trackback from your own site.