mi(sual).com

Zawlkhawpui a tawk zo ta lo
Khatia, zawlkhawpuia zirna runsang bela, ui/zawhte/bawng/vawk/ar hrik leh rulhut zawnga Aizawl daikil leh sa zawrhna fanga ka hmanhlel fo hnu khan, Pathian zarah ka zirna chu ka zo ve ta reng mai. Kum hnihna kan zirlai vela vawk farm siam chak em em khan; kum nga tal tawp ran chanchin ka’n zir meuh chuan, mahni maia farm sualchhuah chu ka zuam leh tawp si lo. Tichuan le, vanneihthlak tak maiin India ram pum inelna exam bei vein, Bangalore Veterinary College-a zir chhunzawm turin seat ka hmu hlauh mai. Ka huphurhin ka va han phur tak si em!

Buana hmaa kherh
Kan chhungkaw dinhmun ka en a. India ram khawpui zinga khawsak hautak berna khuaa lehkha ka zir tur chu ngaihtuah a buai map mai. Zawlkhawpuia cheng ta lo chu, office dawr kuala, eng eng emaw sikawlarship dil tur paw’n; a ngaihna ka hriat loh bakah, buaipui dan kawng ka bo phian. Ka chhungte hnenah, thlatin Rs. 2500 vel tal min thawn theih chuan, a theih ang angin zir zawh ka tum ang e. Seat hmuh a har si a tiin Bangalore pan tur chuan ka inbuatsaih leh ta.

Chunnu’n laikhum a bel
Kum hnih dawn lai, ka nu dam tha lo chu, Bangalore ka pan hma kar hnih velah a natna zual thutin, chaw pawh a ei thei lo. Bangalore ka pan ting tang si ang a, min boralsan daih ang a tiin ngaih a ngam lo, ka hma hun ka ngaihtuah ve bawk si. He lei rammi kan ni lo tih hre rengin, ka rinna ka tlanpel thuak thuak fo thin.

Vangpui hun nuam, khuangchawithla tir lam chuan lungleng takin Leitlangpui chhuahsanin, Aizawl ka pan a. Aizawl ka thleng a, ka nu chanchin ka hriatin kal zel tur nge, haw leh mai tur tiin ka inngaihtuah leh. Durtlang tlan pela, kum nga tal tawp ka khawsakna Selesih ka’n tlanpel vung vung lai te chuan, rilruah eng dang a leng lo. Mizoram chu hmu leh tawh ngailo tur ang hialin ka inngaihtuah a, hnuk ulh teuhin Guwahati ka insawh thleng a.

Train ticket, Waiting list no. 127
Thian za hovin, ziritrtute thlazar hnuaiah India hmar lamah zinin ni 20 chuang zet ka thang ve tawh a. Mahnia zin tur bakah, train ticket nei lo ka ni bawk si. Ka va’n huphurh tak! Tlangval a pumpa, ka zam ru em em a. In lama kalsan lah chhuanlam a tha bawk si, haw leh ngawt chu rilruah a lian.

Chhuanlam dang
Ka chhuk thlak dawn lai vel kha, Mangalore-a Kristiante an nghaisak hlimchhawn a ni. Guwahati Mizoram house ka thleng a. Mizo tawng thiam nal vaklo hian min be nghal bawrh bawrh a. Bangalore atanga lo thleng chiah niin, Kristian tan awmna chi a nilo, a ti ta mai! Thingpui in paha titipui turin min sawm a. Mahse, a nungchang leh mizia ka rin loh mi tak a nih avangin ka hnial a. Ka hriatchian leh chuan, rin chi awzawng a lo ni lo. Pathian hian min va hum thiam tak em!

Guwahati chhuahsanin
Ka kal a hun ta. Hma taka thovin, Guwahati train station ka pan a. Inthlahrung leh zam hmel takin TTE ka hmuh apiang biak tumin ka ticket ka’n hmuh a. An mitsir paw’n min thlek duh bar lo. Chutia beidawng taka ka bungrua nena ka inah bawr lai chuan, Sam 37:5 thu ka rilru-ah lo langin ka phun sep sep a. Rilru zam leh hlauthawng taka awm khan, thlamuanna ka nei ta tlat mai.

Ka rilru insiamin, ticket waiting list ni mah se, pawisa ka chawi tawh tho alawm tiin mutia ka kova. A/C compartment, a ruak lai apaingah ka bungrua hi dah tawp rawh ka ti a. Kan inzui lut hnak hnak a.

Zamna phena thlamuanna
Tichuan, compartment ruakah chuan, ka thu ta ran mai a. Khawhar takin ka thu vang vang a. Vai an vei chhen a, train a kal hma chuan, tumah ka thutnaah chuan an lo lut lo. Ri nuai nuai karah chuan khua a har vawng vawng. Train a kal dawn tihah vaipa pakhat a rawn lut hlawl a. tukverh lam a hawi vang vang a, a tawngmawh hmel hle.

Hmelhriat siam a thaa ka hriat avangin, ka hming te hrilhin ka be pawh ta tawp a. Ani pawh chu Bangalore-a hnathawk, chawlh hmang Jorhat-a haw a ni a. A bialnu’n pasal a neih avanga a rilru nat thu leh, a beidawn thu min hrilh ta mial mial mai a. Tin, ani pawh hian train confirmed ticket a lo nei bik lova. Chawpchilh taka inhmu e ti lovin, kan innel ta phian a. Kan vanneih a kaltluang zel a. Kan compartment-ah chuang ve tur te chu siliguri atang chauh lo chuang ve tur an ni hlauh.

Ka vannei a sin
Khawhar takin zinkawng ka zawh ang chu tih nak alaiin, Ashim-a nen chuan kan innelin, ei tur zawng zawng ama’n min laksak vek a. Siliguri kan thleng a. Bhutanese nula 3 leh, an hruaitu pa an rawn lut a. Tin, Nepali nupa, an fanu te nen. An va han fel tak em! Bhutan apple, lian leh thlum tha tak tak te min pe a. Nula 3 nurse zir tur te lah an fel, an ti ti siam siam a. Keini, thutna nei miah lo chu, thutna kan chan theih nan an insiam rem zel a.

Chumai a ni lo, zanah nula pahnih chu mu dunin, an seat pakhat min kian tawp bawk. Bhutan chanchin te min hrilhin, Mizoram chanchin te ka hrilh ve bawk a. Thla te lo hovin, inpawh takin kan chuang ho a. Khang nulate khan ka thlalak an la kawl ve ran awm si a. Zinkawng huphurhawm tak tura ka ngaih chu nuam ti takin ka zawh ta a nih chu. Garden City chu tluang takin ka thleng ta.

Similar Posts:

• Bangalore atangin NE mite an chhuak
• Rêl bawk chu! (mahse Sairang rêl lo deuh)
• Lengpui Airport – Ka Ngaihmawh Te
• Mizo tlangval paruk bum in an awm leh.
• Synod Choir Taiwan kal tur thlahna

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Friday, September 28th, 2012 at 4:57 pm and is filed under Luangliam, Mizo Society & Culture, More than words. You can follow any responses to this entry through the RSS 2.0 feed. You can leave a response, or trackback from your own site.