Vairamah rei tak awm e ti lo chuan Guwahati hi kan thlawhkan kan thlawhkan a, 2002 nge 2003 kha ka kal hnuhnun ber chu a ni awm e. Kan kal ve pawhin sumo, bus or train in kan kal a, Mizoram House hi kan han pan a. Kan riah loh chang chuan a tlaiah Mizoram panin kan chhuak leh nghal thin. Train a kal zui tur kan nih chuan zankhat hi hotel ah emaw Mizoram House ah emaw te kan riak a. Rel station leh Mizoram House bak hi kan kal ngai em em lo. Guwahati kan hriat reng dan chu tui chhe nu phet phut, khua lum si, vai ho phakar si, kawng chhe si tiin a ni.
Thla hmasa (September) khan damlo kalpuiin Guwahati chu ka zuk thleng thla pheu mai a. Thlawhna te in a lo kal theih tawh a, a awlsam hle. An airport pawh a lian tha a, international airport ngat a ni bawk . Kan han tum a, kan zun kha a chhuak em em a, ladies toilet lam kan pan nghal a. Guwahati Airport a kan thil chhinchhiah hmasak ber chu an commode sang lutuk kha a nih chu! Mipa toilet lam chu ka hre law, mahse hmeichhe toilet a commode kha an va han dah sang tehreng em! Bawp sei zen zun lem lo ho chu ding chungin kan zung lo chauh a ni e. Mahse a fai phian. Taxi kha Mizoram House thleng in-con pui tur kan hmu hlauh mai a, airport lah kha a awmna a lo hla zek a, House thleng kha darkar khat ai chuan kan tlan rei in ka hria.
A khua chu a lo changkang tawh hle! Kawng te pawh a tha tawh em em a, flyover hmun tamtakah an sa a, hei hian traffic jam a ti ziaawm hle. An tui pawh a fim kur tawh a, a hard em em lo bawk. Departmental stores lian tak tak Westside, Pantaloons, Big Bazar, Vishal te’n dawr an lo hawng a, ei leh in lamah lah Café Coffee Day, KFC, Pizza Hut, Domino’s, Mainland China etc te an awm a, hotel changkan hmel deuh deuh pawh a awm nual.
Chutih laiin Mizo ho in kan tlawhchhuah hneh em em Fancy Bazar, Paltan Bazar leh Panbazar te chu an la evergreen reng a, Gate No. 2 ah lah Mizo tawngin electronics thil kan lei a! Khawlai kan han tlan vel chu a chang hi chuan Aizawl te nen pawh hian inang lek leh hian ka hre thin; tlangmi leh vai inpawlhsawp nuk danah te, bazara an dawr awmdan te pawh a ni mahna. Ti vairam turin kawngsirah thingpui leh a hmeh zuar an awm nuk a, fruit juice, muri, groundnuts, fu tui leh pani puri a awm a, bus a tawt em em a, vaitawngin an rak nuk nuk a, zanah dawr an hawng rei a, kutdawh an awm bawk a.
A nuam ka tihna ber chu tumahin mak tiin min en hu hu lo a, engahmah min ngai lo a, mahni awm awm hian kan awm ve tawp a. “Khawi atangin nge in lo kal” tih ahnekin bazarah han kal ilaa “Ka pi, ka pi” an lo ti a, Mizoram House kawta auto driver te lahin Mizo tawngin “Khawnge i kal dawn” an lo ti a. India ram khawpui danga “Chinese, Nepali, ching cheng chong” tih vela inauh awm ve lo kha a thawventhlak hle. Mipui an sual lo. Sumdawng te chu an phakar tho a, hei hi chu sumdawng mizia ve hrim hrim a ni ka ti mai. Khawlaiah, damdawiiinah, bazarah, mihring sual tak ka tawng lo. An mipa te pawh an suallo khawp mai. Bus ah kan chuang a, a tawt deuh pawhin min rawn nek lui talh lo a, hmeichhe seat ah an lo thu a nih chuan kan luh veleh an tho sawk sawk a, Tho rawh tih kher ngai lovin.
Mizo an tam a, zin veivak an tam a, a hmuna hnathawk pawh an tam. Rinloh deuha hmelhriat hmuh pheu a awl. Mihring chi hrang hrang, mize chi hrang hrang pu kan tawng a, dormitory a thlen phei chu a hlimawm thei dar dar hle.
Auto fare hi a to em em thung a, ke a kal phak reng te pawh hi cheng 30 an ti tang zel. Cycle rickshaw a la tam em em a, auto ai chuan tlemin a tlawm deuh. Zan tlai deuh hleka cycle rickshaw a chuan kha a lunglenthlak ka ti tlat a nih chu. Thiam chuan bus a chuan hi a tha khawp mai, bus fare a tlawm a, a stand ah an ding rei ngailo bawk a kan thleng ve zung zung tho. English an uar lo a, Hindi thiam a pawimawh. Bazar nan Hindi, English leh Mizo kan hmang kha ka nuih hi a za thei hle.
misual.commers The_Chhamanator, CFL leh nick nei lo mi pathum te ka hmu a, an fel hle. Damdawiinah, sahuanah, bazarah te min kalpui a, ngalfimin dam rawh se.
Similar Posts:
- Tu mawh nge niang??
- Delhi airport ah Mizo pathum man
- Fimkhur turin chah
- John Schlitt arriving in Delhi, Guwahati
- New Bangalore Airport Opening… at a price
October 6th, 2012 at 8:09 am
Kan khua te chu nuam deuh asin
Report this comment
October 6th, 2012 at 2:30 pm
“Chinese, Nepali, ching cheng chong” tih hi i lo haw ve maw? inchhaih dan zawng² ah ka haw fal nalh!
Report this comment