mi(sual).com

Mizoram  Vaivawm  inelna pui ber a ngaih, President’s Cup Final chu a nungchungin ka han en  ve a. Ka en satliah mai a nilova, VIP thutnaah ngat a nia ka thut ni. VIP thutna kan ti ngawt a, VIP tak tak pawh kan awm lem lo.   Pavilion-ah kan thut avang khan in VIP thutna a nih kan ti ngawt a, chu pawh Official ho thutna pavilion ni lo zawk ah leh nghal. Tin, thutna dup leh thianghlim awm ta lo chu Vanglaini phek phahin kan thu a, duh duhnaah in sawn khual theihna kha a VIP na lai tak chu a ni ber awm e, khawhar thlak viau mahse a nuam dangdai viau mai.

Emau kawng dai reh…: Vaivawm en tura in sawm hi thil namai a ni hauh lova, mi dawhthei lo leh inla buai chi tan phei chuan en peih chi a ni lo. Tin, a game hre ve lo leh tui pui lo tan phei chuan inhremna pakhat  ang hial a ngaih theih a nih miau avang hian vaivawm enpui tur hi an vang viau reng a ni. Ka hming ang chiah hming mawi tak pu ve tho, kan nau ka sawm a. A ni hian tlawmngaih chhuah in min han enpui a, tlawmngaih chhuahin ka tih kherna chhan awh a ni hi Savun hampuar pet thin a ni miau a. A hma lam pawhin kan en dun tawh a, ka sawm hian a nuih a za thei khawp  a, mahse, tha tak chuan min en pui ve ziah chu a nih hi maw…

Mizoram Vaivawm inkhel pui ber mah nise Emau kawng dai reh ang khan a khawhar thlak lek lek mai dawn a  lawm le. A entu mipui zawng zawng hi NLUP pawh min sem dawn sela tumah kan in huphur kher lo ang. Ramhlun Sport Complex hi grass lem phah a nih ve lem loh avang hian a phut dep dup mai. Khaw that ni phei chuan boundary four vuak pawh thil awl  tak ni lem lo ang. Mizoram a kan vaivawm chimchin nen a khaikhin chuan kan in hmeh tawk viau in ka hria. Hma kan sawn zelnaah nakinah chuan stadium tha zawk te kan nei chho zel dawn niin a lang a, kan stadium a changtlun rual hian kan game pawh hi a changtlung ve zel  turah ka ngai.

The Final : Kulikawn Cricket Club leh Chanmarians ten final an khel a, Kulikawn lam hian bat hmasa in over 30 ah wicket 8 hlauhin run 129 an siam a. Chanmarians lam hi an vawm tha viau mai. Second Innings ah hian Chanmarian lam in ball hmasa berah six an  han hlap pap mai a, mahse, over hnihna ah an  opener pakhat  zawk  duck out a thil a buai zo ta vek mai. A khat mawi tawk a kut benna tur awm tawk in an out phak phak a, a tawp thleng zo lovin 20 run in Kulikawn an chak ta a ni.

Mizoram vaivawm khel hi a hmuhnawm ve viau mai a, en pawh a en thlak khawp mai. Mahse, hmasawnna tur kan ngah hle in ka hria. Batsman lam hian batting technique an ngah vak lo, bowler lam pawhin vawn dan style dang nei an tam lem lo.

Ka pi te kha: He field-ah hian Lassi a zuar thin nu pakhat hi a awm a, chutia Lassi zuar thin ta chuan Vaivawm inkhel en te a lo thiam reng mai a. Kan bulah a rawn thu ve zawk a, TV lamah pawh ka en ve thin a ti. Ka en thiam hnu hi chuan hmuhnawm ka ti te a ti ve luam a. He lai vel a lassi a zawrh pah hian a lo pel liam mai mai lo ni ngei tur a ni a, saw saw a hma lam chuan a vawm chhe thin lutuk a,  te a lo ti siam siam thei a. Vaivawm fan kan pun belh zel niin ka hria a, lawmawm ka ti khawp mai. Tar lamah a hna thawh tur tha taka a thawh pah hian a intihhlimna tur a chhar ve tlat. Pitar nikhua tak a ni.

Hmun kan chang lo:  Hman ni a ka thinrimna pakhat Mizoram chanchinbu lama Vaivawmin hmun kan chan loh zia bawk hi ka sawi leh duh a. Kan inkhel en zo hi kan u Mamuana, Y2goal dawrah kan lut kawi a, an dawr tharah Sachek kan va hawp sak a. A bu zawlah ah hian broiler ang mai hian a lo thu lurh lurh a, a hawi sang vah a. Mizoram Media ten Savun hampuar pet an vulh nasa zia leh Vaivawm in hmun kan chan loh zia ka hrilh ve hlak kha. A ni hi Mizoram football thuziak a sulsutu hmasa kha a ni ve a, inhawng deuh se la chu Mizoram a football writer ten international  min hrut pui nasat zia, khawvel a football thawnthu ngaihnawm ber min hrilh hrep hnu a, field bingbawlawl tak tak, khawthat a khu, khawchhiat a diaka an khel leh si avanga hma kan sawn theih loh dan te, titi world class, a khel local level vel inkar (gap) thui lutuk leh savun ham puar pet Mizoram in kan chhiatpui dan thleng pawh a fah ka duh viau a, mahse, kan inkawm ngaih ve vak lova ka sawi ta hrep duh lo.

A  diktak chuan kan  tawng lo haw lo sela, kan tawng na deuh teh ang. Mizoramah  football writer  ho chi translator an ang lek lek ka ti ? Hmanni a chanchinbu pakhat a an thu ziah sual thu sms in a feedback column lamah an rawn ziak a, ‘kan source in a sawi dan a ni e’ zuk ti let ngam a. Eng anga source sual pawh nise a dik lo chuan a dik lo a ni mai a. Source dik zawk hman tawh turin tan pawh ta sela a tha khawp ang. Tin, thuziah tur an nei loh chang a, table hlai pui pui a an tar te hi ninawm ka ti ve det.

Chhungkaw thu kan sawi lawk ang e: Mizoram vaivawm khel ho hi an intih changkan pal hang tih ka hlau. A dik tak chuan vaivawm hi game hautak tak mai a ni tih  chu tlang hriat a ni a.  Mahse, vaivawm khel tur hian a pawimawh ber chu a hmaraw neih that  aiin inpekna a ni lo thei lo. Mizoram a vaivawm khel tu tam ber hi Basketball khel thin te ai hian kan changkan lo deuh chauh ang em aw ka ti. Hei hi ka sawi duh, Vaivawm Game hi kan theh lar tak tak dawn a nih chuan a nawlpui in an khel thei turin kan inhawn a tul awm e. In la changkan leh in la Hi-fi deuh a kan khel chuan kan te telh telh ang. Chuvang in mipui nawlpui in kan khel thei tur kan in hawn a, mipui tam zawk hip kan tum hi thil pawimawh tak niin ka hria.

Hmmm… YMA Conference lamah kal ve ka tum ve a, a ziah pawh ka ziak mumal hman love. Min lo hrethiam mai dawn nia…

Similar Posts:

• In Kan Nei ( Vaivawm lawmtu ten)
• Game of Love
• Kawkkawitu ka ni ve ta.
• Mizoram-ah football a parvul mek e
• Mizote leh Football

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Monday, October 22nd, 2012 at 8:00 pm and is filed under Sports & Games. You can follow any responses to this entry through the RSS 2.0 feed. You can leave a response, or trackback from your own site.